وشلون يعني اذاني واذانك أربع؟! - نادي الهلال السعودي - شبكة الزعيم

alhawey · #1 04/07/2006, 09:50 AM

يامرحباً بكم،،

ترى هذي سواليف مهوب موضوع عشان ما تقولون لي حط مدخل ما مدخل

تعرفون حنا يالسعوديين نجيب عيال واجد (((..ما شاء الله..))) ...

وهالعيال الواجد يجيبون بزارين واجد

وهالبزراين الواجد يجي يوم ويجتمعون ببيت واحد...

:::::::::::::::::::::>> وش رايكم عاد بهالمقدمه احس اني مثل المتنبي اكتب شعر ولا انا داري

يازين هالبزارين وياملحهم أول ما يجون للبيت

، قمة في الادب ، روعة في الهدوء ، امتياز في الانضباط التكتيكي داخل المنزل...

بس بعد ما يروح نص ساعه بالضبط ، تبدأ المؤامرات

ثم تتسارع الاحداث ، وتبدأ المناوشات

نصف ساعة أخرى ، وتبدأ الاصابات وتعلو أصوات البكاء

في هذه اللحظات تحاول الامهات معالجة الازمة، ولكن من دون جدوى

لأن أغلب الاطفال لا يبالي بهواش الحريم

..

هنا تبدأ عملية مراسلة أحد الرجال لسرعة انهاء الموقف، وتحديد الاباليس

المتسببين بأعمال الشغب، وانزال أشد العقوبات عليهم..

قدّر الله علي وتوليت عملية التحقيق في أحد المشاكل اللي صارت ببيتنا وراح ضحيتها بنات اخوي التوأم( ما شاء الله)+اخوهم الاكبر..

التهمة الموجهه: سرقة شناط البنيّات + الاعتدء عليهن بالضرب + معط العسكريم من الاخ الاكبر ومن ثم تلفيعه

..

باختصار ، استخدمت حنكتي ودهائي واكتشفت ان محمد(5سنوات) ولد اخوي الكبير ، هو من يقف وراء هذه الاعتداءات
( هالوليد ماشاء الله عليه مزيون وذكي لكن نجس وخطير جداا) ..

استدعيته للحوش، وهاوشته وقلت له : ترى والله ان ما عقلت لا أخلي اذاني واذانك أربع ، وازعل عليك وآخذ الساعه( ذليته بهالساعه اللي انا شاريها له بـ80 ريال) ، وطلبت منه يجيب الشناط حقت البنات( طبعا العسكريم انتهى موضوعه)..

راح وجاب الشناط بسرعه هائله( خايف على الساعه لاتروح) وسألني سؤال يدل على انه ما فيه فايده منه..

قال لي : عم،، وشلون يعني اذاني واذانك أربع؟؟

الصراحه ضحكت

ولا أدري وش أقول له..

المهم قلت له رح اسأل امك الجوهره (اللي هي امي الله يطول عمرها بصحة وعمل صالح)..

هنا تذكرت قول الله سبحانه وتعالى ( المال والبنون زينة الحياة الدنيا )..

في اوقات قليله نحس ان هالاطفال مصدر قلق وازعاج، لكن على العموم هم ملح هالدنيا وأهم مصدر من مصادر السعادة فيها..

جارنا حرم من نعمة الابناء 9 سنوات ، كنت اذا شفته احس انه مهموم ، و اذكر قبل سنتين جا يتقهوى عندنا بالبيت ، وقال وقتها انه مل من موضوع العلاج وبدا يفقد الامل..

وسبحان الله بعد هالسنين العجاف رزقه الله بولد

، و انقلبت حياته بعد هالمولود وصرت أشوف بعيونه انه أسعد الناس..

الحين ابرجع لسؤال محمد: وشلون يعني اذاني واذانك أربع؟؟ ( وشلون افهّمه ان معناها : ما راح اسوي لك شي)

وبعطيكم نماذج اخرى من أسئلته( ما شاء الله عليه) واتحدى احدكم يجاوب عليها...

ليش ربي بالسما؟؟

وشلون يعني فرامل؟؟

ليش الحريم ما لهن شنب؟؟

وهنا اسألكم وشلون نجاوب على مثل هالنوعية من الاسئلة؟؟ بالذات وا ن بعض البزارين نشبه و يصر على معرفة الاجابه...

حبيت اسولف عليكم شوي ،،

,,تحياتي للجميع,,