اليوم جاية لكم وفي جعبتي ((مخي)) الكثير من النقاط جمعتها من روحاتنا وجياتنا للاسواق

واللي شفته فيها وهي نقاط تحتاج منا النقاش حقا
نبدا بسرد النقاط وراح يكون بالعامي علشان اخذ راحتي في الحكي وسوف تطفشون من كلمة ((طيب ليش)) سوف تتكرر عشر طعش مرة
الى نقاط النقاش:





1/هذا وانا ياطولين العمر امشي بالسوق لا حظت شي ولاحظته كثير وفي اماكن غير السوق
وهو ان واحد سعودي وجنبه وحدة متأبطة بيده اجنبية .. كيفها خليها تتابط ..
طيب ليش اجنبية ؟؟.. يعني ما كان بالامكان انه تكون ذا اللي بجنبه سعودية ؟؟؟؟؟؟؟؟
ليش مافيه امكان الا فيه امكان ونص بعد ... ليش تروحون وتعرسون على اجنبيات ؟؟
لااااااااااااااا تقولون لي غلاء المهور هذا كان عذر بس الحين لا والف لا
لان اغلب اللي يعرسون من برا الديرة ((مريشين )) <<الظاهر ان هالكلمة صح انا اسمعها عند العيال بمعنى غني بس مدري هي كذا صح والا لا<<
يعني عيال نعمة ... يعني ايضا ان ما هو عذرهم المهر غالي والا عالي..
طيب ..ليش يروحون يتزوجون اجنبية ؟؟ حلوة يعني ... عندنا هنا اجمل بنات العرب يهبلون قلبا وقالبا
طيب نصدق انه يبي الزين وياخذ سورية والا لبنانية...((يروح ياخذ فلبينية والا اندوسية بصراحة هاذي غريبة مرة غريبة
((واحد سعودي تزوج اندوسية وما قدر يدخلها للسعودية لان العمة معية ((يعني مو موافقة )) تدخل بفيزة خدامة فصار حياته3 شهور عندها باندونيسيا وشهر عند امه بالرياض ياقلبي قلب اميمته والله وعجزوا فيه طلقها طلقها ما وافق وجابت له الحين 3اطفال وهو ياحياتي اذا كان عنده راح واذا ماعنده قعد وانتم عاد تخيلوا ماساته بين عياله اللي بذيك الديرة وبين اميمته اللي اربع وعشرين دميعتها على خدها علشان ولدها(( الله يعينهم))
ياربي وش اللي حادكم بالله على هالغثى
ياعيااااااااال السعودية
وربي بناتنا فيهم الخير والبركة الزين كله عندنا واهم شي الاخلاق وموجودة ((بغض البصر عن بعض اللي شوهوا سمعتنا))
واذا على غلاء المهور هذا اول قبل تقريبا سنتين ولاتنسون ان هذا من حق البنت والحين خاصة صار كل شي غالي موت.. وصار الحين فيه توعية للبنات فاصبحت تعرف مصلحتها وين وكيف تصارع في هذا الزمن من اجل ان لا تكون ضمن من لقبوا بـ العوانس
حتى الاهل ما صاروا يطالبون الخاطب بالشي الكثير والبيوت مليانة بالبنات اقولك عن(( واحد ماشاء الله تبارك الله عنده 14 بنت ماشاء الله ))
تتوقعون هذا راح يطالب بالكثير وخصوصا ان ماعنده ولد يساعده على تحمل المسئولية ...
((ووحدة ثانية اعرفها وحيدة امها وابوها ودلوعة مررررة يوم جاء زواجها كان مهرها 40الف يعني زيها زي غيرها ((اهلها شارين الرجل))

في هالوقت مافيه أي عذر للسعودي انه ياخذ اجنبية بناتنا احلى واولى واعز كرامة وراح تلقى منها كل اللي يرضيك
>>ترى ما اني قاعدة اسوي دعاية ولاشي لكن شي يقرقع في قلب مواطنة سعووودية غيوووورة..

((انتهت النقطة الاولى ...وقفوا ..وخذوا بريك .. وارجعوا كملوا))







2/وانا ايضا في السووق لاحظت شي ويمكن يكون الكل لاحظه ..وهو يخص البنات اكثر بس الاكيد ان للشباب دور كبير فيه ((نستثني اللي ما عندها اخو))
والاكيد ان كل البنات عندهم محارم لهم ويخافون عليهم ..ولايرضون لهم أي شي شين او يمس سمعتهم ..صح والا لا؟؟
طيب ليش احنا قاعدين نشوف اشكال والوان من البنات ...العباءة تقول لهم يمة ارحميني
عباءة مخصررررة يالله ياللله تنفس البنية اللي جواها ... زركشات والوان وحركات وبركات ولثمات وعيون مكحلة وعدسات وحواجب مشيولة وووووو.......الخ
والله اشياء كثيرة يسونها البنات مالها داعي .. وربي لو انها تطلع وجهها كله كان ما احد ناظر فيها..
اكيد انت ياخوي تطلع للسوق وتشوف هالاشكال وش يجي في بالك عن هالبنت ؟؟بصراحة

اذا انت من النوع اللي عادي عندك ان اختك قبل ما تطلع للسوق تتزركش وتحط وتلط وتتزين وتتلثم ..فارجوك لاتكمل الموضوع لاننا ما نحتاج شباب زي كذا ابدا لا في الموضوع ولا في المنتدى ولا في مجتمعنا كله...

فيه بعض الشباب يقول هذي اختي ومتربية معي واعرفها واعرف اخلاقها ولايمكن تغلط وانا واثق فيها..وفي اخلاقها

اوكيه ..انا معك ان الثقة حلووة ونتائجها احلى اذا كانت ثقة صح ...
انا اذا احد عطاني ثقة احاول قد ما اقدر اني ما اخسر هالثقة
بس المشكلة في المجتمع اللي حول اختك ...........هل انت تثق فيه ؟؟
انا ما اقول احجروا خواتكم لا يطلعون من البيت ولا يسون ولا ولا....
بالعكس انا ضد هذا المنطق
لان الشك والريبة غالبا ما تؤثر سلبا وتخليها تسوي اشياء كثيرة غلط
((في المدرسة معنا بنت دايم اشوفها اذا جت تطلع كل شي فيها اسود وتلبس هذيك حقت اليدين والله مدري وش اسمها وتلبس شراب اسود والجزمة((وانتم بكرامة)) حتى شنطتها سودة
وكنت اقول في نفسي ماشاء الله عليها يارب لاتحرمني اني اصير زيها كل يوم على ذا الحالة
وبالصدفة كانت هذي البنت صديقة وحدة من البنات((صديقاتي)) وكنت جالسة انا وصديقتي وجت هي وجلست معنا ...آآآآه كم تمنيت اني ما قعدت معها... كلامها كله>> ..اليوم كلمت معاوية..وعمرو زعل مني علشاني..... وجعفر قالي ابي اشوفك ...ومصطفى خلا ص ما ابيه ... وفاروق جابلي امس هدية و...و....و.....>>الاسماء مستعارة 100%
بصراحة صوعقت ... سالت صديقتي.. بعدين قالت لي : ان اهلها محجرين عليها واجد ولا يخلونها تطلع حتى التلفون ما تكلم فيه الا للضرورة وانها طلعت جوال من وراهم عن طريق وحدة من البنات اللي زيها وبدت تكلم والحين تفكر انها تطلع مع واحد منهم بالليل))
((اللهم لا شماتة يارب استر علينا وعلى بنات المسلمين))

البنت دايم تعطيك على حسب ما انت تعطيها على شان كذا انا اقول لاتشكون في خواتكم وان اضطريتوا للشك لا تبينون لهم اتكم شاكين وربي راح تكون النتائج عكسية يكفي ان علاقتكم راح تخرب والسبة الشك..
انا اقول لو يحاول كل واحد فيكم انه يحتوي اخته ويعطيها الثقة بس بعد مايكون تاكد ان اخته ارتاحت له وقدر هو انه يكون اخوها وصديقها وسندها في نفس الوقت بكذا تكون هي مكتفية ذاتيا بحنان امها وابوها وصداقة وحب اخوانها وصدق واخلاص صديقاتها ..فما راح تلجا للتكشخ والزركشة لانها امتلأت عقليا وعاطفيا وراح يكون همها اكبر من كذا..
واذ كل البنات اكتفوا اكيد العيال راح يكتفون وماراح يلقون من يرمون عليها صيدهم..

انتهت الثانية خذوا بريك......................





3/يصير الشاب عكس النقطة اللي قبل....
تشوف اخته ماشاء الله عليها ((بس هو الله يهديه))
اخته جنبه وهو يدور على بنات حواء المزركشات عيونه مرة يمين ومرة يسار ومرة وراء ومرة مع الضحكة اللي مرت ومرة ومرة ومرة.........................واللي جنبه لاحول لها ولاقوة لو قالت بروح اشتري من الهندي موية قال لها <<طلع مراجله عليها<< :انت صاحية اخليك تروحين تكلمين رجال غطي عيونك بس وروحي اركبي السيارة.....ويروح هو ويكمل مهمته ((افا مايصلح يطلع من السوق وهو مارقم ولا وحدة))
طيب ليش تسوي كذا اذا انت من النوع اللي لازم ترقم لاتسوي هذا الشي قدام اللي معك
لا بعد من زين الطبايع اذا كان معه طفل يروح يعطيه وردة مع الرقم ويقول له رح وعطاها هذي البنت <<من زين القدوة والله





4/هذي النقطة بذات انا متعقدة منها ...واخر نقطة ابشركم...
اذا كان المحل زحمة كل حريم انت يارجال ليش تدخل وسط زحمة الحريم وربي تسوي زحمة ما لها سنع وبتضيع اهلك جوه المحل وتضيق على بنات حواء ((اذكر مرة كذا كان المحل وايد زحمة حريم وفيه رجال مع اهله واقف ومطير عيونه فوق كنه عمود كهرب لا وياليته يتحرك واقف مصنم .......وانا كنت راجعه على وراء علشان الحرمة اللي قدامي تمر الا و....طخ....صقعت فيه ((بس من على الجنب))....بغيت انهبل ..قمت احوس ادور كني مضيعة شي ...اخر شي ما قدرت اكمل بالسوق طلعت وقعدت احتري اهلي بالسيارة...احس ان جسمي صار كله قشعريرة ....))الله لايعيدها ..






ملاحظة
هذا الكلام ما قلته لتقليل من شان احد او الاستهتار بهم لا والف لا ..
هذا قلته لان وببساطة غيورة على وطني وشبابه واسمه وكل شي ينتمي له واحب اشوفه دائما مميز
وربي ياكثر مافرحت بانجازات سجلوها شباب هالوطن له ((غير الرياضة طبعا)) وكم يسعدني ان يواصلوا هذا الانجازات
واتمنى ان نقف صفا واحد نحمي وطننا الغالي من كل شر وان نحارب كل من حاول ان يمس هذا الوطن بسوء سواء كان سوء فكريا او سياسيا او من استهزء بتقيد هذا الوطن بتعاليم الدين الحنيف




انا اتكلم وياكم لانكم انتم اللي تحملون العبء الاكبر
لاتقولون لي البنات هم اللي يلبسون وهم اللي يسوون
البنت دائما طيوبة وتسمع الكلام المنطقي بدون أي صراخ
علشان كذا لو ان كل واحد صار قريب من اخته ويعرف افكارها ويشاركها في كل شي ويتبادلون وجهات النظر فيما بينهم اتوقع راح ينحل جزء كبير من هالمشاكل اللي نسمع فيها..........


آسفة على الاطالة بس الموضوع يستاهل وان كان الاسلوب مو مرة
بس فكرة الموضوع تستاهل النقاش


عوافي لكم والله لايحرمكم غالي

هلا وغلا فيكم يالزعيماات......

أول نقطة دااايم اتناقش فيها وفي النهاية أطلع منها لاأنا الي أقتنعت ولاالي أقنعت بس غالبا الي يتزوجووون من أجنبيات يكوون الحب عامل عمايله.......

ثاني نقطه الله يهدي بنات المسلمين ..........

ثالث نقطه اففففففففففففف ياهم يرفعوون ضغطي يسوون الغلط ويغثوون بنات النااس ولا يبووون أحد يمر من عند خواتهم.........

مشكوووره على الموضوووووع.........

مشكورة هلالية على المرور الرائع
وانا بس ابي اعرف ليش يتزوجون منهم

غريبة ما علقتي على الرجال اللي يدخل مع الزحمة وش رايك فيه
وما قد صار لك موقف زي كذا

^^^^^^^^^^^^^^^^^^^^^^^^^^^^^^^^^
اوووو ياكثر المواقف والي يدخل مع زوجته ولا اخته يمكن يكوووون خايف عليها ولا يبي يمتع ناضريه
بس من جد يسببون لنا احراااج يعني يوقفوون عند أشياء انتي تبينها وصعبه تقولين لهم وخروا ابشوفها.......

اول نقطه/
لاتعليق

الثانيه/
امس كنت بالسوق ودقت علي هلاليه من الرياض
واقولها والله اني طالعه غريبه وسطهم وانا بعبايتي اللي عالراس ومغطيع عيوني وشراريب..الخ
بس انا لاحظت شي انك اذا جيتي وطبعا المحل بيكون زحمه فإذا كنتي مغطيه عيونك ومن هالقيبل
ومعك اخوك الصغير يعني مو برجال كبير فاعرفي ان اصحاب المحل مابيعطونك وجه
حنا كنا واقفين وامي تقول هذا بكم مايرد عليها
وبمجرد مارفعت عن عيوني ابشوف التنورة زين لقيناهم كلهم عندنا
وانا اغطي عيوني ونخرج من المحل

النقطه الثالثه/
الله يصلحنا ويصلحهم ويهدينا جميعاً

النقطه الرابعه/
ماادري يمكن يدخل عشان الزحمه!!

موضوعكن رائئئئئئئئئع سلمت اناملكن

ابي اعرف انتي وحده ولا وحدات

يعني كم وحده ماسكه هالمعرف هذا


اما لموضوعك
مشكوووور

فاهم الدعوى غلط

نقاط حساسه تطرقت لها
بس تصدقين ما اتذكر وش قلت
ومشوار ارجع وافرى ثانيه

ااااااااااااه من القهر... رديت وانمسح الرد ....

ع العموم حياك أختي.. وموضوع زي موضوعك مو خسارة نكتب فيه مرة وثنتين...




لكن لك وجهة نظري باختصار..


1/ الزواج من الخارج .... ليس بسبب عدم كفئ بنات البلد .. لكن هكذا أهوائهم فليفعلوا مايريدوا....
شخصيا .. هواي بنت بلادي... اعرف عاداتها وتعرف عاداتي..

2/ السوق وماادراك مالسوق.. بلااااوي .. وامراااااااض...الله يشفي مجتمعنا منها..
أول شيء احييك على كلمتك....

إقتباس وربي لو انها تطلع وجهها كله كان ما احد ناظر فيها..

لانه والله صاري هالموقف... واني الى ذا اليوم منقهر منه ...
أول مره اشوف بنت و يجيني غثيان ..
كنت بالسوق رمضان الماضي أو اللي قبلة ... يوم الجمعة وانا لسا صاايم ... كنت مع الوالدة... كنا بداخل محل.. شوي الا ذيك البنت ... مابقول الا أنها مو حلووووة ...
شينة وقوية عين ... أول ماشفتها تخرعت... وجهها كله حب شباب.. ومع ذلك طاقة اللثمة ... و عباية تقووووول ياارب الرحمة ...


النقطة الأخيرة اذا ماني بواهم عن الزحمة....فالمحلات...
مابقول الا انها قلة ذوووق .. من البعض.. سواء رجال أو نساء... محل زحمة ... لازم هو ؟؟! مافيه غيره ؟؟1 خلاص شف غيره و لا تفتن ولا تُفتن..

تحياتي أختي...
وكلمة قالها الشيخ عبدالمحسن الأحمد في أحد محاضراته ... يقول...
لو الله شوه رجل ذيك المراة هل بتوريها الناس ... ؟؟!
لو الله شل يد المغازل .... هل بيرسل بلوتوث ؟؟!
::: والكلام بمعناه:::

ختاما.. حفظك الله وحفظنا و ابناء المسلمين وبناتهم من كل مكرووووووه ...
أدام الله غيرتك ... وكثر من أمثااااااااالك بارك الله فيك ....

مشكورة اختي عالموضوع




والله انا مو راعي اسواق لانها قلق وزحمات و وجع راس




وبالنسبة للزواج من الاجانب فما احد يقدر يمنعه

أنــــا حالات بعض الأيام ما أقعد بالبيت وبعض الأيام اهلي يقولون لي اطلع ملينا منك

بس اذا صرت مع عيال خالاتي مسنترين بالشارع وتحرش بخلق الله :p <==-= لاعاد امزح يا حبيلنا بس ماهنا اركد منا ..

!! يعنـــــــي !!

اذا رحت مع خواتـي للسوق احمد ربي واشكره اذا شفت مثل هالأشكال اللي متكشخات ,,
تقل بعرس .. والله استغرب ..


****************

والسلام ختام

***************