هاذي المواضيع الصح شكرا لك اخوي ،،

الي بقوله البطوله هلاليه

القادم احلى

معليش حبيبي
وأنا أقرأ ألاقيك تمدح في الدوسري وتمدح في الشلهوب وفي قوارو أسوأ 3 في المباراة أتوقع بعدها تمدح نواف
وأتاريح حاط نواف مع العلل الاثنين الجمعان والصويلح
مدري أكذب عيوني وأصدقك
الشلهوب.....يا خسارة....أمازال فينا جمهور الحركة الوحدة....عشان سحبتين ورفعة هدف خلاص
ننسا كل نومه في المباراة......وننسى الدلع والسحبات اللي مالها أي داعي
ننسى الانفرادة إللي أي مبتدئ يجيبها


بدر الدوسري.....أقسم بالله ما سمعت إسمه في المباراة غير مرتين
لاعب صغير كهذا المفروض لما يلعب أول مباراة نشوف فيه شية حماس على الأقل
لا والله.....هذا لا مستوى ولا حماس ولا أي مبالاة ولا شي


ونواف......أفضل لاعب في الشوط الأول
إنت لما تقييم لاعب لا تقيمه بسحبات ولا كلام فاضي.....((لعلمك الخاص أنا أكثر من يكره رونالدينو وروبين ولويس جارسيا وإبراهيموفيتش ومن هم على شاكلتهم)) ممن يتفرغون للمسخرة والدلع والتسحيب اللي على غير سنع
والشلهوب واحد منهم ترى

لكن نواف.....قيمه على حرثه للملعب طولا وعرضا
قيمه على توزيع اللعب لليمين واليسار
قيمه على مساعدته الدائمة لخالد عزيز في منطقة المحور
قيمه على عودته للتغطية في الجناح
قيمه على الأوفرات اللي للجمعان

هو صحيح إنه بدأ يستعجل شوية في المناولات وكثير منها خطأ
لكن في غيرها
نواف عشرة على عشرة

ياريت لا نطلم نواف....هو صح مو مثل أول....لكن مستواه ممتاز جدا

وياريت ننتبه للشلهوب....اللاعب النايم هذا
ركزوا عليه وتأكدوا من كلامي
أنا ما أكره الشلهوب بل بالعكس
لاعب النصراوي يحبه قبل الهلالي......لكن إنه يتفرغ لحركات بهلوانية ويمدحه جمهورنا الموقر ...وفي المقابل يذم لاعب يقاتل ويلعب بجدية كنواف فهذا مالن نقبله كجمهور يغير على لاعبيه ومنهم نواف


تحياتي لك
وكل عام وإنت بخير
واختلاف الرأي لايفسد للود قضية
وأتمنى منك الرد على رسالتي
ومشكور طال عمرك

اوافقك وبشده على نقطة تجديد العقد لتفاريس..

هاللاعب مكسب حقيقي وصغير...


وياليت الادارة تسمع

مع كامل احترامي لرأيك

الا انني اختلف معك في كل شي قلته

بالله من جدك تدافع عن نواف

والشلهوب ما اعجبك

انا عندي كلام كثير تعقيب على كلامك لكن الوقت ما يسمح ان شاء الله في فرصه ثانية

:d تم حذف ردي شكلك واسطة مع المشرف اعيد واكرر من الادب تسمية الناس باسمائهم سموئهم باسمائهم ليش ماتقول نواف وش ابو ستة ملايين والكنز يسير واثق الخطوة:d

90% قوية والله

انا اشوف المستوى لازال سيء مع انه افضل من المباريات السابقة بقليل

تاخير في نقل الكرة هجوم عقيم ياليت نشوف اللعب السريع من لمسة وحدة واللعب الجماعي والانتشار السريع

لابد من اللعب بمهاجمين انا املي بالله ثم في ياسر القحطاني

اليوم كذا لاعب مستواهم اضع عليه علامة استفهام

حياك الله يا أخوي وبالنسبه لطلبك للرد أبشر بأرد.
اذا الشلهوب مهوب مهم عندك,فهذا يا أخوي رأيك ولك ولرأيك كل الأحترام , بس الشلهوب أبيك تشوف الموسم الماضي مع الهلال والمنتخب ويكفيك, والا مباراة الأتحاد في المربع العام الماضي بتكفيك ان شاء الله, يا أخي لاعب يوصل الكره للمهاجم وهو مرتاح يقول تفضل, بعدين رفعته حتى لتفاريس في مباراة الحزم على راسه بالمقاس يقول له لا تترقي ولا تعب نفسك بس حطها براسك, صانع ألعاب حقيقي من الطراز الأول, صح في قطع الكرات والأشتراك مع الخصم موب قوي جسمه مايساعده بس أهم صانع ألعاب سعودي في الهلال, بعدين مخلص ولا مساومات ولا عقود ولا خرابيط وهو والله يستاهل بالمعقول بس موب بالأرقام الفلكيه اللي وصلنا لها الحبيب نواف التمياط.

أما نواف ماحد ينكر انه قبل الأصابة كان مستواه أفضل بس موب الوفاء ياتمياط في هالعقد والله ولا كان العشم بالمساومه والله اني كنت أتمنى انه يروح للأتحاد على الأقل الكور بتوصل من المهاجمين صح بدون شوتات من أي محل
ولا تمرير ولا شي. مستواه يحتاج لأعادة نظر منه.

للمقارنه بين الشلهوب والتمياط : جدد التمياط لثلاث سنوات بستة ملايين, الشلهوب جدد لأربع سنوات بخمسمائة ألف ريال فقط. مستوى أفضل حاليا وأصغر عمر واخلاص أكثر لامساومة ولاشي.

أما قواروووو فقادم الأيام بأذن الله كفيل بأن ترى مستواه على حقيقته.

أتعجب من بعض الجماهير تفضل نجوم على مصلحة فريق كامل, أنا أحب الزعيم ككيان وأحب من يحب ويخلص للزعيم من لاعبين , أنتم في الزعيم لاينكر فضل أي واحد من نجومه وسباق في تكريمهم وحقوقهم الماليه.

والله لا واسطة ولاشي وتقدر تسأل المشرفين عن ردك ولا راح يقصرون معك بأذن الله , أما ان كان ردك غلطت علي فيه والا شي الله يسامحك دنيا وأخره, وهاذي وجهة نظرك وأنا أحترمها. وبراحتك على رأيك.

الف مبروك الـ 3 نقاط وبأذن الله يواصل الزعييم انتصاراته

اليوم صار الفتى الذهبي مايعجبكم والجمعان بعد المفروض نشد من ازر اللاعبين جميعا ومانفرق بينهم كلهم جواهر والماس واولهم الذيييييييييييييييييييييييييييييييييييييييييييييييييييييييييييييييييب

الله يعطيك العافية