- في هذا الشهر المبارك ، نسئل الله أن يعيده علينا بالخير والصحه ، وان يتقبل من الجميع صالح الاعمال ..
نعود إليكم من جديد ايها الاحبه ، زاد الشوق اليكم بغيابنا عنكم
عدنا لكم وكلنا آمل ان نعوض الغياب بـ ما يرضيكم ..
في هذا العدد سنقلع بكم إلى عالم مختلف جديد و خفيف ..







في هذه الزاوية " في رمضان " .. يسرنا ان نقدم لكم فقرة كانت من الاعضاء ..
لـ يقدموا لكم ما حصل لهم في رمضان من " مواقف محرجة ، ومضحكة " ..

تعالوا نستمتع بما حصل لهم ..



هذا سلمكم الله قبل 3 سنين وثاني يوم برمضان وفي منتصف الليل والظلام حالك وفيه صوت ذيب ( مؤثرات ) وأنا أتقلب حيث طقني الجوع ومستحي من أم بدر أطلب منها تسوي لي سحور لأنها كانت رايحة فيها من آلام الوضع ( الطلق ) لأننا كنا ذيك الليلة نتولم نبي نروح المستشفى علشان بنتي نورة قررت بأمر الله إنها تطلع من كرشة أمها بعد تسع شهور تفكير وش السواة الحين ؟!! أنا جوعان ماأكلت شي !! ووراي بكرة صيام !! وأم بدر بأي لحظة تبي تطلق صافرات الإنذار !!

المهم قررت إني أحسم الموضوع وطمرت لأقرب مطعم وجبت شاورما ريحتها تشق الخشم .. عاد والله الجوع يبي يخليها أطلق شاورما بالشرق الأوسط لوهي مكتوب عليها تحذير حكومي : الشاورما سبيب رئيسي في أمراض التسمم والتبعرص وقد يؤدي تناولها إلى الوفاة

والله وأدخل فرحان معي شاورما وما يمديني بس أتواسى بالجلسة علشان أقضم أول جغمة .... طن طن طن طن ( مؤثرات ) وإذ بأم بدر تعلن حالة الطوارئ القصوى !! يالله يالغريب المستشفى .. يمديك أو مايمديك .. أنت وحظك !!

وش السوات الحين ... المفروض أسوي نفسي قدام أم بدر إني أتوجع مع وجعها وإني حاضر بكل جوارحي معها وإني أصلا نفسي مسدودة ومالي خلق أكل وهي بهالحالة :sad: !! وبطني يصارخ ويقول .. يابو الشباب ماهوب وقت رومانسية !! والله وأتجاهل نداءات أم بدر واستغاثاتها وأقعد أمخمخ على الشاورما وأم بدر تناظرني بحقد بس هين أشوى إني سمعت صوت بطني لأن أم بدر مطلعتنا من نص الليل ولا ولدت إلا الساعة 11 الصبح :sad: طبعا الموقف ماعاد أنساه لأن زوجتي العزيزة ذلتني من ذاك اليوم بسالفة الشاورما وبمناسبة وبدون مناسبة تقول : تذكر يوم إنك تقعد تاكل شاورما وأنا حالتي حالة ؟!!


بقلم .. الغريب




و الله ما عندي مواقف بـرمضـان ابـدًا للاسـف ..

بـس ابي اقولكـم موقـف صـار لابـوي زمـاان ..

يـقول ابـوي جيـنا بـعد الـعشـااء و كان بكـرة مشكوك انـه رمـضان ..

و احـترينا طلق مدفع شئ و ما سمعنـا شئ ,, << و الله يا ابوي قديم خـايف اشوفـه بكـرة مـعلم من معالم الجنادريـة ..

و يقول و لا سمعنا شئ على ان رمـضان بكـرة ..

عـاد قـلنا خـلاص بكرة بـلع و فـلة حـجاج ..

و بـعده صووم و قـفلة مـزاااج :p ..

و يجـيك و يتـعشى و يـناظر الساعـة لـقاااه عشر و نص ..

فـقال ..

يا لــهوي ,, الساعـة عشرة و نـص و مـا نمـت !

و الله يا انـا صايرن اسـهر تسثيـر الله يهديين :p ..

و راح نــااام ..

و قـاام الـصبح لـقا كل اهل البيت مجتمعين على مائـدة الافـطار ..

و فـيها مـا لـذ و طـاب مـن الـطعـااام ..

زيـتون ,, بـئدونس ,, خـبز تـوه طالع من الـفرن ,, جـبنة مـالحـة ..

.. (( لا تـصدقون تـرى حـدهم ذولا قهـيوة و تميرات و السـلاااام عـليكم )) ..

و يجـي ابـوي و يطـلع بـرى مـعه بـراااد الشــاااهي اللي يحـبه قـلبك ,, اسود مثل سواد الليل الله يجيرك ..

و يجي لم اخويـاه ..

و يقـول ..

هـلا ابـو سـليمان ..

قـسم بــالله ان تشـرب هالفـنجال .. !

ابـو سـليمان انفـجع ..

سـلامات يا عبـد الله .. !

ابوي ..

الله لا يسـلمك ..

وش بـك .. ؟!

ابو سليمان ..

النـااس صايمـة و انت مـفطر !

ابوي ..

اجل الحمد لله اني افطرت قبل ما اعرف انـه صوووم !

***

مشكورين يا احلى مجـلة و طولتم الغيبـة ..

و السلام عليكم و رحمة الله و بركاتــــــــه ,,


بقلم .. الكناري الأزرق



قاعتي الترم اللي فات محدده,, يعني ,, أغلب محاضراتي فيها,,,


المهم,,,


ذاك اليوم,,,

كان عندنا اختبار في قاعه ثانيه وانا متعوده ع القبله في قاعتي الآنفة الذكر ,,<< الاختبارات تتسلط في رمضان,,


اللي حصل,,


من زوووود الحماس قمت ارووووكع الظهر انا ووحده من البنات قبل الاختبار عشان ربي يفتح علينا,,,,<< المشكله ان كل وحده أدبج من الثانيه,,,



وانا في الركعه الرابعه,,, قالت وحده,, التميميه,, وش تصلووووون,,!!


ماااابعد أذن ,,,



بعدين لحظه,,, القبله على كيفكم,, مو كذا,,,!!


اللي قاهرني,, انهم ما تكلموا الا بعد ما صليت ثلاث ركعااااات,,,



ووووووووووووووووووووووبس,,,


انتهى,,:p


السرااااااااااحه,, يعني بيني وبينكم,,,


لما جتني الدعوه,, تشققت,,,


قلت ,,ياااااااااااي بأطلع بالمجله وبأصير مشهوره,,, يعني وانا أمشي بالشارع


يطلبون الناس توقيعي,,,


وعشت في أحلااااام الشهره,,,:p :p


<< ماااااااااااتنعطا وجه,,, :p


بقلم .. التميميه




,,, الموقف.:

المواقف كثيره كثر شعر راسي
لكن اتذكر موقف صار لي في الجامعه
في رمضان اللي قبل رمضان هذا >>> من بدري مصاله..

وتعرفون التعب في رمضان والدراسه وشلون ..
في ذلك اليوم كنت تعبانه وسهرانه لا بعد عندي اختباراحياء
و عندي الدوام الى الساعه اربع والمحاظره الساعه 2 ولامعمل كيمياء بعد ..

رحت اصلي الظهر و مايحتاج اقولكم كيف جو المصلى بارد
وهدوء يخلي اللي يبي يصحى ينام والا يبي ينام ينام >> ساقطه بالتعبير

مما دعاني الى النعسان ثم النوم الا ارداي..

وهذه اول مره في التاريخ انام فيها بوقت الدوام

ونمت ونمت ونمت ونمت ونمت >>اخلصي علينا

ونمت ونمت ونمت الى الساعه 3ونص..

قمت من الغطه مفزوعه ورحت للمعمل
جري على الاقل اللحق التحضير ..

ودخلت والا الاستاذه تحضر ,,والبنات ومتجمعين حولها ..

وقلت: لها بكل براءه الدنيا

استاذه ممكن تحضريني ..؟

قالت :من اول انادي باسمك مارديتي ليه..؟

قلت: ماسمعتك ..>> صح انا ماسمعتها

وحضرتني ياحليلها

((الله لو تدري اني في سابع نومه..))


يوم رجعت البيت..
قلت لامي , رحمتني وخافت تقول لو نمتي وسكروا عليك.
مثل وحده صار لها كذا ومدري وشوو..بغت تصيح.. :sad:
,,,تعرفون الأمهات يقلقون بسرعه..

ووووووووووووبس >امحق خاتمه




بقلم .. الـــوردة الزرقاء



موقف طريف حصل لي في أحد ايام شهر رمضان المبارك يوم كان عمري 12 سنه وهو اني انا رجال أحب واعشق حلاو البقر (أكيد عرفتوه) منذ نعومة أظافري وحت هذه اللحظه..

فكنت أغبي حلاو البقر بسطح البيت وكل شوي أطلع واروح آكل لي وحده

وفي احد الايام نام عندي ولد عمتي ، وعرضت عليه مشروع أكل حلاو البقر ،وجازت له الفكره ، وطلعنا للسطح وكانت الساعه 7 صباحاً ، وبينما نحن نحتسي حلاو البقر وكان صوت ولد عمتي عالي جدا ،وفجأة دخل علينا ابوي ولفّعنا وسطّرنا وقفل علينا باب السطح وقال لن أفتحه الا اذا أذن المغرب
ولكن عطف الام ورحتمها قلص الوقت الى اذان الظهر

هذا كان أحد المواقف الطريفة اللي دائما اتذكرها انا وخشتي وولد عمتي معي..


بقلم .. alhawey




بقلم .. مليّعهم






السلام عليكم و رحمة الله و بركااااتوه


حياكم الله معي في فقرتي المعتداه (((طبعا من الان )))


ودي اذكر لكم قصه تذكرتها قبل كم يوم عن اخوي الصغير المهاطي


في يوم من الايام و سالف العصر و الاوان


كان هناك ام و 3 اولاد معه في السياره ولدها الكبير (( ما ينفع فصحى ابد ))

طبعا انا اكبر اخوني و خواتي و سيارتي كانت هوندا سيفيك لانها داخله في الموضوع

نرجع لسافله

الام او الوالده الله يحفظه تبيني اوديها للخياط او المشغل

و وديناها للمشغل ودخلت


قعدت انا و اخوي الاوسط و اخوي الصغير المهايطي ((طبعه مهايط ))

قاعدين في السياااره و علينا السلام

فاتحين الشبابيك على نسيم الحر اللي في الريااض

و قاعدين

نحتري الوالده


مالكم بالطويله

شوي

الا ويجيك ذاك اللكزس ES300 بقرااطيسه

و ابو الشباب مشخص به و انواع الرسم

اخوي طالع من الشباك و يطالع في السياره

قعد 5 دقايق مفهي معها

شوي



و يخش لك ذيك الخشه اللي ما قد خشها ابو جميل على الثنيان

دخل في عين راعي السياره و يقوله

(( سيااارة اخوي احسن من سياااارتك ))

انا

قلت خلنا نشوف اخر المهايط

قله ابو الشباب

(( ليه سيارة اخوك احسن من سيارتي ))

الرجال محترم و شاف ذا المهايطي قال خلني اوسع صدري معه

طبعا اخوي الاوسط تكملت عدد جالس يسمع و لا يتلكم

المهايطي رد عليه

(( سيارة اخوي تصفك الطبلوون و سيارتك ما تصفقه ))

انا التفت عليه و بغيت بس قلت حرام اخوي الصغير

مع اني ما قد عديت الـ120 كلم\ساعه و اهلي معي في السياره

الرجال رجع و سئله ثانيه

((شلون اخوك يصفك الطبلون))

المهايطي

((يعني ما تعرف

اخوي يسوي عوووووووووووون ))

الاخ ماخذ مقلب في عداد الضغط

يحسب انه هو حق السرعه

عاد كلموا سواليفهم و عاد ما قعدت ساكت انا

خشيت معهم في السواليف و سكت المهايطي

و بعدها بشوي جت الوالده

و توتا توتا


خلصت الحتوتا


تلحفوا زين المهم و انتم نايمين



بقلم .. النادر





في هذه الفقرة يسرنا ان نعرض اليكم ماقدمه لنا المبدعين في نشر ابداعهم مع دخول هذا الشهر الكريم ..

نتقدم لهم بجزيل الشكر والتقدير على المشاركة في هذه الفقرة ..



المبدع .. A L - F O T O



المبدع .. ازرقنّي





المبدع .. laser





المبدعـه .. الــ قمرـــهـلال




















لتحميل الثيم فضلاً اضغط هنا









لتحميل الثيم فضلاً اضغط هنا






رمضان آه يا رمضان. ما ن تبدأ بشائر هذا الشهر الفضيل حتى تنشرح النفس و يغمرها السكون. لا أعلم طريقةً لوصف مشاعر الدفء و الطمأنينة ، لو اعرف طريقة مناسبة لوصفها لفعلت. إنها مشاعر الخشوع و العبادة تمثل نقاء الروح في أبها صورة.

من هذا المنطلق يختلف القاضي في شهر رمضان عن بقية الشهور ، ديدني في ذلك دين كل مسلم . فالشهر له هيبته و وقاره الذي يفرض نفسه على أهله . في مكان عملي ، لرمضان بصمته التي تختلف عن كل الشهور فالإنتاجية تزداد باطراد ، فلا يوجد وقت للشاي أو للقهوة ، أو للغداء فتجد أن ساعات الدوام الـ 6 تكاد لا تكفي .

لا يوجد ما يستحق ذكره فيما يتعلق بعادة النوم في رمضان فلا يوجد اختلاف كبير إلا اللهم فيما يتعلق بوقت السحور و قلة الأكل فما أن ينتهي رمضان إلا و أنا قد فقدت شيئاً من وزني.

برنامجي عادةً هو الاستيقاظ قبيل صلاة الفجر بنصف ساعة (أو أكثر قليلاً) و من ثم تناول السحور مع أم عبدالله أو في الأغلب لوحدي و من ثم أداء صلاة الفجر مع الجماعة. و ما أجمل المشهد و أنت ترى الناس مقبلون على المسجد مع تباشير الصباح زرافاتٍ و وحدانا. ثم النوم حتى الساعة الثامنة والنصف و الاستعداد للذهاب إلى العمل. الرجوع من العمل تقريباً الساعة الرابعة (أو تزيد قليلاً) .قراءة القرآن حتى أذان المغرب إذا كنت في قوتي أو أرجيء ذلك إلى ما بعد صلاة المغرب و هي ساعة ذهبية يريد المهرجون سرقتها من عباد الله. بعد الصلاة إكمال الفطور . ثم حالة من الاسترخاء حتى اذان العشاء . بعد التراويح أصبح تحت تصرف أم عبدالله حتى العاشرة ( و قد تتجاوز ذلك قليلاً الى العاشرة و النصف) من قضاء حاجاتٍ للأهل وبعض العوالق. بعد ذلك أخلو بنفسي في مكتبتي حتى الثانية عشرة و النصف أو الواحدة بعد منتصف الليل (تقريباً)، فأبدأ اقلب أوراقي و ارتب يوم غدٍ للعمل أو أتسامر مع بعض الأحبة في المسينجر وهم قلة على كل حال.

بطبيعة الحال ... قد يختلف هذا البرنامج قليلاً حسب بعض الدواخل و الطوارئ ، كأن يتطلب العمل مني البقاء إلى ما بعد الإفطار (لكم أن تتصوروا موقف أم عبدالله مني و من العمل عندما ارجع) . أو بكون بين يدي عمل يجب انجازه فيلامس نومي الساعة الثانية بعد منتصف الليل . فيما خلا هذا فبرنامجي يكاد يكون على ما هو عليه.

رمضان في الماضي كان أكثر دفئاً فقد كان يكتنفه عبق الوالدة الحبيبة ، و ظل والدي رحمه الله وعلو همة أختي الحبيبة. أتذكر التفافنا حول مائدة الافطار مع الاهل . البساطة هي عنوانه . أذكر برنامج الشيخ الجليل الطنطاوي رحمه الله رحمةً واسعةً الذي تم استبداله بهراء فارغ الآن. اتذكر اجتماعنا للسحور و الدمع يملاْ مقلتي يا لحسن تلك الأيام. لم يكن هناك ما يمنع ان ينتبه احدنا للآخر حين يتكلم. لم يكن هناك ستون قتاة تفزيونية ، لم يكن هناك من تعقيد الحياة الحديثة أي شيء ، سقى الله تلك الأيام.

ترجع بي ذاكرتي إلى الأيام الأول من الصوم ( في العاشرة من عمري تقريباً ) ، أتذكر أحاسيس التعب و الضمأ من جراء ترك الأكل و الشرب لمدة يوم كامل إضافة إلى الإفراط في السهر . أتذكر أنني و أنا صغير أتلوى من الجوع (أظن ذلك) قبيل الإفطار بدقائق ... فتمر الدقائق العشر الأخيرة وكأنها عقود من الزمن ... أتذكر أنني لا افطر إلا على "التوت" ومن ثم التوت و بعدها التوت .. باختصار أغوص في سائل احمر قاني اسمه توت .. كنت أظن ذلك الوقت أن اكبر انجاز لبشر هو أن يترك الطعام و الشراب كل هذه المدة الطويلة. تلك بداية الانجاز العظيم (كما اعتقدت في ذلك الوقت).

هذا بعض ما يحضرني عن هذا الشهر العظيم و أسأل الله أن يتقبل الله منا و منكم صالح الأعمال. و أرجو أن تغضوا الطرف عن الزلل فقد تم كتابته على عجل ولولا أن الفيروسة توعدتني لما كتبت ما كتبت.


بقلم .. القاضي