بسم الله الرحمن الرحيم آآآسف جدا لفترة انقطاعي عنكم والله اشتقت للمنتدى والأعضاء وكل عام وانتم بخير مع انه وصلنا منتصف رمضان بس سامحوني .
هذي قصة صلوحي اسم الدلع حقه من الشله طبعا ويقلط كل يوم عندنا في الاستراحه وذابحنا بالفول المدمس ماأبي اطول عليكم اتركم مع القصة
صالح شاب يبلغ من العمر 26 سنة اللحين والا أيام القصة كان عمره 24 يعني توه في عز الشباب . صالح ماشاالله عليه درس في كلية المعلمين بالرياض تخصص لغة عربية وتخرج منها بعد التخرج كل الشباب قاموا يباركون له المهم صار ينتظر التعيين المفاجأه الكبرى أنه ماتعين حتى يومنا الحاضر صلوحي كان خاطب بنت خالته ويبي يتزوجها من يوم كان في الكلية قالوا له اصبر لين تخلص البنت الثانوية صبر صلوحي قال ياولد أنا لاوظيفه ولاشي ويني وين الزواج المهم البنت تخرجت من الثانوي وصلوحي تحت الإنتظار لعل الله يجيب له وظيفة ومرت الايام والله والبنت تدخل الجامعة وصالح ماعنده أي مانع البنت تكمل دراستها وأخيرا جانا صلوحي يرقص على قولته رقصة الناقة من الفرح . خير وش فيه صلوحي قال لقيت وظيفه باركوا لي : ماشالله مبرووك ووين وكم الراتب ووشي الوظيفة . قال في شركة جديده والراتب 2800 ريال والوظيفة سكرتير للمدير . ماشالله مبروووووووك صلوحي وعقبال الزواج . راح صلوحي من عندنا مبسوط وعطى اهله الخبر وعطى خالته طبعا ام المدام خبر يعني استعدوا لان صلوحي عنده ولله الحمد سيارة آخر موديل كامري وعنده شقه طبعا من ابوه الله يخليه له وجاهز الاثاث والمهر جاهز بس واقفه على الوظيفة . اتصل على خالته . صلوحي : السلام عليكم هلا خاله . الخاله : وعليكم السلام صلوحي : أبشرك توظفت والراتب حلو 2800 ريال الخاله : مبروك صلوحي : الله يبارك فيك أوكي خاله حبيت أبشرك تامريني بشي . الخاله : سلامتك وسلملي على الوالد صلوحي : أبشري يالله فمان الله
قفل صلوحي وكان قصده افهمي ياخاله أبي أتزوج البنت المهم قال صلوحي بدري شوي على الزواج بس خلني أكلم الوالده عن الزواج عشان أجمع راتبي وراي شهر عسل راح صلوحي وقال لامه اللحين أنا توظفت متى الزواج قالت انشالله بعد شهرين من اللحين لين البنت تستقر في الجامعة قال حلو . بعد اسبوع من الكلام جانا صلوحي شباب باركوا لي . ماشالله مبروك خير . قال صرت مدير شؤون الموظفين في الشركة ماشالله وشلون قال لكل مجتهد نصيب ......الخ كم الراتب قال اربع الآف ريال في أول ثلاث شهور بعد كذا راح يزيد يمكن يكون خمس الاف . صلوحي بشر اهله وقال لخالته يعني افهمي بعد . هنا بدأت القصة . صلوحي كلم والده يالله البنت اللحين في الجامعة وماشية أمورها كلمي خالتي عشان نتزوج . والدة صلوحي انبسطت وقال ابشر ياوليدي كلمت الام الخالة الام : السلام عليكم الخاله : وعليكم السلام الام : صلوحي ماشالله راتبه اربعه ويبي يزيدون انشالله الخاله : ماشاللة والله اني فرحت له الام : ترى الولد جاهز ويسئل عن البنية الخاله : اي بنت ؟ الام : فلانه مو احنا خطبناه لصلوحي الخالة : الا البنت للولد بس البنت تبي تكمل دراستها الام : ايه ماعندنا مانع تكمل والولد يحب ان البنت تكمل دراستها الخاله : لا بس البنت حنا نبيها تدرس سنتين عشان تتوجه بالجامعة الام : مادري بس الولد يقول انكم مواعدينه اذا خلصت من الثانوية الخاله : لاماعنده سالفه روحي قولي له الكلام الام : يصير خير انشالله وانتي شوفي البنت وش تبي تقول
الام راحت وقالت لصلوحي السالفة الولد انصدم وقال ننتظر رد البنت بعد اسبوع اتصلت ام صلوحي على اختها .
الام : السلام عليكم هاه وش قالت البنت الخاله : والله نفس كلامي شوفي الولد يبي يصبر سنتين أو لا الام : ماراح يصبر ولدي وعارفته يبي الزواج من يوم انه يدرس الخاله : ماعندنا غير الكلام الام : أجل الولد يبي يتزوج الخاله : الله يوفقه ويتزوج انشالله والزواج قسمه ونصيب
جت ام صلوحي وقالت لولدها الكلام قال صلوحي وش الكلام هذا أنا أبي اصون نفسي ابي احفظ شرفي أنا ماطلعت لاجواز ولاشي كله عشان مااجي للمحرمات أنا مااقدر اصبر سنتين أخاف اخرب اخاف واخاف ....... الام انشالله نبي ندور لك بنت غيرها يمكن خيره ماتدري صلوحي . انشالله أنا ابكلم ابو البنت وبعدين نشوف.
صلوحي : السلام عليكم هلا ابو فلان والد البنت : وعليكم السلام هلا وغلا مين معي صلوحي : افا ماعرفت صوتي أنا فلان والد البنت : " تغير الصوت 180 درجه هلا صالح وش عندك صلوحي : بخصوص البنت وش العلم والد البنت : ماوصلك العلم البنت تبي تجلس في الجامعة سنتين لين تتوجه في الجامعة وبعد كذا تتزوجون انشالله صلوحي : اسمع ياخال الكلام كلام رجال لرجال أما أنا انسان ابي احافظ على نفسي وانتم واعدتوني بعد الثانويه وقلنا نصبر لين يجب الله لي وظيفه واللحين انا موظف وراتبي زين وأنا ماعندي مانع ان البنت تكمل دراستها وانا اوصلها للجامعه وارجعها بعد وماراح اصبر سنتين . والد البنت : أجل الله يسهل عليك ياصالح وتلقى لك بنت حلال أحسن من بنتي صلوحي : خلاص أجل على كذا اتفنا نفسخ الخطوبة والد البنت : أكيد
صلوحي كلم والدته وقال لها دوري لي على بنت حلال خلاص طابت النفس من بنت الخال وانا لو تزوجت اللحين صار لي ولد احسن من اني اجلس سنتين ماعندي ولد ام صلوحي : ابشر .
" صفات صلوحي : يحافظ على الصلاة أول بأول . لم يعرف له أي سوابق سوى علوم الرجال . لم يسافر الى خارج المملكة ، أخلاق عالية المستوى ، جميل المنظر . حنون ، عاطفي جدا ، وجميع الصفات الحسنة توجد به لكنه " مــــــــــــدخن "
بدأت ام صلوحي تخطب لولها زين الحلايا صلوحي : أول وحده خطبوها : معليش الولد يدخن الثانية : معليش الولد يدخن الثالثه : معليش البنت تبي تكمل دراستها الرابعة : معليش الولد يدخن الخامسة : أنا موافقه عليه بس أنا بنت ناس عز وابي يجيب لي كل شي ماركات عالمية " طبعا صلوحي " قال معصي السادسة : معليش تبي تكمل دراستها البنت السابعة : طلعت تلبس نظارات ومابغها صلوحي الثامنة : اسمها مزنه وام صلوحي ماعجبها الاسم وصرفت صلوحي بإنها رفضت التاسعة : ام صلوحي مابغتها اخوانها أكبر داشرين في الوسط السعودي العاشرة : ام صلوحي مابغتها البنت مركبة تقويم في أسنانها
وجميع من خطب لصلوحي قال ان الولد يدخن أو البنت تبي تكمل دراستها وحتى يومنا الحاضر صلوحي ماتزوج طبعا ولا حتى التعيين ماجاء بعد صلوحي بطل الدخان وصارو يقولون كان الولد يدخن واحنا مانضمن انه مايرجع له " اي والله النشبه "
صلوحي قال بتزوج من برى المملكة قالو له معصي . وهو للحين يخطب حتى امس كان خاطب وقالو له : كنت تدخن مانبيك. صلوحي على فكره من القصيم وولد قبائل لكن ماله حظ
ياشباب اللي ابي من قصة صلوحي إنكم تجاوبون على الأسئلة التالية وتعطوني تعليقكم على القصة .
هل البنت اللتي تدرس اذا تخرجت من الثانوية او الجامعة ستجد وظيفة ؟ هل شرب الدخان جريمة كبرى ؟ اذا كان الشخص مدخن وترك التدخين فما العيب في ذلك ؟ أيها الشاب هل تقبل بالزواج من فتاة تلبس نظارة ؟ هل تقبلين بالزواج من شخص مدخن . ؟ هل تقبلين بالزواج من شخص يرتدي نظارة ؟
هل البنت اللتي تدرس اذا تخرجت من الثانوية او الجامعة ستجد وظيفة ؟
مو شرط ... لكن العلم زين ..
شخصيا .. أتمناها جامعية ... لكن ماتتوظف...
إقتباس
هل شرب الدخان جريمة كبرى ؟
أيه!! قل ليه ؟؟! أنا أقول لك .. أولا .. يأذيك بالبيت ..بالسيارة .. بكل محل . ثانيا ... يؤثر على مستقبلك الأنجابي...والا غلطان ؟؟! ثالثا... لاتنظر الى عظم المعصية ..لكن انظر لعظم من عصيت ..
إقتباس
اذا كان الشخص مدخن وترك التدخين فما العيب في ذلك ؟
بالعكس..يعتبر نقطة ايجابيه...فكل ابن ادم خطائ..
إقتباس
أيها الشاب هل تقبل بالزواج من فتاة تلبس نظارة ؟
ماودي انها تلبس نظارة .. لكن الحب مايعرف ياخوي..
تحياتي لك أخي.. وأتمنى تراجع توقيع الأخ الكناري الأزرق... علشان تعدل كتابة ... إن شاء الله ..
مسكين صلوحي مابعد تزوج ورى ماجلس وصبر ع مقرودته ..
إقتباس
هل البنت اللتي تدرس اذا تخرجت من الثانوية او الجامعة ستجد وظيفة ؟
ميبي ، لازم الواحد يتعلم مو اخذ شهادة ثانويه وأعلقها !!
إقتباس
هل شرب الدخان جريمة كبرى ؟
يب ، واحد مايعرف مصلحة نفسه بيجيب المرض لـ زوجته ولـ عياله ..
إقتباس
اذا كان الشخص مدخن وترك التدخين فما العيب في ذلك ؟
إذا كان تاركه زين ع زين ، بس اهم شي يعاهد نفسه انه مـ يرجع يشرب دخان مره ثانيه
بعدين الي شرب دخان ، يشرب شيشه ! واللي بيشرب شيشه بيشرب خمر واللي شرب خمر طايح فـ المخدرات .. يعني الطريق مستمر إلا إذا الشخص وعى نفسه وانتبه لـ طريق اللي يمشي فيه لأن الشيطان راح يزين له كل شي والباب اللي يجيك منه ريح سده واستريح
إقتباس
أيها الشاب هل تقبل بالزواج من فتاة تلبس نظارة ؟
اللي تلبس نظارات تقدر تسوي عملية تشطيب ماهوب عيب ----->> انقزي ذا موب لتس
إقتباس
هل تقبلين بالزواج من شخص مدخن . ؟
لأ ، اصلاً وشوله نتزوج ..
إقتباس
هل تقبلين بالزواج من شخص يرتدي نظارة ؟
قلت لك لبس النظاره مو عيب ، يقدر يصلح عملية تشطيب أو يلبس عدسات
بعدين احياناً تكون النظاره ع الشخص وش زينها مناسبه له يطلع شي وهو لابسها خصوصاَ إذا كان حاط لك ............. ---> ميسو امسكيها بتخق
حقيقه موضوع ( صلوحي ) استوقفني كثير ,, ولربما لم يكن صلوحي هو الوحيد في هذه الحياه فـ الكثير الكثير ممن هم على شاكلته ,, وماله لا الصبر وباذن الله سـ يجد ضالته ,, حقيقة استوقتني نقطه في الموضوع ..
إقتباس
الثامنة : اسمها مزنه وام صلوحي ماعجبها الاسم وصرفت صلوحي بإنها رفضت
في اعتقادي ان الامر بين يديـه قبل عقد القران فـ اعرف بعضهم قام بـ تغيير اسمها ;)
اما فيما يخص بـ اسئلتكـ ...
إقتباس
هل البنت اللتي تدرس اذا تخرجت من الثانوية او الجامعة ستجد وظيفة ؟
ليس شرطا ان تحصل على الوظيفه بعد التخرج ,, وايضا ليس قانونا قاهرا بـ ان تكمل دراستها وهي في بيت اهلها ,, فـ بالامكان فعل ذلكـ وهي تحت لواء زوجها ,, والهدف من التعليم هو الحصول على الشهاده ..
إقتباس
هل شرب الدخان جريمة كبرى ؟
نعم .. ولكن حلي بـ المدخن بـ ان يحاول توريـة المساله هذي ,, اعني بـ ان يغطي ذلكـ بـ الفعل الحسن والقول الحسن ,, وان يركز على الجوانب الايجابيه بداخله ,, فـ لا يكن مثلما القائل ( شين وقوي عيـن ) فـ كم من المدخنين باتوا افضل بـ كثير من غيرهم الغير مدخنين ,, من اغلب النواحي المهمه والتي تخص البيت والزوجه ,,
إقتباس
اذا كان الشخص مدخن وترك التدخين فما العيب في ذلك ؟
ليس عيبا .. بل من وجهة نظري هو انتصار .. نعم نحن نقع في الخطأ ,, ولكن يجب علينا ان لا نتمادى فيـه ,,
إقتباس
أيها الشاب هل تقبل بالزواج من فتاة تلبس نظارة ؟
الامر جدا عـادي .. فـ هناكـ الكثير من البدائل ,, هناكـ العدسات اللاصقه ,, وهناكـ العمليه التي تجرى بـ الليزر ,, فـ الحلول موجوده والاهم هو المضمون ..
اما بقية الاسئله لا علاقة لي بها ,,
في نهاية المطاف ,, اشكركـَ جزيل الشكر على هذه الاطلاله ,, وكل الاماني لكـَ بدوام التوفيق ,,
هذي قصة صلوحي اسم الدلع حقه من الشله طبعا ويقلط كل يوم عندنا في الاستراحه وذابحنا بالفول المدمس ماأبي اطول عليكم اتركم مع القصة
لا يصيــــر أنـــا ..,,
[CENTER]صالح شاب يبلغ من العمر 26 سنة اللحين والا أيام القصة كان عمره 24 يعني توه في عز الشباب . صالح ماشاالله عليه درس في كلية المعلمين بالرياض تخصص لغة عربية وتخرج منها بعد التخرج كل الشباب قاموا يباركون له المهم صار ينتظر التعيين المفاجأه الكبرى أنه ماتعين حتى يومنا الحاضر صلوحي كان خاطب بنت خالته ويبي يتزوجها من يوم كان في الكلية قالوا له اصبر لين تخلص البنت الثانوية صبر صلوحي قال ياولد أنا لاوظيفه ولاشي ويني وين الزواج المهم البنت تخرجت من الثانوي وصلوحي تحت الإنتظار لعل الله يجيب له وظيفة ومرت الايام والله والبنت تدخل الجامعة وصالح ماعنده أي مانع البنت تكمل دراستها وأخيرا جانا صلوحي يرقص على قولته رقصة الناقة من الفرح .
لا أشــوا مهب أنــا ,,
هل البنت اللتي تدرس اذا تخرجت من الثانوية او الجامعة ستجد وظيفة ؟ .. مهب شــرط , لكن اهم شي العلـم .. هل شرب الدخان جريمة كبرى ؟ أكبـــر من جريمة , بالنسبة لي , ولا أواطن اللي يدخن وما أحب ريحت اللي يدخن .. اذا كان الشخص مدخن وترك التدخين فما العيب في ذلك ؟ مافــيــه عيب هذا ميزة , اذا كلن ما قبله فيبي يقول وش الفايدة من تركه ويرجع له المفروض نشجعه .. أيها الشاب هل تقبل بالزواج من فتاة تلبس نظارة ؟ بالعكــس تزيدها جمــال .. ;)
ويمكن لا تزوجت اشرط انه تلبــس نظارة .. هل تقبلين بالزواج من شخص مدخن . ؟ للبنــــات .. هل تقبلين بالزواج من شخص يرتدي نظارة ؟
يزيده جمــال أيضـاً ,, ,, للمعلــومية تراي ما ألبــس نظارة علشان ماتقولون يلبس نظارة ويمدح نفسه ..
هل البنت اللتي تدرس اذا تخرجت من الثانوية او الجامعة ستجد وظيفة ؟
يمكنـ مو شرط وظيفـة بالنسبة لي ادرس بس ماحطيت ببالي وظيفه ودي اكمل ماجسيتر ولا اتوظف بس الشهاده سلاح بيد الواحد ممكن تحتاج البنت وتدور وظيفه الدنيا تدور
[QUOTE]هل شرب الدخان جريمة كبرى ؟[/QUOTE] مالقيت تسال الا انا اكره الدخان بشكل ماتتصورنه والي يدخن اكره بعد
إقتباس
اذا كان الشخص مدخن وترك التدخين فما العيب في ذلك ؟ [/QUOTE] كثير يتركونه ويرجعون لــة
إقتباس
أيها الشاب هل تقبل بالزواج من فتاة تلبس نظارة ؟
اتوقع النظاره على البنت تفقد شوي من جمالها وجه نظري الله لايحدنا لها
إقتباس
هل تقبلين بالزواج من شخص مدخن . ؟
لااااااااااااااااااااااااا الله لايقولة ان شاء الله
إقتباس
هل تقبلين بالزواج من شخص يرتدي نظارة ؟
ايه عادي بالعكس كثير النظاره تخليهمـ كشخه واحلى بعد
اتمنـى افدناك ياخوي والله يوفقكـ انت وصلوحي ويرزقكمـ بنت الحلال عاجلا غير اجل
يااا عميري والله رحمته صويلح الله يرزقه بنت الحلال الي تسعده ويسعدهااا
نجي للأسئـــــله
هل البنت اللتي تدرس اذا تخرجت من الثانوية او الجامعة ستجد وظيفة ؟ أصلا امر مستبعد اني اتوضف بعد ما أخلص الجامعه .. لأن اصلا انا ما درست علشاان اتوضف الا إذا حدتني الضروف .. لا سمح الله
هل شرب الدخان جريمة كبرى ؟ أكيـــــــــد لأسباب أول شي وقبل كل شي قال تعالى ( ولا تلقو بأيديكم الا التهلكـه ) وثاني شي يعني مااده سااامه ومستحيل أحد يجهل الأمراااض الي يسببها التدخين بس ما أدري أعتقد نوع من أنوااع الدلاااخه .. مع احترامي لكل المدخنين والمدخناات واخر شي أصلا منضر الواااحد غبي وهو ماسك السجاااره واااااااااااع يقرف ويكتـــــم وكل شي
اذا كان الشخص مدخن وترك التدخين فما العيب في ذلك ؟ مو عيب بس انا عن نفسي لو تااركه أكثر من سنـــه عاادي بس ماااله شهر تااركه لا إحتمال يرجع هل تقبلين بالزواج من شخص مدخن . ؟ الله لا يقووله استغفر الله ياربي الله يعااافيه ولا يبتلينا هل تقبلين بالزواج من شخص يرتدي نظارة ؟ اييه عاادي مو عيب ولا نقص وبعدييين بالعكس شكل الشاب يطلع شي بالنظاره .. تزيده وســــامه <<< دعايه
هو شاف الناس كيف يرفضونه لأنه يدخن بعدين لأنه كان مدخن , يعني المفروض ما يقعد يتشرط لأنه مو أفضل الناس ولا احسنهم ولا فيه ذيك الصفات إلي تخلي الناس ما يقدرون يردونه ,,
إقتباس
هل البنت اللتي تدرس اذا تخرجت من الثانوية او الجامعة ستجد وظيفة ؟
إن شاء الله ,
والغرض من الدراسة ليست الوظيفة فقط وإنما توسيع مدارك العقل وزيادة في العلم ,
إقتباس
هل شرب الدخان جريمة كبرى ؟
بالتأكيد ,, فالدخان يجر أشياء ثانية ويسبب الأمراض ,ويكفي بأنه أمر محرم ,
إقتباس
اذا كان الشخص مدخن وترك التدخين فما العيب في ذلك ؟
لا عيب في ذلك ,, بالعكس يدل على قوة إرادة هذا الشخص , فليس كل شخص قادر على أن يتخلص مما ابتلاه الله من هذه الآفة ,
ولكن بعض الناس يردون من كان مدخناً خشية بأنه قد وقع في المخدرات فيخافون بأن ينتكس ويعود لها ,ولهم الحق في الخوف على ابنتهم ,,
إقتباس
هل تقبلين بالزواج من شخص مدخن . ؟
بالتأكيد لا .. فالواحدة منّا لا تفكر بنفسها فقط فربما هي تستطيع أن تتحمله رغم أنني لا اعتقد ذلك ,, ولكن غداً أطفالها سيتضررون من تدخين والدهم , وربما يصابون بأمراض الصدر ,, وأيضاً التناقض الذي سيعيش فيه الأطفال , فهم يأخذون في مدارسهم بأن التدخين محرم ومضر ويرون والدهم يدخن ؟!! ,,
إقتباس
هل تقبلين بالزواج من شخص يرتدي نظارة ؟
لا أرى النظارة عيباً سواء للرجل أو المرأة وعادي اقبل الزواج به ,
ولكن إن وجد الرجل جميع الصفات التي يودها في فتاة ما .. ولكنها تلبس نظارة وهو لا يريد ذلك فبإمكانه أن يطرح عليها عندما تصبح زوجته لبس العدسات اللاصقة أو إجراء عملية التشطيب ,
وكذلك العكس بالنسبة للفتاة ,
وعلى قولة فيو .. بعضهم يطلعون وسيمين بالنظارة وأحلى ,,
يــاحراام ياصلوحــــي رحمته مسكين :sad: وبعدين أهل
البنت ليش يكسرون بخاطر الولد المفروض الرجــال عند كلمته مثل ماعطوه وعد
يزوجونه إيــاها <<مقهوووره:sad:
إقتباس
هل البنت اللتي تدرس اذا تخرجت من الثانوية او الجامعة ستجد وظيفة ؟
لا والله ماراح ينفعها الا بيت زووجها بس لازم يكون عندها شهااده
تعرف ظروف الوقت بالمستقبل ماتدري وش يصير يعني لازم يكون عندها شهاده
بس هذا مايمنع أنها تتزوج وتكمل دراستها
إقتباس
هل شرب الدخان جريمة كبرى ؟
أكيــد ..
لأن إذا ماخاف هو على نفسه أكيد البنت بتخاف
على نفسها ومثل ماتعرف الضرر أكثر يرووح للزوجه أول شي وللعيال ثاني شي
بس هو لازم يكوون عارف من نفسه وهذا اكبر غلط واكره شي الدخاان
إقتباس
اذا كان الشخص مدخن وترك التدخين فما العيب في ذلك ؟
مافي عيب بس إذا كان ضامن نفسه أنه مابيرجع
علشان مايبلش بنات الناس معه ..
إقتباس
هل تقبلين بالزواج من شخص مدخن . ؟
لا طبعـــا
لأني بخاف على نفسي أول شي..
إقتباس
هل تقبلين بالزواج من شخص يرتدي نظارة ؟
إيــه عادي النظاره مو عيب هذا مرض يبتلي فيه الانسان
وماله يد فيه يعني ليش نرد رجاال علشان نظاره وبعدين النظاره تخلي الرجال شي وشخصيه وأناقه وبعديين وش فيهم اللي يلبسون نظارات
تسلم أخوي على الموضوع والله يــوفقك ويوفق صلووحي ويلقاله بنت الحلاال
مشكورين على ردودكم لكن نصيحة للبنات والله الدخان مو مقاس للزوج
الزوجه الذكيه تكسب الأجر وتقنعه وتساعده على ترك الدخان صدقوني هو بلاء من الله عزوجل والدليل اسئل أي مدخن يقول لك نفسي اتركه بس ماقدرت
أيتها الفتاة من قلب رجل يخاف عليكم كثيرا الله الله بالزواج والاقبال عليه والله إني أشوف يوما تتمنى المرأة نصف رجل العنوسة في مملكتنا الحبيبة صارت تكثر
ياأيتها الفتاة تستغربين زواج السعودي من واحده من خارج المملكة هذا هو احد الاسباب الذي يدعو لذلك
صلوحي صدقوني خطط على سوريا وعلى لبنان ومصر وقال المهر اللي راح احطه في سعوديه حطه في ثلاث من برى أبرك لي بس انظمة البلد في السعوديه ماتسمح له ومشكورين مره ثانية
عميد المجلس العام وعضو سابق بلجنة تطوير المجلس العام
تاريخ التسجيل: 26/02/2001
مشاركات: 4,222
إقتباس
الرسالة الأصلية كتبت بواسطة الفيروسه الزرقاء
بعدين الي شرب دخان ، يشرب شيشه ! واللي بيشرب شيشه بيشرب خمر واللي شرب خمر طايح فـ المخدرات .. يعني الطريق مستمر إلا إذا الشخص وعى نفسه وانتبه لـ طريق اللي يمشي فيه لأن الشيطان راح يزين له كل شي والباب اللي يجيك منه ريح سده واستريح
أنا أقوله
بعدين ركز فـ هـ الجملة "إلا إذا الشخص وعى نفسه وانتبه لـ طريق اللي يمشي فيه لأن الشيطان راح يزين له كل شي "
هو صحيح فـ ناس تشرب شيشه من دون لا تشرب دخان والعكس ! لكن إذا الشخص استمر بـ هالطريق افكورس راح يطب لك فـ طريق الخمر ثم عاد المخدرات ، وفيه ناس يطبون بـ المخدرات قبل الخمر والشيشه ..
يعني تختلف من شخص لـ شخص وطريقه جيته فـ هالطريق
إقتباس
الزوجه الذكيه تكسب الأجر وتقنعه وتساعده على ترك الدخان صدقوني هو بلاء من الله عزوجل والدليل اسئل أي مدخن يقول لك نفسي اتركه بس ماقدرت
لأ ياشيخ !!
أجل بـ أخذ واحد يدخن واخليه يتركه ، اشوى اني بطب معه فـ نفس الدرب ---->> تسويها
إقتباس
وعلى قولة فيو .. بعضهم يطلعون وسيمين بالنظارة وأحلى ,,
عميد المجلس العام وعضو سابق بلجنة تطوير المجلس العام
تاريخ التسجيل: 26/02/2001
مشاركات: 4,222
إقتباس
الرسالة الأصلية كتبت بواسطة الفيروسه الزرقاء
أنا أقوله
بعدين ركز فـ هـ الجملة "إلا إذا الشخص وعى نفسه وانتبه لـ طريق اللي يمشي فيه لأن الشيطان راح يزين له كل شي "
هو صحيح فـ ناس تشرب شيشه من دون لا تشرب دخان والعكس ! لكن إذا الشخص استمر بـ هالطريق افكورس راح يطب لك فـ طريق الخمر ثم عاد المخدرات ، وفيه ناس يطبون بـ المخدرات قبل الخمر والشيشه ..
يعني تختلف من شخص لـ شخص وطريقه جيته فـ هالطريق
على اي اساس تقولين هالكلام ؟؟
ناس واجد يشيشون من سنين طويلة ما قربوا للخمر ولا المخدرات !!؟؟