|
:::مقابلة مع مصمم لعبة Winning eleven :::
اذا كان ودك تقرا عن وش الفريق الي يحبه مصمم لعبة Winning Eleven ويسويه في الدوري هذا Seabass (سياباس) يعطينا كم لمحة عن وش يسوي في المقابلة ذي
س:كيف تقدر تشرح كيف من اي باب يجي تطوير لعبة Winning Eleve هل هو من باب حبك للعبه او لغز تقني رائع؟
Seabass: بالطبع انا واخوياي في فريق التصميم نحب نتغلب على التحديات التقنية للعبة بس في بعد حبنا لكورة القدم ,حنا ناخذ التحديات الجديدة علشان ودنا نسوي لعبة كورة قدم واقعية . حبنا للرياضة هو الي ودنا نظهره في اللعبة .
س:عمر البليستيشن 2 الحين صار له خمس سنين , هل تتوقع انك تقدر تطلع اكثر من اللعبه وتعصرها تقنيا بالنسبة لامكانيات الجهاز ؟
Seabass:فيه قحشة من حركات اللاعب (player motions ) الي ودي اضيفها , بس اننا حسينا ان الجهاز وصل الحد الاقصى من طاقته ,وعندي افكار تتعلق بالذكاء الاصطناعي (AI) ودي اضيفها بعد , بس مره ثانيه لامكانيات الجهاز الي تحدنا ,معاد اقدر احط ذالامور زياده . ولاحظتوا فيه بعض البطئ في اللعبه ( عند منطقة الجزاء بالذات ) كله بسبة اننا حشينا معلومات واجده وخايفين نوصل الحد الاقصى في وقت قريب
س:لما جلستوا تسوون اللعبة على جهاز الاكس بوكس ,هل شغلكم على جهاز اقوى تقنيا شوي فتح فرص اكثر اثاره للذكاء الاصطناعي (AI) , وحركة اللاعبين وامور ثانيه ؟
Seabass: نعم صحيح جهاز الاكس بوكس والكمبيتر الشخصي (PC) اقوى شوي ونقدر نحط حركات اكثر للاعبين ونزيد الذكاء الاصطناعي ,بس ان هاذي اول محاولة لنا ,علشان كذا رسينا على اننا نحول اللعبه من السوني بس ونشوف كيف يمشي الوضع . بس في المستقبل بنجرب الفرق بين الجهازين , لان شغلنا كفريق يعتمد على اننا نصمم اللعبه للبليستيشن 2 من البداية ,علشان كذا حتى مع ان جهاز الاكس بوكس اقوى ما يبان الفرق بينهم ويصعب نخليه احسن من نسخة البليستيشن2 الاصلية. ولكن كان فيه مجال اننا نحط عنصر اللعب على الانترنت على الاكس بوكس .
س:ليش مافيه خاصية اللعب على الانترنت للبليستشن2 في السنه هاذي , وهل فيه خطط مستقبليه للعب على النت بجهاز السوني 2 ؟
Seabass: تقنيا كان بالامكان ننا نحط خاصية اللعب على الانترنت للبليستيشن 2. بس لو تقارنون بين البنية التحتية لشركة سوني واكس بوكس من ناحية اللعب على الانترنت تلقون ان ميكرسوفت عندها كل شي جاهز على اكس بوكس لايف لا من ناحية الخدمات او السيرفرات علشان كذا اعتقدنا ان خيار الاكس بوكس هو الافضل .بس من ناحية البليستيشن 2لازم حنا نوفر الخدمات هاذي من عندنا , علشان كذا عديناها من لعبة Winning Eleven 8. على العموم حنا مشغلين لعبة Winning Eleven على السوني بليستيشن 2 عندنا في الاستديو على الانترنت ,فكل الي باقي اننا نحتري سوني تسوي بنية تحتية كويسة للبليستيشن . انا متاكد ان لعبة Winning Eleven 9 بتصير على الانترنت للبليستيشن2 .
س:الى اي مدى وصل تخطيطكم المسبق لسلسلة اللعبة , هل فريق التصميم عارف وش بيصير على لعبة Winning Eleven10وعلى اساسها يعرفون وش الحدود والتطويرات الي يقدرون يسوونها من بعد Winning Eleven9 ?
Seabass: اكيد بالطبع حنا دايم نخطط وننظر لقدام , ولكن نهاية دورة حياة البليستيشن 2 هي الي تحدنا . علشان كذا حنا نناظر الى Winning Eleven9 ونوقف , وعندنا افكار وجالسين شغالين عليها . بالنسبة للمستقبل زي ما قلت على Winning Eleven10, حنا نفكر في الجيل الجديد من الاجهزه علشان كذا نطرح افكار عنه بس .
س:وش الاشياء الي تعتقد بيسمح لك الجيل الجديد من اجهزة الالعاب انك تسويها والي ما قدرت تسويها على اجهزية الجيل الحالي ؟
Seabass:حنا نتوقع ان بنقدر نحط حركات كثيره للاعبين , عندنا كثير من معلومات لقطات حركة اللاعبين (motion capture ) الي ودنا نظيفها , بس للاسف ما قدرنا نحطها على اجهزة الجيل الحالي نظرا للمحددات وقوة الاجهزة . فزي ما تعرف المساحة شي والي بتفتح لنا مجال جديد من نوعية اللعب علشنا بنحصل على سحبات والا مناولات مختلفه . وبتشوف الفرق على طول لان فيه حركه اكثر .وفيه بعد الذكاء الاصطناعي في الوقت الحالي فريق التصميم لازم يحط بعين الاعتبار هل الذكاء بيشتغل في الجهاز . حنا ماسكين افكار كثيره الي ودنا بقوة نضيفها علشان كذا في اجهزة الجيل الجديد نقدر نحط الي نقدر من افكار .بنقدر نضيف ذكاء اصطناعي بحيث نخلي الهجوم او الدفاع اذكا , ونظيف بعد اللعب على الانترنت . فريق التصميم عنده افكار كثيره على لعب الانترنت بس ما قدرنا علشانا قربنا من الحد الاقصى من قوة الجهاز .ما ندري كم باقي من مساحة , بس نتمنى ان اجهزة الجيل الجديد فيها مساحة اكثر وقوة اكثر علشان نقدر نسوي الي كل هذا .
س:وش افكار فريق التصميم على جهاز سوني المحمول ال (PSP) ؟ وهل فيه افكار تخلي العبة متوافقة مع جهاز البليستيشن 2 ؟
Seabass: فيالوقت الحالي مافيه شي اكيد .الحين لنا علاقة بنسخة للعبة على جهاز ال PSP والي بنعلن عنها في الوقت القريب . وحنا ما علقنا الاعلان عن اللعبة ,بس في مراحل تطوير الفكره علشان نشوف الاحسن لجهاز سوني المحمول ال PSP.
س:لما سمعتو انت وفريق التصميم لاول مره عن جهاز ال PSP , وش الافكار الي شجعتك على طول ؟ وش الي على طول فكرت انه ممكن يصير ؟
Seabass: فيه حاجتين اثرت فيني , الاولى والي هو انه جهاز متنقل ,علشان انك تقدر تلعب في اي مكان واي وقت . الشي الثاني هي فكرة ال LAN والي هو الاتصال الاسلكي بين الاجهزه وهذي الي جد شجعتني .
س:يعني ممكن يصير 22 لاعب ضد بعض ؟
Seabass: حنا دايم نقول ان من اخر اهدافنا الي نبي نسويها هو اننا نخلي 11 لاعب ضد 11 , بس فريق التصميم ما يؤمن انه يسويها على جهاز ال PSP قبل ما تصير على اجهزة البيت . تقنيا نقدر نسويها , وذلك بااتصال ال LAN لجهاز ال PSP , بس نتوقع ما تعطيك الشعور الصح للعبة Winning Eleven على ال PSP
س:هل من الممكن تبادل المعلومات بين جهاز الي PSP وجهاز البليستيشن 2 ؟ على سبيل المثال في دوري الماستر ؟
Seabass: انت جبتها صح يوم طريت لي وش الاشياء الي شجعتني على جهاز سوني المحمول ال PSP , من النقاط الي كنت افكر فيها بما انه محمول , انك تقدر تروح به اي مكان وتعدل الفريق حقك في دوري الماستر , وبعدين لما ترجع للبيت تحط التعديلات على البليستيشن . هذي وحده من الافكار المبداية الي في راسي .
س:هل عندك فريق في دوري الماستر ؟ ومنهم للعيبة الي تشتريهم على طول اول ما تبدا الدوري ؟
Seabass:انا احب فريق الانتر ميلان ( بعذر يحط قواتهم عاليه ) واشتري اللعيبة اليابانيين علشانهم رخيصين وجيدين ( كفوك ) واشتري اللاعب الاوروقواني ريكوبا على طول واحطه كمفتاح لعب لفريقي .
س:وش تتوقع ان التحكم في اللعب احسن ازرار بالاسهم والا عصا التحكم ؟
Seabass:اتوقع ان ازرار الاسهم لها تجاوب اسرع , بس اشوف عندنا في اليابان ناس يفتون بعصى التحكم زي ازرار الاسهم . اذا حسيت ان اصابعك ورمت من اللعب بالاسهم العب بعصى التحكم وحاول تعود عليها .
س: انت حصل وطريت ان مراقبة الرجل لرجل في اللعبة ماهي زي ما كنت تبي , فاي الاستراتيجيات الي تحس انها تنفع في اللعبه ؟
Seabass:في الماضي جتنا شكاوي ان ثلاثة لاعبين دفاع ماهي بقوة اربع لاعبين ,في لعبةWinning Eleven 8 قوينا الدفاع اذا خليتهم ثلاثة . انا انصح انكم تستخدمون مصيدة التسلل صح , لانها فعاله في لعبة Winning Eleven 8 . مراقبة الرجل لرجل ماهي زي ما ابغى في اللعبة , بعد ما شفت اليونان في اليورو 2004 فكرت اني لازم اشوف كيف الفرق الضعيفه تستخدم مراقبة الرجل لرجل علشان تصير فعاله , خاصة اذا كان اللعب الجماعي صح .
منقول
عُدنا .... والعو  دُ أحمدُ | 
الوضع العادي
