طــالــب سعـــودي في بــلاد الفرنجة - نادي الهلال السعودي - شبكة الزعيم

هلالي الظهران · #1 27/07/2006, 05:59 AM

[مدخل]

مساء الخير كلن بتوقيته .. في الايام الماضيه كنت اغيب عن المجلس فترات قصيره ومنقطع وبصراحه ضميري يؤنبني على التقصير .. اضف على ذلك اليوم الخميس كنت مكلف اني انزل اخبار المجلس والكاريكاتيرات.. يعني الدعوه صباحي الى عقب الفجر وانا انسان متعود ارقد بدري << ايه هين ..اناظر الساعه تشير الى الثانيه صباحا ايه ياولد وش تسوي وفي لحظه وسوس لي ابليس وغمزي برمش عينه وقام يؤشر الى اعلى الصفحه يمين .. يالله صدق اللي قال ان ابليس ملعون جدف وخبيث ..

صرت اناظر ايقونة موضوع جديد وكانها امامي مثل الماخوذه هيفاء وهي تغني بوس الواوا شوف الواوا اح وعاد خويكم لاسمع ااح ضاعت علومه .. قلت ياولد مابدهاش هيفاء بجلالة قدرها ترقص لك والحياه فرص ولازم نستغلها..عاد لازم نسبر في اغوارها .. ومن خلال هالعلاقه وبعد مخاض طويل تم انجاب هالموضوع .. عاد ماندري هو لقيط في احد يتبناه الله اعلم ,,

[مقدمه]

أسعد الله هالوجيه والخشش السفره بالخير والمسرات .. شاكر لكم حسن اصغائكم مع اطيب الاوقات واحلى الاماني ,,

اصدقاي الاعضاء الشيون الفاضيين .. صديقاتي العضوات الحلوات الامورات بعد طوايفي وطوايف هلي .. الموضوع فيه مسكة خط نوعا ما واللي يبي يشره يحط شرهته على جريدة الرياض اللي اخرت الكاريكاتيرات ..يعني بالعربي اللي اتصاله دايل اب يفصل الخط حتى لايجي ابوانكم ويلعنون خيركم ثم تدعون علي وكاني انا مدير الانترنت (ياخبل يقاله وزير الانترنت )..

الزبده.. تراني طالبكم تقولون تم ..واني داخل على الله ثم على وجيهكم اللي كنها وجه ناصر درويش وهو فاك كشرته وتوه صاحي من النوم .. وهذي البرمودا ورميتها عليكم .. بليييز لازم تقرون قصتي كامله .. اجبروا بخاطري وخاطرها ولا تفجعون ولد بامه ..

المهم ان قصتي تنقرا كامله .. من فوق من تحت ماعلي لازم تقرونها ولا رجعوها لي اضف وجهي انا وياها .. على بركة الله نبدأ القصه ( تو الناس الله ياخذ نص وجهك )..

((الفصل الاول))

بعد معاناة اثنا عشر سنه من الدراسه هذا ان ماحسبنا الفوائد يعني تصقع لها 14 ومع صيفيات الدور الثاني نكمل 15 سنه معاناه واضطهاد في المدارس .. تجلت ارادة الله وتحقق المنى بالتخرج من التوجيهي .. ولكن لم تكتمل هذه الفرحه حيث قدر الله علي وطلعت نسبتي مثل وجه ناصر درويش(هذا بيدخل الجنه سيده والسبه انت ووجهك ).. تخيلوا مقدار الالم والكابه ..

يالله ما اقسى قلوبهم وما احجرها لقد قتلوا فرحتي في مهادها .. تخيلوا مقدار الصدمه .. تخيلوها وكانه شاب سعودي تتصل عليه فتاه ذات صوت شجي وفي الاخير يطلعوا اخوياه مصلحين فيه مقلب .. تخيلوها فرحة فتاه تقدم لها شاب وفي الاخير يرفضها ( الله يقلعك لا عاد تشبه مره ثانيه ) .. ثم ماذا بعد ذلك يا نفس.. اين اذهب؟ وماذا افعل؟ ومن سيقبل بي؟

اصابتني الكابه وفقدت الامل بالحياه .. وفكرت كثيرا بالانتحار .. ولكن سرعان ما اتراجع .. ويحك يانفس توبي واياك والحماقات .. حاولت تخطي معاناتي وكثيرا ما فشلت ..

واحد وخمسين واحد خمسين بخٍ بخ ٍ ( هذي مشكلة اللي ثقافتهم صفر ) ..

آه آه بخٍ بخٍ ..

الا ليتي شعري هل ابيتن ليلة قرير العين ×× من غير هموم او طنقرة بوزنٍ

افتوني بالله عليكم ماذا افعل؟ ولمن اشتكي؟

استشرت طبيبا نفسيا حكيما فقال لي يا بُني اضحك للدنيا تضحكلك .. خرجت من عيادته وانا منتشي طربان وكانني ملكت الدنيا ..تخيلت وكاني قبلت في جامعة عزوز كلية علوم البحار( يقلع ابو الطموح ) .. اول ماغادرت العياده صادفت ممرضه سيلانيه فتبسمت في وجهها فبصقت في وجهي ..

اه ياطبيبي وماحيلة ابن ادم لامنه ابتسم للدنيا بصقت في وجهه .. خرجت من العياده وفي قرارة نفسي بان القي بنفسي امام اول سياره اراها ..

وما ان دلفت رجلي الى الشارع والقي بنفسي امام سياره مسرعه .. نطقت الشهاده واغمضت عيني بانتظار اللحظه الاخيره .. انتظرت برهه وبرهةٌ اخرى ثم برهة ثالثه ..نهضت لاجد السياره التي اخترتها لنهاية حياتي وهي منقلبة بجواري والسبب مطب اصطناعي تتبعه حفره ..

آه آه بخٍ بخٍ حتى الموت لايريد ان يقبلني ..

((الفصل الثاني))

وفي يوم اخر كئيب .. هه كنه خميس خميس او ثلوث وان كان ماني متوهم فهو يوافق اول شباط السنبله .. واكيد كلكم تعرفون شباط اللي تجونه من جهة غرب ثم تطلعون شمال كانكم طالعين صلبوخ( ما تحسون اني اوصف كل شي .. ان شاء الله طال عمرك <<كاني سامع واحد يقول اخلص علينا ياالثور ) ..

وبينما انا افكر في مصيري وانا في غمرة احزاني .. اذا بهاتفي الخلوي يُقرع ( حشا مركب جرس ) ..

<فاصل>

الزبده فكونا من ذا الهرج المعقد احس اني تعقدت وعقدتكم معي .. احس اصابعي انبعجت وانا اكتب ,,

المهم..بعد ان قُرع الجوال ..كان المتصل رفيق دربي ومشاركني همي وحاله من حالي .. بعد ماسلم قال .. وجدتها وجدتها وجدتها .. قلت الله يخلف على امن جابتك هالحكي جحدناه من عقب الفاصل .. قلت اخلص علي يا الفاهر يا المنحط يا عاله على المجتمع يا بطاله انت .. قال.. خلاص يابو سوسن ربي فرجها من اوسع ابوابه ولقينا حل ينفع لي ولامثالك من اللي نسبهم اقل من 80 .. قلت عجل به يا اخا العرب .. اقصد انهج علي يا الثور وشلون؟؟

قال الدوله ماقصرت.. والله يطول بعمر ابو متعب صقر العروبه .. عرضي دونك وكلي فداء يا رسول الله ( الاخيره دخلت غلط بس وش نسوي عند كل اشاره لازم نشوفها .. المشكله تلقى اللي بالسياره معلين الصوت على ريكي مارتن على الاخير والسياره تهز هز وبالقزازه مكتوب الا رسول الله -اللهم صلي وسلم على سيدنا محمد- الله يصلح حال الشباب) ..

ايه وين وصلنا .. ايه يابو سوسن والحديث لصديقي .. الدوله ماقصرت وفتحت باب البعثات الخارجيه للدراسه .. وابشرك بعد كل العاطلين بالسعوديه ياخذون بعثات ..

اييييييه تذكرت كوكبة الشرق الست ام كلثوم يوم تغنت بالحان عبدالله بلخير وهي تقول.. هل رأى الحب سكارى سكارى مثلنا ..

وفي تلك اللحظات السعيده تذكرت حكمه صينيه تقول .. ائلب الئدر على فومها تطلع البنت لامها .. واخيرا بنكسر عين الشايب ولا يقعد يذلنا كل شوي يوم اني بامريكا ويوم ويوم ..

((الفصل الثالث))

المهم .. جاني ابوي ومعه كل اوراقي جاهزه .. التقديم على وزارة التعليم العالي وموافقة الجامعه في بريطانيا وطبعا شهادة الثانوي وشهادة السيره والسلوك واربع صور 6×4 ملونه وملف علاقي اخضر ..

مابقى الا اروح السفاره واسوي معهم المقابله .. عاد الوالد يوصيني خلك رزين وبين لهم لغتك الانجليزيه اللي تعلمتها 6 سنين بالمدارس .. والمشكله انه مايدري انه ايام الاختبارات ما اعرف الا احط صح وخطا واختر الاجابه الصحيحه على عماها ..

قلت له شوف يابابا ( بيسافر بريطانيا ويبي يصير مودرن وولد نعمه ) .. الباب اللي يصقع براسك ويخلع ضروسك وش تبي يا الفاهر يا المنحط ياحثاله يابطاله ( شايفين السبه تدور وتدور وترجع على صاحبها )..

قلتله يا طويل العمر انا ما اعرف من الانجليزي الا يس ونوو وكلمتين طياره وتباً لك .. قالي وش معنى طياره طيب ..

بصراحه بيني وبينكم والكلام للجميع ماتوقعت يسالني .. قلتله معناها تياره (الله يجازي اللي كان السبب ) .. ويمسكني ابوي من رقبتي ويتلني على الدركسون ثمن يفتح التنده ويصكرها علي ..وبعد ماحن قلبه ونزلني .. اجل تياره جعلهم يتيرون راسك بالحاير .. اسمها ايروبلين جعلك الصمرقع يا التيس الاربد ..

المهم دبرها ابوي ووافقت السفاره على طلبي بدون المقابله ..

وبعد ايام جاء المنعطف المهم في حياتي حتى اني قبل المنعطف شفت لوحة مكتوب عليها.. امامك منعطف حياتي خفف السرعة ..

وجا اليوم الموعود .. وصلني ابوي للمطار ..وصراحه كنت مخطط من قبل لا اطلع الطياره التفت التفاته اخيره واتخيل نفسي وانا اصيح واذب شناطي واغراضي واحضن ابوي احتضان عنيف وانا اصيح .. بس للاسف قاسي القلب نطلني عند المطار ومشى .. وآه ياقاسي انا فيك ابتليت هذا حظي والطريق اللي مشيت .. وودعني الهندي حق العفش بعد مابخششته بعشر ريال,,

((الفصل الرابع))

وصلت مطار هيثرو بلندن .. وسكنوني عند عايله معوقه .. الابو مايكل وهذا اربع وعشرين ساعه القاروره بيده فاقد طول الليل والنهار الله لا يبلينا .. وامهم روز هي الوحيده اللي فهمتني مع انها احيانا تخربها وتناديني ايها الحقير الصغير .. ماتنلام من زوجها العربيد السكير اللي من دخلت بيت هالعايله ماتعلمت الا جملتين ..

أين الجعه ياعزيزتي .. ولابد انك ثملا ياعزيزي .. واللي يغبن ان ام بي سي2 مايترجمونها الا تباً لك.. تباً لك ..

وهالعايله عندهم ولدين .. الكبير سميث عليه تصرفات غريبه ووراه بلا .. ابد مو طبيعي .. اما الصغير جون ولد ماااااااصل شعره احمر .. ومن زود البثاره وواشم بخده شجرا خضرا .. مع بياض بشرته التفت على ماما روز وقلتلها حشا الظاهر انك متوحمه بعلم لبنان يوم تجيبنه ..(بالمناسبه دعواتكم لاخواننا واخواتنا بلبنان .. وتبرعوا الله يصلحكم لايخرب مصيف السعوديين )..

بس هالعايله على بثارتهم بس انهم طيبين ويقدرون رغبات الواحد .. يعني اذكر اول ماوصلت عندهم سالتني ماما روز وش تبي تاكل .. وانا الحين ابي اشرحلها اني ما ابي لا لحم خنزير او بسطرما وعاد خويكم حده بالانجلش ميت وتشيكن .. قلتلها نو ميت .. جلسنا شهرين وحنا كل يوم ناكل دجاج وتونه الين تعلمت الكلمتين ..

بعدين عندهم نظام رهييب .. يعني تلقى كل واحد له صحنه الخاص وكاسته حتى الكنب كل واحد له كنبته ومايقعد بغيرها..والمشكله ان مايكل ورز اربع وعشرين ساعه متسدحين بكنبتهم تقول ماعندهم سرير ..

بس عندهم نظام غبي.. حمامتهم الله يكرمكم بدون مفاتيح والدعوه حبيه .. اذكر مره دخلت اتروش ومصكر الستاره والباب بدون قفل .. وفجاه يفتح الباب .. دخلت روز وقامت ركبي تنافض وصقعتني ام الركب .. جلست على الكرسي وقضت وخرجت وتركت الباب مفتوح ولا كان فيه احد داخل .. عاد تخيلوا شلون بصكر الباب ..

((الفصل الخامس))

ومرت الايام وبالرغم من تاقلمي مع العائله المنكوبه .. الا ان الهدف الرئيسي كان بعيد جدا .. كانت الدراسه في وادي وانا في وادي اخر .. تخيلوا شاب سعودي عمره ماراح ابعد من ديرتهم وان خربها خربها راح جده غير .. وبين يوم ليله ينقلب كل شي .. يعني يبدا الواحد يشوف اشياء بيضه عقب ماتعود على السواد وهو حده بديرته لامرت وحده مبرقعه مشى وراها وقالها .. ليه الغزال مستعجل وش وراك ياحلو .. ترد عليه وراي حمار .. ثم يطير من الفرحه انها كلمته ..

وفجاه يلقى كل اللي حلم فيه باشكال والوان قدامه .. حتى الديسكو اللي مخصص للي اعمارهم فوق 21 سنه زورنا اعمارنا ودخلنا ..

وهذا حالنا كل يوم .. سهر بالليل وديسكو ورقص وفلة حجاج .. وبالنهار نووم وسحب على المدرسه او عادي نروح وننام .. هناك عادي كل اللي تبي تسويه وماعليك من احد ..

حتى عند العايله عادي جيب معك اللي تبي بس المهم لاتتعدى على حدود غيرك .. يعني كنبتك سوي فيها اللي تبي بس لاتقرب من كنبة غيرك والله ان يطلعلك مايكل وهو سكران ويلعن جدفك يسمعك كلام كله تبا لك تبا لك ..

وطول النهار متكين مع الشباب والشابات العرب.. وضحك واستهبال ورقص والعالم يمشون حولنا ويضحكون يحسبون الدعوه تهريج .. وان ملينا رحنا الهايد بارك وطقيناه كوره .. ومحد يرجعك ورا بهالديار الا العرب اللي هناك ..

كمثال في كل يوم أحد في مكان مخصص بالهايد بارك لالقاء الخطب والكلمات .. من اي جنسيه او ديانه والناس تتجمع تسمع .. وكان فيه واحد زول طيب اجودي جالس يتكلم ومسح باليهود وهتلر وكل الاوباش الارض وحنا يا العرب الجرب نصفق له وشوي يمر المطفوق بلخير وهو يغني جانا الهوى جانا من زنجبار .. وشوي هالجرب اللي يصفقون مع الزول للاسلام صاروا يصفقون لبلخير واحلى دعايه لاحلى عرب ,,

(( الفصل السادس)) << ابشركم قرب الفرج خلاص وصلنا للنهايه ..

ومرت الايام وانا على هالوضع والحاله من سيء الى اسوأ .. الى ان جاء هذاك اليوم ..

كعادتي راجع من الديسكو اول الصبح وجيت ابرمي نفسي على السرير الا اشوف احد بسريري .. قلت يووووووه هذا اكيد غريب الاطوار ولدهم الكبير سميث ...

لاني اذكر مره اخوه الصغير جون (البثر ماغيره ) سوى فينا مقلب وقال لاخوه الكبير .. العربي يحبك والقى غريب الاطوار سميث بسريري ويقولي ليه ماصارحتني خلاص انا البوي فريند حقك ..

المهم.. جيت ابتله من رقبته .. والقى ملاك نايم بسريري .. خفت اصحيها ورحت نمت بكنبتي جنب العربيد وزوجته وغمضت عيني ..يوم صحيت نادتني ماما روز وعلمتني بالسالفه .. وقالت ان هذي بنت مكسيكيه وتبي تسكن عندنا جيزها جيزك(مدري شلون طلعت بالانقلش ) ولازم تحسن معاملتها .. قلتلها ابشري ايتها العجوز الشمطاء تبا لك تبا لك ..

المهم وانا اقوم واروح يم المكسيكيه واسلم عليها وارحب فيها .. واقولها علي الطلاق فطورك علي اليوم

قلت لها وش أسمك: قالت معك ماريا بنت خوليو بن سيزر ال مرسيدس

قلت لها: عاشت الاسامي ماريا .. بس يعني لاعب النصر السابق خوليو سيزر ابوك؟

قالت لي: لا ياخبل انت ذاك بوليفي وانا مكسيكيه يافتى

قلت لها : اسمك جدك سيزر أجل مصنع عصيرات سيزر لكم صح؟

قالت لي: لا لا يالخبل كلما ما تشابه عليك اسم لزقته فينا .. فيها قبايل ذي .. بس انت قولي .. انت سعودي صح ونكك ابو سوسن ..

قلت لها:العن ام الحركات وش دراك بلوتوثكم فيه ذا الميزة ..

قالت لي: ههههههه ما الطفك يابن تريزا.. بالله عليك من اين لك هذه الوسامة ايها الرجل القوي ولا تنادني من بعد اليوم الا بحبيبتي ايها القوي الوسيم ( والله البلا من المسلسلات المدبلجه )

ويوم ورا يوم وملعونة الجدف تدلعني وتخققني معها الين تعلقت بالارض اللي تمشي عليها حبيبتي ماريا .. وصلت لدرجه اني بعت الدنيا ومن فيها لعيون ماريا ..

الى ان جاء يوم من الايام وبدت معي ماريا كالعاده .. يامحبوبي يافاتني ياحبي الاول والاخير ساطلب منك معروفاً.. لدي مشروع واريدك ان تموله .. قلتلها انا فداك يابعد طوايفي ..

وبعد كم من يوم دق ابوي على المبوبايل تبعي سلم ورديت عليه السلام عاد انا ابي اوريه اني منيب بسيط في اللغة

قلت له: هاي دادي ..

رد وقال : هايات ماي بوي هاو ار يو

قلت له: ام فاين..هاو ار يو after me ؟ ( معنى السؤال وشلونك يا بعدي )

قال لي : بخير المهم متى بتجي يا ولدي .. بيني وبينكم كنت ماقدرت اعلمه بالحقيقه وكنت ابيه يرسل لي فلوس بقوله انها رسوم الدراسه والعايله واهي اصلا لعيون ماريا مرسيدس ومشروعها ..

قلت له: يبه باقي دفعه اخيره من حساب الدراسه والعايله ..

قال لي: كم تبي ارسلك دراهم؟

قلت له: بس خمسين الف الله لا يهينك ..

قال: بكرة ان شاء الله تلقاها عندك في الحساب !

يوم قال لي ذا الكلمة وأعطيه ذيك البوسة الكبيرة في السماعة وأقول له: بحبك يا أحلى اب في الدنيا ..وأسكر السماعة وأقول في نفسي هالشيبان لو بغوا يطلعون الدراهم طلعوها ,,

واروح طاااااااير صوب حبيبة القلب ماريا مرسيدس وابشرها .. ومثل مافهمتني انا علي التمويل وهي تنفذ المشروع والارباح بيننا وانا على عماي اهم شي معشوقتي مبسوطه مني ..

مر اسبوعين على هالحال .. الى ان اتى اليوم المشؤوم ..

حاصرت الشرطه منزل مايكل ثم اقتحمت المنزل والقت القبض علي وعلى ماريا مرسيدس ..

وبعد التحقيق اكتشفت ان المكسيكيه كانت تتاجر بالمخدرات والممنوعات باسمي .. وطلعت هي برائه وانا اللي قعدت بها .. ومن زود الطفاقه قلت كله لعيونك ياماريا .. لكن الصدمه انها جاتني وقالت .. يا ايها المغفل الحقير الابله .. يالك من ساذج واحمق ..تستحق العقوبه لغبائك وطيشك ..

وطلعت الماخوذه مثل الشعره من العجين

بس الحمدلله طلع مامور الشرطه سبق وان اشتغل بالسعوديه بوظيفة طبيب استشاري باحد اكبر المستشفيات وقحش من هالفلوس الى ان شبع شي منه راتب اساسي وشي بدلات .. تصدقون معطينه ..بدل همر .. بدل جيمس سوبر..بدل ازعاج .. بدل سوء الجو.. بدل تاخير القهوه .. الظاهر بعد معطينه بدل راتب ..

وفي النهايه تكفل على مسئوليته الخاصه انه يوصلني للسعوديه مع وضع اسمي على لائحة الممنوعين من دخول البلاد..وعدت الى وطني بعد سنتين من الضياع ,,

الفصل الاخير .. مايستفاد من القصه..

^ ^ والله ماظنيت فيه فوايد غير ان سجن الحاير صار قريب ..

1- هالبعثات اللي صايره هاليومين ..ضررها اكبر من فايدتها وموضوع يستحق النقاش بالفعل .. يعني من جد صاير شي غريب اللي ماينقبل بالجامعات السعوديه يطلع بعثه!!! يعني بصراحه الموضوع يبيله ضوابط اكثر,,

2- لازم الشباب السعودي قبل لايطلعون برا ياخذون دورات في كيفية التعامل مع المحتالين والنصابين والمجرمين وبعد دوره في التعامل مع الجنس الناعم

,,

3-هذه القصه كتبتها على عجل وهي من تأليفي يعني لا أحد يصدق

..

واعتذر من الجميع على الاطاله .. ودمتم,,

نـــــــ15ــــــمر · #2 27/07/2006, 06:06 AM

والله انك مشوااااااااااااااااااااااااااااااااااار

يا خي اقلها نسق شوي

ابرجع ان شاء الله

تشــــــــــــــــــــــــــــــــاو

الهنوووف · #3 27/07/2006, 06:07 AM

شكلك كاتم في قلبك
وش ذا ياطووووووووووووووووله

بقراها اذا جا بالطياره :p
الحمد لله على السلامه فاقدينك والله

تراني محلمه فيك وان معك سياره سودااء

لنا عووودة

هلالي و مانشستراوي · #4 27/07/2006, 06:13 AM

يعطيك العافيه .. وقصه مشوقه ؛؛

لوحة مميزة · #5 27/07/2006, 06:28 AM

<<-- قرا الموضوع قبل لا تنسق وتحط السطور الفاضيه بين فصول الروايه ;)

الله يرج بليس عدوينك أنت وهالقصه الفزيلوجية المنسمة الهادفة

<<---- وين هادفه معه

إقتباس


	وصراحه كنت مخطط من قبل لا اطلع الطياره التفت التفاته اخيره واتخيل نفسي وانا اصيح واذب شناطي واغراضي واحضن ابوي احتضان عنيف وانا اصيح .. بس للاسف قاسي القلب نطلني عند المطار ومشى .. وآه ياقاسي انا فيك ابتليت هذا حظي والطريق اللي مشيت .. وودعني الهندي حق العفش بعد مابخششت بعشر ريال,,

من جد ياخي ليه التمثليات يلعبون علينا يصورون مشاهد ما تصير في الأمر الواقع

يالله يعطيك العافية ولا تحرمنا من جديدك اللي يميز هالسالفه أنها أقصر من غيرها ولا سوالفك بالعادة مافي أمل أقراها

يالله تحياتي ..

هلالي الظهران · #6 27/07/2006, 07:33 AM

ماشاء الله امداكم

,,

اسف على التنسيق الاولي اللي طلع فيه الموضوع بس وش اسوي المنتدى قام يستهبل

,,

راجعلكم بس الحين تصبحون على خير

,,

Blues4Ever · #7 27/07/2006, 10:24 AM

^
^
مو منك من التخبيص الي با اخبار المجلس <=====فضيحة

على العموم مشكور

G o L d E s T · #8 27/07/2006, 11:23 AM

تسلم اخوي على القصه

القاضي · #9 27/07/2006, 01:54 PM

الحبيب هلالي السرعة،

ماشاء تبارك الله و أنا كنت أظنك محلي فأصبحت عالمي ، أقصد في السجون. لابد أن تلك المرأة فائقة الجمال لتهبها خمسين ألف ريال أو أنك "ماشفت" خير و "ماصدقت" على الله.

ثم ماذا فعلت ماما روز عندما دخلت عليك في الحمام. فقط "جلست على الكرسي و قضت"!؟ يا أخي لابد من الاسهاب.

".. لامرت وحده مبرقعه مشى وراها وقالها .. ليه الغزال مستعجل وش وراك ياحلو .. ترد عليه وراي حمار .. ثم يطير من الفرحه انها كلمته .."

هههههههه و الله تخيلت المشهد و هالأخ يتميلح.

لا و من زين الطبايع صاير سميث يحبك.

بس صارحني ما توطى ابوك في بطنك يوم رجعت!؟

بالنسبة للبعثات ، في السابق كانت الوزارة مشكورة تقوم بعمل دورات للشباب في كيفية التعامل و التعايش في الدول المبتعثين إليها. للأسف الشديد هذا لايحدث الآن و لا أدري لماذا!!؟

شكراً لك على القصة و على الدرس.

سهل · #10 27/07/2006, 04:07 PM

سكلتك امك

اذكر احد الاقرباء عندما ذهب (لانقليزيا ) << يسميها كذا

وعندما يجتمع مع الاسره على الكنب كان لا يعرف سوى ( يس ) ( نو )
كانوا يقولون له انت ولد جيد فيقول ( يس )

وبعد برهه

يقولون له
انت ولد غير جيد فيقول ( يس )

وبعد مضي سنه ذكروه بما حصل فبانت نواجذه

قد يكون أهل المدن اقل الفرائس وقوعاً بالمحظور اذا سافر شباب القرى !
اعرف شخصاً سكنت معهم فتاة روسيه مسلمه كانت تطرح الفلو من السكاي

جميلة جداً .. تراه يصلي وهو هايم بغرامها ولكن يمنعه دينه من التحرش بها
اعجب بها وبثقافتها الدينيه وحين عودته ارسل لها كل الكتب الدينيه التي طلبتها
ومصحف وسجادة صلاة ( كان يعصي الله ولكن امامها لا يستطيع ) ماذا ستقول
هذا المسلم يفعل كذا .. لم يمنعه شئ من الذهاب الى الديسكو ولا الى تناول المسكرات
فما الذي منعه من هذه الفتاه !!

<<< الرجال يقول قصه من تأليفه وانت مسكت به خط

ما هو الإحسان في العبادة ؟
(الإحسان أن تعبد الله كأنك تراه فأن لم تكن تراه فأنه يراك) فانه يراك فانه يراك فانه يراك .