كل عام وانتم بخير .. ومبارك عليكم الشهر ..





صلاة الفجر .. !!

آخ آخ آخ آخ آخ آخ آخ آخ آخ آخ آخ آخ آخ





صلاة الظهر ..!!

آخ آخ آخ آخ آخ آخ آخ آخ آخ آخ آخ آخ آخ





صلاة العصر .. !!

آخ آخ آخ آخ آخ آخ آخ آخ آخ آخ آخ آخ آخ





صلاة المغرب .. !!


هذا هو برنامجي الصدقي ;) بس يوم دريت ان اليوم بكتبه حاولت تعديل الوضع


طبعا كنت مواصل ورجعت البيت الساعة 3 وشيك على النت الى ان جهز السحور ...

وانا مهمتي في ها الوقت اللي يعصقل مع الوالدة اروح اصحيه بطريقة خاصة ...

عاد امس سوقي مضروب ما في الا زبون واحد

تسحرنا ولله الحمد وكان فيه كبسة و الباقي من العشاء .. طبعا انا كنت ماكل

برا البيت قبل ما ارجع فكتفيت بالقيمات وجغمات من الماء البارد ..





أذن الفجر ورحت للمسجد والحمد لله صليت الفجر وجلست بعد الصلاة اقرأ قران

وشوف ابو لينا في آخر المسجد داق لطمة كنه سامي في توقيع الكناري

بعد ما خلصت حزبي شطفت من عنده ولقط الصفحة بسرعة أثره توه في سورة البقرة !!

عاد من يوم كنا صغار وانا وياه نتسابق من قرا اكثر ...

واستلمه نصايح على الفجرية ;) عاد قالي انت وين وصلت لا تصير خاتم القران وانا مدري !!

المهم بعد ما رفعت ظغطه شوي قلتله وين انا واصل من باب التحفيز

وارجع البيت واحط راسي تقريبا الساعة السادسة صباحاً..

وســـــحـــــبــــة طــــــــــــــويــــــــلـــــــــــة الــــى اذن الـــــــظـــــــــهـــــــــــــــــر





بعد صلاة الظهر جلست في المسجد أقرا قران ثم رجعت البيت واول ما دخلت نادتني الوالدة

يوم جيتها قالت تعال شف الشيخ عبد المحسن الاحمد في التلفزيون ( قناة المجدالعلمية )

جلست مع الاهل شوي وتسحبت الى غرفتي تسحب وافتح النت ودخل الزعيم

قريت يوم الوردة الزرقاء الحافل وقلت الله يعيني وقريت موضوع الفيروسة فيو وشيكت على ايميلي





ورجعت اختي امجاد من المدرسة وهي تصيح انا قلت شكلها في مطاقة بين البنات الله يستر

ويوم أسألها قالت ما ابي اصوم ؟؟

انا شكيت في الموضوع وبعد سين وجيم اكتشفت انها زعلانة لانها قامت الصبح وتعبت وهي تصحي

اخواني ولا احد معطيها وجه وتاخرت على المدرسة فتبي تنتقم من الصوم الله يهديها





وارسلتني الوالدة قبل صلاة العصر السوق اشترى بعض الاغراض للبيت وانا راجع ما شي في أمان الله ..

الا يجي سواق ماشي مليون وسط الحارة وبغى يوديني في خبر كان لكن الله ستر ..

انا ارتفع الضغط عندي مليون واقوله ايس فيه والا السواق طلع جرية ويقولي ايس فيه ..

عاد فكرت اني انزل لكن تذكرت المنتدى وقلت ما لها داعي اكتب في الزعيم اني تطاقيت مع بنغالي

وقلت لا حول ولا قوة الا بالله ورجعت للبيت ;)





واذن المؤذن لصلاة العصر وروح المسجد وبعد الصلاة جلست مع واحد من الشباب نتجاذب اطراف الحديث

وقرأت بعض الايات ثم رجعت للبيت واأخذ كتاب جميل في غرفتي بعنوان (( كيف تطيل عمرك الانتاجي ))

يجمع الاحايث والاذكار التي تتحدث عن زيادة العمر ثم ر رجعت لتفسير ابن كثير لشرح ايةاشكلت علي ..

وشاهدت جزء من برنامج للشيخ محمد العوضي على قناة الراي ...





وهنا يبدأ الحدث الاهم في هذا اليوم ...


دخلت المطبخ ابي اساهم في خدمة المجتمع فقالت لي الوالدة رح جب ؟؟؟؟ قلت يمى كل يوم جب جب

ما قلتلي يوم خذ ...قالت اجل خذ الزبالة على طريقك



الحدث الاهم في هذا اليوم ان الوالدة قالت لي ود شوربة للمسجد قلت سم من عيوني يابؤبؤ عيني

واخذ الحافظة وادربي راسي وانا في الحوش ابي افتح باب الشارع الحافظة ما كانت مسكرة زين

فنكبت الشوربة علي . .. وياهي حااارة

واحط الحافظة في الحوش وسيدى على المغاسل ابي ابرد واثر الماء حار واروح احط ايدي عند الكيف

عاد اخوي أحمد أعلن حالةالطواري في المنزل وحات الوالدة والوالد والعائلة كلهم

وانا رغم الالم اضحك من قلبي :p واقول ما في شي

عاد ثوبي كله شوربة بس ما احترقت الا ايدي اليسار والوالدة جايب عسل واختي جايبة معجون

واشتغل عندنا الطب الشعبي ودهن ايدي بكريم والحمد لله ربي ستر وسلم





وعند الاذان كان الافطار جاهز في الملحق وافطرت انا وولد خالتي واخواني التوئم وصديقهم

ورجعت بعد الصلاة وانا مفلل لغرفتي سيدا وشاهدت برنامج الشيخ على الطنطاوي رحمه الله

واخذت لفة سريعة بين القنوات ومابين الاصلي والتقليد





المهم كنت متردد وين اصلي الترويح ما بين الرشود واللحيدان ..

وفي هذه الاثناء اسمع تفحيط عند باب غرفتي وافتح والقى اخواتي فبادرتهم وين تصلون اليوم

قالوا اللحيدان .. قلت اجل انا بصلي عند الرشود;)

ويجي اخوي يقولي لا يفوتك الترويح مع اللحيدان في السطح ..كنك في الحرم !!!

انا صدقته وقلت اللحيدان والسطح مافي مشكلة نروح نصلي هناك ...

لكن الله المستعان طلع السطح غبااار كني في العاذرية مو الحرم !!!





وبعد صلاة التراويح مسكت طريق خريص متوجه الى الدوااااام ...

وكتبت لكم هذه الكلمااااااات ...


ما يستفاد من ما سبق ذكره ...


1- اكتشفت ان اغلب وقتي فضاوة غير طبيعية . .

2- ان الانسان يصدر قرارت خطيرة لاسباب غير منطقية ..

3- انه يجب اغلاق حافظات الشوربة باحكام ..

4- ان لا تصدق اخوك اذا قالك السطح مثل الحرم ...





الحمد لله على سلامتك يا مـاجد ورائعة يومياتك أتحفتنا بصراحة

وتستــمر يوميات أعضائنا مع متألق آخر

موعدكم غداً بإذن الله مع هلالي الظهران