السلام عليكم ورحمة الله وبركاته
قبل اسبوع او يزيد قليلا
انفتح الموضوع مع العيال الله يصلحهم عن اول سيارة شريتها
طبعا عادت بي الذاكرة اثنان وعشرون عاما
وبالتحديد في شهر خمسه من عام 1405 هـ
كنت أدرس في الصف الثاني ثانوي
والسيارة ما جت مثل شباب الحين بارده مبرده
بل بعد الحاح وعويل وصراخ وبكاء
وبعد وفاة والدي رحمة الله واسكنه فسيح جناته
رأى عمي انه لا مناص من شراء سيارة لي حتى اقضي فيها لوازم الأسرة وقضاء حاجياتهم
وقرر شراء سيارة لي
فقال ماذا تريد
طبعا يبي يجي على بالكم اني طلبت لكزس ولا كامري
لا
لأنها ما بعد جت في ذلك الوقت
أول موديل للكامري كان عام 1988
واللكزس بعد ذلك بسنتين
طبعا السيارة اللي شريتها الشهيره ( أم عزيز )
يعني ددسن غمارتين
طبعا هي محبوبة القصمان ذاك الوقت و من قده اللي يملك ددسن
كرفتها سبع سنين ولله الحمد بدون مشاكل
بس صدمت فيها مره راعي دباب
طبعا هو المخطي
والا وش جاب الدباب للسياره الله يهديه
المهم
قعدت معي السياره ثاني ثانوي وثالث ثانوي والجامعة اربع سنين
بعد ذلك جاء قرار تعييني في الرياض معلما
وتعرفون
صعب مدرس وفي الرياض ومعه ددسن
فكان قرار التغيير
طبعا الكلام هذا في أيام حرب الخليج عام 1411 هـ
بعد المشورة والاستخارة كنت متردد بين
الكرسيدا
والكابرس
بعد التوكل على الله تعالى
شريت الكابرس
واخذت العفش ورحت للرياض
سكنت عند خالتي الله يحفظها ويخليها
وتم تعييني في النظيم في مدرسة عقبة بن عامر الابتدائية
وبعد نهاية العام تم نقلي الى مدرسة القاعدة الجوية
لاحظو اني جمعت كم ريال خلال السنتين اللي درست فيها
طبعا مبطي لا هنا لا اسهم ولا عقل تجاري ولا ولي ناصح
يعني كانت أحياء شمال الرياض { حي الصحافة مثلا } جوار جريدة الجزيرة والرياض ونادي الشباب
كان متر الأرض تحت ال 200 ريال
وشوفو الحين كم وصل
المهم جاء نقلي لمنطقة القصيم بعد سنتين في الرياض
وخبركم القصيم يبي لها جيب
وانا معي فلوس
رحت للمعارض وبالتحديد معرض أضواء الباحه
لقيت عندهم ذاك الباترول اللي يحبه قلبك
زيتي بفضي سوبر سفاري م 93
اذا لقيت صرته حطيته لكم
الباترول سياره ينشد بها الظهر
طورقت به اربع سنين ثم
ثم قررت
عاد وش قررت هذا في الحلقة الثانية
اخوكم ابو محمد
ملاحظة : كتبت في العنوان مواتر وما كتبت سيارات
لأني شايب والشيبان يسمونها مواتر
الوضع الشجري
