مــليــنــا .. نبيـــه من جديـد تكـفون !! - نادي الهلال السعودي - شبكة الزعيم

ابو الريش · #1 01/08/2006, 09:12 AM

صحبهم \ مسيهم بالخير

اخباركم شباب ان شاء الله بخير ؟؟

صراحه حال المنتدى يازقرت مايسر لا صديق ولا عدو !

ردود بايخه وتعليقات ابيخ ومادري تقول قاتلين قرايب بعض .. ياخوان قبل كل شي نبي نكون بالمنتدى محترمين بعض .. وعلاقتنا تكون حلوه .. ترا كل اللي بيننا شاشه وكيبورد وبنتهاوش عليها بعد ؟

لحد يضحك على نفسه ويقول حال المنتدى زين ومافيه شي

ردود استفزاز .. نزاعات .. للأسف شلليه .. المنتدى صار الواحد مايحرص على دخوله كثير زي أول !!

الأسباب كثيره .. واللي فوق شي بسيط من أشياء كثيره خلت المنتدى على ذالحال ..

أمنيه شخصيه .. ويمكن تكون أمنيه اغلب اعضاء المنتدى .. هي عوده المنتدى زي أول .. وأقدر أجزم انها امنيه كل شخص لحق على ذيك الأيام .. موب بعيد لا قبل سنتين بس ..

السؤال الكبير .. نقدر نحقق الأمنيه هذي ؟؟

والجواب الكبير " هذا من عندي ترا صارفها لكم

" .. مانقدر نرجعه زي أول .. لكن نقدر نخليه منتدى كل عضو فيه يحترم الثـاني منتدى فيه نقاشات (( هادفه )) ونقاشات يسودها (( الأحترام )) والأهم من هذا كله (( المحبه )) اذا وصلنا المرحله هذي ممكن نرجع منتدى اول ويمكن احلى ليش لا.. ماودي اقول يوزرين احلف بربي لو احطهم بغرفه وحده قتلوا بعض من كثر ماهم شايلين على بعض وانا على علاقه بالأثنين واتمنى يقرون موضوعي كويس ويفهمونه !!

وللأسف بدايه الكلام اللي فوق كله رد أستفزازي او موضوع تشعب وصار فيه نقاش زي كل نقاشات الفتره الأخيره .. وللأسف النقاش وزي كل نقاش زي ماقلت لا فيه احترام و لا محبه ولا بطيخ .. اللي نشوفه نقاشات على شكل تصفيه حسابات

ياكثرها مواضيع اللي ادخلها واقول من اولها الموضوع مكان ممتاز للنقاش .. وطبعا اقصد النقاش المحترم .. وأطفش وأترك الموضوع من شي اشوفه .. مب انا كثير مثلي

طبعا المطلوب ليكون المنتدى مرتب على الأقل ويسوده الاحترام موب شي صعب .. شي بسيط لكن للأسف اللي صار الفتره الأخيره يمكن يصعبه

انا أخطيت على أعضاء .. أنت ياللي تقرا الموضوع يمكن أخطيت على اعضاء .. مافيه انسان معصوم عن الخطاء .. لكن صدقوني مهما اخطئنا في حق بعض ماراح نوصل لخطوره الشلليه والردود الأستفزازيه والنزاعات اللي صايره

اللي يقرا موضوعي مايصدق ان كل هذا صاير هنا في شبكه الزعيم وفي منتدى العالميه اللي كان من افضل منتديات الرياضه العالميه العربيه .. واللحين للأسف وبصريح العباره لا يستطيع منافسه منتديات كثير وعربيه " كبيررره " .. صار مثله مثل اي منتدى رياضي عادي

فقد بريقه السابق

وربي ياشباب ان متعه الموسم ومتعه المباريات كانت بالنقاشات اللي بعد كل مبارات .. اللحين والموسم الماضي خصوصا أكره المنتدى بعد أي مبارات واتجنب ادخله

احيانا أجلس بالأسابيع ما ادخله الا لرابطه ميلان انزل كم خبر واطلع .. وغيري على ذالحال كثير .. لكن أول غير .. أول مانطلع منه .. اللي يدرس ياخذ دور ثاني علشان ذالمنتدى

.. واللي يشتغل يروح نص الراتب على ذالمنتدى

.. كان شي خيالي أتمنى يعود لو جزء منه

لكن اللحين للأسف فقدنا البريق .. وفقدنا شي أهم وهو الأحترام والمحبه

موضوعي ماحطيته كذا .. انا من عرفت المنتدى مانزلت الا كم موضوع والباقي ردود .. لكن وربي طفشت .. الموضوع نزل ومابي احد يناقشه يرحم والديكم منب ناقصين

كل واحد بيقول العضو الفلاني فعل و و و .. اللي ابيه شي واحد تكفون

نبدا صفحه جديده

طوينا صفحه الماضي وبدينا صـادق الاحساس << أطلع آبو اللي سلمك كيبورد

صفحه جديده بجد .. مانبي كلام بس .. نبي أفعال ترجع المنتدى

شي واحد نبي نسويه بس .. نحترم بعض ونبعد عن ردود الأستفزار

ردود الأستفزاز زي ماقلت سالفتها سالفه .. ماراح اذكر يوزرات او غيره علشان لا يصير الموضوع بعد نقاشات بوداي والأحترام بوادي

لكن نبي نبدا صـفحه جديدهـ تكفون

نبي نرجع احترامنا لبعض وبرجعه الأحترام يرجع كل شي يرجع التميز والبريق للمنتدى

يرجع الأحترام ترجع الأخواه والمحبه بيننا

ياما نقاشات بدأت بس يالغالي وانتهت بأبشع الكلمات وعندي انواع البرنتات لأني كنت متأكد انه بيجي يوم وأقارنها بحال المنتدى حاليا واقول ما اصدق ان منتدانا وصل للمرحله هذي

صدقوني كلام استحي اتذكره كيف يقدرون يكتبونه

مانبي نرجع ورا نتعب .. مانبي فلان يقول علان استفزني وغلطت عليه والثاني يقول نفس الكلام

نبي شي واحد

صفحه جديده .. الأبتعاد عن الردود اللي فيها انتقاص لأي فريق لأي منتخب

المشرفين الأفاضل .. محد شكك ولا احد يقدر يشكك في قدراتكم أو كفائتكم .. أنتم الأفضل ولا كان ماحطوكم مشرفين

لكن المطلوب تكون فيه طريقه معينه زي الأنذارات لكل عضو ..

مانبي حذف عضويات لكن نبي ايقافات نبي " تأديب " .. انا لو اغلط على واحد وانلحط اسبوع بالأيقاف ارجع اباري الساس وأدور السلامه

بالعربي الفصيح وعلى بلاطه قليل من الحزم يا مشرفيننا المنتدى صار ضحك

يمكن اكون قسيت شوي بكلامي علينا كأعضاء او على المشرفين

بس وربي يعلم الله مانزل الموضوع الا من حره فيني .. شي خلاني اتجنب المنتدى ..

تذكر ياخوي قبل تكتب أي رد .. انك ماراح ترضى احد يكتب شي زي كذا عن ناديك

تذكر قبل تكتب شي عن هبوط اليوفي او أي شي ان فيه ناس يعشقون الفريق ولا يرضون احد يتكلم عليه واي كلمه او انتقاص منك للفريق راح يسبب نزاعات واستفزاز لعشاق الفريق " أفهم "

تذكر قبل تكتب عن بقاء ميلان ومشاركته في دوري الأبطال ان فيه عشاق للفريق مايرضون احد يغلط على فريقهم واي أنتقاص منك للفريق را يسبب استفزاز لجماهير الفريق وبالتالي وبشكل طبيعي راح يردون وتكبر السالفه زي اللي نشوف اللحين

جبت الفريقين فوق كمثال فقط .. وعارف بيجي احد ويقتبس ويقول ورا ماتكلمت عن فلان وعلان

ارجع اقول كمثال بس ولا بتسوونها سالفه ؟؟

ما اتكلم عن أحد معين ولا عن فئه معينه ولو ان فئه " حنا عندنا حلاو وانتم ماعندكم .. وفئة باب حوشنا اكبر من باب حوشكم " صعب التعامل معها لكن البركه في مشرفيننا الأفاضل

انا نزلت الموضوع وانا ماخلصت كل اللي عندي بس الأشياء اللي كنت بأوصلها عجزت القى تعبير عنها .. بتجي مع الردود

:: ريش ::

س1: بصفتك ايش يا ولد محمد تنزل الموضوع ؟
ج1 : كل اللي ابغاه احترام ومنتدى جميل زي مايبون كل اعضاء المنتدى

س2: ماتحس انك زودتها وكبرت الموضوع ؟
ج2 : اذا تعتبر ان اثنين وصلت فيهم درجه الكراهيه انهم لو يلقون بعض ذبحوا بعض شي صغير .. ارتح ورح نم آبوك محاور

س3: مسوي انت وراسك المثلث قوي وتفكر ان المنتدى ممكن يرجع زي أول؟
ج3: مع الأحترام والبعد عن الأستفزاز المنتدى راح يستعيد نفسه شوي شوي وكل شي ممكن وليه مايكون أفضل من أول ؟ الأقلام موجوده والامكانيات موجوده اعضاء تحسدنا عليهم أكبر الشبكات الرياضيه

--
قبل أقفل وانا أقلب المنتدى لقيت رد لموضوع مضحك وبنفس الوقت شراره ممكن تتسبب في اشياء كثير

الموضوع للغالي سنوب دوغ

بعنوان

JUVENTUS (DEL-PIERO)===>back-grounds

الموضوع واضح عنوانه خلفيات للسيده العجوز وللاعب الكبير السياندرو ديل بييرو

ندخل الموضوع نلقى الشباب يشكرون صاحب الموضوع للحين تمام

الغالي ضحية مجامله من الناس اللي يعجبوني بالمنتدى ولي علاقه فيهم برابطه الميلان لكن رد زي هذا

إقتباس


	باي باي يوفي .. اليوفي صار توفي

وش الفايده منه ؟؟ رد استفزني وانا ما اشجع اليوفي كيف لما تكون تحب اليوفي ؟؟

الرد فوق برضوا كمثال بس مثال لا اقل ولا أكثر ومثال قريب ماله 3 ساعات علشان لحد يقول انك تجيب كلام غريب

ممكن يدخل واحد من الشباب من مشجعين اليوفي واقتباس ورد والثاني يرد وهاكزا الين يوصلون لمرحله اخويانا اللي فوق

قفله

المنتدى ممكن يرجع .. بالأحترام والموضوع واضح اللي يحس اني بالغت او بعيد عن الحقيقه يعتبر نفسه ماشاء الموضوع

ننتظر آرائكم وأرجوا ان موضوع اللي أتأمل منه يلفت انتباه الشباب مايكون بعد مكان للنقاشات اللي مالها نهايه والأستفزاز

تحيتي اخوكم أحمد

RoMa4eVeR · #2 01/08/2006, 09:18 AM

ابدعت يامحمد وصح لسانك وحال المنتدى مايسر ابد بس بعد المشرفين الجدد تعدل شوي

وان شاء الله اننا نبي منهم الشي الكثير وهم مهوب مقصرين ان شاء الله

ملاحظة"كثرة المواضيع بالمنتدى بطريقه غريبه الي ينزل تدريبات فريقه المفروض يحطها بالرابطه مو بالمنتدى العام وكل يوم يخلون اعضاء وينزلون ثلاث اربع مواضيع
وهالشي يضر بسمعه المنتدى"

امنيتي يرجع المنتدى مثل اول وان شاء الله يتعدل الوضع وترجع مكانة المنتدى مثل اول واحسن..

مشكور على الموضوع

اخوكـ
ماجد,,

ٍS7EVA · #3 01/08/2006, 09:28 AM

أولا : تشكر يالغالي على الموضوع ..

**************

وأقول انا .. بس لو كان بالمنتدى .. ايقاف للعضو .. كان المنتدى بأحسن حال

زي اي منتدى موجود بالشبكة .. ايقاف .. ايقاف فقط ..

روح الـهـلال · #4 01/08/2006, 09:30 AM

صح لساااااااااااااااااانك وماقصرت والله العظيم انى كنت بكتب نفس الموضوع مع بعض الاختلافات وهى الشلليه والمجاملات والعلاقات ومع الاسف من بعض المشرفين عينى عينك يعنى بالعامى لاحبتك عينى ماضامك الدهر صراحه شى يقهر ناس تتعب وناس تاخذ كل شى بسبب العلاقات والصداقه يعنى حرام والردود نفس ماقلت لاسف واحد يجى يقول انت يابزر لاتكتب والمشكله انه كبير ويقول نفس الكلام هاذا وش خلى للصغار يعنى انا لو اتكلم لصبح ماخلص بس يعطيك الف عافيه وياليت احد يفهم .

hilalemooot · #5 01/08/2006, 09:37 AM

السلام عليكم

يعطيك العافيه يالغالي .. قلت اللي بخاطري .. و زياده

مواضيع مكرره .. نقاشات تتحول لـ تصفيه حسابات .. ردود إستفزازيه ..

هذا أغلب اللي نشوفه للأسف !! ..

بالنسبه للنقاشات .. بتكلم عن هالنقطه تحديداً .. للأسف كثيير من الأعضاء يطالبون بمواضيع نقاشيه يتم فيها تبادل الآراء بين عضو و آخر .. أتركهم ساعتين أجي القى مطاقات صايره

طيب انت تشجع فريق .. غيرك يشجع فريق ثاني .. ما تقدر تطرح وجهه نظرك بدون ما تسيء للآخر ؟؟ .. لازم أسب و أهاوش و أطول صوتي علشان تمشي وجهه نظري ؟؟ .. ما اراح توصل كذا أبداً

كلنا أخطينا .. وكلنا تجاوزنا حدودنا أحياناً .. لكننا بعدين والله نندم .. خصوصاً لما أتذكر أن اللي أخطيت عليه مسلم مثلي .. و أن اللي يجمعنا هو حبّ الهلال أولاً ثم يأتي بعده تشلسي و مانشستر و برشلونه و الريال و ميلان و يوفي ووووو . <<< يا خوفي يجيني أحد يقول ليه حاط تشلسي أول

إقتباس


	بالعربي الفصيح وعلى بلاطه قليل من الحزم يا مشرفيننا المنتدى صار ضحك

والله يا غالي مافي أسهل منها .. بالعكس أريح لنا ولشغلنا .. بس ما نبيها تاصل لهالسالفه هذي

في النهايه حنا إخوان .. أجتمعنا لتناقش و نتحاور فقط .. والهدف الأساسي هو المتعه

وحنا إن شاء الله محنا مقصرين بشيء بس جهدنا ما راح يكتمل بدون مساعده الأعضاء وتفاعلهم معنا ومع القوانين الموضوعه

شكراً أحمد .. و أتمنى أن نفتح صفحه جديده من الآن

فـ مان الله ,.,.,

ابو زيد الهلالي 9 · #6 01/08/2006, 10:10 AM

والله ان المشرف نيستلروي.. يتوحش على كل من يسوي شوشره بالمنتدى..سنايدي يالذيب...

دمـوع · #7 01/08/2006, 10:25 AM

ياخوفي ان حذف المواضيع يبدأ بك أنت عزيزي أبو الريش
ليس لسبب إستفزازي أو عدم احترام نادي أو عضو
ولكن بحجه ان مثل هذه الموضوع ( يضر ويشوه سمعه المنتدى ) على حد زعم البعض !

اسأل مجرب !

تحياتي
المجرب اللي تكلمت لك عنه فوق

الهلال حـبي · #8 01/08/2006, 10:33 AM

إقتباس

الرسالة الأصلية كتبت بواسطة hilalemooot


	أتمنى أن نفتح صفحه جديده من الآن

كفـو والله اخوي HILALEMOOOT ماقصـرت والله

تحيــاتي

Gunner4Ever · #9 01/08/2006, 10:57 AM

أنا عضو و متابع لـ هذا المنتدى من سنتين تقريبا ً ..

و طبعا ً مثل ما هو معروف كان من أفضل المنتديات إذا ما كان أفضلها ..

بعدها صار المنتدى في تراجع كبير .. و أنعزلت عنه أقلام مميزة ..

لكن صراحة .. أنا اشوف هذه ظاهرة طبيعية شاهدتها في كل المنتديات اللي أتابعها ..

فـ مثل ما كانت هناك فترة ذهبية للمنتدى .. لازم تصاحبها بعدها فترة فراغ ..!!

و أنا أشوف إدارة المنتدى أقدمت على خطوة مهمة مؤخرا ً وكان المفروض أنها تسويها من زمان ..

و أقصد بها : مسألة الإشراف ..

فـ hilalemooot و G E R R A R D من أنشط أعضاء المنتدى و أميزهم ..

وهم محل الثقة

و المندى لازال يملك الكثير من الأقلام المميزة ..

ع العموم يعطيك ألف عافية يالغالي على حرصك ..

إقتباس


	و أن اللي يجمعنا هو حبّ الهلال أولاً ثم يأتي بعده تشلسي و مانشستر و برشلونه و الريال و ميلان و يوفي ووووو

ليش ما حطيت الآرسنال معهم

ابو حنفي · #10 01/08/2006, 12:38 PM

الله يعطيك العافيه على حرصك .. وبالفعل المنتدى فقد الكثير من بريقه السابق والسبب بعض النقاشات السخيفه + الغياب التام من المشرفين قبل تعيين احمد وبدر وهالشي ساعد من يتداول هذه النقاشات لان الحبل كان متروك على الغارب ..
اتفق معك بشان الايقافات بالنسبه للاعضاء .. فلا يوجد ثواب من دون عقاب ..

تحياتي ..

نيسـ 10 ـتلروي · #11 01/08/2006, 12:42 PM

الله عليك .. تسلم يدّيك أبومحمّد ..

كفّيت ووفّيت والله .. وياليت كلّ الأعضاء مثل عقليّتك ..

والله يا أخوي أحمد إنّي أنا وباقي المُشرفين ما قصّرنا .. لكن بعض الأعضاء هداهُم الله هوايتهُم إفتعال المشاكل من أبسط الأشياء .. وكأنّك تتكلّم على أحد أقاربهُم ..

وأنا كنت في السّابق أترك الشّبكة أما للنّوم أو للرّاحه .. أرجع وأحصّل كلّ شي مقلوب رأس على عقب .. لكن بعد إنضمام الغالين .. هلالي موت وجيرارد .. تحسّن الوضع .. وصار فيه إنضباطيّه أكثر .. لأنّك مثل ما أنت عارف اليد والواحدهـ لا تُصفّق ..

أتمنّى وأتمنّى وأتمنّى من جميع الأعضاء نبذ التّعصّب وترك الخلافات وفتح صفحة جديدهـ من الآن ..

مشكور أخوي أبومحمّد ..

GREAT INTER · #12 01/08/2006, 01:01 PM

يعطيك العافيه على الموضوع الرائع .. والله انك صادق مع إني ما لحقت على قبل سنتين زي ما تقول

لكن كنت متأكد أن المنتدى مر عليه أوقات أفضل من كذا ..

كفيت ووفيت ويا ليت من الجميع العمل ليكون المنتدى هو الأفضل .. وترك النقاشات الحاده الي ما لها داعي ..

والمنتدى لن يرتقي بالإيقافات وتقفيل المواضيع (فقط) .. بل سيرتقي برقي فكر أعضاءه .. وبس

وبالنهايه أشكرك على فكرك الراقي .. ونتمنى من الجميع يصيرون زيك .. وشكرا .. ;)

^^GREAT INTER^^

juve1897 · #13 01/08/2006, 01:22 PM

هلا و الله بسميي

كلامك كله صحيح و بالصميم هناك بعض الاعضاء الي يتعمدون بإفتعال المشاكل
و بعضهم اذا كان الموضوع في وادي و هو خاش عرض ما ادري وش يبي بس يبي ينكد ويسبب
مشاكل الي مثلهم احسن شيء التجاهل في بدايه المنتدى كنت ارد عليهم لكن عرفت ان احسن
اسلوب لهم هو التنطنيش و عدم الرد عليه على الاصح اكبر عقلي عليه و خله يتكلم لبكره ما دام ان هدفه معروف

لكن بعد ان اصبح كل من هلالي موت و جيرارد مشرفين تحسن المنتدى من اول الواحد يرحم نستـ 10ـروي
تقول ما فيه احد غيره

بس هم لما جوا لقيت المنتدى تحسن للأفضل و قلت المشاكل الي كانت تحصل من
الاعضاء في النهائيه هي عبارة عن اراء و المفروض الواحد يكون له احترام للشخص الاخر لانه بصراحه مطقله
راينا لنفسنا لا يصل لهم ابدا و الانديه الي يسمعنا ندافع عنها يقول محامين عنهم

و في الاخير

و مشكور على موضوعك

كل أزرق حلو · #14 01/08/2006, 01:49 PM

بسم الله الرحمن الرحيم

يعطيكم العافية شباب كلكم ما قصرتوا كفيتو ووفيتو خصوصا أخوي أبو الريش على اهتمامه الصادق وإخلاصه للزعيم اللي هو ينتمي له

فيه شي ودي أقوله :

وهو إن التعصب ما هو قوة زي ما يعتقد كثير منا بالعكس التعصب ضعف .. وضعف كبير بعد

البعض منا يحسب إن المكابرة والصراخ هي قمة القوة .. وينسى إن القطار الفارغ دائما ضجيجه أعلى!

وحنا وش اللي خلانا نتراجع وخلا رياضتنا تتراجع ونبدأ نأكل في هالثمانيات إلا إننا تركنا العمل الجاد والتفكير المرتب وتفرغنا للمزايدات والمشاحنات .. حتى في الصحف الرسمية بكل أسف

اللي يجمعنا بطبيعتنا كبشر قبل حب الهلال .. هو حب الإبداع والجمال

والجمال هذا ماهو محصور في فريق واحد أو في شيء واحد

الجمال نسبة وتناسب الكل له قسمة منها ..تزيد أو تنقص عند شيء على شيء المهم موجودة هالنسبة!.. والكل له طريقته في تقديم الجمال .. باجيو له طريقته في تقديم الجمال .. وبيرجكامب له طريقته .. وحتى دونقا وكانفارو لهم طريقتهم في تقديم الجمال .. الإبداع ما هو مقصور فقط على مهاجم يعدي مثلا .. حتى مدافع يستميت في الدفاع ويعرف كيف يستخلص الكرة أو لاعب وسط ينظف منطقة فريقه لتبدأ العمليات الهجومية هذا بحد ذاته جمال وإبداع كبير .. المطلوب منا فقط هو إننا نتذوق هالجمال .. أو بالأصح .. نعرف كيف نتذوق هالجمال !

وكون طريقة تيري هنري مثلا في تقديم الإبداع تستهويني .. هذا ما يخليني ألغي وأنكر إنه ما فيه الإبداع اللي يقدمه أوين مثلا .. وحتى لو أنكرته بيلتغي يعني؟؟ لا خلاص هو موجود وثابت بس يمكن أنا اللي فكرت إنه ممكن إذا أنكرته ينتكر وفي الحقيقة ألغيت عقلي أنا!!

للأسف الفرق والناس الكفار اللي قاعدين نتناحر عليهم وحنا مسلمين ويسببون الفرقة والشحناء بيننا هم أنفسهم ما يسوون اللي نسويه ولا يعرفون هالمزايدات هذي .. تلاقيها أول ما تقوم عندهم تخمد بطبيعتها .. لأنه فيه سلوك حضاري للأسف عند الكفار يفتقر إليه كثير جدا من المسلمين ..وهذي مصيبة بحد ذاتها .. والسالفة كلها ما تسوي .. الفريق اللي ما يفوز اليوم يفوز بكرا .. واللاعب اللي ما يكون في الفورمة اليوم بكرا يمشط الملعب .. وهكذا حال الدنيا في كل شي .. سجال .. بس عاد وين اللي يتأمل؟

المنطق زين يا شباب ولا يكلف شي .. بالعكس يطور الشخصية .. ويعكس قوتها ..يعلمك إن اللي قدامك إنسان حر فعلا في آراءه وجريء في منطقه وقادريقول اللي يحس إنه حقيقة حتى لو كانت على حساب أي شي.. بعكس التعصب الأعمى .. البغيض .. اللي ما يحسسك بشي كثر ما يحسسك إن اللي يلجأ ما هو شاطر في شيء إلا في التهجم التافه أوالتهرب منك ومن الرد أو الكلام اللي هو عاجز عنه!!

نتمنى .. إن منتديات الزعيم تحوز على لقب الزعامة الحضارية فعلا.. وتعلم الثانين كيف يكون الفكر الكروي المتحضر والمتطور واللي قابل للتطور في كل مرة .. مو الفكر المتحجر اللي قابل للتراجع دوما!! .. بجد نتمنى يبدأ الصح من هنا

ترى الموضوع مو صعب .. نحاول يا شباب

THE COACH · #15 01/08/2006, 01:58 PM

كلام جميل ورائع منك أخي الكريم

فكرة أريد إيصالها للأعضاء وهي

أن مايفعله بعض الأعضاء ولا أقصد أحدا محددا يجعل كرة القدم محرمة شرعا لماذا لأنها أصبحت تسبب العداوة بين المسلمين وهذا مايريده الكفره نحن نريد آراء تطرح وتحترم من الطرف الآخر إذا لم تقبل الطرف الآخر فلن تقبل من الناس خلال حياتك وإذا رأيت رد إستفزازي فأترك الموضوع بخيره وشره الوضع الآن أصبح لا أقول سيئا ولكن هو أقرب مايكون للسيء لانريد هذا الشيء نريد من جميع الأعضاء بلا إستثناء نسيان الماضي وفتح صفحة جديدة إنسوا ماحصل نريد قلوب نظيفة لا أقول أن تحب باقي الأعضاء ولكن إحترمهم أنت لست مطالبا عزيزي العضو بالرد على كل عضو يتكلم على ناديك المفضل دعه وشأنه أنا لفت نظري في توقيع الأخ الغالي والعضو المثالي S U L A I M A N كلمات جميلة تقول

إِنْ بُلِيتَ بِشَخْصٍ لاخَلاقَ لَهُ *** فَكُنْ كَأَنَكَ لَمْ تَسْمَعَ لَهُ وَلَمْ يَقُلْ

وأيضا هناك بيتين آخرين تحلوا بهن جميعا ليس بالمنتدى وحسب بل في جميع شؤون الحياة ودعه شعار لك يقول الشاعر

يخاطبني السفيه بكل قبح *** وآسف أن أكون له مجيبا

يزيد سفــاهة وأزيـد حلمـا *** كعود زاده الإحراق طيبـا

أشكرك أخي الكريم وأشكر جميع من ردوا بتلك الردود الجميلة وأكبر دليل على روعة الموضوع هو أن المشرفين ردوا وهذا يؤكد أن الموضوع إستثنائي

وأنا آسف على الإطالة

تحيتي للجميع ;)