هلاليه سنعه

.. السلام عليكم ورحمة الله وبركاته ..

هلا والله بأعضائنا .. وش اخباركم يوم راح ثلث رمضان ايييه ياسفـــابه ايامه طارت بلمح البصر ..
بدت المقــاضي تنتصف << تتذكر موضوعها .. والتوت على وشك .. الحين شوارب التوت صارت معتقه
وبدت طلعات السوق للعيد .. وعاد طلع اليوم حظي اليوم 12 ولا يــوم اربعـــاء يوم الطلعات والوناسه
اليوم المحبب للقلوووب << يكفي طلّعت قصيده



اببدأ من الساعه 12 .. بداية يوم الإربعاء .. ودقّت الساعه 12 بعد منتصف الليل << بق بن على غفله
وأرسلت سندريلا تبلغني بالمــوعد .. سندريلا هلالنا يابعدي والله .. يمال العافيه على الشغل العدل ... وبدينا المشواااار .. كنت جايه من سوق صحارى على الساعه 11.30 ياهوو عالم هذا وهو تووونا تخبروون مقاضي عيد .. والعالم تخترش وبزارين واالإخباريه تدهّر بسؤال اليوم.. عاد يووم جيت وجت اختي طيرة شلووى عاد هذي مهبوولة سامي وقالت ان سامي بيجي بالعربيه باخبار الرياضه بيجيبون تقرير عنه واسنتر عند العربيه واخر شئ اشووف لقطه بسيطه وهو يقول انه بيستخير بها الشهر الفضيل بيشوف هل بيعتزل ولا لا بعد رمضان الله يستر بس ..
همين حطيت على حروف وألوف برنامجي المفضل احب المسابقات بعدين ياطويلين العمر قعدت على النت شوي..



همين تسحرت مع اهلي الساعه 3.30 حسب التوقيت المحلي بمدينة الرياض وكان سحورنا رز ودجاج وسلطه ومرق خضار وعصير ولبن وفاكهه .. عا تصدقون ماعاد يشتهى السحور.. ببداية رمضان كان له طعم اخر ..
اخواني واخواتي كانو نايمين ولا قنبله تصحيّهم .. بس انا صاحيه واختي والوالد والوالده وجدي وجدتي الله يحفظهم تسحرنا بعدين ياطويلين العمر غسلت المواعين انا وخيتو لأن شغالتنا الاصليه خرج ولم يعد
لعبت علينا مارجعت من ديرتها والشغاله المؤقته من تشاد حسبي الله ونعم الوكيل راحت زياره لاهلها بالرياض وشكلها مواريها هجت شكلها تروّعت من مواعين رمضان عاد مواعين رمضان حدّث ولاحرج
بعذري اسب التشاديين ماسبيتهم كذا للطاقه ايه شكلها مندسه اخاف البلوي عطاها عرض تشتغل عند حرمته
<<< اعقلي ترانا برمضان
المهم صليت الفجر وقريت قرآن .. بعدين قريت جرايد امس << يمديكم على الهوايه ..منيب احب الاخبار طازه احبها فايته بعدين نمت الساعه 8



..همين قمت صليت الظهر ورجعت نمت بعدين قمت الساعه 2.30 ظهرا
وعيوني كلها نووم .. تخبرون اليوم ابحط يوميتي واببيّض الوجه نزلت لأمي وأمي تروّعت بادرتها وسلمت عليها ومسيّتها بالخير .. قالت امي : يابنيتي عساتس منتيب مصخّنه قلت لا الحمدلله طيبه.. قالت : اشوا بس غريبه صاحيه مبتسره ... قلت ابد يمه اليوم ابحط يومي بالزعيم ..
وفشيله اني اقولهم قمت 4 << فضّحت .. امي قعدت تدعي لكم من قدكم دعوه وفي نهار رمضان
تستاهلوون والله ... وبدينا المعركه اليوميه ..



جتكم السنعــه وفسرّت ذرعانها << الله واكبر ياللي مسويه ذبيحه وبديت اتفاهم مع السمبوسه يوم قضيت منها صلّحت صينية فتوتشيني وأذن العصر .. صليت همين انضمت لنا ماي سستر ورى المواعين تروّع تقل جبل
<< قلبها مع المواعين .. استغفر الله الناس يقرون هالعصر ويتعبدون وانحن مغير دعا وشحا على هالشغاله
<< على الطاري عندكم سلف شغاله المووهم تعاونا وكملنا باقي الفطور والعشاء وحنا نستمع لإذاعة القرآن
فيه برنامج فتاوى وبرامج مفيده والله حلو الاستماع والاستفاده من الوقت ..
وصلّحت العصير تانج البرتقال << حبيب القلب <<اخبر حبيب القلب مازولا عاد انا من عشاق التانج انا وخيتو ريما الصغيرونه والبقيه فيمتوو طعم اللقاء ..
وصلّحت فيمتو >> من اعدائي ..


عاد الفيمتو انصاره وش كثرهم

دقّت ساعة الحسم باقي تن منتس ويذن وحالة استنفار بالمطبخ وارسلنا فطور للمسجد وجلسنا على مائدة الافطار عاد امي ماتفطر الا اذا سمعت ابن ماجد مذن جامع الديره ..
فطورنا--> كان .. تمر سكري .. تمر مكنوز .. تين .. زبادي .. لقيمات ..وجبنيه مرسلتها ام جيراننا وابل باي (فطيرة تفاح ).. وتانج .. وتوت .. وقمر دين .. وماء ..
افطرنا وهمين صلينا المغرب وعلطوول سيدا على المطبخ وتشتغل صفارات الانذار << متأثره بالحرووب
بعدين ولّمنا العشاء وحطينا فيه مالذ وطاب ..
عشانا -->على هرم المائده شوربة كويكر اللي يحبها صدى الامس << بتقهره وشوربة ماجي شعيريه ..

وسمبوسه ..

وفتوتشيني ..

وكبه ..

اكواب الدجاج ..

وبيتزا ..

وترى الصور ملطووشه بس مقاربه للحقيقه
وشاهي ..
اللهم لك الحمد والشكر على هذي النعمه اللهم احفظها من الزوال بعدين قعدنا انا واخواني نفرفر بها القنوات ..


بعد ذلك تجهزنا نبي نرووح للمسجد انا وامي واختي ابد سمينا ودخلنا المسجد وكان يعم بالهدوء
وبسم الله صفينا مع الإمام وبدينا نسمع اصوات وبدا الصووت يعلى وينتشرون هالعيالين .. مضبّطين الخطه
اللي هجووم .. واللي يزوّد بالمؤؤنه بدو ينبطون ويرمّون على الحريم علب مويه مليانه ابد تقل صياد سمك
وعاد تجيني ذيك الكفخه المحترمه على راسي ويقعد يدوور راسي وارتفع ضغطي .. واخواتي يضحكن علي
قلت طيب خليني اسلّم بس ويوم قضيت واجي انا وكم حرمه مصابه وهشناهم وهجووو وصكينا باب المسجد
المهم وكملنا الصلاة وراسي ينبض فيه صعروور << الصعروور هو الشئ الذي ينتفخ من الجلد ويتورم عندما يضرب بضربه قويه او فلقه او نحو ذلك << لغير الناطقين باللهجه النجديه ..




وابد رجعت البيت وجلست مع اهلي شووي وسوينا تحليل قبل المباراة عن الخطه واللاعبين .. عاد الوالد الله يحفظه شبابي ودايم ومناوشات فيما بيننا وباقي اخواتي هلالييات عاد انا غرست حب الهلال فيهم وابوي يقوول ماااش الشباب والهلال هالسنه الله يستر بس مدربينهم مهوب ذاك الزوود .. قلت يبه الهلال لاتخاف عليه كذا بداية الموسم يتعثر همين ان شاء الله بيتحسّن ..



وآسفـــــــــــه جداً جداً على الإطاله .. المفروض مايمسكووني كيبوورد ويارب انكم استانستو بيومياتي
المفرحه والمؤلمه في نفس الوووقت .. والله يبلغنا واياكم هالشهر الفضيل ويتقبل منا ومنكم صالح الاعمال
وابد حطيت نقطه .<<< ياكثر ماتنقطين
وارسلتها لخيتو العزيزه سندريلا الله يلبسها الصحه والعافيه ويووفقها ويجزاها عنا خير
ارسلتها قبل المبارة تعرفوون الواحد مايدري هل يفووز ولا ينهزم والنفسييه في الحالتيين لاتسمح بالتعبير ...
دمتــــــــــم بخيـــر يازعمــــــاء ويــومكم أزرقـــ بإذن اللــــــه ..

ــــــــــــــــــــــــــــــــــــــــــــــــــــ

الحمد لله على سلامتك هلالية سنعةبعدين قايلتلك من قبل اكسبيهم وزعي عليهم حلاو خل يفكون شرهم عنك

بصراحة يوميااات جداً رائعة الله يسعدك يارب وان شاء الله تتواصل يوميات اعضائنا وفي انتظار يوميات

الســــــــامي كسمــو الهـــلال

الله يوفقك بس مو بدري على اغراض العيد

( لي رجعـــه بإذن الله ) ..


بعد الرجــــــــــوع ..

هـــلا بأختي هــلاليــه سنعـــه ..

إقتباس حطيت على حروف وألوف برنامجي المفضل

برنــامج مليء بالمعلومــات العــامه ..

و(ببعض) المتصلين اللي يموتون من الضحك ...

إقتباس سحورنا رز ودجاج وسلطه ومرق خضار وعصير ولبن وفاكهه

هــذا صــار غدا مـا صار سحــور <<< مـــا شـــاء الله

والله اليوم إكتـشفت إن ريجيم البنات في رمضـــان راح فيها

إقتباس اخواني واخواتي كانو نايمين ولا قنبله تصحيّهم

مثلي تماماً ما شــاء الله عليهم ..

إقتباس شكلها تروّعت من مواعين رمضان عاد مواعين رمضان حدّث ولاحرج

الصراحه ( راحه )

إقتباس امي قعدت تدعي لكم من قدكم دعوه وفي نهار رمضان

أحلى شــي سمعته لحد الأن ..

الله يخليها لكم .. ويطول في عمرها إن شــاء الله ..

إقتباس وبديت اتفاهم مع السمبوسه

انا حاولت أتفــاهم معــاها بس الأخت يبغى لها مترجم ..

إقتباس على الطاري عندكم سلف شغاله

خلاص .. إذا كان في عنـد أحد شغاله يقول لنــا أحنا الإثنين ..

فيه برنامج فتاوى وبرامج مفيده والله حلو الاستماع والاستفاده من الوقت ..

إقتباس والبقيه فيمتوو طعم اللقاء ..

إعــلانــات صدى الأمس أثرت حتى فيكم .. !

إقتباس عاد الفيمتو انصاره وش كثرهم

والسبب صدى الأمس ..

إقتباس دقّت ساعة الحسم باقي تن منتس

يـا شباب .. المترجم الله لا يهينكم ..

إقتباس اللهم لك الحمد والشكر على هذي النعمه

..

أحلى شيء في الدنيــا إن الإنســان يشكر ربه على النعمه .. وعلى أي شيء ( عموماً )

إقتباس وعاد تجيني ذيك الكفخه المحترمه على راسي

هههههههههههههههههههههههههههههههههههههههههههه

أضحكـ الله سنكـ ..

إقتباس قلت يبه الهلال لاتخاف عليه كذا بداية الموسم يتعثر همين ان شاء الله بيتحسّن ..

بإذن الله ..

إقتباس ويارب انكم استانستو بيومياتي

وهذا الذي حصــل ..

إقتباس والله يبلغنا واياكم هالشهر الفضيل ويتقبل منا ومنكم صالح الاعمال

اللهم آمين ..

هلاليه سنعه ..

رووووووووووووووووعه

دخلتينا في جوكم ماشاء الله رووووووووووووعه

::

اول مره اشوف هالموضوع لأني نادر ادخل هالقسم

لكن من حسن الحظ اني قرأت يومياتك من طقطق لسلام عليكم.


ويالبى رمضااااااااااااااااااااااان وبس <<< وش تبي ذي ..


على طاري الشغاله .. شوفي احنا العام كان الشغالات متكدسات عندنا ((الله ياطويلة العمر))

شغالتين وقالت شغالات المهم شغالة اخوي وشغالتنا ..

وهالسنه راااااااااااحوا للأسف ..

ومع كذا والله ماحسينا بالفرق

الله يخلي البلاستيكـ وطقته ..

والحمدلله السنه هذي قروبنا متعاون الله يديم هالمحبه ولا يحوجنا لشغالة ابد


اللي بقوله الله يوفقنا ةياكم على طاعته واكثري من الأستغفار وقت تغسيل الصحون والله تحسين امورك ميسره


((هالأمر مجرب ياعسسسسسسسسسسل))

::


على طاااااااااااااااااااري:

إقتباس الرسالة الأصلية كتبت بواسطة المنتدى الاستشاري [وصلّحت العصير تانج البرتقال << حبيب القلب <<اخبر حبيب القلب مازولا عاد انا من عشاق التانج انا وخيتو ريما الصغيرونه [/COLOR]

اقول يالبى تانج وعشاق تانج وخاصه البرتقاااااااااال وهـ بس وهـ

الله لا يحوجنا لسن كويك

ولا للقاء حلاوته:p


::

وبعدين ورى فطوركم كله مشروبات

وين سيدة الموائد اللي هي الشوووووووووووووربه <<< ماودك تضفين عفشك من الموضوع وبس


::

وتسلمون على هيكـ مواضيع

":

ههههههههههههههه
موضوع حلووو

إقتباس إقتباس بعذري اسب التشاديين ماسبيتهم كذا للطاقه ايه شكلها مندسه اخاف البلوي عطاها عرض تشتغل عند حرمته

لاحول ولاقوة الا بالله

اقول اختي اذا بغيتي تحطين يوميات لاتحطين فيها صور اكل ترانا صايمين وفيه فارق التوقيت


الا الحمد لله ع السلامه ترا يمدحون الفقس للصعارير يقولون وحده بوحده >> بدا الطب الشعبي

يوميات حلوه
وبانتظار يوميات المبدع السامي

مشكووووووووووور..!!..
وشهيتينا والله

هلالية ربي يعطيك ألف عافية على يوميااتك الراااائعة..
والله يتقبل منك صااالح الأعمااال في هالشهر الكريم..

و بالنسبة للخدامة ليش ما تجيبون البلوي نفسه،،، بس بشرط يكون لابس عبايته.

والحمد لله على سلااامتك من الصعرووور و آخر الشرر عنك ياا رب.....


الشكر موصول لك سندريلاااا....


السامي نحن في انتظاااااارك..

انا ضايق صدري من امس من شفت ان يومياتك بعدي
قلت هالمره شكلها سنعه وبتفشلني عاد انا حاطيني مع ايام الاسبوع يعني مافي امل اطبخ تخبرين دراسه

الحين ماتدرسين انتي او غايبه

إقتباس هلا والله بأعضائنا .. وش اخباركم يوم راح ثلث رمضان ايييه ياسفـــابه ايامه طارت بلمح البصر .. بدت المقــاضي تنتصف << تتذكر موضوعها .. والتوت على وشك .. الحين شوارب التوت صارت معتقه وبدت طلعات السوق للعيد .. وعاد طلع اليوم حظي اليوم 12 ولا يــوم اربعـــاء يوم الطلعات والوناسه اليوم المحبب للقلوووب << يكفي طلّعت قصيده

ايه والله راحوو ومادرينا فيهم الله ييعده علينا وعليكمـ

إقتباس كنت جايه من سوق صحارى على الساعه 11.30 ياهوو عالم هذا وهو تووونا تخبروون مقاضي عيد .. والعالم تخترش وبزارين واالإخباريه تدهّر بسؤال اليوم.. عاد يووم جيت

الا اقولك مالقيت ملابس للعيد ادور ولالقيت شي ماحب الزحمه
ويومني لقيت جت وحده وخذته بغيت اذبحهاا
والا القى ويخلص مقاسي كالعاده مايبقى الا مقاسااات كبار تكفيني انا وانتي مع بعض

إقتباس وجت اختي طيرة شلووى عاد هذي مهبوولة سامي وقالت ان سامي بيجي بالعربيه باخبار الرياضه بيجيبون تقرير عنه واسنتر عند العربيه واخر شئ اشووف لقطه بسيطه وهو يقول انه بيستخير بها الشهر الفضيل بيشوف هل بيعتزل ولا لا بعد رمضان الله يستر بس ..

اختس ذي تصلح لي
من عرفت مسنتره بس ماجابو الا لقطه صغيره شفتهم لما نزل مع الباص وقالو سامي سامي بغيت اصيح
ايه شفتي سامي بيعتزل يقوول خانقتني العبرة وش ذا مير مابعد لعب معنا

إقتباس وخيتو لأن شغالتنا الاصليه خرج ولم يعد

يتسلطن برمضان عاااااااد
لاشغالتنا مانحاشت توها من قدها اصلا تشتغل ببيتنا :p

إقتباس ..همين قمت صليت الظهر ورجعت نمت بعدين قمت الساعه 2.30 ظهرا

ايه صدقتي الزعيم كسب في اهالينا خير صرنا نصحى بدري اذا عندنا مواضيع



وه بس وه ياحبي له

إقتباس وترى الصور ملطووشه بس مقاربه للحقيقه وشاهي ..

بغيت الطش ذاك اليوم بس تراجعت

إقتباس ارسلتها قبل المبارة تعرفوون الواحد مايدري هل يفووز ولا ينهزم والنفسييه في الحالتيين لاتسمح بالتعبير ... دمتــــــــــم بخيـــر يازعمــــــاء ويــومكم أزرقـــ بإذن اللــــــه ..

مبرووك الفووووووووووز والي قالو اني اتفاقيه بسبب الوان موضوعي شفتوو انا اسوي تموويه


الله يحفظكـ على هيكـ يوميات ومبروك الفوز على الاتحاد مقدمـا:p

إقتباس بصراحة يوميااات جداً رائعة الله يسعدك يارب وان شاء الله تتواصل يوميات اعضائنا وفي انتظار يوميات الســــــــامي كسمــو الهـــلال

ونعمـ الاختياااار
بانتظاره على احر من الجمر على قولتهم


سندريلااا الصدقيه يعطيتس العافيه






الهنوووف







كانت






هنا




ورحلت

إقتباس الرسالة الأصلية كتبت بواسطة المنتدى الاستشاري همين حطيت على حروف وألوف برنامجي المفضل احب المسابقات بعدين ياطويلين العمر قعدت على النت شوي.. شفتي المصري اللي يمدح ام بي سي والبرنامج والمقدم .. همين تسحرت مع اهلي الساعه 3.30 حسب التوقيت المحلي بمدينة الرياض وكان سحورنا رز ودجاج وسلطه ومرق خضار وعصير ولبن وفاكهه .. عا تصدقون ماعاد يشتهى السحور.. ببداية رمضان كان له طعم اخر .. اخواني واخواتي كانو نايمين ولا قنبله تصحيّهم .. بس انا صاحيه واختي والوالد والوالده وجدي وجدتي الله يحفظهم تسحرنا بعدين ياطويلين العمر غسلت المواعين انا وخيتو لأن شغالتنا الاصليه خرج ولم يعد لعبت علينا مارجعت من ديرتها والشغاله المؤقته من تشاد حسبي الله ونعم الوكيل راحت زياره لاهلها بالرياض وشكلها مواريها هجت شكلها تروّعت من مواعين رمضان عاد مواعين رمضان حدّث ولاحرج بعذري اسب التشاديين ماسبيتهم كذا للطاقه ايه شكلها مندسه اخاف البلوي عطاها عرض تشتغل عند حرمته <<< اعقلي ترانا برمضان المهم صليت الفجر وقريت قرآن .. بعدين قريت جرايد امس << يمديكم على الهوايه ..منيب احب الاخبار طازه احبها فايته بعدين نمت الساعه 8 حنا جتنا شغالةً , ماهنا اسنع منه , تخلي البيت يلمع اجي القى غرفتي تلمع ,, وكلشن تصلحه ,, عاد الفيمتو انصاره وش كثرهم [/COLOR] [COLOR="Gray"]دقّت ساعة الحسم باقي تن منتس ويذن وحالة استنفار بالمطبخ وارسلنا فطور للمسجد وجلسنا على مائدة الافطار عاد امي ماتفطر الا اذا سمعت ابن ماجد مذن جامع الديره .. وسمبوسه .. وراه كل الناس اذا اذن يخترشون وتجيهم حالة استنفار !! وكبه .. منب احبه الحمد لله ,, اكواب الدجاج .. شكلهن لذيذات ! وبيتزا .. مهب ذاك الزود الا تسان المس علشان امي , وعاد تجيني ذيك الكفخه المحترمه على راسي ويقعد يدوور راسي وارتفع ضغطي .. واخواتي يضحكن علي قلت طيب خليني اسلّم بس ويوم قضيت واجي انا وكم حرمه مصابه وهشناهم وهجووو وصكينا باب المسجد المهم وكملنا الصلاة وراسي ينبض فيه صعروور << الصعروور هو الشئ الذي ينتفخ من الجلد ويتورم عندما يضرب بضربه قويه او فلقه او نحو ذلك << لغير الناطقين باللهجه النجديه .. مثل اللي مايعرفون العبسه ,, يعجبني يا شيخ هاللي فلقتس ,, وآسفـــــــــــه جداً جداً على الإطاله .. المفروض مايمسكووني كيبوورد ويارب انكم استانستو بيومياتي المفرحه والمؤلمه في نفس الوووقت .. والله يبلغنا واياكم هالشهر الفضيل ويتقبل منا ومنكم صالح الاعمال وابد حطيت نقطه .<<< ياكثر ماتنقطين وارسلتها لخيتو العزيزه سندريلا الله يلبسها الصحه والعافيه ويووفقها ويجزاها عنا خير ارسلتها قبل المبارة تعرفوون الواحد مايدري هل يفووز ولا ينهزم والنفسييه في الحالتيين لاتسمح بالتعبير ... دمتــــــــــم بخيـــر يازعمــــــاء ويــومكم أزرقـــ بإذن اللــــــه .. [/CENTER][/SIZE] شكراً ,, واسمتعنا بيومتس ,, المليء بالصعارير ؟.. ــــــــــــــــــــــــــــــــــــــــــــــــــــ الحمد لله على سلامتك هلالية سنعةبعدين قايلتلك من قبل اكسبيهم وزعي عليهم حلاو خل يفكون شرهم عنك بصراحة يوميااات جداً رائعة الله يسعدك يارب وان شاء الله تتواصل يوميات اعضائنا وفي انتظار يوميات الســــــــامي كسمــو الهـــلال

ننتظره غداً ..