" عودنا لكم والعود أحمد ، رجعنا لكم بعد ماخلصنا إمتحانات !
رجعنا لـ دوام والجلوس ع هـ المكتب والإطلاع ع الملفات وتخليص المعاملات --->> قلنا إفتتاحية موب قصة .
أيه سلمكم الله هذا العدد 6 طول الله أعماركم ع طاعته قدامكم ..
فصفصوه وأقروه زين ، والله يعينكم بتجيبون قهوة لأن مقال العنا بيصدع رأسكم .. "

كما يسرنا ان نتقدم بالشكر الجزيل للاخ " موادع " على مجهوده الكبير في تغطية خاصة لزيارة خادم الحرمين الشرفين لـ جامعة القصيم ..
كذلك نتقدم بـالشكر الجزيل للمشرف "Mr.GoaL " على فكرته لزاوية قول على قول ...





يالله وأنت الملاذ إن مسني عوقي
وأنا ذنوبي هجد من راسي لساقي

يالله تغفر خطاي وترحم وتوقي
عظمي نهار الحساب وتقبل إعتاقي

بهذه الكلمات يناجي الشاعر المتألف فهد المساعد ربه طالباً العفو والمغفرة ، ولا نملك سوى أن نردد آمين على ذلك الدعاء سائلين المولى جل جلاله ان يفعو ويغفر لنا خطايانا .
لن أُطيل عليكم ، تعالوا معنا نبحر سوياً في رائعة الشاعر فهد المساعد وهي بعنوان (التوبه) :

تطيح دمعه واسلم للفضا موقي
وارفع يدين الذنوب وتظلم أعماقي

أشوف قبري يمر بوحشته فوقي
وتصير كل الحياة أضيق من أخلاقي

يا نفس طالت ليالي غيّنا فوقي
كم قلت يالله وقلتي تونا باقي

يا المزنه اللي تحن لغيثها نوقي
تعبت أخليك وأقول نياقي نياقي

تعبت ياما تعبت وضاعت حقوقي
ياما ندمت وردمت الذنب فـأوراقي

ياما سكت وتركت البوح لعروقي
أخاف اسولف وأخيب هقوة الهاقي

أخاف ابوح ويخون الصمت منطوقي
وأقول شي يحث الناس لفراقي

يالله وأنت الملاذ إن مسني عوقي
وأنا ذنوبي هجد من راسي لساقي

يالله تغفر خطاي وترحم وتوقي
عظمي نهار الحساب وتقبل إعتاقي






ضيفنا في هذا العدد " كايدهم " ، أشرف في بدايته على منتدى الجمهور الهلالي .. وبعد مده عينوه عندنا بـ المجلس العام ..
كايدهم ..




حيا الله ضيفنا [ كايدهم ] تفضل أشرب القهوة وعين من الله خير ، وعطنا بطاقتك الشخصية نشوفها ؟!

الاسم : اسم زي باقي خلق الله --> لا ياشيخ

العمر : 24 سنه .

الجنسيه : سعودي

طبعا اعـزب ولا عندي نيه للزواج --> تكفى اعرس


1/ سولف لنا عن بداية طقطقتك بـ الكيبورد ؟


اووووووه اذكر ايام صخـر كنت العب فيه .. ماكان فيه الا لعبتين طلعوها كورة قدم و باكمان ثم تطورنا شوي وصرنا نلعب اتاري ثم كمبيوتر العائله الى ان دخلنا النت زيي خلق الله ..

2/ ياأخي وش سبب أختيارك لـ كايدهم ؟


والله ماادري ، وانا من الاشخاص اللي مايهتم بأسم باليوزر بقدر مااهتم بمضمون مايكتبه الشخص ..


3/ كايدهم يقولون أن فيه علاقه حميمة بينك وبين السودانين ؟


اوهووووه ..

والله الحمد لله ماتربطني معهم الا كل خيــرر بس اللي عجـزت افهمه في الـزوله كيف يضـبطون الـبكشه اللي فوق روؤسهم بدون ماتـطيح ..

4/ وأنت ماشي في هالحياة مامر عليك موقف وحلفت أنك مـ راح تنساه طول عمرك ؟!

اممممممممم .. والله مافيه شيء معين لي لكن حصل لاحد اقربائي

اذكـر موقف في الـبر .. كنـا طالعين مع اخويي في رحله بريه تبعد عن الرياض 150 كم مدتها 4 ايـام قبل سنتين او ثلاث تقريبا ..

احد ابناء عمي جاء للمخيم بعد وصولنا بـيوم وكان مادل المخيم زين وضيع في الليل وكان يكلمنا في الجوال ويقول انه جوعـان .. ولا فيه مطاعم فاتحه ولا فيه شيء .. وانا ماكان عندنا الا خـروف مشـوي مـع مــرق .. المهم قال لواحد اني بجي خلوا لي شـوي من الاكل على بال مااجيكم .. المهم طول شوي وبعد ماوصفنا له الف مره ياله ياله وصـل .. يوم وصل كان في الليل وبـرد وطالع من بـدري .. وجوعــان مررره .. يوم جاء عندنا وقال وين العشاء ؟ قاله اللي دق عليه .. ماعندنا اكل خلص عشانا ولا درينا انك تبي اكل ..

المهم ولد عمـي .. حاول يبين ان الموضوع مايهمه.. وبعدها بساعتين قبل الفجر بشوي .. قال بيروح للمحطه يجيب اغراض تبعد عنا حوالي 15 كيلو .. وراح معه اللي دق عليه .. المهم وصلوا المحطه وحاول ولد عمي ينزل اللي دق عليه يجيب اغراض من البقاله .. الغـبي نـزل للبقالـه يشتري اغراض .. وصار ولد عمي في السياره .. ولد عمي شغل السياره وعــنننن >>> ويمشي ويخليه في البقاله ويرجع لنا في المخيم ..

اللي في البقاله طلع ولا لقـاه .. ولا معه جوال .. ماله الا يمشي من المحطه للمخيم يعني يبيله اقل شيء 6 ساعات مشي في عز الـبرررد حتى يوصلنا .. المهم وانا في المخيم واحد من اخوينا قال بيمشي للرياض .. وهو راجع من حسن حظ اللي في البقاله شافه خوينا وركـبه ورجعه لنا وهو H !! طبعا صار بعدها مقالب شينه لكن هذا من المقالب اللي اعتبرها ثقيله ومستحيل انساها ..


5/عضو تحسه فاهمك وعارفك في المنتدى ؟ وعضو رافع ضغطك وودك تتمشكل معه ؟

والله مافي احد معـين ..

6/ وش طموحاتك بـ هالحياة ، وتحقق شي منها ؟

اهم شيء رضا الوالـدين وهذي مااقولها زي اي اجابه ثانيه لكن فعلا رضا الوالدين اتمنى اكون بار فيهم لان اللي قدموه لنا لو يفكر فيه الشخص فعلا يجد انه مقصر جدا في حقهم ..
اللي تحقق من طموحاتي .. مافيه شيء معين كون لسا في بداية حياتنا لكن الحمد لله مافيه شيء في خاطري ماجبته ..

7/ بيت شعر تحب تقوله ؟

المهتوي اذا اهتوى يمشي على النار كنه ماطوى فيها ..

8/ سؤال توقعتنا نسألك إياه ولا سألنك ؟

عن الاشراف ومنتدى المشرفين

9/ كلام ودك تقوله وتختم فيه اللقاء ؟!

يعطيكم العافيه على مجهودكم وعلى مجلتكم الممتعه والشقيه واللي فعلا اعطت جو ممتع في المنتدى العام .. اتمنى استمرارها ، واشكر فريق العمل على جهوده المبذوله لاسعاد اعضاء منتدى المجلس العام .






بو ريمان: دخلت المنتدى
العنا: ايه توني مشيك قبل شوي
بو ريمان: مافي شي ما لاحظت شي
العنا: وش يعني الحب والاشراق والعنف ما تجي والله والهنوف طيارتها بتقلع وسهل يدور بقفله وبنت عمي راحت لمكه صح صح لاحظت ان محبوبه كتبت رد
بوريمان: لا غير هذا ما لاحظت شي بعد
العنا: بدا العرق يتصبب والحال يقول انه توهق
تراني عاد ماطولت بس تشييك وطلعت
بوريمان: ممكن سؤال
العنا: لا
بوريمان: متى بتترك الكذب عنك
العنا: بوريمان انت انسان محترم وانا قلت لا يعني لا وبالتالي لن اجاوب >>>> صك عليه
بوريمان: المهم اعضاء المنتدى بيطلعون للبر
بوريمان: شباب وبنات وتراهم بيطلعون الخميس الجاي بعد الفجر بتخاوينا صل معي الفجر
العنا: هههههههه قصدي مع السلامه
الخميس الجاي الفجر
العنا: ياخي امامكم يطول
بوريمان: اقول لا يكثر
العنا: طيب طيب تشوف اذا ما اكتب بالمنتدى انك تقول كل تبن
بوريمان: اقول الله يرزقك عقل
العنا: مشكله بعدين يطلع عندين عقلين >>> سجع هذا الشعر مو شعر ليز وسوسو الهلاليه
الا ماقلت لي بوريمان كم بنقعد
بوريمان: يوم واحد بنروح الفجر وبنرجع آخر الليل
العنا: طيب كيف الترتيب
بوريمان: تكلفت يوم جينا بنمشي تسال
العنا: لا صدق عاد كيف الترتيب
بوريمان: المكان مختاره دبل كيك والروحه البنات في سياره مع القاضي والشباب في سياره واللي يبي يجي بسيارته براحته
العنا: اكيد ولد الظهران بيجي بسيارته وطول الطريق تفحيط حول سياره البنات ويمكن يحد القاضي وتخبر القاضي النظر عنده لك عليه اخاف مايرد القاضي الا الردميه شرايك اسوق عن القاضي
بوريمان: شاورهم وصفقني ان وافقو
العنا: طيب وانت
بوريمان: انا بخاوي الشباب بسيارتهم مدري عاد بيروحون بسياره مين
العنا: طيب وينهم الحين
بوريمان: متواعدين عند المجلس العام بيوقفون سياراتهم هناك ويمشون من هناك خلنا نمشي لانتاخر
^
^
يؤ يؤ كل هذي سيارات اثرنا واجدين الله يخفف على سيرفر الشبكه :p
بوريمان شكلنا تاخرنا شف العالم جاهزين انا خلني اروح اسال القاضي يمكن يبي خوي واذا صرفني يمكن اخاوي ولد الظهران واذا صرفني هو بعد جيت اركب معكم

اقول القاضي ترى خطا تروح لحالك ما معك الا بنات شرايك اخاويك
القاضي: لا لا ماعلينا الاالعافيه
بعدين الشباب بيركبون في سياره ابوعثمان وبيمشون حولنا انا متفق مع الجاحظ
العنا: مهما كان ضروري اخاويك
القاضي: اقول شرايك تفارق
العنا: طيب طيب قاضيوه تشوف اذا ما اكتب بالمنتدى انك تقول كل تبن

العنا: هلالي بخاويك
هلالي الظهران: اقلب وجهك
العنا: المشكله انت عادي اكتب عنك انك تقول كذا اصلا لو اكتب انك قايل اقلب وجهك تحسنت سمعتك شوي
المهم بخاويك والله لاعلم انك جايب معك معروض
هلالي: اركب اركب يالفضيحه
العنا: اقول شرايك ادق على بوريمان اقول لهم انتم اسبقونا وحنا بنماشي القاضي
هلالي: ياسلام عليك لوني داري عن افكارك كان ركبتك معي من زمان
العنا: توك ماشفت شي اصبر علي
طيب الفقه خل اكلم بوريمان
الو حول عمليات العنا يتكلم من سياره هلالي سياره رقم 3 الوضع مطمئن والبنات بخير وتقدرون تسبقونا الوضع تحت السيطره
بوريمان: مهب شغلك مع السلامه طوووط طوووط
العنا: لا لا عادي واجبنا الله يخليك بوريمان وتبون ترجعون ونروح انا وهلالي نمشي البنات عادي
هلالي: هاه بشر
العنا: ابشرك الامور تمام بس الظاهر مهب شغلنا
هلالي: ما فهمت
العنا: يعني آخر المكالمه كنت اكلم نفسي
هلالي: اقول انزل انزل
العنا: اقول لا تقعد تذلنا عند سيارتك ترى راكب معك عشان انتبه للبنات ولو ادري انه مهب شغلنا كان ركبت مع القاضي
هلالي: لا لا تكفا خلك معي اقول انقلع
العنا: الحين القاضي ليه مظلل السياره وهو ممنوع
اقول هلالي شرايك نبلغ عنهم نقطه التفتيش الجايه يفكون التظليله
هلالي: وصلنا وانت تتفلسف
العنا: طيب شرايك تسرع شوي نوصل قبلهم نلف راس دبل ونضبط وضع الخيام وناخذ لنا محلات تحت الشبابيك
هلالي : ياسلام عليك
^
^
^
العنا: هلالي شف دبل صاك الجيب ومشخص :p
هلالي: مرسم كنه في مدخل قاعه زواج :p
العنا: هلااااااااااااا >>>> حركات دبل هلا دبل اخبارك
دبل: حيهم حيهم هلا بهم وين الباقين
العنا: ورانا بس تقدمنا نطمن ع الاوضاع قبل ياصلون نخبرك منت تكانه لنا عليك شوي
دبل: اقول يالغثا خل اليوم يمشي على خير ترانا باولها
العنا: :p
هلالي: كيف وزعت الخيام وين خيمتنا ووين خيمه البنات ومن بيطبخ
دبل: يا غافل لك الله الحين بس فهمت شجايين عشانه
مب شغلكم ومالكم دخل روحو بذيك الخيمه وانثبروا
العنا: فضحتنا هلاليوه انت ماعندك اسلوب ما تعرف
هلالي: اقول لا يكثر اصلا انت بحد ذاتك فضيحه مايحتاج كلام
^
^
^
دبل: حيهم حيهم هلا والله
العنا: اسمع صراخ دبل الحين بيرتاع القاضي ويرجع :p
هلالي: من جدددددددد
العنا: قم هلاليوه فرصتنا انت نزل عفش الشباب وانا بنزل عفش البنات
هلالي: لا كلنا نروح لسياره القاضي انت نزل شنطه القاضي وانا بنزل شنط البنات
العنا: اوكي مو مشكله بس جب شنطهم عندنا سو فيها ملخبط عشان كل شوي يطلبون شنطه ونوديها لهم
لحظه هلالي غير بدلتك في احد يلبس اخضر مع احمر
هلالي: وش البس
العنا: اخضر وابيض وسيفين ونخله
هلالي: على تراب
العنا: :p
هلالي: العنا تعال بسرعه شف
العنا: شصاير
هلالي: شف الشباب مجتمعين خ نشوف شعندهم

بوريمان: كيف البرنامج
القاضي: انا من رايي نخليه مفتوح
العنا: لا انا اشوف نخليه مغلق :p اييييي
كوع ع الطاير موجه من هلالي للعنا
الجاحظ: من بيطبخ
العنا: من يعني اكيد البنات
قفزه سريعه تفاديا لكوع جديد من هلالي
الجميع: الله يرزقه عقل
هلالي: الا المفروض البنات يطبخون
بوريمان: انا اقول خلونا نغير شوي يطبخون الشباب
العنا: اموت وشوفه ضد البنات يوم
الجاحظ: المهم ناكل اكل صح وبس
القاضي: اعتقد دبل ممكن يطبخ
العنا: الحين المشرفين ليه روسهم كبيره وما يشاركون بالترتيب :p
القاضي: ياحبه عيني يالمشرفين شيبدون شيخلون
العنا: ياشيخ المفروض نسميك الآضي مو القاضي ي المصري
بوريمان: المهم دبل ما عندك مانع تطبخ
دبل : افاااااااا عليك بوريماااااااان انت تاااااااامر وحنااااااااا نطااااااامر >>>> يقولها وهو يطامر
بوريمان: القاضي كيف وضع البنات
القاضي: انتم روحو لخيمه الرجال وانا بشيك عليهم والحقكم
دبل: هيه هيه هلاليوه وين وين
هلالي: بروح مع القاضي يمكن يبي شي
دبل: وانت يالعنا وين
العنا: بروح ارجع هلالي اذا خلص من فزعته مع القاضي
دبل: تعااااااال انت وياااااااه قطعو البصل والطماط
العنا: لا والف لا ثم لا تتلوها لا جاي قبلها بشوي لا
البنات يقطعون ايييييييييييي
كوع ع الطاير موجه من هلالي للعنا
العنا: ياخي يومني موخر قبل شوي ماعطيتني كوع ويوم ما وخرت عطيتني بالله علمني المره الجايه اوخر او لا
هلالي: يا خبل خيمه الطبخ طاقها دبل عند خيمه البنات يحسبهم هم اللي بيطبخون امش واسكت
دبل: اححح في احد
العنا: لا لا ما في احد متغطين متغطين
دبل: مو شغلك
العنا: اقصد يعني اللي عنده مشكله هو يتغطى انا شخصيا ماعندي مشكله وهلالي بعد والبنات بخيمتهم انت دبل ممكن تتغطى
ماادري وش صار بس صرت اناظر من خلال فتحات صغيره لم تكن سوى فتحات الملاس الذي نشب في وجهي >> بالله عليك منب اسلوب
هلالي: قلنا اسكت لا تفضحنا
دبل: ترانا بخيمه الطبخ لا يجي منكم احد
صوت قادم من خيمه البنات: طيب
العنا: من هذي هلالي
هلالي: مدري يمكن التميميه اومحبوبه هم الملاقيف
العنا: اقول والله مابراسك لو هم كان سمعناها تيب مو طيب ط كبر راسك
هلالي: طيب مين
العنا: شف عندي خطه قل الكلام اللي قاله دبل ثانيه و خ نسمع :p
هلالي: أوكي
ترانا بخيمه الطبخ لا يجي منكم احد
طررررررنققققق
العنا مركز عند الرواق يبي يسمع الصوت وللاسف ما سمع الا صوت من الخلف لم يكن الا صوت تاوه على راس هلالي نزلت بقوه من يد دبل >>> اروح تاوه ع الاسلوب
دبل: خذو البصل والطماط وانقلعو لخيمه الشباب قطعوه
العنا: م ع ص ي تقعد لحالك حول خيمه البنات محارمنا يادبل
ماخذ البصل والطماط وساحب هلالي وماشي في نفس الوقت اللي يرفع دبل فيه التاوه من الارض مع قليل من الحضرمه
دموع هلالي تنزل من سبايب الزمن ودبل والبصل والتاوه
والطماط يطلع من بين اصابع العنا ولا عصير :p
العنا: ليت البنات يشوفون الطماط عشان ماياكلون
هلالي: قم عطه البصل والطماط وخلنا نطلع نتمشى
العنا: اوكي مو عشانك عشان هـ الصعرور اللي براسك :p
^
^
^
هلالي: عطيته البصل والطماط
العنا: ايه الا بوريمان والجاحظ شيسوون
وسهل وباقي اللي طواقيهم كبار وينهم
هلالي: بوريمان هو والجاحظ يسولفون والقاضي جايب شاي وبيقعد معهم هم وباقي الشباب
المشرفين حاطين لهم خيمه لحالهم يقولون مانقعد مع الاعضاء بس البارق يطل احيانا ;) المهم خلنا نمشي
^
^
^
العنا: هلالي شف من ذيك البنت اللي هناك
هلالي: مدري بس شكلها تايهه
العنا: تايهه اجل اكيد احب الهلال واهله خلها ما تنتحارش ماله داعي ادق عليك بكره ترد علي من السفاره :p
طيب ذيك منهي
هلالي: وين
العنا: ذيك اللي معها بايسون
هلالي: اكيد فيو دام الدعوه فيها مشروب طاقه يمكن تبي تكمل رد وخلصت طاقتها بس اذا تبي تتاكد قزها شف شكلها اذا شينه فاكيد هي :p
العنا: شلون شفتها
هلالي: ما شفتها بس احساسي مايكذب بخصوص الشينات
العنا: ايه يسمونها الحاسه السادسه
هلالي: الا هذيك اللي تشخبط منهي
العنا: اكيد ليز وبكره بتنزله في المنتدى شعر :p

العنااااااااا هلالي الظهرااااااان تغدو
هلالي: من هذا
العنا: دبلوه
هلالي: لاتجيب طاريه يعورني راسي
العنا: اقول هلالي ماله داعي نتغدى
هلالي: ليه
العنا: من غير ليه
هلالي: انا بتغدى وانت بكيفك
العنا: انا ماراح اتغدى
هلالي: لا تكفا ترى ماراح اشتهي اقول بالطقاق
^
^
^
الجاحظ: هذا اللي تبي بوريمان ذق طبخ الشباب
بوريمان: دبل كم حطيت من كيلو ملح
دبل: والله مقدار العاده غريبه والله
سهل: والله لاوقفك يادبل وارفع مواضيعك واقفلها :p
وعلى حين غره يلتفت هلالي الظهران الي ويشير بدمجته المصعرره تجاه باب الخيمه ان اتجه الى الباب ثم اخرج من الخيمه >>> اجل باخرج من الشباك >>> لا يالعنا هذا اسلوب بلاغي >>>> بسم الله علي الله لايضرني :p
العنا: نعم خير
هلالي: شلقصه
العنا: ابد بس غسلت الطماط والبصل بميه كلها ملح عشان تتعقم بعد يدينا
هلالي: طيب ليه ما قلتلي
العنا: ما قلتلك
اوكي اعذرني هذا سر بيني وبيني عاهدت بيني ما اكشفه لاحد انتقاما من دبل
هلالي: امش تحرك لا يدري عنك دبل
العنا: تحسبني خايف منه
اخاف من التاوه والملاس ولا اخاف منه :p
العنا: هلالي من هذيك البنت
هلالي: مدري بس جنبها اوراق اكيد نجمه خلنا نفارق ماله داعي تطلع محرر
العنا: من جد ماله داعي تحرر موضوع خضار
هلالي: شف ذيك البنت اللي قاعده ع الطعس تراقب الغروب
العنا: تلقاها رائده تحسبه الاشراق ترى ما تفرق
هلااااالي
هلالي: من يناديني
العنا: اكيد دبل ما فيه اطول من لسانه
هلالي: اجحده خ نسوي ما سمعناه
هلاااااالي وين شنط البنات
انواع الغبار وكعب هلالي يطق باذنه من السرعه اشوى ما خذ مخالفه بس
هلالي: نعم دبل خير
دبل: وين شنط البنااااااات
العنا: مع هلالي الظهرااااااااان
دبل: كل تراااااااااب
العنا: :p
هلالي: كملو محاورتكم وبروح اودي الشنط
دبل يلقط هلالي من صعروره: تعاااااال وين راااااايح
العنا: ايه وين راااااااايح وكاله من غير بوااااااااب ولا وكاله من غير بااااااااب
دبل: العنااااااااا
العنا: هلااااااااا
دبل: فااااااااارق
العنا: :p
دبل: عطوني الشنط وانقلعو
هلالي: شمعنى هو عادي وحنا لا يعني عشانه تزوج
العنا: والله لو تاخذ اربع انت الثقه معدومه :p
هلالي: تكفا انت عاد اللي مركبين البنات معك
العنا: قالو لي بس قلت لا ابي اصك على خويك الشيطان من اولها
ارتحت منه بس ماارتحت من خويه هلالي
هلالي: العنا ترى ماني ناقصك
العنا: اقول خل عنك البنات
هلالي: صادق والله اصلا كلهم شيون
العنا: اللي ما يطول العنب حامض عنه يقول
هلالي: صدقت والله الا قل تربيه المجلس العام نجوم السماء اقرب لك ;)
>>>> آخر سطرين تمويه ع الزوار اللي ما يعرفونكم
العنا: تعال نمر عند خيمه المشرفين
هلالي: مشينا
العنا: اسمع اسمع سواليفهم
عطوهم شوي حريه
والله ما ينفع الا اي موضوع مخالف قفلوه واي عضو يخالف وقفوه
انا من رايي تعطونهم فرصه
هلالي: تسمع فيه طقطه
العنا: اكيد سهل يطلع قفوله :p
هلالي: ويييييين شيبي بها هنا
العنا: والله لو شافنا حول البنات قفلنا انت بيقفلك من صعرورك :p
هلالي: يازين القفل باذنك
العنا: اقول ماله داعي يطلع ويحصلنا نتسمع العطه يابطه
هلالي: انطلق
العنا: الصحن الدوار :p
هلالي: سلامات
العنا: لا بس خشيت جو مع انطلق :p
هلالي: الشرهه علي اللي اماشيك
العنا: اسمع اسمع
اداره حاسب تربيه خاصه رياض اطفال
هلالي: من هذي
العنا: اكيد الهنوف
هلالي: تفكر شتدخل
العنا: خ ارفع ضغطها >>> ما في جامعه اقعدي بالبيت انت ونسبتك المخيسه
هلالي: الله يرجك
العنا: النحشه
هلالي: اطلع من النخيم كله الهنوف الحين تلقاها زابنه عند الشكاوى قصدي خيمه المشرفين
العنا: شف ذا البنت طالعه من المخيم
هلالي: من ذي مو غريبه علينا بس ما هي من بنات الطلعه
العنا: اكيد كيفها كويتيه ماهي معنا بس حوالينا ;)
^
^
والله ضيقه صدر لو رحنا للراشد اصرف
العنا: هلالي ما بدهاش خربانه خربانه
هلالي: وشو
العنا: تعزم
هلالي: قدام
العنا: تعزم نروح نطل على البنات من الشباك
هلالي: قويه
العنا: على قدر اهل العزم تاتي العزائم & ايخاف الرجال دبل بتاوه وملاس
هلالي: منتب سهل
العنا: لا انا العنا
بس خ نصبر شوي واذا اظلمت رحنا
هلالي: امش ولا تطلع صوت
العنا: تعال طل من هنا
هلالي: وخر شوي بشوف شيسوون
العنا: فاتحين المنتدى يقرون موضوعنا المناظره بوريمان قاعد يطلع ع اكتافنا
هلالي: شف ذيك اللي تضحك مستانسه هي وخشتها اكيد فيو
العنا: شف ذيك كنها تقرا قصه حزينه اكيد الماسه او النجمه هلالي شف اللي جنبها تقتبس وتصك ودها ولا ودها
هلالي: اكيد محبوبه السودانيه الله من السودنه
العنا: من جد محبوبه اول شي تسويه بعد ما تقوم من النوم ترتاح شوي :p
هلالي: شدراك
العنا: شدخلك
هلالي: ترى محبوبه الصبح مع التميميه وبالليل مريحه
العنا: طيب بنت عمي التميميه الصبح مريحه وبالليل مع محبوبه
هلالي & العنا: شدراك
هلالي & العنا: شدخلك
العنااااااا هلاااااالي مشيناااااااا
العنا: يا طول لسااااااانه الظاهر مسمينه دبل عشان لسانه فيه دبل :p
وضاع يوم من ايام عمرنا دون ان نذكر الله ;) اقصد دون ان نرمي رقم
هلالي: تونا ورانا مشوار الرجعه وانا لعبتي السياره
العنا: ليه ناوي تاخذ مخالفه
هلالي: مشينا بس مشينا ياخبل
^
^
ع الطريق
العنا: هلالي شف الشباك مفتوح
هلالي: والله
العنا: قسم بالله شف العيون بس اروح وطي انا :p
هلالي: اموت في العيون اللي كذا
العنا: هلالي خلك رجال انا شفتها اول يعني نعطيها رقمي
هلالي: السياره سيارتي وما راح تاخذ غير رقمي
العنا: هلالي لا تفرق بينا بنت
هلالي: علم نفسك
العنا: بس هذا النوع من العيون هو اللي احبه
هلالي: انا اصلا ما التفت لغير هـ النوع من العيون
العنا: طيب شوف خ نعطيها ارقامنا كلنا وهي بكيفها
هلالي: بس لا تعطيها رقمك اللي مع شباب المنتدى عطها رقم ثاني>>>> خبره
العنا: طيب ارفع المعاريض للكتب الخاص ونشوف شيصير قصدي ارفع معاريض الارقام :p
^
^
^
هلالي: وصلنا انقلع انزل واذا كلمتك علمني واذا كلمتني بعلمك
^
^
^
بوريمان: كيف الطلعه تمام
العنا: والله ما شافته بس فيها تمامه وحده
^
^
^
هلالي مستلقي ع السرير وما شغل المكيف يخاف يدق جواله مايسمعه
صوت مكيفه صوت جمس مشقوقه كنداسته
ددي ددي وا ددي >>> دقه هلالي :p
هلا >>>> يا رومنسي :p
وياخذ الجوال الثاني ويدق ع العنا

العنا ماسك جواله ومركز
اخيتي اخيتي >>> دقه العنا :p
نعم >>>> يا رسمي :p
وياخذ الجوال الثاني بيدق ع هلالي الظهران وفي نفس اللحظه القاتله يتلقى اتصالا من ولد الظهران >>> طالبيني في منتدى القصه
الصوت القادم: لحظه
العنا: لا معك العنا
الصوت القادم مطنش
نغمه جماعي
الصوت القادم: يا تعبان انت ويااااااااه ياقللللللليييييين الادب ما تستحون
العنا: من معي الظاهر غلطان اخوي
هلالي: الو ما اسمع انت شابك جماعي لو سمحت اعد الاتصال
دبل: على ترااااااب انت ويااااااه والله لو ما تصيرون رجال ان اوريكم الشغل يامتخلفين
العنا: دبل لوسمحت محد قالك تاخذ الرقم مااجبرناك حنا متطورين اللي تبي الرقم تاخذه واللي ما تبيه مو لازم انت ليه تاخذه
دبل: تخسي وتعقب ما يخسى الا انت
هلالي: اتفق مع العنا في ظل الحريه المكفوله لنا برسم النظام في المجلس العام
دبل: الا تخسي معه
العنا: دبل صدقني ترى والله وناسه ودك تخسي معنا
دبل: المهم والله ان ماصرتو رجاجيل ان اشبك واحد من قفول سهل بين آذانكم يالمهبل
هلالي: ابشر ابشر بس والله ترى عيب عليك البنات عاقلين ماياخذون ارقام وانت تاخذ رقم
دبل: انثبر لا ادخل عليك مع السماعه
العنا: بالنسبه لي يبي لك تجي مع السبيكر لاني مشغل السبيكر
دبل: الوعد المنتدى يالمراهقين
العنا: لوسمحت قل يالمراهق وخويه
هلالي غير يوزرك سجل بيوزر هلالي الظهران 2 مثلي انا بسجل بالعنا 2 دبل سمعتنا
دبل: لا انا مااحب اتجسس بس مايجوز يحكون اثنين ويخلون الثالث
العنا: من قال انك ثالث انت ثالث ورابع لانك دبل يعني اثنين :p
دبل: ترى الملح رافع ضغطي وانت بترفعه زود يالعنا
هلالي: قصدك العنا رفع ضغطك اول وبيرفعه ثانيه
دبل: وشو
العنا: رصيدي خلص قصدي الحد الائتماني وصل مع السلامه
دبل: انا المتصل
هلالي: لا هو شريحته مطلعها بواسطه دايم الحساب عليه
دبل: الوعد المنتدى مع السلامه
هلالي: هذي العيون اللي اشغلتنا عندها صارت عيون دبل
العنا: تكفا ياللي مادخت معها وما تلتفت لغيرها اجل ما تلاحق الا البنات اللي عيونهم مثل عيون دبل
هلالي: المهم ان دبل اكلنا المقلب وعطانا درس يحبه قلبك
العنا: طيب ليه هو والقاضي يركبون مع البنات
هلالي: شرك فيك اقول انثبر وخلك ف مصيبتك
هلالي & العنا: كم بنت ذبحتنا بعيونها ولو كشفت تبنا

الزعل ممنوع مع كامل التقدير لكل الاسماء الوارده بالقصه الخياليه وخاصه دبل وهلالي .



بقلم / العنا ..









كما عودنكم ننقل لكم كل ماهو جديد على ارض الخير .. في هذا العدد كان لـ عدسة مجلة طريق الإقلاع وقفه مع زيارة خادم الحرمين الشريفين لـ جامعة القصيم ..

حيث قام بزياره لها يوم الجمعه بعد اداء صلات الجمعه في جامع الملك فهد رحمه الله ، وقد تبرع للجامعه من اجل تطويرها بمليار ريال سعودي ..

اليكم صور من زيارة خادم الحرمين الشريفين لـ جامعة القصيم :





لحظة وصول خادم الحرمين الى مقر الحفل في الجامعه ..
حيث وضع حجر الاساس لـ 13 كليه تحت الانشاء الان ..



خادم الحرمين الشريفين .. وبجانبه ولي العهد صاحب السمو الملكي الامير سلطان بن عبد العزيز ..



الامير فيصل بن بندر امير القصيم ، وبجنبه من يمين الصوره الامير مقرن رئيس الاستخبارات ..



صوره من الخلف



صوره لمقر الحفل ويبدو انه امتلأ بالكامل



الملك عبد الله لحظة مغادرته الجامعه ..
وفي هذه اللحظه كنت اصافح يده وقد ابتسم لي لكن للأسف لم تظهر في الكاميرا ..

إقتباس فخر بأن تودع منتخب بلادك وانت تحضى بالتقدير والاحترام على ما قدمت وحزن أن تودع القميص الذي يحلم كل لاعب كرة قدم في مملكتنا الغالية ارتداءه وتشريفه.

ورحــل الاخـضـر .. !

إقتباس انا ابو جهل وعمري 22سنه ادرس هندسه تخصص رياضيات قسم الحاسبات ..

ماأنت أبو لهب ؟!

إقتباس مناظرة بين حكيمي المنتدى !

أنت متأكد أنهم حكيمين موب غلطان بـ العنوان !

إقتباس نانسي عجرم: المحبون كثيرون.. وذهبت لسوريا لتوضيح موقفي

من زينتس علشان نحبتس ، حبتس القراده .. حتى لوجيتي للسعودية مـ راح نحبتس !

إقتباس زوجة بيكهام : نحن لا نقبل أن نعامل معاملة الكلاب

وأنتم وش !







































في النهاية .. يسرنا ان نعلن عن الفائز بـ جائزة اشتراك DSL ..
وذلك بعد فوزهـ في مسابقة " حزر فزر " .. والفائز هو :
blueblood_999 ..
وكانت الاجابة الصحيحة هي :
العنا ..

نبارك له .. وحظاً اوفر للجميع ..



في النهاية .. نتمنى ان نكون قدماً ما يرضي على اعجابكم ..
وان نكون قد وفقنا فيما كنا نبحث عنه ، من رسم الابتسامه على شفاتكم ..
- لأي نقد أو إقتراح أو مشاركة نرجو إرسال رسالة على يوزر المجلة

دمتم في حفظ الله ورعايته ..




مجلة طريق الإقلاع
1 - 7 - 2006 م