مسائكمـ الله بالخيـر مساء مختلف بمساء رمضانية بنكهة الفيمتو ورائحه اللقيمات وبهارات هنوفيه
في البدايـة اعتذر لسندريلا على مقلب امس كل هذا من تخطيط فرصوة الضايعه بقولكمـ وش قالت لي ادري بتذبحني قالت ارسلي لسندريلا انك هونتي وماراح تكتبي جدولكـ خليها ترتاع قلت لا مسكينه حرام عليكـ قالت بترسلين والا برسل انا ان الهنوووف تعتذر
[]هنا عاد اجبرتني ارسل والله مادوي لاني احس بمعانتهاا ارسلنا لها وروعناها الظاهروالحمد لله جت سليمه
اعتذر لكمـ يومي ممل شووي وتراه طويل بس اقروه لازم تعب اصابيعي مايروح هدر >>>وش عندها تبيكم ترحمونها قبل ابدى وش هالنذالـة الي بالشوارع عز الظهرية وطالعه وموصلة معــاك حــر وعطش وكل ماتمشي تلاقي سيارة مقطعين لك جحـة (بطيخه )فوق حمراء يقهرونكـ:sad: يخلون الي مايحب الجح يحبة غصب ...
... نبدا وعلى بركة الله
اذا بباب غرفتـي يطرق الهنوووووف ماقمتي
انـا عين مفتوحه وعين مغمضه وش عنده ابوي مرتـاع فيها شي وحده نايمه بعد الفطور وش صار عاد جيت بقول اذا اذن العشاء قوموني علشان اروح اصلي بالمسجد بس قلت بقوم من نفسي المهمـ تخيلووو وحده حاطه ببالها ان الساعه مابعد تعدت 8
انا من شفت ابوي مرووع وانا قايلة الوضع فيه شي المشكلة جوالي بالشنطة ومدري كم الساعه التفت يمين يسار ماعندي ساعه قررت وبعد عنـاء وتفكيــر اطمر من سريري الجميل واطل مع باب غرفتي على الساعه الي برىوانـاظر وافرك عيوني ثانية مستحيــــل وش هالساعه خربــانة الله يقطع شرها روعتني اجل 12 وينا فيه واطل على غرفة اختــي انا : كم الساعه اختي :: 12 هــــااااااااااه وش 12 ليلااا راحت علي نومـة مهيب صاحية ماعمري نمـت بعد الفطــوور اصلا مدري وش جاني هاليــوم لاني مارجعت من دوامي الا متاخر
(نايمــة من بعد العصــر الى المغرب افطرت في ثواني وصليت ونمــت ثانية الى 12 الليل اول مره اسويها واكتشفت ان امي طالعه ومتوقعه اني صحيت اتوقع الزعيـم فقدني كل يوم اعسكر عليه بعد الفطوور لين ياذن العشاء ) المهمــ صحيت من النوم وجلست شووي واتذكر المنتدى والمسابقة وضاق صدري قلت هم قالو 9 ونصف راحت علي وادخل واشاركـ بطمـووح الهزيمة بس عن قولت ماشاركت واجلسـ على النتـ.. شووي واتذكر اني لافطرت فطور يسوى ولاتعشيت ولاتسحرت فقررت اجمعهـ كالعاده يعني سحورن عشااء
وانــزل واتذكر معشوقتي الرياض (جريده ) واجلس على النتـ شووي واشوف فرصوة تقول بروح اتسحر وشوي كل الي عندي بروح اتسحر وانا اقول وش عندهم تونا على بالي الساعه 2 طلعت 4
المهمـ كليت لي شي على الطاير وصليت ونمـت صحيت 8 ورحت اتلقى العلمـ وانتهيت محاضرات 12 وجلست اقرا قران لين يتصل علي السواق هاليومين خدامتنا مدري وش فيها وانا البس عبايتي تطق يدي وتقول انا مدري وش خلاها تدخل معاي جوال مياحتاج لاتناظر البنات وتقول ماشاء الله الظاهر الكثرة اذهلتها وتركب السياره وتقول للسواق ماشاء الله بيمرنك غف كونخ كز ونزكنى فيما معناه يعني باللهجه حقتهم وعدت الساعه 1 تقريباا للمنزل العامر وادخل الببيت >>قولي قسم على بالي طلعتي وادخل النتـ الى اذان العصر علشان اصلي
صليت وركدت جوالي احتياط ونمتـ >>>>>أول مره تركد الجوال بالعصر هو انا نمتــ مدري انا من النوع الي يشيل همـ وحريص ماعرفتـ انوم نمت شوي وماغير اتقلبـ انا خايفه تروح علي نومه مثل امس واوهقكمـ المهمـ الساعه 5 وشووي قررت اني اصحى ونزلــتـ تحتــ استعداد للفطـوور رتبنا واذن وافطرنـا وعينا خير انتهيت من الفطــور الهنوووف :: يمــــه وين الجريده امي :: فـووق بغرفتي الهنــوووف :: وراه تقرينها فووق امــي :: اتوقع ماردت علي وكملت طريقها
صليتـ ورحت اقرا الجريده وضاق صدري وش فيه هلالنـا الوضع عندهمـ يضيق الصدر احس ان زعيمنا محيوس عسى الله يفرج عنهمـ واشووف لقـاء الي بيكون مع الكابتن الشهير ابو عبدالله >>>>>>تستحي تقول سامي الجابرحاف احس عيب واستانستـ
خلصتـ الجريدة امي تقول تعالي ذوقي الورق عنبـ حلوو واكل لي حبتين واروح فــوووق كالعاده >>>>>>>>>ماتبي تشوف التلفزيون اشغلـ نفسي وشغل النتـ الى اذان العشاااء وارووح المسجد اليوووم وداني ابووي بس قبل هاليوم راح عنـي بدري وخلاني اروح لحالي مايدري على باله اختي معاي بس اختي من تفطر تنام وقالت امي بتروحين لحالك قلت ايه وقلبي يدق بسرعه قالت للشغاله وصليها نصف الطريق ولما جينا بنطلع الا سواقنا بيطلع شافته الشغاله وقالت روحي معهـ خلاص انا هنا انحرجت واستجبت لاوامر خدامتنا وامشي بسرعــة علشان يصير فرق بيني وبي السواق صليت و ادور جزمتي مالقيت الا وحده ودور وادور مالقيت الا هالوحده مليت وطلعت بجزمه وحده جيزي جيز سندريلا>>>>الشخصيه الكرتونيه مو اسشاريتنا
طلعتـ الا الاقيه ينتظرني السواق عند الباب ياحليله راعي واجب المهمـ امشي ورافعه رجلي الي مافيها جزمه وامشي باطراف الاصابع والحمد للحمد عبايتي طويلة وهذاك اليوم من حسن حظي لابسه لون الشراب اسود ساده
وطول جلوسي بالبيت انتظـر فارس احلامي على الخيل الابيض يجي بجزمتي وانتظر محد جاا يطق الباب واليوم لقيت الجزمـة حقتي بالمسجد بس استحيت اخذها وبصراحه الى الان مصرة على راي ابي فارس احلامي يجيبها ليـ
طلعتـ من المسجد وكان فيه محاضرة وانا احترت اجلس او لا اخاف اجلس وابوي ينتظرني برى فشيلة
طلعتـ ومالقيت ابووي وقررت ارجع لحالي >>متهورة الشارع كان زحمــة شووي وانا حاسه اني بنخطف مدري ليش قلت كل من صار يومياته صار له حدث مهمـ اكيد انا بنخطف وقام يوسوس بي الشيطان
وامشي بسرعـه ووصل باب البيت مامعي مفتاح وارن الجرس واعلــق لامجيب وانا خوافه عااااد:sad: ويمر ولــد يمشي ولما وصل عند بيتنا رجع بسرعه وهو يركض خفت قلت راح ينادي شلته
بس مارجع وفتحو لي الباب ولقيت امي واختي نايمين لانهمـ امي مانمت عقب دوامها واختي مارجعت الا العصرمن جامعتها مانامت واتصل على ابووي اقوله تراني رجعت لاينتظرني واتصل اقول تراني رجعت ابوي مو مستوعب قلت رجعت البيت قال طيب ليش متصله قلت علشامم ماتنظرني قام يضحك مدري ليش الساعهـ 9 تقريبااا ادخـل النتــ كالعاده .. .والاقي صديقه لي من زمان ماشفتها vip..>>>>
ويرن التلفوون وطبعا مافيه الا انا واروح ارد الاقيها بنت خالتي عمرها3 سنين الهنووف :: الوو هلا بنت خالتي :: الو وين امكـ انا :: نايمـة وش تبين فيها هي :: ابيها تجي تاخذني عندكمـ عادهي من الاجازة وقلبها بيتطقع تبي تنام عندنا انا :: ليش تبين تجين عندنا هي ::قالت ايه امي تقوله المهمـ::قالت من الفضاوه وين اختكـ طيب (المشكلة فرق بيني وبينها 15 وبينها وبين اختي 17 وتسولف معنا وتبي تنام عندنا ) قلت نايمه .....قالت وين الشغاله ..قلت فووق ..قالت وين السواق ..قلت زودتيها عاد قالت وانتي ورى مانمتي قلت نايمه العصر كانها تفهمني الحين قالتـ تستهبليـن انا ........مستغربه البنت صغيره وش هالكلام قلت ليش انوم ::قالت علشان تقومين الصبح المهم جاني خطـ قلت لها لحظه المهمـ انتهى الخط الثاني ورجعت لقيتها سكرت جلست شووي وتتصل ثانيه تقول وراك تقولي لحــظه انا مستغربه من رده فعلها قلتـ كنت اكلمـ ناس >>معطتها وجه انا الى الان قال عندكـ حريمـ قلت لااكلم صديقتي وانتهت المحادثه على خيــر بس هالبنتــ فلة اذا جت تنام عندنا وكنا ببيت ثاني يعني تلبس عباية وتمد لكـ الشنطه تقول الهنووف او لاختي شيليها
الساعه 10 الى 12 ....جالسه احووس وادووس لحالي امي قامت من النوم وطلعت لجدتي واختي توها تصحى الساعه 12 وانا مالي غير النتـ واكتب يومياتي
الساعه تشير للواحده امي تقوول ربع ساعه ويجهز السحوور
في النهايـة احب استغل هالمنبــر اولاا رمضــان شهر الغفران اتمنى كل واحد يحط جدولة لنفسه مو لنـا ويشووف وش سوا وش ماسوى وش الاعمال الصالحه اخشى ان يكـون رصيد المسلسلات اكبر من قراءه القران والصلاااه اتعجب من من يتركـ صلاه التروايح وهو امام التلفاز من قناة لقنـاة ومن مسلسل لمسلسل ومن اغنية لاغنية حقـا تلكـ قلوب ميتــة اذا ماحترموا عظمـة ذلكـ الشهر مشهــد اذهلنــي امام احدى الاشارات هنا وصفت البعض بالقلووب الميته في رمضــان وصوووت الاغاني يقرع الاذاني والعياذ بالله لم يكتفي بنفسه بل اجبر من حولة من السيارات السماع تمنيت ان لو كنت شاب لاطرق نافذته او ارفع صوت ايات الله تعصي الله وباعظم الشهووور وباثمن الاوقات مشهـد للاسف تكرر معي في رمضان وللاسف انني الايام الي خرجت فيها لاتتعدى المرتين وتكرر هالموقف رمضــان القادمـ قد لاتكون معنا او لاكون معكمـ فاستغل الايامـ فالاعمـار تذهب يوم القيامـة لن يفيدكـ طاش وهذا المسلسل وذاك بل بيفيدكـ صلاتكـ وعبادتكـ اللهم كما جمعتنا في دنيا فانية اجمعنا في جنه عاليه قطوفها دانيـة
2\ ادعـو لي اصلي مع الشيخ ابراهيم الجبرين السنه الي راحت وهالسنه ماصليت بيتقطع قلبي بس ابوي يقول مسجدنا زين ومو من النوع الي يحب يصلي بكمـ مسجد والسواق مستحيل يخليه يودينا لااماكن مزدحمه
3| ما تتذكرون ايام رمضان قبل قبل اذان المغرب يجي بالتلفززيون هذيك الايه (مثل حبه انبتت سبع سنابل في كل سنبلة مائه حبة والله يضاعف لمن يشاء ) فقدتها
اتمنــى انكمـ قضيتو وقتــا ممتعــا معي
وتراكمـ بكره معزومين عندي على الفطوور بس جيبوو فطروكم معكمـ:p وكل واحد يكتب وش طبخته الي بيجيبها بس لاتجيبون احد معكمـ الكراسي ماتكفي علي الطاولة وترتيبها بس
دمتــمـ في حفظ الله
اسال اللهم ان يجلعنا واياكمـ من عتقائه من النــار
ـــــــــــــــــــــــــــــــــــــ
الله يسعدك يالهنووف زي ما أسعدتينا والله يرزقك صلاة في الحرم ان شاء الله
وتتواصل باءذن الله ابداعات الاعضاء بطرح يومياتهم وغداً باءذن الله بانتظار هلالية سنعه
في البدايـة اعتذر لسندريلا على مقلب امس كل هذا من تخطيط فرصوة الضايعه
بقولكمـ وش قالت لي ادري بتذبحني
قالت ارسلي لسندريلا انك هونتي وماراح تكتبي جدولكـ خليها ترتاع قلت لا مسكينه حرام عليكـ
قالت بترسلين والا برسل انا ان الهنوووف تعتذر
خير خير ...
كان نزلتي كلامنا كله ...
وش بقيتي ...
والله أنك فضيحه بس مردودة أن شاء الله;) ....
إقتباس
واجلس على النتـ شووي واشوف فرصوة تقول بروح اتسحر
المقلب اللي سويناه قبل لا اروح اتسحر ...
وكل شوي اسألها ماردت عليك سندريلا تقول لا :p ...
الين وصلت الساعه اربع قلت خلاص ماعاد يمديني على السحور خلني الحق بس واتركها واروح
إقتباس
مدري وش خلاها تدخل معاي جوال مياحتاج لاتناظر البنات وتقول ماشاء الله الظاهر الكثرة اذهلتها
وشوله تخلينها تنزل;) ...
عشان تشيل عنك الشنطة ...
إقتباس
انا من النوع الي يشيل همـ وحريص ماعرفتـ انوم نمت شوي وماغير اتقلبـ انا خايفه تروح علي نومه مثل امس واوهقكمـ
من كتبت سندريلا اسمها في يوميات الثقفي وبطنها يعورها
>>> الله من الذراقه بس:p
يمديتس على الفضايح
إقتباس
وطول جلوسي بالبيت انتظـر فارس احلامي على الخيل الابيض يجي بجزمتي
ماش ماتعرفين القصه زين ...
مايجيك هو يجيك خدّامه يجربون عليك الجزمه:p ...
وبعدين تروحين له أنتي مب يجي لك
إقتباس
وامشي بسرعـه ووصل باب البيت مامعي مفتاح
وارن الجرس واعلــق لامجيب وانا خوافه عااااد
ويمر ولــد يمشي ولما وصل عند بيتنا رجع بسرعه وهو يركض خفت قلت راح ينادي شلته
ياحليلك :p .... بنت خالتو اللي تعرفينها ماغيرها ...
رجعت من المدرسه وتعطلت فيهم السيارة وتمشي على رجلينها بتروح للبيت بلحالها لأن المشوار قريب شافت ذا السيارة اللي مغير تدور في الشارع وتخاف :sad: وتنصى أقرب باب لجيرانهم وتسوي نفسها تضغط على الجرس عشان مايلحقها ويوم راح شوي عنها ماتشوفين غير عصاقيلها من الركض ...
إقتباس
.والاقي صديقه لي من زمان ماشفتها vip..
أقول منهي ولا أصير أحسن منك;) ....
إقتباس
ادعـو لي اصلي مع الشيخ ابراهيم الجبرين
يالله يارب تحقق مرادها ...
ومشكورة على النصايح الحلوة ...
هاه مر على خير يومك وشوله الخوف ...
يعطيك العافيه هنوفه وسندريلا الله لا يحرمنا منكم ...
فعلاً يومك طويل بنت خالتك كنها عبودي ولد اخوي
كلامه أكبر منه ولو صرفته يزعل ومصادق الأكبر منه
مايعترف باللي بعمره لأنهم صغار في عينه هالمغرور
أنا بعكسك دايم اقنع ابوي يصلي بمسجدنا صوته خطير وصديقاتي يتجمعون هناك
لكن هو ما يحب يروح مسجد ثاني وأطلع أنا مع أنا لمسجدنا لأن امي وعيالها يعني خواني يروحون معه
إذا طلعت بدري حطوني بطريقهم وإن تأخرت خذتها مشي والشارع ما يخوف كله جيراننا >>أحلفي
يعطيك العافيه الهنوف ونصايحك مهمه والله يهدي الجميع
هلاااااااااااااا هنييييييييييييييييييف يا مرحبااااااااا تو نور المنتدى;)
أول شيء وش رأيك في السحبه اليوم بس والله جد يوم أرسلت لك رساله على الجوال كنت مشغوووووله لرأسي وش أسوي عمتي تسلطت عليك وما جات من الشرقية إلا يوم إنك بغيتيني
الموووووووووهم..
بصراحه بصراحه وبدون مجاملة أول مرة أعيش مع أحد الأعضاء يومه بحق وحقيق مو لأنك هنووووفه بس أخاف أحد يصجني لا بالعكس أحس كتبت يومك بتلقائية وبساطة وبدون تكلف..
هنيييف وراك يا خبله تسربتين في الشوارع بدون والي ترى أقسم لو يخطفونك استخف أنا ورعبوبة من لنا عقبك
هنوووفه وش رأيك تكتبين يومياتك كل يوم أحس إنها فله <<<ترى أمزح لا تذبحيني
يالله ترى بكره بأجي كود توسعين صدري تعرفين الحال هالأيام
وترى بأجيب معي فيمتو علشانك وأنا بأجيب لي لازانيا تبغين أنتي وأختك علميني أجيب لكم معي
هلا بك الهنوووف ,, قصدي سندريلا زمانك
يومياتك فلـــه .. وناسه .. كل وقتك على كيفك
نت وجرايد ,, واكل ومرعى ودراسه وتطلعين بدري ..
ماشاء الله عليك ,, الحين عرفت ان نومك ثقيييييييييييييييل حيل :sad:
إقتباس
ادعـو لي اصلي مع الشيخ ابراهيم الجبرين السنه الي راحت وهالسنه ماصليت بيتقطع قلبي
بس ابوي يقول مسجدنا زين ومو من النوع الي يحب يصلي بكمـ مسجد
والسواق مستحيل يخليه يودينا لااماكن مزدحمه
نسيت اقولك ,, اذا كانك تنتظرين فتى احلامك يجيبها عز الله قعدتي بدونهاااا
مالك الا جانقير << على كيفه يسمي ..
وبعدين لاتتعودينها تروحين للمسجد لوحدك ,, المره هذي عدت
المره الثانيه ماتخيب تصيب << اسلوب تخويف
وبنت عمك او مدري وش تصير لك احس انها فله وتحب سعة الصدر
واللي راعية سوالف مثلها ترى تقطع وقت لاتفوتينها
وجزاك الله الف خير على النصيحه القيمه ,,
تمنياتي لك بالتوفيق والنجاح في الدنيا والاخره
كل هذا من تخطيط فرصوة الضايعه
)فوق حمراء يقهرونكـ:sad: يخلون الي مايحب الجح يحبة غصب ...
انا من النوع الي يشيل همـ وحريص ماعرفتـ انوم نمت شوي وماغير اتقلبـ انا خايفه تروح علي نومه مثل امس واوهقكمـ
........مستغربه البنت صغيره وش هالكلام 
انا مستغربه من رده فعلها
...
...
الوضع العادي
