محلات ابو ريالين لجميع انواع الحُب - نادي الهلال السعودي - شبكة الزعيم

هلالي الظهران · #1 12/09/2006, 04:12 AM

السلام عليكم ورحمة الله بركاته

أسعد الله هالوجيه والخشش السفره بالخير والمسرات .. شاكر لكم حسن اصغائكم مع اطيب الاوقات واحلى الاماني

,,

مقدمه

بينما كانت منيره تتصفح احد المنتديات من معمل الحاسب الالي القابع في جامعة عليشه في الاثناء التي تقوم فيها الدكتوره بشرح المحاضره ..وفي هذه الاثناء وبينما هي منهمكه في التصفح لفت انتباها اعلان عن وجود معرض للحب !!

بعد ما تشاورت مع زميلاتها وبعد تبادل انواع الحكي الماصل قررت ان تروح للمعرض وتشوف المعروضات وتعطيهم الزبده

...

يتبع

^
^
^

بدينا بحركات المصاله

..

لا بس الحين ابي من كل شاب ملحط منقطع يروح يجيبله دبدوب ولا قطو من الشارع ويخمه ويجهز صورة لبنت عجرم او شيماء سبت تحسبا للمشاهد الرومنسيه الساخنه ويفضل اطفاء الاضاءه

..

وعلى كل خبله تقرا الموضوع التزام الصمت واحضار كميه كبيره من الكلينكس تحسبا لاي حالة بكاء حاد وفي حالة عدم توفر الكلينكس لا مانع من استخدام الروب او الجلابيه في مسح الدموع المختلطه بالسعابيل

.. والرجاء الالتزام باللباس الشرعي الكامل

..

ختامن وقبل سرد التفاصيل الرجاء اغلاق الجوالات والجوال اللي فيه بنات يتم تحويله علينا

.. علما بانه يمنع دخول البزارين لوجود مشاهد مخله ويفضل تقصرون على الصوت لان به موسيقى

..

الجزء الاول .. في معرض الحب ..

دخلت منيره معرض الحب .. استقبلتها المضيفه السوريه وشربتها القهوه بنكهة الفراوله (واحد يسمع بالحب

) وعطتها كاتلوج انواع الحب المعروضه..

مسكت منيره الكاتلوج وبدت تنقي بين الانواع الموجوده وتسال المضيفه..

منيره: هيييه انتي يا العصلا .. وشو ذا حب قيس وليلي وبكم يبيعونه؟؟

المضيفه: شوو عصلاااا .. ماعلينا هيدا اغلى نوع عنا لانو بدو تضحي كتير .. يعني ازا بدك تشتريه لازم تنتحري علشان اللي بتحبي يؤبر ئلبوو..

منيره: لا وجع ما ابيه عساه الماحي اللي يخلخل عظامه .. طيب هذا حب روميو وجولييت بكمم؟؟

المضيفه:باين عليك مزوئه كتيره لانو هيدا من احلى ئصص الحب .. بس لتشتريه بدك ثلاث عمليات لنخرتك وبدك ريجيم لمدة سبع سنين و.....

منيره: لاوجع مابيه هونت .. طيب حب هذول جاك وخويته حق التايتنك مكتوب عليه تخفيض

.. على كم؟؟

المضيفه: لا ضفي وجهتس هذا مهوب لكم يا السعوديين ( مو بكانها خربتها

) ..

منيره: طيب وشو ارخص شيء عندكم؟؟

المضيفه: ارخص حب عنا هو حب هلالي الظهران وشغالة جدهم مرمر

..

عاد خلوني احكيكم بنفسي هالقصه .. في يوم من الايام وصتني جدتي اشتريلها علبة فيكس ودخون وعلبة بسكوت الموز ابو كيسه خضرا من البطحا.. جبت الاغراض والا هم مزهبين الغدا واقلط معهم :p .. قامت جدتي تكشخ قدامي تنادي مرمى يامرمى جعلك الصمخ؟؟!!

وانا اقولها.. عسى ماشر يايمه لايكون عازمين الدعيع

(ياحبيله ابو دعدع)ومسوين له تكريم

.. ينقز ولد خالتي الصغير بحلقي .. لاهذي شغالة جدي الجديده واسمها مرمانوها!!

والله وتجي مرمانوها وتحط السماط ومعه الرز البخاري ودجاج شوايه وشطة كريستال

.. وتبتسم لي ذيك الابتسامه .. وانا اخق واقوم اناديها مرمر مرمر وين اللبن؟ وما احس الا وجدي يصقعني ذاك القفاا!!!

وتدلعها يا الماخوذ يا الصايع يا قليل الحيا قم لابارك الله فيك !! وانا اقوم وطقتني البكوه واطلع فوق وانا مطنقر بوزي .. وقررت عنادا بجدي اني اتحرش بمرمر

..

بعد ماشفتها خلصت من غسيل الصحوون ودخلت غرفتها وصكرت الباب

.. رحت لمها ودقيت الباب .. فتحت الباب وهي مغسله شعرها ويهفهف وريحة الفيكس شاقه خشمي شق وقالت.. ايش يبغى؟

قلت لها .. في ثوب حقي خلاص غسيل ؟ قالت لا وصمخت الباب بوجهي ..

رجعت بعد خمس دقايق وطقيت الباب .. فتحت وقالت ايش يبغى؟

قلت لها.. خلاص ثوب غسيل؟ قالت لا وصمخت الباب مرتن ثانيه..

رجعت بعد خمس دقايق ونفس السيناريو .. قالت انت دقو باب مررره تاني انا في كلام بابا

( ماتحسون انها كاسره عيني ههههههههه)

رجعت بعد ساعه وطقيت الباب .. فتحت والشرر بعيونها ايش في انتا؟

قلت لها.. بابا موجود؟ قالت لاا

.. قلت طيب في ثوب حقي خلاص غسيل (مصالة بزارين

) ..

ههههههههههههههههههههههههههه وتطلق مرمر ضحكه معبره..هذي يسموونها الحب من اول ضحكه

..

من عقبها بدات قصة حبنا انا ومرمر .. صرت كل يوم اغسل الصحون عنها واشتري لها بطايق سوا واجيب اندومي وهي تطبخه وناكله بعشنا

(ورا الخزان اللي بالسطح واذا حرينا نزلنا نسبح بالخزان .. بس الحق انها تلبس مايووه اسلامي ههههه) وهي تبادلني الحب وتمرخلي ظهري وكراعيني كل يوم

..وهامت في الارض حبا وعشقا لدرجة انها سوتلي عمل علشان ما اجحدها..وبدات الاجيال تلو الاجيال في الاستشهاد بحب مرمر ووفاء هلالي

.

نرجع للدلوخ اللي بالمعرض ..

منيره: طيب خلاص ابي واحد خبل زي هاللي حب مرمر

..

المضيفه: لا عيوني شرط هالنوع من الحب انك تحبي واحد من اخوان مرمر ولا واحد من عيلتها!

منيره: يوووووووووه مالت عليكم مالقيت شي ينفعني ياويل حالي(كسرت خاطري:p ) .. طيب ما القى عندكم حب زي حب هاليومين؟؟

المضيفه : لا عيوني هيدا الحب نوزعه مجاني

..

ههههههههههههه تخيلوا وجه منيره وهي ملقطه خشتها وتجرجر برجولها وهي خارجه من المعرض تجر اذيال الخيبه والاحباط

..

الجزء الثاني.. جامعة عليشه-البوفيه..

اجتمعت منيره وزميلاتها كعادتهم اليوميه في البوفيه .. وبدأ السيناريو والازعاج اليومي المعتاد الجميع يتحدث ولا وحده تستمع

..

فجأه صرخت منيره .. يابنات ماقلتلكم وش سويت بمعرض الحب امس !

تنقز حصه بحلق منيره : اييييييييييه يا منيره تكفى علميني تريني والله ابي احب مثلكم وش زودكم تحبون وانا لأ:sad: ..

تتدخل ريم بتهكم : ليه ياحصه انتي ماعمرك حبيتي احد او احد حبك يا مسكينه؟!

تجيب حصه ببراءه :الا مره وحده حبيت ولد الجيران!

ريم بخبث: شلون؟؟

حصه : مره كنت نازله الصبح وابروح مع السواق .. وهو كان واقف عند بيتهم ويوم شافني صمخ بالباب وبغى يتكفرس على خشته من الادب يبي يصد عني !

الانظار متجهه صوب حصه .. طيب وش صار بعدين؟!

حصه: وشو بعدين .. جاته بعثه لامريكا وقلت بس اكيد يبي يحبني ثمن يتزوجني وياخذني هناك ويخليني اسوق

(يقلع ابو طموحكم هههههه) .. بس حسافه راح هناك سنتين وحب وحده مقروده يقالها ماريا مرسيدس

(كاني سامعن فيها

) .. ثمن رجع وهو مدمن وقاضي:sad: ,,

ريم تعلق باستهزاء وغرور: ههههههههههههه ياحليلك يا حصه .. شايفه هالتعليقه اللي انا لابستها جابها لي ناصر من لازوردي ..وناظري هالساعه اهداني اياه سعود ..وتعالي عندي البيت واوريك الطقم اللي شراه لي فيصل من ليسانزا

..

منيره تقاطع ريم: اها بس يا التسذوبه لا تلعبين على البنيه

.. خلوني اسولف لكم عن معرض الحب!

بدأت منيره تسرد الزياره من البدايه الى النهايه .. والبنات متسمرين حولها يسمعون بانصات وكانهم يناظرون بمسلسل خليجي!

بعد ما انتهت منيره من السالفه ..بدأوا البنات يتحسرن .. وحده تقوله آآآآآه ياقيس وينك يابعد عمري ليتك موجود كانك علمتك الحب

.. والثانيه تقول اخخخخ بس وينه هلالي الظهران هالثقيل لو يعطينا وجه بس كان انسيه مرمر وطوايف مرمر

.. ويطلع صوت ريم من بين الاصوات .. خلوا عنكم مافيه احلى من المجاني حقنا

(عاطبتها الخبله ههههه)..

وقطع حوارهم فجاه .. صوت هواش في اخر البوفيه عند الناحيه المظلمه!

وحده تصارخ ياداشره والثانيه ترد عليها تقول الله يدمر مستقبلك ويفظحك !!
ووحده تقول الهيئه الهيئه انحاشو (هذي راعية اشاعات

),وحده تقول ماتت ماتت , ووحده ماسكه الزاوية وتصيح مالها أي دخل بالهوشه؟!

وفي الكورنر اثنين عربجيات كل وحده ماسكه بشوشة الثانيه تكفيخ وتقبيص وعض وجنبهم وحده ثالثه تناظر وهي مستانسه!

فجاه قامت الثالثه وصرخت فيهم .. بعدين انتي وياها اذا مافكيتوا بعض ترا ولا وحده فيكم بتصير صاحبتي

)..

بعد ما انتهت الهوشه .. رجعت منيره وشلتها لمكانهم وقاموا يكملون سوالفهم ..

منيره تستانف الحديث :عاد الله يقطع الشباب وسوالفهم .. انا من رحت معرض الحب وماعاد يملا عيني هالاحمد صح انه يحبني بس الشباب هالايام ماعاد لهم امان!

تصدقون يا بنات مره اخوي رقمني!

كنت طالعه معه السوق ومغيره اسمي بالبلوتوث وكل شوي يرسلي .. مره اغنية راشد يامغلط في تليفوني .. ومره يرسل رقمه ومره صورته!

تدخل نوف معهم على الخط : لا لا الا حبيبي هو يحبني ويموت فيني ومايقول لي لا ابد .. ودايم يقصد فيني ويتغزل بجمالي

..

تتقاطع معها ريم .. ورينا وش كتب عنك ياخبله ؟!

ريم.. هههههههههههههههه وانتي صدقتيه هالرساله جايتني من اكثر من واحد!

نوف : لا حتى ولو انا متاكده انه يحبني!:sad:

ريم: طيب هاتي رقمه والحين ندق عليه ونختبره!

ريم تتصل على سعود خوي نوف : الوو ... هلا بالزين كله هلا سعود !

سعود: مين انتي؟ وكيف عرفتي اسمي؟!

ريم: يوه وشفيك نسيت انت اللي مرقمني امس !

سعود: هلا والله .. بس انتي اي وحده فيهم؟! انتم اللي سيارتكم بيضاء ولا زرقاء؟!(اخخخخخخ يالنصاب)

ريم تقطع الخط ونوف تدخل بحالة بكاء مريره:sad: ( ايه ثمن تجي المنتدى وتفرغ وحنا نبتلش

) ..

تتدخل الجداويه رانيا .. وانتو وشلكم بالحب والهرج الفاضي! خليكم فري زيي انا الواد اللي يعجبني أأشرلوا يرقمني نروح نتمشى سوا بكوفي وبعدين يرجعني ويادار مادخلك شر

..

تتدخل مها : لا يا حبيبتي انتي خبله! انا وش بستفيد اذا طلعت معه كذا! انا ما اطلع مع واحد الا اذا جاب لي هديه او سدد فاتورتي ولا عزمني في ابل بيز ولا الريف الايطالي ( هذي منتهيه

) ..

منيره: على طاري الريف الايطالي مره صارلي موقف محرج .. كنت خارجه انا واختي وبنات خالتي للريف الايطالي وكاشخين.. وكان عند الاشاره واحد راعي رانج ومشخص ووسيم وانا خاقه معه اناظر

..وبالصدفه وقف معنا عند الريف الايطالي!

هو بيدخل قسم العزاب وحنا بقسم العوايل .. وانا اناظر فيه من تحت لتحت علشان مايشوفني ويكبر راسه بعدين

.. ما وعيت الا وانا داعسه على عبايتي وجايبه الرصيف كله على وجهي هههههههه ..

كلهم ضحكوا الا مها ماسكه الجريده وتناظر فيها ومسرحه!

ريم: وين الحلو سرحان؟!

مها: ياسر القحطاني فديته صورته تجنن وماخذن قلبي وعقلي وروحي !

ريم: اقول اها بس .. العبي على قدتس بس!

مها : الا يا بنات تروني اعرف توقيع ياسر من تبي اوقع لها ؟! ( على فكره مها ماتجي الا وهي طاقه تيشرت الهلال وعليه رقم ياسر تحت بلوزتها

) ..

منيره: كلن على همه سرا وانا على المحاضره سريت ! بس لا تنسون يا بنات الليله نبي نطلع الفيصليه ونهبل بالشباب بلا حب ولا خرابيط!

الجزء الاخير .. مايستفاد من القصه..

1- اذا كان في بيتكم شغاله .. انتبهوا على عيالكم منها وانتبهوا عليها من عيالكم

..

2- احذروا من رفقاء السوء والفراغ وخصوصا البنات.. وماني على باطل فهو باطل واللي فيه خير مارماه الطير

..

3- يابنات ارفقوا علينا .. المنتدى قلب كانه محلات ابو ريالين لجميع انواع الخواطر والقصائد والتنسيق مجاني

..

4- كل عام وانتم بخير ومبارك عليكم الشهر ..

5- مافيه شي بس موضوعي وعلى كيفي

.. يالله انقشعوا جميعا

..

الهلال حـبي · #2 12/09/2006, 04:28 AM

السلام عليكم
تسجيل حضور ؛؛ لي عوده

iq1399 · #3 12/09/2006, 04:36 AM

هيه انت يالظهراني وش جايك اليوم على البنات

وبعدين تعال انت ماوراك جامعه تظفك عننا

يوم شفت موضوعك وانا اقول ياويله تسانه يحتسي عن الموضوع اللي انا كاتبه ..

والله لخش بعينه ...

اشوا ماجبت طاري الموضوع ولا شيء ولا تسان انت الحين بالشميسي هوسبتل هيلث <<<< مالها دخل

المهم لا عاد تكثر مثلوثه ولبن تال الليل .. تراها خطيرة

وبعض الاحيان او كثير تخليك تجيب العيد

اما ذي اللي لابسه تي شيرت ياسر ... مدري ليه حسيت انه صدق

والا اللي تسذب وتقول جت الهيئة ... شكلها انوااع البثاره

على فكرة انت وراه لك فترة ما تدخل ماصدقت احد يفكك من الاخبار وتسحب ..

على قول الكويتين <<< سحبت علينا مولية

لا عاد تطول علينا ..

بس ترى ان بديت تزعل البنات بمواضيعهم الحساسه بيحجرونك بالزاوية ويذبحونك ويقطعونك تقطيع ثلاجة

فرصه ضايعه · #4 12/09/2006, 05:09 AM

وعليكم السلام ورحمة الله وبركاته

ياهووووووووووه

....

بحجز لي مكان

....

عشان يجيني الرد بدري

_____________________________________

تيت

وش هالحركات

....

ماشاء الله عليك رجعت لياقتك بسرعه:p .... مب مثلي كني عجيّز يدفونها بعربيه وكل شوي تفرمل عليهم

أثرك فاهملهن وعارفلهن هالأشكال;) ....
بس ترى والله فيه مثل ذا اللي تقول:sad: ....
الله يكافينا شرهم

,,,

ببدى من الأخير وبكيفي

....

إقتباس


	- مافيه شي بس موضوعي وعلى كيفي .. يالله انقشعوا جميعا ..

طيب اصبر خلنا نرد

....

إقتباس


	4- كل عام وانتم بخير ومبارك عليكم الشهر ..

وأنت بصحة وسلامه

....
علينا وعليك ....الله يجعلنا من صوامه وقوامه ويبلغناه قل آمييييييين

إقتباس


	3- يابنات ارفقوا علينا .. المنتدى قلب كانه محلات ابو ريالين لجميع انواع الخواطر والقصائد والتنسيق مجاني ..

الحمد لله مالي في الخواطر

....
عربجيه الأخت:p <<< بتطلع منها

إلا صدق ورى مايفتحون منتدى خاص بالخواطر والشعر

لأن أكثر المواضيع في المجلس خواطر وأشعار ;)

إقتباس


	2- احذروا من رفقاء السوء والفراغ وخصوصا البنات.. وماني على باطل فهو باطل واللي فيه خير مارماه الطير ..

كلام سليم ورائع

....
بس وراك خربتها :p أجل ماني أخبرها مابُني

إقتباس


	1- اذا كان في بيتكم شغاله .. انتبهوا على عيالكم منها وانتبهوا عليها من عيالكم ..

والله أنكم تخوفون

....
ياحليلنا حنا

... على الأقل ينخاف علينا بس :p مب ينخاف مننا

يووه تعبت وأنا اقتبس من الأخير خلنا نرجع من الأول أفضل

إقتباس


	..وفي هذه الاثناء وبينما هي منهمكه في التصفح لفت انتباها اعلان عن وجود معرض للحب !!

عليهم معارض بعد ماخلو شي :p ....
ماسمعت عنه متى صار

<<<< دخلت جو

إقتباس


	لا بس الحين ابي من كل شاب ملحط منقطع يروح يجيبله دبدوب ولا قطو من الشارع ويخمه ويجهز صورة لبنت عجرم او شيماء سبت تحسبا للمشاهد الرومنسيه الساخنه ويفضل اطفاء الاضاءه ..

عاد مالقيت إلا ذا الثنتين :p ....
فيه أحسن منهن واجد

....

إقتباس


	وعلى كل خبله تقرا الموضوع التزام الصمت واحضار كميه كبيره من الكلينكس تحسبا لاي حالة بكاء حاد وفي حالة عدم توفر الكلينكس لا مانع من استخدام الروب او الجلابيه في مسح الدموع المختلطه بالسعابيل .. والرجاء الالتزام باللباس الشرعي الكامل ..

الله يرجك

....
قاعده أقراها وأنا لابسه عباتي ومخليتها فوق راسي بعد:p :p
ومتولمه للدموع أحسب فيها حياة أو موت

... مع أن دموعي ماتطيح إلا في الشديد الأوي

على قوله أخوانا المصريين;)
كل هذا عشان اطبق شروطك بحذافيرها

<<< قويه ذي مدري وشلون طلعت

وفي الأخير حتى عبرتي ماطلعت

هي في الشرق وقصتك في الغرب:p

إقتباس


	منيره: لاوجع مابيه هونت .. طيب حب هذول جاك وخويته حق التايتنك مكتوب عليه تخفيض .. على كم؟؟ المضيفه: لا ضفي وجهتس هذا مهوب لكم يا السعوديين ( مو بكانها خربتها ) ..

أجل منهو له;) ....
معروض عندنا ولا يبونا نستخدمه

...
أكيد فيه سر

إقتباس


	المضيفه: ارخص حب عنا هو حب هلالي الظهران وشغالة جدهم مرمر ..

أفا ياذا العلم

....
أثرك رخيص

....
ولا ...بعد وش هالحب اللي مع شغاله الله يحوم كبدك

إقتباس


	في يوم من الايام وصتني جدتي اشتريلها علبة فيكس ودخون وعلبة بسكوت الموز ابو كيسه خضرا من البطحا..

أبوووك يالقدم

....

إقتباس


	لاهذي شغالة جدي الجديده واسمها مرمانوها!!

عليها اسم بعد :p ...
إلا بسأل ليش دايم اسماء الأندونيسيات بحرف السين

....
سرميتي وسيتي وسونا وساتي ....إلخ<<<<< أسماء شغالاتنا اللي عندنا

ماعدا حقتنا اسمها غريب شوي كل من سمعه ضحك

مانيب قايله اسمها تحملوني أثمكم;)

إقتباس


	وما احس الا وجدي يصقعني ذاك القفاا!!!

مزدين فيك:p ....<<< مدري تنكتب كذا ولا غير

إقتباس


	( ماتحسون انها كاسره عيني ههههههههه)

لأنك ماتنعطى وجه

....
وجهك مغسولن بمرق

إقتباس


	صرت كل يوم اغسل الصحون عنها واشتري لها بطايق سوا واجيب اندومي وهي تطبخه وناكله بعشنا

ياعيني عالتدليع اللي كذا

....
عاد أهم شي الأندومي

... تراه أغلى منك بالنسبه لها

إقتباس


	اكيد يبي يحبني ثمن يتزوجني وياخذني هناك ويخليني اسوق (يقلع ابو طموحكم هههههه) ..

والله ياأنت تسمع بطموحنا;) ....
عن نفسي ماتستهويني السياقه بتاتا البته

... وأحس أني ملكه إذا ركبت وواحد يسوق لي مب أنا اللي اسوق

بس بعض المرات تجيني خمّات ودي اسوق في البر :p ...

إقتباس


	فجاه قامت الثالثه وصرخت فيهم .. بعدين انتي وياها اذا مافكيتوا بعض ترا ولا وحده فيكم بتصير صاحبتي وبشوف وحده تريحني غيركم ;)

ياكثرهم

...
وحده في الكليه معروفه بإسم متعب

ولها ثنتين يماشونها كل يوم دور وحده

...
طبعا ماتختار إلا بنات نعومات ... الله لا يبلانا :sad:

إقتباس


	مها: ياسر القحطاني فديته صورته تجنن وماخذن قلبي وعقلي وروحي !

والله ياهو عنده سوق بين البنات غير طبيعي

الله يهديهم بس :sad:

إقتباس


	منيره: كلن على همه سرا وانا على المحاضره سريت ! بس لا تنسون يا بنات الليله نبي نطلع الفيصليه ونهبل بالشباب بلا حب ولا خرابيط!

طيب سؤال ...

ليش البنات هن اللي يغازلن الحين

مب مثل منول الشباب هو اللي يبدى:sad:

والله إذا شفتهم بالسوق رحمتهم ... أحس فيهم حاله نفسيه

...

الله يكافينا شرهم ويهدينا ويهدي لنا

يعطيك العافيه هلالي الظهران على الموضوع الرايق

... دخلت جو مع موضوعك

....
فوائدك عال العال

.... لا تحرمنا طلتك

M e T o O o · #5 12/09/2006, 05:15 AM

الحمد لله ع السلامه يالظهراني .. وولكم باك

,

يعطيك العآفيه ع الموضوع اللي بـ(ـوقته) ؛)

,,

إقتباس


	3- يابنات ارفقوا علينا .. المنتدى قلب كانه محلات ابو ريالين لجميع انواع الخواطر والقصائد والتنسيق مجاني ..

اما هذي صدقت فيها ,

< < بينجلد الحين من بعض النآس :p ,

الـنـادر · #6 12/09/2006, 05:37 AM

looooooooooooooooooooooooooooooooooooooooooooooooooool
^
^
^
كذا الضحكه بالامريكي

خخخخخخخخخخخخخخخخخخخخخخخخخخخخخخخخخخخخخخخخخخخ
^
^
^
كذا الضحكه بالعربي

وش هالخرابيط يا هلالي الظهران

وش هالسواليف اللي طلعت كذا فجأه من دون سابق انذار

يا اخوي علمنا انك بتنزل موضوع عشان نجهز نفسنا موضوعك

إقتباس


	بعد ماشفتها خلصت من غسيل الصحوون ودخلت غرفتها وصكرت الباب .. رحت لمها ودقيت الباب .. فتحت الباب وهي مغسله شعرها ويهفهف وريحة الفيكس شاقه خشمي شق وقالت.. ايش يبغى؟ قلت لها .. في ثوب حقي خلاص غسيل ؟ قالت لا وصمخت الباب بوجهي .. رجعت بعد خمس دقايق وطقيت الباب .. فتحت وقالت ايش يبغى؟ قلت لها.. خلاص ثوب غسيل؟ قالت لا وصمخت الباب مرتن ثانيه.. رجعت بعد خمس دقايق ونفس السيناريو .. قالت انت دقو باب مررره تاني انا في كلام بابا ( ماتحسون انها كاسره عيني ههههههههه) رجعت بعد ساعه وطقيت الباب .. فتحت والشرر بعيونها ايش في انتا؟ قلت لها.. بابا موجود؟ قالت لاا .. قلت طيب في ثوب حقي خلاص غسيل (مصالة بزارين ) ..

و لك وجه تطق الباب بعد صمخت الباب الاولى

إقتباس


	3- يابنات ارفقوا علينا .. المنتدى قلب كانه محلات ابو ريالين لجميع انواع الخواطر والقصائد والتنسيق مجاني ..

والله الواحد ما يدري وش يسوي اذا سمع صوت بنت او بنت داقه على جواله

الله يعطيك العافيه ي يا هلالي الظهران على القصه و الروايه الجميلة و النصائح

و

سلام عليكم

تيماوي · #7 12/09/2006, 05:48 AM

@ حبيت يكون لي حضور بموضوعك واقول الحمد لله على رجعتك بالسلامه ...

الهنوووف · #8 12/09/2006, 05:48 AM

إقتباس


	السلام عليكم ورحمة الله بركاته

إقتباس


	أسعد الله هالوجيه والخشش السفره بالخير والمسرات .. شاكر لكم حسن اصغائكم مع اطيب الاوقات واحلى الاماني ,,

وعليكم السلااام ورحمة الله وبركاتة

الله يحيك والحمد لله على سلامتـــك

تو مانور المنتدى

إقتباس


	بينما كانت منيره تتصفح احد المنتديات من معمل الحاسب الالي القابع في جامعة عليشه في الاثناء التي تقوم فيها الدكتوره بشرح المحاضره ..وفي هذه الاثناء وبينما هي منهمكه في التصفح لفت انتباها اعلان عن وجود معرض للحب !!

إقتباس


	بعد ما تشاورت مع زميلاتها وبعد تبادل انواع الحكي الماصل قررت ان تروح للمعرض وتشوف المعروضات وتعطيهم الزبده ...

معمل الحاسب بالملز

إقتباس


	وعلى كل خبله تقرا الموضوع التزام الصمت واحضار كميه كبيره من الكلينكس تحسبا لاي حالة بكاء حاد وفي حالة عدم توفر الكلينكس لا مانع من استخدام الروب او الجلابيه في مسح الدموع المختلطه بالسعابيل .. والرجاء الالتزام باللباس الشرعي الكامل ..

إقتباس

اجل بقرا وقت ثاني مالي خلق ابكي الحين

لاتخاف لباس شرعي

إقتباس


	ختامن وقبل سرد التفاصيل الرجاء اغلاق الجوالات والجوال اللي فيه بنات يتم تحويله علينا .. علما بانه يمنع دخول البزارين لوجود مشاهد مخله ويفضل تقصرون على الصوت لان به موسيقى ..

والله جوالي مسكر الحين انتهى شحن البطاريه >>>>>البطارية افهموا يعني لازم اروح اشحن بالشاحن

اقوول عقب هالمقدمــة خفت شووي مدري ليش برووووح افطر وراسي صدع من الاخباار
بررجع اكمل قراية

الهنوووف

كانت

هنا

وستعوود قريباا

بعد العووووودة

إقتباس


	وانا اقولها.. عسى ماشر يايمه لايكون عازمين الدعيع (ياحبيله ابو دعدع)ومسوين له تكريم .. ينقز ولد خالتي الصغير بحلقي .. لاهذي شغالة جدي الجديده واسمها مرمانوها!!

إقتباس

انا واختي نسميه ابودعدع مدري احنا اخترعناها او هي الكل يقولوها

إقتباس


	تصدقون يا بنات مره اخوي رقمني! كنت طالعه معه السوق ومغيره اسمي بالبلوتوث وكل شوي يرسلي .. مره اغنية راشد يامغلط في تليفوني .. ومره يرسل رقمه ومره صورته!

انا مدري وش هالطبع الشين الي يرسل رقمة وصورتة اللهم لاشماته بس

ولا كل واحد مضبط له بطاقة بالفوتشووب

عيالنا من جحر لدحديره

إقتباس


	1- اذا كان في بيتكم شغاله .. انتبهوا على عيالكم منها وانتبهوا عليها من عيالكم ..

حتى الشغالات ماسلموو حالتكم صعبه والله

إقتباس


	2- احذروا من رفقاء السوء والفراغ وخصوصا البنات.. وماني على باطل فهو باطل واللي فيه خير مارماه الطير ..

إقتباس

ايه والله الصديقه تزين لصديقتهاا طريق الشرر

انا مدري وش تستفيد الوحدة اذا خلت صديقتها تكلم او تطلع مع احد

جعلتس مانيب قايلته كانك داجه دجي لحالك وش تبين ببنات خلق الله معاك

[quote]

إقتباس


	3- يابنات ارفقوا علينا .. المنتدى قلب كانه محلات ابو ريالين لجميع انواع الخواطر والقصائد والتنسيق مجاني ..

اذا مافي الا خواطر وقصائد عادي بس التنويع زين

إقتباس


	4- كل عام وانتم بخير ومبارك عليكم الشهر ..

وانت بخير اخوووي

إقتباس


	5- مافيه شي بس موضوعي وعلى كيفي .. يالله انقشعوا جميعا ..

إقتباس

بعد ردي وعلى كيفكي انقلعووو جميعاا

>>>خربتني

اجل انا اقول انقلعو

تخيلت القصه طووويلة بس ماشاء الله اسلووبك يخليها قصيره ومسلية

>>>لاتصدق

حتى ماحسيت بنفسي الا شربت العصير كله مدري الببسي

>>>النصب بدا

ياليتك جربت الاختصارات (الابتسامات) بتطلع جنان

هذي بمعمل الحاسب منيرة مدري وش اسمهاا صورتها لكم

وهذي بالكوفي شووب

منيرة وحصه وريم

اسلــوووب مشــوووق ومتميــز كعادتـــه هلالي الظهران
يمتعنــا بحرووفــة
هلالي الظهران والقصص المشوووقة ومايستفاد من القصه ماركــة مسجلــة مدري هي اصلي او تقليد
اعترف من الي يقلد انت او ابو ساره

لا امزح كلكم اخوان وعيال ديرة مايفرقكم منتدى >>>عجوز فاهمه غلط

تمياتي لكــ ولقلمــك التوفيق في مسيرة الابداع والتميـــز

دمـــت للزعيــم

حماك الله

إقتباس

اخر تعديل كان بواسطة » حبي تيماوي في يوم » اليوم عند الساعة » 05:45 A

وش انت قايل ياخووي الفضوول وصل عندي شي مايتصوور مدري ليش

الهنووووف

كانت

هنا

ورحلت

سندريلا الهلال · #9 12/09/2006, 05:55 AM

هلالي الظهران

الحمد للة على السلامة

أما الشروط والتنبيهات تقل داخلين سينما

وراك شايل على البنات حملة والله أغلب مايكتب ملاحم ولا قصائد ولاخواطر الا الشباب

البنات مايكتبون الا بالقطّاره

لان القافية تبطي تطلع معهم

لأن خواطرهم من النوع الأصلي

وين لقمة القاضي على غفلة

أما فعلاً بصراحه الامر اللي تطرقت له خصوصاً العاملات المنزليه لابد من عدم اغفاله والانتباه له لان الظاهر مافيه بيت يوجد فيه اكثر من ثلاث افراد الا والشغاله تشاركهم فيه الله يصلحنا بس

ورفقاء السوء وما ادراك مارفقاء السؤ الله يكفينا شرهم ويبعدنا عنهم ويرزقنا الصحبة اللي تعينا على الخير وللخير يارب

الله يعطيك ألف عافية على الموضوع الفكاهي شكلاً المفيد مضموناً

بالتوفيق لك

سحرالشرق · #10 12/09/2006, 06:59 AM

اللقافة حولتني تحت برج الفيصلية

أقصد جابتني هنا وعقب خلصت من الموضوع وقعدت أرد يجي هالمقرود يقول وصليني المدرسة أخاف أروح لحالي

يالله أروح أوصله ثم أرجع يمدحون النظام هالأيام يعني لو ألقى أحد ماخذ مكاني أتفاهم معه

@@@@@@@@@@@@@@@

عقب مارجعت

هلا بأهل الظهران كلهم عاد تصدق وانا داخله أقول فيه نور غريب يوم شفت موضوعك قلت اهاا بس عرفت سر النور<<<اخلصي علينا

عودة جميلة بجمال روح تضمها جنباتك!!
وحضور مختلف بابتسامة ترسمها حروفك!!

أقول يالظهراني أموت وأعرف وش سبب تعديل حبي تيماوي لموضوعك<<<<تركت كل الموضوع وطالعت التعديل تحت صدق لقااااافه أصلي

عموماً يا سيد الرقالة=الرجال في رواية عن مصري:p
يوم تحكي بياسر القحطاني ذكرتني بوحده خبله منذ ولدتها أمها

تقول تصدقين يا ابتسام إذا شفت عدنان حمد<<<حقart تجيني حرارة وما أبي أحد يطالعني البنت صغيره عمرها 16سنة والله رحمتها

بحق لا اعلم أجرم من ومن تقع عليه مسؤولية ما وصل إليه حال فتياتنا..
الأهل؟؟
أم المجتمع؟؟
أم الفراغ العاطفي؟؟

لكن يظل الفراغ العاطفي الذي يعاني منه أغلب الشباب ذكورا وإناثا هو السبب الرئيسي في مثل هذه المشكلة..
وللمجتمع في مشكلة الفراغ العاطفي الباع الطويل فما زلنا نُجّرم ونوبخ كل من يصرح بمشاعره لصديق أو لقريب صغيرا كان أو كبيرا وياللعار!!

بعدين أنتم وش فيكم علينا كل واحد لازم يقحمنا في مواضيعه

يالظهراني أي خواطر اللي تحكي عنها ممكن هي خاطره لكن ليس بالضرورة تكون في إطار((حبني وأحبك))
بعدين بدال ما أنت قاعد تتطالب بإننا نخفف شوي بالتنسيق أحسن لك تدور لك أحد يعطيك دروس بالتنسيق ويفكنا من إزعاجكم كأن ما ينسق غير البنيات

هلالي الظهران..
بلغك الإله بفضله وكرمه شهر الرحمة كما بلغك شعبان وأعانك على قيامه وصيامه وصالح الأعمال..

من الأعماق تحية لك أيها المتميز...

abu_riman · #11 12/09/2006, 09:39 AM

الحمدلله على السلامة يا بطل ..
أتمنى تكون لي عودة ..

البالون · #12 12/09/2006, 02:50 PM

وعليـكم السـلام ورحمـة اللـه وبـركاتـه

أسفـرت وأنـورت و المـجـلس بـقدومـك مبصـووط

ياهـلا واللـه بـ الظهـرانـي ,,

يقـولون أن جـدك سمـع عن السـالفـة ونـاويك نيّـة قشـراء << يقـولون أنا ماقلت شي

ويقـولون أنـه نـاوي يسـوي عـلاقـة بيـنـه وبيـن مـرمـر بـس بعـد مايدبغـك << خخخخخ

مشكـوور وكـرر حضـورك ,,

الهلالي دائماً · #13 12/09/2006, 11:01 PM

هلااااااااا وغلااااااااااااا ... هلالي الظهران

يالله ان تحييه .. وعوداًحميداً ...

إقتباس


	محلات ابو ريالين لجميع انواع الحُب

لا ابشرك صديقي .. اللحين صار كل شي بريال وبسطات

على الشارع وغمارة الددسن .. لا محلات ولاهم يحزنون ..

إقتباس


	أسعد الله هالوجيه والخشش السفره بالخير والمسرات .. شاكر لكم حسن اصغائكم مع اطيب الاوقات واحلى الاماني ,,

الله يسلمك هلالو وش المقدمة اللي تفتح النفس ياخي كذا بصير

كلي أذن صاغية وقلب واعي وخشة مفهيه وبوز مطنقر

إقتباس


	يابنات ارفقوا علينا .. المنتدى قلب كانه محلات ابو ريالين لجميع انواع الخواطر والقصائد

أولااك تعال هون ابو شريك ...

اي شو فيك فاش خلئك على الصابايا أي خيو خليهون يفضفضوا ..

من شان الله .. دخيلك لا تواخذهم ... ((خواطرهم توقطر ابداااع ))

وبعدين .. لشو معرض الحب هيدا .. اي الحب ملحوش ( منطول) بكل إرنة

إقتباس


	المضيفه: ارخص حب عنا هو حب هلالي الظهران وشغالة جدهم مرمر ..

بيني وبينك اسم الدلع مغري .. وقد قال فيه الشاعر :

تمرمرت في حب مرمر كأنني ** مكر مفر مقبل مدبر معا ..

هلالو اتوقع ان شغالة جدك جاية من المكسيك ..

وعلى فكرة وشفيك شاب على ماريا مرسيدس البنية راحت ايامها

وصارت دقة قديمة .. الحين روبي ما كل الجوووو

إقتباس


	وحده تصارخ ياداشره والثانيه ترد عليها تقول الله يدمر مستقبلك ويفظحك !! ووحده تقول الهيئه الهيئه انحاشو (هذي راعية اشاعات ),وحده تقول ماتت ماتت , ووحده ماسكه الزاوية وتصيح مالها أي دخل بالهوشه؟!

الله يرجك ياشيخ ...

عليك وصف ولا احمد شوبير في مباراة بين يال مدريد و نسيم حميد

== >>> لووووووووووووووول

بس معجبتني راعية الاشاعاات ذكرتني واحد من العيال تخصص اشاعااات
جا جا والله جا ...من حروف الهجااااء جاجاجا ....جازورا جاجاجا... جمجوم ...
== >>> خبرة جاااااااأت هههههههههههههه

إقتباس


	- احذروا من رفقاء السوء والفراغ وخصوصا البنات.. وماني على باطل فهو باطل واللي فيه خير مارماه الطير ..

هنا الزبدة ....
كلامك اخوي هلالي الظهران حقيقة لا خيال ..
من جد هذا اهم ما يستفاد من القصة ...

إقتباس


	والتنسيق مجاني ..

الا التنسيق يا ابو عبد الله ..تراه موضوع حساس .. و في ناس متعقدين منه

ولو صار برسوم عز الله طفرناااااااااااااااااااااااا

الرائع هلالي الظهران ...

ما أروع ضرسك اذا ابتسمت وما أجمل حرفك اذا نسمت >> خربها ابو مقبل

أخي الغالي شكر لك على هذه القصه البوليسية الرائعة ..

ودمت بحفظ الله ورعايته ...

مهبك / ماجد

الكناري الأزرق · #14 13/09/2006, 12:30 AM

الـسلام عليكم و رحمة الله و بركاتـه ,,

هـلا و الله بولد الظهران ..

ياله ان تحييه ,,

وش لونـك .. ؟!

وش اخـبار مرمر

.. ؟!

يقرب لـها مرمر زمـاني

.. ؟! .. ( انت شكلك مناحي

! ) ..

إقتباس


	شاكر لكم حسن اصغائكم مع اطيب الاوقات واحلى الاماني ,,

هذي الواحد يقوله يالهدر بأخر الموضوع مو ببدايته

..

إقتباس


	1- اذا كان في بيتكم شغاله .. انتبهوا على عيالكم منها وانتبهوا عليها من عيالكم ..

ابـشرك شغالـتنا عـجوز طاغـنة بالضرس

,, قـصدي طاغنة بالسن !!

قـبل امـس و هي قاعده تمرخ رجلين امي بفكس و فازلين كانوا يتهاوشون ..

أمي :- انا الصغيرة و انتي التسبيرة

..

مرمر قصدي جيمي << بـاله مع مرمر تسليل الادب

:- لااااه مـامـه انا صغيير بـس تسأة تلاتين سنه

..

و عـليه مد بالكلام تقل مد تسونامي

.. !

او بالاحرى المفروض اقول تسونامي عليه مد تقل مد شغالتنا بالكلام

!

نـعود لهجوم حديثنا ,, قصدي نعود لمحور حديثنا .. << وش اخبار صادوهـ و الصيرفي كان ما عنده غير هالجملة

.. ؟!

الهلال لعبه امس شين .. ( وش اسوي لك ذبحن النوووم كل يوم انام الساعة 2 الصبح و اقوم 6 و نص الفجر امووووت على الاحباط

.. ) ..

اقولك شئ ..؟

بـلا محور حديث بـلا خرابيط ياله سـلامن من الله عليكم و رحمتن منهو و بركاتـه و يا سريري العزيز الاماكن كلها مشتاقـه لـك

.. ( مير الله يخلف اي سرير نيمن بالارض الله يجيرك اموووت على هيك عزوبي

,, مكيف غرفتي عاطل << الله يوفقه بوظيـفة

! ) ..

تغريد · #15 13/09/2006, 12:59 AM

اهلين هلالي الظهران

اززيك

كيف الظهران

سلملي عليها

إقتباس


	بينما كانت منيره تتصفح احد المنتديات من معمل الحاسب الالي القابع في جامعة عليشه في الاثناء التي تقوم فيها الدكتوره بشرح المحاضره ..

عليشتنا الحبيبه

الا انت اش دراك انو في معمل فيه نت

؟؟
انا مادري تصدق

قلي اي مبنى؟

إقتباس


	وعلبة بسكوت الموز ابو كيسه خضرا من البطحا..

ههههههههههههههههههههههههههههههههههههههههه
وووينك من اول ماما تتوحم عليه وماندري وين نلقاه اثره في البطحا

لما توصيك مره ثانيه جدتك لاتنسى تجيبلنا منه كم علبه

إقتباس


	الجزء الثاني.. جامعة عليشه-البوفيه..

هذا اكيد الي بمبنى 12

ولالا فيو

إقتباس


	ريم تعلق باستهزاء وغرور: ههههههههههههه ياحليلك يا حصه .. شايفه هالتعليقه اللي انا لابستها جابها لي ناصر من لازوردي ..وناظري هالساعه اهداني اياه سعود ..وتعالي عندي البيت واوريك الطقم اللي شراه لي فيصل من ليسانزا ..