من أمريكا..سامي الجابر وين بتوووصل؟؟؟ - نادي الهلال السعودي - شبكة الزعيم

بدر السعودية · #1 08/09/2006, 01:34 AM

بسم الله الرحمن الرحيم

السلام عليكم ايها الزعمااااء

بصراحة اليوم يوم سامي الجابر

محدثكم يدرس بامريكا ماستر وحاليا ادرس انجليزي باحد المعاهد الامريكيه...المهم..اليوم كان عندنا كلاس ..طلبت منا المدرسه من كل واحد يتكلم عن اشهر واحد بدولته..في البدايه اخذتنا بالدور كل طالب يقول المشهور بدولته..يوم وصلت عندي وانا اقولها سامي الجابر

هو فيه غيره اصلا؟؟!

قالت المدرسه تكلم عنه...وانا اللي اقوووم اقص لهم قصة حياته

قلت سامي كابتن وقائد المنتخب ..ومن اكبر المساهمين في تأهل المملكه لكأس العالم اربع مرات على التوالي..وهو اللاعب الوحيد اللي شارك في جميع كؤوس العالم ..وحقق لمنتخب الكثير من البطولاات والالقاب.... وووووووووووووو من الكلام هذا..وقلت لها يلعب بنادي كبير في المملكه اسمه الهلال

يعتبر افضل فريق بالمملكه يلقب ((بالزعيم)) لانه حقق جميع البطولات وهو الفريق الوحيد المتسيد في عدد البطولات بدون منافس وساهم سامي في اغلب البطولات وهو ايضا قائد وكابتن الفريق وله شعبيه كبيررررررره جدا... وووووووووووو من هالكلام.....المهم يوم خلصت كلامي المدرسه تذكرته وعرفته

قالت::عرفته هو يلبس فانيله رقم 9 لعب بكاس العالم<<<طبعا بالانجليزي

قلت بنفسي الله عليك يا ابو عبدالله حتى العجز يعرفونك

قلت لها ايوووووووه عداك العيب <<على قولة اخوانا المصريين

ايضا يا جماعة الخيرررررر من ضمن يومنا الدراسي بالمعهد عندنا ساعه ندخل فيه ((اللاب)) مختبر فيه كمبيوترات وفيه انترنت..المهم دخلت ((اللاب)) وجلست على احد الاجهزه ..بالصدفه كان جنبي طالب برازيلي يقاله ((ألن)) ..انا من اجلس على الجهاز اول شي اسويه ادخل الانترنت وعلى طول شبكة الزعيم

الرجال جالس يناظرني وانا ادخل الموقع يوم فتحت صفحة المنتدى طبعا تعرفون في اعلى الصفحه في صور نجوم الزعيم...والله العظيم يا شباب انه كان يناظر بالصفحه ويوم شاف صورة سامي وهو ينط ويأشر بصباعه على صورة سامي ويقولي انا اعرف هذا اللاعب يأشر باصباعه كذاا>>>

<<<يعني لعيب

قلت له تعرفه قال ايه انا اعرف هذا الاعب وكتب على ورقه رقم ((9)) ويأشر على ظهره

قلت بعد الله عليك يا ابو عبدالله حتى البرازليين معجبين فيك ويعرفونك وين بتوووصل يا ابو عبدالله؟؟؟

طبعا البرازيلي هذا ما يعرف انجليزي زين..واجلس اسولف معه عن الكورة طلع داهيه وحق كورة واجلس اقوله عن الزعيم واقوله ريفانيلو لعب مع الزعيم والان عندنا بالفريق اثنيين برازليين ووووووووو وجلست ادردش معه عن الزعيم الين خليته هلالي

صرت اقوله وش تشجع يقول الهلال

المهم السؤال اللي مو يبطح نفسه السؤال اللي طاق ركبه ونص...الانصاف لهذا الاسطورة يأتي من الخارج...بينما في وطنا من يأتي ويشكك في في افضلية هذا الاسطورة على المستوى الوطني والخليجي والعربي والاسيوي!!!!!!!!!!!!

بس صدق من قال سامي والباقي اسامي...كايدهم وحارق دمهم

الله عليك يا ابو عبدالله تعديت البرازيل وين بتوووصل؟؟؟؟؟؟

بصراحة اليوم يعتبر يوم سامي يوم مميز

في الحقيقه انا من الاعضاء المتابعيين فقط لشبكه و ليست لدي اية مشاركات والدليل تاريخ تسجيلي قديم بس انا ما اشارك فقط متابع...بس اللي صار اليوم اجبرني على الكتابه

يستاهل ابو عبدالله

بالتووووووفيق ان شاء الله لززززززززعيم

في النهايه لا تنسوني من دعواتكم

واسف على الاطاله

هلالي9 · #2 08/09/2006, 01:40 AM

يعطيك العافيه وسامي معروف عنه الشهره
وانا بعد لي موقف في امريكا ايضا ركبنا مع سواق الفندق اللي يودي المطار (نيويورك) المهم قعدت ادردش معه
وقلته انت راعي كووره قال ايه قلت تعرف في السعوديه احد قال ما اعرف الا لاعب رقم تسعه وانا قلتله سامي قال ايه الجابر
والسوااق من جنوب افريقيا ...
يشهد الله ان كل الكلام صحيح
مشكوور

بدر السعودية · #3 08/09/2006, 01:43 AM

فديته ابو عبدالله يشرف والله العظيم

اشكرك على المرور

هــ kaka ــلالي · #4 08/09/2006, 01:46 AM

يعطيك العافيه وسامي معروف عنه الشهره

ق م ر 1 0 0 · #5 08/09/2006, 01:46 AM

ماشاء الله عليه سامي تخطت شهرته حدود الوطن

الصوت الهلالي · #6 08/09/2006, 01:51 AM

قصة رااائعة يالغالي وانت اللي عداك العيب على ما ذكرت للمدرسة والبرازيلي ;)

اسلوب راااائع في الكتابة والطرح والذيب يستاهل اكثر ومن اللي ما يعرفه ؟؟

وللمعلومية سامي كان حاظر امس مباراة ايطاليا وفرنسا وكان معروف لدى الجمهور ووقفوه اكثر من مره

تحياتي لك والله يوفقك في دراستك ولا تبطي علينا ....

أبو علاوي · #7 08/09/2006, 02:00 AM

الله يعطيك العافية

هلال برشا · #8 08/09/2006, 02:04 AM

يعطيك العافيه

كلام رائع اخوي وبو عبدالله مو غريبه عليه هالشعبيه

الله يوفقك بدراستك اخوي

أبو ميار · #9 08/09/2006, 02:05 AM

لا تروح بعيد خليك في الوطن

الأطفال اللي ما تعدى عمرهم الخمس سنوات طبعاً الى الآن لم يحددوا ميولهم اسألهم عن أفضل لاعب سيقولون لك سامي وأتحدى أي واحد يقول غير كذا الا أن يكون مغرر به

لأن الطفل لا يكذب لذلك فهو يقول سامي

وأنا دائماً أحب الأطفال ودائماً ما أسألهم عن الكوره فيقولون سامي

شكراً كاتب الموضوع

هلالي و مانشستراوي · #10 08/09/2006, 02:09 AM

يعطيك الف عافيه .. وبالتوفيق ؛؛

بريماكس · #11 08/09/2006, 02:16 AM

كبير والله كبير .... ابوعبدالله يستاهل

والله يوفقك يالغالي في حياتك العلميه

{<الســــ9ـــامي>} · #12 08/09/2006, 02:19 AM

يعطيك العافيه اخوي
ويستاهل والله معالي السفير

البالون · #13 08/09/2006, 02:20 AM

يشـرفنا واللـه ســامـــي !!

مشكـور واللـه يـوفقـك في الـدراسة ,,

بدر السعودية · #14 08/09/2006, 02:22 AM

لابد ان يعلم الجميع الصورة الحقيقيه لهذا الاسطورة

والله العظيم انه شرف لكل سعودي هذا الاسطورة...

تذهب لديار الغربه فترى الكثير من يجهلك ...ولكن اذا ذكرت لهم الاسطورة سامي الجابر فتصبح بقدرة قادر اشهر من نار على علم ...

كبير والله كبير يا الذيب

اشكركم ايها الزعمااااء على مروركم وتعليقاتكم

والف الف شكر للمشرفين على تثبيت المشاركه الله يعطيكم العافيه ولا يحرمنا منكم

تركي هلالي موت · #15 08/09/2006, 02:45 AM

كبير والله كبير .... ابوعبدالله يستاهل

والله يوفقك يالغالي في حياتك العلميه