مــاجد مقبــل يصــلي التراويح في سطــح ....!! - نادي الهلال السعودي - شبكة الزعيم

سندريلا الهلال · #1 26/09/2006, 12:32 AM

كل عام وانتم بخير .. ومبارك عليكم الشهر ..

صلاة الفجر .. !!

آخ آخ آخ آخ آخ آخ آخ آخ آخ آخ آخ آخ آخ

صلاة الظهر ..!!

آخ آخ آخ آخ آخ آخ آخ آخ آخ آخ آخ آخ آخ

صلاة العصر .. !!

آخ آخ آخ آخ آخ آخ آخ آخ آخ آخ آخ آخ آخ

صلاة المغرب .. !!

هذا هو برنامجي الصدقي ;) بس يوم دريت ان اليوم بكتبه حاولت تعديل الوضع

طبعا كنت مواصل ورجعت البيت الساعة 3 وشيك على النت الى ان جهز السحور ...

وانا مهمتي في ها الوقت اللي يعصقل مع الوالدة اروح اصحيه بطريقة خاصة ...

عاد امس سوقي مضروب ما في الا زبون واحد

تسحرنا ولله الحمد وكان فيه كبسة و الباقي من العشاء .. طبعا انا كنت ماكل

برا البيت قبل ما ارجع فكتفيت بالقيمات وجغمات من الماء البارد ..

أذن الفجر ورحت للمسجد والحمد لله صليت الفجر وجلست بعد الصلاة اقرأ قران

وشوف ابو لينا في آخر المسجد داق لطمة كنه سامي في توقيع الكناري

بعد ما خلصت حزبي شطفت من عنده ولقط الصفحة بسرعة أثره توه في سورة البقرة !!

عاد من يوم كنا صغار وانا وياه نتسابق من قرا اكثر ...

واستلمه نصايح على الفجرية ;) عاد قالي انت وين وصلت لا تصير خاتم القران وانا مدري !!

المهم بعد ما رفعت ظغطه شوي قلتله وين انا واصل من باب التحفيز

وارجع البيت واحط راسي تقريبا الساعة السادسة صباحاً..

وســـــحـــــبــــة طــــــــــــــويــــــــلـــــــــــة الــــى اذن الـــــــظـــــــــهـــــــــــــــــر

بعد صلاة الظهر جلست في المسجد أقرا قران ثم رجعت البيت واول ما دخلت نادتني الوالدة

يوم جيتها قالت تعال شف الشيخ عبد المحسن الاحمد في التلفزيون ( قناة المجدالعلمية )

جلست مع الاهل شوي وتسحبت

الى غرفتي تسحب وافتح النت ودخل الزعيم

قريت يوم الوردة الزرقاء الحافل وقلت الله يعيني

وقريت موضوع الفيروسة فيو وشيكت على ايميلي

ورجعت اختي امجاد من المدرسة وهي تصيح

انا قلت شكلها في مطاقة بين البنات الله يستر

ويوم أسألها قالت ما ابي اصوم ؟؟

انا شكيت في الموضوع وبعد سين وجيم اكتشفت انها زعلانة

لانها قامت الصبح وتعبت وهي تصحي

اخواني ولا احد معطيها وجه وتاخرت على المدرسة فتبي تنتقم من الصوم الله يهديها

وارسلتني الوالدة قبل صلاة العصر السوق اشترى بعض الاغراض للبيت وانا راجع ما شي في أمان الله ..

الا يجي سواق ماشي مليون وسط الحارة وبغى يوديني في خبر كان لكن الله ستر ..

انا ارتفع الضغط عندي مليون واقوله ايس فيه

والا السواق طلع جرية ويقولي ايس فيه

..

عاد فكرت اني انزل لكن تذكرت المنتدى وقلت ما لها داعي اكتب في الزعيم اني تطاقيت مع بنغالي

وقلت لا حول ولا قوة الا بالله ورجعت للبيت ;)

واذن المؤذن لصلاة العصر وروح المسجد وبعد الصلاة جلست مع واحد من الشباب نتجاذب اطراف الحديث

وقرأت بعض الايات ثم رجعت للبيت واأخذ كتاب جميل في غرفتي بعنوان (( كيف تطيل عمرك الانتاجي ))

يجمع الاحايث والاذكار التي تتحدث عن زيادة العمر ثم ر رجعت لتفسير ابن كثير لشرح ايةاشكلت علي ..

وشاهدت جزء من برنامج للشيخ محمد العوضي على قناة الراي ...

وهنا يبدأ الحدث الاهم في هذا اليوم ...

دخلت المطبخ ابي اساهم في خدمة المجتمع

فقالت لي الوالدة رح جب ؟؟؟؟ قلت يمى كل يوم جب جب

ما قلتلي يوم خذ ...قالت اجل خذ الزبالة على طريقك

الحدث الاهم في هذا اليوم

ان الوالدة قالت لي ود شوربة للمسجد قلت سم من عيوني يابؤبؤ عيني

واخذ الحافظة وادربي راسي وانا في الحوش ابي افتح باب الشارع الحافظة ما كانت مسكرة زين

فنكبت الشوربة علي .

.. وياهي حااارة

واحط الحافظة في الحوش وسيدى على المغاسل ابي ابرد واثر الماء حار واروح احط ايدي عند الكيف

عاد اخوي أحمد أعلن حالةالطواري في المنزل وحات الوالدة والوالد والعائلة كلهم

وانا رغم الالم اضحك من قلبي :p واقول ما في شي

عاد ثوبي كله شوربة بس ما احترقت الا ايدي اليسار والوالدة جايب عسل واختي جايبة معجون

واشتغل عندنا الطب الشعبي

ودهن ايدي بكريم والحمد لله ربي ستر وسلم

وعند الاذان كان الافطار جاهز في الملحق وافطرت انا وولد خالتي واخواني التوئم وصديقهم

ورجعت بعد الصلاة وانا مفلل لغرفتي سيدا وشاهدت برنامج الشيخ على الطنطاوي رحمه الله

واخذت لفة سريعة بين القنوات ومابين الاصلي والتقليد

المهم كنت متردد وين اصلي الترويح ما بين الرشود واللحيدان ..

وفي هذه الاثناء اسمع تفحيط عند باب غرفتي وافتح والقى اخواتي فبادرتهم وين تصلون اليوم

قالوا اللحيدان .. قلت اجل انا بصلي عند الرشود;)

ويجي اخوي يقولي لا يفوتك الترويح مع اللحيدان في السطح ..كنك في الحرم !!!

انا صدقته وقلت اللحيدان والسطح مافي مشكلة

نروح نصلي هناك ...

لكن الله المستعان طلع السطح غبااار كني في العاذرية مو الحرم !!!

وبعد صلاة التراويح مسكت طريق خريص متوجه الى الدوااااام ...

وكتبت لكم هذه الكلمااااااات ...

ما يستفاد من ما سبق ذكره ...

1- اكتشفت ان اغلب وقتي فضاوة غير طبيعية .

.

2- ان الانسان يصدر قرارت خطيرة لاسباب غير منطقية ..

3- انه يجب اغلاق حافظات الشوربة باحكام ..

4- ان لا تصدق اخوك اذا قالك السطح مثل الحرم

...

الحمد لله على سلامتك يا مـاجد ورائعة يومياتك أتحفتنا بصراحة

وتستــمر يوميات أعضائنا مع متألق آخر

موعدكم غداً بإذن الله مع هلالي الظهران

الكناري الأزرق · #2 26/09/2006, 12:42 AM

السلام عليكم و رحمة الله و بركاتــــه ,,

لا لا لا للمخدرات

<< يكلمكم و بجمبه دفتر ابو عشرين حق اولى ابتدائي

!

شـباب حـرااام

..

كـتبت رد طويل !

و بالنهاية كالعادة تـظلل كل الكلام فجآة و انمسح

..

اسف ماجد مالي خلق اعيد اكتب الرد

..

يمكن بكرة اعدلـه

.. << اسـحب

..

سحرالشرق · #3 26/09/2006, 12:45 AM

عسى بس ما يكون صديق أخوك اللي جوال أمهN70

<<<<ما تنسى

الحمدلله على سلامتك بس بحكم خبرتي السابقة في عدم إغلاق حافظات الأكل بإحكام أشك إنها ما كانت مغقلة جيدا يمكن والله أعلم فيه واحد ملقوف لاعب فيها وفاتحها

<<<ترى ما قلت ماجد

بصراحه يومكم يا الرجال غثيث ماش ما فيه شيء سنع

<<<تنتقم

لا بجد شكرا يا ماجد على يوم ممتع والله يعينك على الدوام

وننتظر هلالي الظهران غدا على أحر من الجمر فيقينا أجزم بإختلاف الغد

أبو راس · #4 26/09/2006, 12:45 AM

مشكوووووووووورين

بس المعجون ما يصلح حق الحروووووق

يقولون انه بالعكس .. ممكن يضر ...

برنامج الطنطاوي على اي قنااااااااااة؟؟

يسلمووووووووووو

نـــــــ15ــــــمر · #5 26/09/2006, 01:00 AM

لوووووووووووووووووووووووووووووووووووووووووول

ماجد ناوي اشرشح فيك يوم دريت انك تعزم خلق الله على شوربه وانا ما تعزمني؟؟
ما تدري اني عزوبي
تدري اني كنت ناوي اخليك تمسك خط للشرقيه لجل تعطيني الشوربه

بس شك عيني حاره طاحت الشوربه
خخخخخخخخخ

ماجد نصيحه صل في القطامي ترى صوته روعه بس رح قبل الاذان علشان تلحق تصلي داخل المسجد
والشيء
خلاص ما فيه شيء
تشــــــــــــــــــــــــــــــــــــــــاو

سحرالشرق · #6 26/09/2006, 01:02 AM

لقافه أدري بس بغيت أقولك يا أخوي أبو راس أنا أشوفه على قناة المجد العامة بين المغرب والعشاء...

الهنوووف · #7 26/09/2006, 01:02 AM

لازم تعديل الجدوول

والا كان كله اليوم نوم في نوم

وش سالفتكمـ لازم حدث مهم ياحادث ياشي منكب عليكم ياساتر

يوم حافل بالنشاااااط

بس ماقلت لنا ردة فعل امكـ وش قالت وجع عميان ماتشووف
والا قالت بسم اله على قليبك ياوليدي

اول مره اسمع بالرشود واللحيدان

وينهم فيه ذولي
ياحظكمـ مابي اعطيكمـ عين بس على كيفكم تروحون المسجد الي تبون
اليوم اقول لابوي ..ابي المسجد الفلاني يقول نضرب مشوار علشان صوته زين
مسجدنا زين

والحمد لله على سلامتكـ ذكرتني مره كبيت صحن رز ببيت عمتي

بس مو انا السبب
درجهم مدري وشلون فيه حافه منعطف خطر:p وتوهقت واصفر وجهي

يعطيك العافيهـ ماجدنـا وسندريلاتنا استمتعنا بيوميات ماجد واستمتعنا بفكره سندريلا

بانتظار هلالي الظهران احم احم وخرو عن طريقه

وانا اقول اليوم ماله حس بالمنتدى شكله يجهز لبكرة

بس احس اني برحمه الغربه شينه

حاسه انه بيكتب معاناته هناك جهزو كلينكس معاكم

سوسوالهلاليه · #8 26/09/2006, 01:20 AM

هههههههههههههه

الله يرج ابليسك
قطعتني من الضحك وابوي عندي غير كاتمه ضحكي!!
اجل الشوربه انكبت عليك,,غصب مو نفسك فيها؟؟

تسلم مجود وتسلمين سندريلا
يوميات ولا اروع

الهلالي النايم · #9 26/09/2006, 02:30 AM

يوميااااات مظيعه

خخخخخخخخخخخخخخخخخخخخخخخخخخخخ

يسلموووو سندريلااااااااااااااااااااااا

هلاليه سنعه · #10 26/09/2006, 03:01 AM

اهلين اخوي ماجد في اليوم الثالث ..
اما اللي يعصقل مع الوالده ياعلييكم طررق تعذيب رش بمويه بارده وتحطون كم بطانيه

الحمدلله على سلامتك هالسواويق مغيير يخوطفون به الشوارع الله يكفينا شرهم
يوووه ياسفااب الشوربه << تبي تنجلد

الله يهديك كان تأكدت انها مصكوكه زين والحمدلله على سلامتك مره ثانيه

عاد انا قك انكبت الشوربه على يدي والله بغييت اطير <<علمي نفستس
عاد بها الرمضاان انووواع الحروووق الله يستر بس ..
يعطيك العافييه اخوي ماجد على اليومياات المثيره باحداثها
والف شكر للمتألقه دائما سندريلا على نقل اليوميااات وعلى المجهوود الكبير..
دمتــم بخيــر ..,,

الفيروسه الزرقاء · #11 26/09/2006, 05:54 AM

هلا بـ ماجد

..

إقتباس


	هذا هو برنامجي الصدقي

والله انك صاااااااادق

، لازم ظهر والعصر نووووووم ، الحين انا وماعندي دوام ----> ابد ماتبي تقهر اللي يدرسون :p

ياذن الظهر اكبر المخده وانام ولا اقوم الا المغرب

ويمكن امدها شوي الى العشاء :p ..

إقتباس


	عاد امس سوقي مضروب ما في الا زبون واحد

افا وين راحوا الزباين

!

إقتباس


	قريت يوم الوردة الزرقاء الحافل وقلت الله يعيني وقريت موضوع الفيروسة فيو وشيكت على

ماعرف الفيروسة فيو :p

..

إقتباس


	لانها قامت الصبح وتعبت وهي تصحي اخواني ولا احد معطيها وجه وتاخرت على المدرسة فتبي تنتقم من الصوم الله يهديها

لووووووووووووووووو

ووووووووووووووووووووووول
ياحليلها

بصراحه الله لايلومها العيال صعب جداُ انك تصحيهم من النوم ، معاناة

تكب مويه يـ الله يستوعبون ويصحون :p !

إقتباس


	لكن تذكرت المنتدى وقلت ما لها داعي اكتب في الزعيم اني تطاقيت مع بنغالي

عاادي كان مارست يومك المعتاد ، وعلمتنا فنون القتال

، كان عطيت هـ البنغالي درساً لا ينساه :p " شكل ماجد جالس يهوجس يقول خساره ماتطاقيت المره الجايه بالطاق وانزل طقاقي بالمنتدى :p "

إقتباس


	دخلت المطبخ ابي اساهم في خدمة المجتمع

هههههههههههههههههههههههههههههههههههههههههههههههههههههههههه
متعووووووووووبه عليها خدمة المجتمع

إقتباس


	واخذ الحافظة وادربي راسي وانا في الحوش ابي افتح باب الشارع الحافظة ما كانت مسكرة زين فنكبت الشوربة علي . .. وياهي حااارة

الله يتكفل بك

ترى فيه شي اسمه الارض

ورى ماحطيت الحافظه ع الارض وفتحت الباب والا ناديت واحد يفتح لك الباب

، الله من الطفاااقه والعجله :p

إقتباس


	واشتغل عندنا الطب الشعبي ودهن ايدي بكريم والحمد لله ربي ستر وسلم

سلامات سلامات ماتشوف شر

الجايات اكثر

ان شاء الله :p

إقتباس


	انا صدقته وقلت اللحيدان والسطح مافي مشكلة نروح نصلي هناك ... لكن الله المستعان طلع السطح غبااار كني في العاذرية مو الحرم !!!

لوووووووووووووو

ووووووووووووووووووول
اكلت هالمقلب من اخوك :p
المره الجايه العب عليه وخلك ذهين ، ترى رمضان لسه ماراح ---->> تبي تخليه يتمشكل مع اخوه

إقتباس


	3- انه يجب اغلاق حافظات الشوربة باحكام ..

ياخوفي ان امك مسكرتها زين لكن لقااافتك خلتك تفتحها :p

صن كيو خيو ماجد ، وسعت صدورنا بـ يومك الرمضاني

سندريلا يامال العوافي ع هيك فكرة

..

الفيروسه الزرقاء

فرصه ضايعه · #12 26/09/2006, 06:39 AM

هلا ببو مقبل

...

إقتباس


	هذا هو برنامجي الصدقي بس يوم دريت ان اليوم بكتبه حاولت تعديل الوضع

ليش يعني استحيت فينا

....

إقتباس


	المهم بعد ما رفعت ظغطه شوي قلتله وين انا واصل من باب التحفيز

طيب قلنا حنا وين وصلت

عشان تحفزنا بعد

...

إقتباس


	عاد فكرت اني انزل لكن تذكرت المنتدى وقلت ما لها داعي اكتب في الزعيم اني تطاقيت مع بنغالي

حرام عليك

...
خربت علينا الإثارة

...

إقتباس


	واخذ الحافظة وادربي راسي وانا في الحوش ابي افتح باب الشارع الحافظة ما كانت مسكرة زين فنكبت الشوربة علي . .. وياهي حااارة

الحمد لله على سلامتك:p ...
الله من الطفاقه وشوله العجله

...

إقتباس


	عاد ثوبي كله شوربة بس ما احترقت الا ايدي اليسار والوالدة جايب عسل واختي جايبة معجون

حط بيض محروق

...بس الله يعينك على ريحته

ولا وقت الحرق على طول حط زيت

... الماء مايفيد بالعكس يزيده:sad:
<<<< خبرة في الطب الشعبي:p

إقتباس


	قالوا اللحيدان .. قلت اجل انا بصلي عند الرشود;)

ياحبك للعنااااااااد

...

إقتباس


	- اكتشفت ان اغلب وقتي فضاوة غير طبيعية . .

مب بس أنت الأغلبيه كذا:sad: ...
ومع ذلك مايستغلون أوقاتهم بقرائه قرآن ولا شي ينفعهم من الكتب:sad:

ماشاء الله عليكم يوميات

....
يسلمو ماجد على يوميتك الحافله بالإثارة

إقتباس


	وتستــمر يوميات أعضائنا مع متألق آخر موعدكم غداً بإذن الله مع هلالي الظهران

لااااااااااااااااا

...
حرام عليكم

...
مشكلتي بسافر ولا أقدر أدخل النت

....
ياحسافه بس

...
يالله اللي بيستانس هلالي الظهران بيفتك من ردي

سلاااااااااااام

البالون · #13 26/09/2006, 07:48 AM

السـلام عليكـم ورحمـة اللـه وبـركاتـه

أحسـك تضحك بـ الحيـل

كـل ماتجـي بـ تسوي شيء تتـذكـر انك بتكتب عنه فتتركه ..

إلـى الآن ما قـد جاء يـوم بـدوون مغامـرات و اصابـات ..
سـلامات .. يـدك محتـرقـه

يـومك جميـل جدا ..

THANK YOU MAGiD << تراه دافور فـ الانجليزي :p

وتأكـد من ماجـد مدري كاتبها صح ولا لا << دافور .. ايـه هيــن .. هـع !!

محبكم

رعبوبة الزعيم · #14 26/09/2006, 11:40 AM

هـــلا والله أخــوي ماجد

مبروووكـ عليك الشهر..
بعدين وش سالفتكم يالعيااال مع النوووم

اربع وعشرين ساعه نووم ماتشبعوون ..

انا اكبر مشكله عندي لما تقوولي امي قومي اخوانك من النوووم
وجع مو نوم كنهم ميتين مايحسوون

والحمد لله على سلااامتك ع الشوربه..بس لو انا من امك كان خليتك
تسوي شوربه ثانيه بدااال اللي كبيتها..

انا مشهووره ببيتنا داايم اكب العصير

هذي مشكلتي
امي ماتخليني اشيل عصير علشان عارفه مااعرف اواازن

مشكوووور ماجد الله يعطيــك العافيه..
ونشووف وش يخبي لنا هلالي الظهراان

وتسلمين سندريلا..

...SoMe OnE... · #15 26/09/2006, 12:02 PM

,,,
,,
,

اخوي الغالي / ماجــد

كل عام وانت بخير ,,
وتقبل الله منا ومنكم صالح الاعمــال يارب ,,
بس ماشاءالله عليكـ .. مقطع النوم صار نوم بداخله يوم

إقتباس


	عاد ثوبي كله شوربة بس ما احترقت الا ايدي اليسار والوالدة جايب عسل واختي جايبة معجون

بيني وبينكـ لمثل الحالات هذي ماينفع الا زيت فرامل ..!!

وان حصل حط على يدكـ شحم وعض على صاموله ويسلكـ الموضوع ولا عندكـ اي مشاكل

<<<----- ماكانه جاي من بنشر ابد

إقتباس


	وبعد صلاة التراويح مسكت طريق خريص متوجه الى الدوااااام ... وكتبت لكم هذه الكلمااااااات ...

بيني وبينكـ اللي يمسكـ طريق خريص بعد التراويح يمديه يألف روايه :sad:
لان الهواجيس تدهر في ذا الزحمه

الله يعيننا وياكـ اذا كنت كل يوم لازم تروح من هناكـ :sad:

وبيني وبينكـ يوم حافل بـ الجديه ماعدا ساعات النوم بس عادي لا يهمكـ احد

اعذب تحيه لكـ يالغالي ,, والله يوفقنا وياكـ يارب ,,

****

اخوكـ
...SoMe OnE....