نـــــــ15ــــــمر

بسم الله الرحمن الرحيم

السلام عليكم ورحمه الله وبركاته

حيالله الشباب والصبايا حيالله الزعماء كلهم من صغيرهم الى كبيرهم
من ابو مشاركه وحده الى ابو 15الف مشاركه

كل الشكر لسندريلا للدعوه الجميله بس الله يهديها وهقتنا ووقتي مضغوط
شوي بس تستاهلون يا احلا اعضاء

طيب قبل لا نبدا بسرد ما جرى في يومي وش رايكم ناخذ شويه اجر
دام اننا في العشر الآواخر يالله




سبحان الله وبحمده سبحان الله العظيم

سبحان الله وبحمده سبحان الله العظيم

سبحان الله وبحمده سبحان الله العظيم

شفت كيف كسبنا اجر كلنا والي يبي يرجع وياخذ اجر زود يرجع يقرها مره ثانيه

طيب الحين نبدا بالسرد اببدا من امس قبل الفطور ......

الساعه اربعه العصر ... ما ادري وش جاني اشتهيت قمبري ( شرم)
واذا بي اروح لامي الحبيبه يا حبيلها الله يحفظها واقولها مشتهي (شرم) وحاولت تصرفني بس ما خليتها المهم واروح انا والوالد لشركه الاسماك السعوديه وناخذ
شي كيلو وارجع لامي واقولها اطبخيه ايدام يعني ابيه مثل الهنود
والله وما قصرت وسوته لي من يد ما نعدمها يا ماما



المهم بعد ما تعشينا وخلصنا طلعت لمسجد اللحيدان صليت العشاء والتراويح
ويوم خلصنا الصلاة دقيت على خويي يوسف يوسف هذا كان معي يوم حادثه الدم للركب وادق عليه هلا ....اخبارك ...وينك.... يالله جايك
وامره وقاعدين ندور شوي وبعدها مسكت معي اطلع( لبدي شوب) الي في المملكه
ورحنا ووقفت السياره بعيد عند البوابه الجنوبيه وانا مسوي ذيب وابي اروح من الفندق ومن الفندق اطلع للسوق هذا كان المخطط المهم بعد ما وقفت السياره ونزلت
يوقفني السكيورتي الي يدخل السيارات للفندق قال ما تدخل الا بسيارتك وقتها قلت دام فيها دخله للسوق اجيب السياره ورجعت للسياره واطلع للفندق ويوم وصلت بوابه الفندق نزلت من السياره وجا الفلبيني واخذ السياره يوقفها ....انزل انا
للفندق والله يوم نزلت يا شفت مناظر قسم بالله ما تقول في السعوديه بنات انواع المكياج وانواع التميلح ولا بعد والله انواع المناظر قسم بالله كسرت عيني ما اقدر احط عيني في عينها الغريب ان شياطن تحشر وتتربط في رمضان بس هذولا
شكلهم شياطين الانس اعوذ بالله ما علينا منهم الله يصلحهم
المهم جيت ابدخل السوق ويقولون عوايل لا بوكم لابو آبوكم عوايل ما بقى شبر الا
قلتو عوايل وارجع للسياره منه الله ولا منه خلقه المهم ما قعدت الا بالفندق الا 5 دقايق وين وصلنا ايه رجعت للسياره ويجيني الفلبيني يقول( توني بايب ريالس
منيمم شارج ) الترجمه ....خمسه وعشرين مقابل الموقف

واعطيه 30 ريال ما معي صرف ويقول تبي الخمسه قلت ايه جبها يا ابن الذين


المهم طلعنا شوي ورحنا لداكن دونت تقهوينا الين 12 ونص الليل وطلعنا
لمسجد القطامي وصلينا التراويح يا زين قرايته المهم صليت ورجعت للبيت

وتسحرت ورحت للمسجد مع ابي الله يطول في عمره قولو آمييييين


وارجع من الصلاه وهي النومه ما دريت الا الساعه 12 الظهر جاي ابوي
يقول قم صلاه الجمعه واطلع للمسجد مع اخوي الكبير وحنا في الطريق
يقول ترى ابقرا قران بعد الصلاه الله يجزاه خير
وقرانا ما تيسر منه ورجعنا للبيت قعدت اقلب التلفزيون وزهق ما فيه شيء

شوي واطلع لغرفتي واشوف الجوال الا فيه رساله تقول عن اكتتاب
نروح للرساله



لقد بدا الاكتتاب في اسهم (ليله القدر).. ويستمر الاكتتاب حتى ليله الاتسع والعشرين من رمضان..الحد الادنى للاكتتاب 3 ركعات..ولا يوجد حد اعلى
شروط الاكتتاب
1 الاخلاص ــ2ــالالحاح في الدعاءــ3ــالاكتتاب للمسلمين فقطــ4ــالاكتتاب مفتوح لجميع الجنسيات والاعمار..
ارباح تصل الى الف ضعف الارباح للشركات الاخرى. توزح ارباح الاسهم يوم لا ينفع مال ولا بنون .
للمزيد ..الرجاء قراءه سورة القدر الله يجزى ابو شالح خير مرسل الرساله قولو آمين




شوي وانادي اخوي الصغير نايف اقوله تعال شغل السوني
والعب معه وجبت الهدف الاول وامبسط الا وينعاد وتاتش معي ونلعب مره ثانيه
وجبت هدف عليه وبعدهل قبلها 2 \1 وانعاد مره ثانيه وامبسط
ولعبنا من جديد واخنا جميع الاحتياطات علشان ما ينعاد واجيب القول الاول
وبعدها يقلب النتيجه 3\1 كلب اخوي المهم انا ما ياست واجيب قول وصاره 3\2 له
وشوي تجيني انفراده لادريانوا وتضيع ومن القهر حطيت ستارت ورحت اضرب اخوي ورجعنا وكملنا وبعدها بدقيقتين اجيب التعادل وقم ارقص مثل رقص اهل الجنوب ونلعب اشواط اضافيه لكن الكلب اخوي يلعب ويفوز علي 4\3
وقمت لا شعوريا اطقه و اطبق عليه حركه برت هارت الين ما طق ظهره



....
اتاني خبر من الوالده يقول ان السواق اسرقت محفظته بما فيها وهي تحتوي على اقامه ورخصه مبلغ مالي قدره ثمان مائه وثلاث ريالات
فمن وجدها عليه الابلاغ
.....



الفطور
اجتمعنا انا وجميع الاخوان والاهل وكان على المائده من الاكل ما لذ وطاب من القيمات والسمبوسه والشوربه (كويكر و مشروم) وجبنيه وش بعد خرابيط واجد
مدري وش يسمونا بس الظاهر انها توكل اما المشروبات فعصير برتقال والفمتو
والقهوه...


يا شباب اعذروني على سرعه الكتابه ومشو لي الاخطاء الاملائيه والتعبيريه
تراني كتبت على عجل وخويي قاعد يضرب بوري يقول اطلع ناوين نطلع للخرج
في استراحه هنالك
تفضل يا شباب

سبحانك اللهم وبحمدك اشهد ان لا اله الا انت استغفرك واتوب اليك

بغيت انسى

تشـــــــــــــــــــــــــــــــــــــــــــــــــــــــــاو




ــــــــــــــــــــــــــــــــــــــــــ

الله يعطيك العافية نمــ15ـر والله يجزاك خير والله استفدنا من الأذكار اللي كتبتها الله يجعلها في ميزان حسناتك والله يعوض على سواقكم والله يحفظ لك والدينك

وتستمر يوميات الأعضاء بتفاعلنا معهم وغداً موعدنا مع العضــو الفعّال الكناري الأزرق ..

يومياات
وبانتظاار يوميات الكناري على احر من الجمررر احسها بتصيير فلللله

ياهلا فيكـ خيو نمر
يوه يومكـ احس على عجل
وش هالي مشتهيه تراني مافهمت ...بس اوصيك تتامر واشتهي الحين قبل تعرس وتتوهق مافيه احد يزين لكـ
بتقول لكـ بنت الناس يعني
تبيني انا اسووي هذا الي مدري وش اسمه وهالكلام لين تكره عمرك وتقول مابي شي فكيني

هاردلكـ كح كح يالخسران منتب منا اجل احنا هلالين دوم فايزين >>انطمي بس

يعطيك العافيه اذنا مو وقتكـ الثمين

إقتباس وتستمر يوميات الأعضاء بتفاعلنا معهم وغداً موعدنا مع العضــو الفعّال الكناري الأزرق ..

بانتظاركـ
بس تاكد ان الدي اس ال واشتراكك ماخلص اليوم
ثانيا انتبه تكتب لنا وقت الصلاه والا قبلها بدقيقه
ثالثا واخيرااا نحن بانتظارك




سندريلا تعبت وانا اقول بعطيتس العافيه
بدعي لكـ هالمره
الله يرزقك الجنــة قولي امين يالدبه
>>>>ماتكمل معروفها ابدن

يعطيك العافيه اذنا مو وقتكـ الثمين= اعطيتنا

>>>قلب ينبض بسرعه خوفا من الكناري وعزوز والذئب

من كثر خوفي منكم مارضى يسوي تعديل

إقتباس الرسالة الأصلية كتبت بواسطة المنتدى الاستشاري وشوي تجيني انفراده لادريانوا وتضيع ومن القهر حطيت ستارت ورحت اضرب اخوي

ههههههههه الله يفشلك منفرد بأدريانو وتضيع ههههههههه

يعطيك العافية اخوي

إقتباس الرسالة الأصلية كتبت بواسطة المنتدى الاستشاري وتستمر يوميات الأعضاء بتفاعلنا معهم وغداً موعدنا مع العضــو الفعّال الكناري الأزرق ..

لامو مصدقه الكنــاري مــــره وحـــده لالالا مستحيـــــل ....

يالـــلــه متى يجي غدا علشان نشوف يومياتك يادب .....


ولن يكتمــــل اليـــــوم الا بحضور مدرسين الامـــلاء .... (يعرفون انفسهـــم )


كل الشكــــــــر سندريلا

تحيــــــاتـــي

مشكور

هلا والله وغلا ...

صار يركك أخوك ثلاث مراااااااات متتاليات ؟؟!

بلاه مو منك الا من فريقك الخايس..

ياخي وش فيه الاي سي ... مو حبيبي كاكا ..أسلم الله يثبته ...
والله أني حبيته وفرحت لما سمعت للخبر..

ع العموم .. سواقكم ذا ماقرأ موضوعي القدييييييييييييم جدا ... والمغبر...
كيف أنسرقت محفظتي ؟؟!<<<<أنسرقت والا ضاعت ؟؟1
هيا هاردلك لسواقكم ...وخيرها فغيرها....

ع العموم ..يومك راااااااااااااااائع ...

وبارك الله في مباحثنا "سندريلا" وطول الله عمرها..


بانتظار ... الطمخة المطخوم .. الكناري ذا الصوت الأجش....
>>>>>> يااااااااارب يخطيء بالإملاء<<<<<<<<

برايفت للهنووووف..

إقتباس >>>قلب ينبض بسرعه خوفا من الكناري وعزوز والذئب

لا لا .. لاتخافين ... أما تعديل لك ماني بمعدل...
أنا تخصص فالذئب الأزرق .. وفي الكناري.. <<<<< ياحبي لهم...مايزعلون..زيك وزي جميع الأعضاء ماأحد يزعل ..


تحياتي

إقتباس كسرت عيني ما اقدر احط عيني في عينها الغريب ان شياطن تحشر وتتربط في رمضان بس هذولا شكلهم شياطين الانس اعوذ بالله ما علينا منهم الله يصلحهم

في حريم ما يستحون؛ تقعد تصور فيك ساعه وانت صاد عنها؛ الا تبي تشبكك بالغصب

والله يوميات جميله وخفيفه بالنكهه الشرقيه

حي الله اخوي نمــ 15 ـــر..

إقتباس وش رايكم ناخذ شويه اجر دام اننا في العشر الآواخر يالله

جزاك الله خير اخوووي ..

إقتباس جيت ابدخل السوق ويقولون عوايل لا بوكم لابو آبوكم عوايل ما بقى شبر الا قلتو عوايل وارجع للسياره

هههههههههههههههههه بس السوق عوايل والباقي لكم

إقتباس لمسجد القطامي وصلينا التراويح يا زين قرايته

تقبل الله منا ومنك .. ودي اصلي معه
يوميات رائعه خيوو نمر .. والف شكر لك وللسندريلا ..
بانتظار يوميات المتألق .. الكناري الازرق ..

هلا أخوي نمر حيااك...
مشكووور حبيبي على الأذكار و الله يتقبل من الجميع...

بعدين حراام عليك أخوك الصغير ماله ذنب هذي كلها من بركااات أدريااانو اللي معودنا على الخدااااشة...

يعطيك ألف عاافية نمر و مشكووور على يوميااااتك الحلوة....



هنوووووووووووووف:

شرم=shrimp=ربياااان .




سندريلااااااا ربي يوفقك و يخليك لنااااا....



الكنااااااري لااا تتأخررررر...

,,,
,,
,






اخوي الغالي / نمــ 15 ـــر..




يوميات حلوووه والله ,, ومن ناحية السـوني .. بيني وبينكـ ..
اكتشفت ان مصدر قوة الصغار انه يسنتر 24 عند السوني ..
ومافيه امل يتعداه والظاهر انا لو بقعد 72 ساعه مافيه امل افووز عليه :p
بس مالكـ حق منفرد بـ ادريانو .. وتضيعها .. غمض وهي حبه مربع


الله يسعدكـ يارب ,, ويوفقكـ ,, يومكـ رايق والله ..
وفي انتظار الكناري الازرق ;)






****




كن بخير
...SoMe OnE...