بسم الله الرحمن الرحيم
هذه هي القصة الثالثة التي أرويها لكم من واقع حياتنا وجميع القصص التي رويتها أصحابها موجودون ولازالوا على قيد الحياة أما الآن اتركم مع القصة
جلست عند الوالد استمع له ولقصص الشيبان اللي عنده اللي نصها أفلام هندية قام واحد من الشيبان وقال : لخويه اقول قم شف الغنم ............. ؟ وكفيلك ؟؟
سألت وش السالفه يابو فلان قال
إن خوينا فلان بن فلان اللي موجود معنا اللحين عنده غنم وحلال وكان عنده هندي راااعي وكان يروح للحلال ابو فلان شهرين ويرجع للديرة أريع شهور ويروح شهرين ويرجع اربع شهور وحلاله قبل الأرطاويه وفي بر مافيه أحد إلا الهندي والحلال المهم جاء يوم من الايام فلان وكان معصب وتهاوش مع الهندي لان الهندي يقوله " بابا هرام أنا إجلس هنا واهد سنه لازم يشوف نفر ثاني " طبعا نفر ثاني يعني زيادة راتب على ابو فلان اللي معروف بالقعاطة قال له اقول اخس واقطع وعطاااه ذاك الطراااق اللي الحمار انحاش على باله تفجير الهندي حقد على خوينا وحطها في باله بعد اربع شهور رجع فلان من الناس يبي يشوف الحلال قال له الهندي " بابا انت في روه اربع شهر يجي اثنين شهر بابا انت اجلس هنا ايش فايده مافي مدام مافي بيبي " خوينا سمع مدااام اشتبكت فيوز راسه وقال والله وجابه ابو هنود خلني اسمع وش يقول يمكن عنده حكمه قال للهندي طيب وش الحل .؟ قال الهندي " بابا أنا في أخت كثير هلو هو مافي زواج بابا أنت زواج أخت مال أنا بعدين يجي أخت أنا هنا أنت يجي في حصل زوجه أنت في روح هو يجلس سم سم أنا بعدين أنا مافي طفشان " وااافق خوينا وقال أم العيال ماراح تعرف " وفرصه بعد مايبي لها مهر واجد عشر الآف وتخب عليهم وخلنا نجرب الهنديات " ومبسووووووووط على الآخر الرجال " قال للهندي خلاص قال الهندي أوكي لازم نروح أنا وأنت للهند عشان نعطي خبر اختي وعشان انت تشوفها ومنها تتمشى ..........
راح ابو شباب مع الهندي للهند يوووم وصلوا هناك يقول الرجال هذا ركبنا سياره يمكن 18 واحد احنا والسيار ذكر اسمها لكن نسيته على العموم هي اذا اسرعت مرررررررره تمشي 60 كيلو بالساعه ويقول مع الزحمه يمشي فينا 40 كيلوا في الساعه والريحه الله لايوريك يقول بقينا في السياره يوم كامل بعدها وصلنا للديرة الراااعي يقول يوم وصلنا يقول وهو يركبني على حمار وهو على حمار علشان نروح للقرية يقول احنا في منطقة كلها جبال ويقول وخمس ساعات لين وصلنا القريه يقول أول ماوصلنا والا وش اشوف البيت صندقه رايحه فيها ونصها خشب مكسر المهم يقول قال لي الراعي هذا بيتنا يقول قلت وين أختك ابي اشوفها يقول ماامداني اقول وين اختك الا جاني ذاك الطراااااق اللي بغى ينهدم الجبل من قوته يقول قمت بهاوشه بنفخ عليه طلعوا ربعه واخوانه يقول عرفت إني جبت العيد يقول وهو يمسكني وعندهم ماعز لان المنطقة كلها جبال يقول وهو يقول يالله " أنت همار كبير أنت لازم يروه سوى سوى ماعز ياعنزه " يقول لاحول ولاقوة الا بالله صرت راااعي عندهم يقول وبهذلني أكلهم فلفل ومايعطوني باليوم الا وجبه ماتكفي ورع عمره خمس سنوات يقول استمريت على هذا الحال لمدة شهرين " الرجال معطي خبر لزوجته انه مسافر للهند شهرين يبي يجيب عمال ويرجع " يقول وأنا اطلع من الصبح لين المغرب ارعى في الماعز يقول ولااقدر انحاش ماعرف المكان زين ولاحولنا قرى ولاشي واذا جيت بنحاااش صادوني وطقوني لين أعض الارض يقول ويجي ذاك اليوم والتقي صدفه مع رااعي ثاني يقول أثرني اعرفه وكان على كفالة واجد من الجماعه يقول يوم شافني انهبل وسألني وش جابني هنا " طبعا الراعي هندي اللي لقاه خوينا " يقول قلت له السالفه قال لي إن اللي أنت عندهم هذولاء اللعن خلق الله في الهند حتى الحكومه متورطه فيهم .
يقول قلت له والحل : قال اذا صار المغرب ورجعت اجلس لين ينامون بعد كذا ابيك تنحاش من عند الجبال وانا بكون انتظرك في المكان اللي بتوقف فيه يقول يوم صار الليل وانا انحاش واحصل خوي الهندي اللي كان على كفالة واحد من الجماعه ينتظرني يقول وأنا أمشي معه طول الليل لين صار منتصف النهار ونوقف على ذيك القرية اللي فيها سيارات محترمه لكزززس وبي ام دبليوا " لكززس = حمار " " بي ام دبليوا = بقره " يقول ويركبني على حمار وبفلوس بعد لين وصلنا المدينه يوم كامل على الحمار وبعدها من الديره لين يودلهي بسياره مثل الاولى راكبين فيها 18 واحد يقول يوم وصلنا للنيودلهي واتجه للسفاره السعوديه يقول الا عندهم عالم ومشاكل من الهندود وانا صاير شكلي مثل الهنود اذا جيت بكلم احد الموظفين طردوني يقولون صديق مافيه روه سعودي سفاره سكر ثلاثه اسبوع على بالهم هندي مثلهم يقول قلت للموظف يابن الحلال انا سعودي مثلي مثلك واللي حصل لي كذا وكذا قال : افا يقول والله وماقصر معي غذوني وعشوني ونمت أحلى نومه لين رجعت السعوديه بعد اربع ايام وحرمت أتزوج أو أتعامل مع " عامل بقسوة "