من قصصي وملاحمي انا:d ( نـــــــ15ــــــمر)في الخبر الحقو الدم للركب - نادي الهلال السعودي - شبكة الزعيم

نـــــــ15ــــــمر · #1 09/06/2006, 07:19 AM

السلام عليكم ورحمه الله وبركاته
يالله ان تحي الشباب والصبايا كلهم
الاخبار وكيفكون مناح ولا مو مناح والله مشتاق لكم كلكم واحد واحد من اكبر عضو الى اصغر عضو
ايه صح اخبار العطله وكيف الدشره والفضاوه والسهر وكاس العالم الي بيبدا بعد كم ساعه شكلكم شريت اشتراكات ART ولا دبرت واحد تقلطون عنده الين ما يخلص (يارب نفوز بكاس العالم) مدري من ضاحك علي بس الحق ينقال الله يستر نبي مستوى والاخلاق هذا اهم شيء

نجي لموضوعنا وهو
قصه صارت لي في الخبر عند تشليز وستار بكس (كيف الدعايه)
بسم الله نبدا
في يوم الخميس كنت اتمشى انا و خويي في الواجهه البحريه على الساعه 10 الليل وشوي الى نشتهي قهوه وين يا ولد قال ستار بكس ورحنا وحنا مبسوطين ضحك وسواليف وهرج ونصب على بعض وكل واحد يسلك للثاني المهم دخلنا drive thro (طلبات السياره) للي ما يعرفون English (وش عندي) و مثل ما تعرفون يوم الخميس زحمه تعرفون اهل رياض ما يوفورن( week end))(مو لازم اترجم) الا وهم رازين خششهم عندنا نرجع لمحور حديثنا شوي الا ويجيك الحنوسه وييييييوه بالكراون فتوريت الذهبي ومسوي انا الطاره (طاره.....كلمه عاميه يقصد بها يجييد قياده السياره بشكل محمكم وقد يكون هناك بعض التهور) المهم جاني وشطفني وابن الكلب حكني وجا بينحاش وكانه ما سوى شيء ويرقا على الرصيف بكفرين وجا بيكمل لاكن الحمد لله ما قدر لان كان في واحد مسكر عليه بالصدفه وفي هذه الاثناء نزلت انا وتفقدت سيارتي بلمحه سريعه احس اني قلبت كاتبت رويات مصري هذاك حق تدهم صبري المهم المهم وانا اتفقد السياره اشوف الا انها محكوكه يا ولد وش اسوي الا ولا شعوريا اروح لها الطعس عند شباكه واقوله بصوت عالي انزل وانا معصب جاني وقالي طيب زحمه هنا وبنوقف السير قلتله انزل وبعدها اتفقنى اننا نوقف قدام علشان الخط يمشي بس وقتها انا وش سويت ركبت خويه معي علشان ما ينحاش (انا ذيب)

المهم مشينا شوي وقفنا على يمين ستار بكس ونزلت وقعد ازاعق للمعلوميه هم ثالثه وحنا اثنين وانا جسمي صغير:sad: وبعدها فكرت قلت الهواش والزعاق ما راح يجيب نتيجه قلت خل اجيه باسلوب حلو

وهديت نفسي واعتذرت له وبينت له سبب زعاقي وهواشي والولد اشوى تفهم وبعدها قلت له معك تامين قالي لاء قلت له طيب وشلون قالي انا اتكفل بتصليها وابشر ولا عليك قلت حبيبي وش يضمنلي قلتله طيب ما فيه احد من اخوياك معه تامين قام ويصرف وبعدها اتفقنى انه يحيني يوم السبت ونروح للوكاله ونقيمها وعاد هو يصلحها على حسابه بس وقتها انا قلت عطني شيء يثبت لي انك ترجع لي قالي السياره مو سيارتي هي سياره اخوي وانا المشكله محفضتي مو معاي بس قال لحضه خل ادور لك راح لسيارته وبعدها جاب رخصه اخوه وسلمت عليه واخذت رقم واسمه وقالي اسمه فلان الفلاني ودعته ومشيت ومشى شوي وانا في السياره اشوف الرخصه الا اسم العائلهمختلف ودخل الشك في قلبي واقرى الرخصه الا وفيه رقمجوال وادق عليه و سلمت قلتله اخوي انت عندك كراون فكتوريا ذهبيه قال لا قلت طيب عندك رخصه ضايعه يقولي بنت ضايعه

اقوله عندك رخصه ضايعه يقولي ايه وارمي الجوال على خويي وقلت يا ولد نصب علي واسكت والله ما يضيع حقي قدامي وانا ساكت ليش غبي؟؟ عاد هو راح من جهه الي تحاذي تشيلز وانا دزيت (دزيت..... كلمه عاميه يراد بها دعست او حطيت رجلي على البنزين ) ايه عاد انا دزيت وعكست الشارع لانه كان فاضي واسرع لي واعرض سيارتي عند المخرج بحيث اني قفلته وسديت المخرج وكان هو بينه وبين المخرج الي انا مقفله تقريبا4 سيارات وانزله وانا معصب والشرار في عيوني ويفتح الشباك ويقولي وش فيك وادخل وقتها يدي وامسك صدره واقوله مسوي ذيب يالكلب وانا ماسكه الا واشوف جوالين الفارس على cup folder (الي تمسك المشروبات ) وامد يدي مدري وشلون طالت واخذ الجوالت منه واقوله الحقني وانا راجع للسياره اشوف ذا العالم وذا الحريم يناظروني ويقولون وش عنده ذا معرض السياره ونزل يهاوش ويرجع ومعه جوالين عاد وقتها انا حسيت اني قوي وعضلات(ابظاي) وابتسمت خارجيا وضحكه داخليا (كيف الوصف)

وركبت السياره وامشي واوقف ورى تشيلز وانزل واتفاهم معه وقلتله خلاص توكل وانا باخذ الجولات وبكرا تجيب الفلوس ويجي يقولي انا عندي ارتباطات واحتاج الجوال وما اقدر المهم مشيته واخذت الجوالات منه وعطيته memory والشرايح وبعدها قالي عطني ر خصه قلت له يا بابا طير راعيها الحين بيجي ووالله ما تاخذهها المهم هو مشى وانا مشيت وبعدها بخمس دقايق الا اخو راعي الرخصه جانا وسلمنا عليه وشرحنا له القصه وتشكر مننا وكان وقتها يبي يجلد الي سارق الرخصه بس حنا مششناه وقلنا له خلاص ومشيت انا وبعدها بربع ساعه دق على قالي ابي رقم في الجوال على العلم عنه هو بيده بمفرمت الاجهزه قلت له انت مفرمتها قال لي لا انا ابيها ومدري كيف (سلكتله)قلت له طيب وقتها انا حسيت انه في غدره بتصير انه جايب ناس ولا شيء قلتله انا بعيد الحين عطني ربع ساعه واجيك وقتها انا دقيت على اخوياي والمساكين كانوا في مطعم باكاستناني

والله خلو اكلهم

وجوني

كانو تقريبا 8 اشخاص قلت ما يكفون ودقيت على خويي ثاني وقلتله تعال في مشكله وقتها جاني واحد وقالي ابي اجيب ناس زود قلت لا يكفي الشباب فيهم الخير والبركه وانا وقتها واعد الشباب عند التميمي الي في الواجهه وقلت لهم خلوكم في سياراتكم واذا انا شفت منه أي شيء بطقه وانو طبو على طول وجلدوه ولعنو خيره
ونبهت عليهم مره ثانيه خليكم في سياراتكم لان ما لها داعي الولد يكون نيته سليمه ويشوفني جايب كتيبه وابي اقاتل

ووعاد الولد بنفس المكان في التميمي ويوم دخلت المواقف وقفت اشوف اخوياي كلهم نازلين ويتفرجون من بعيد واشوف روسهم تطلطل علي وبعدها جاني الي حاكني وقام يتفاهم معي ويوم شفت سيارته لقيت في سياره جمبه حسيت ان الدم بيصير للركب بس بعدها جاني واحد من اخوياي الي كانوا يطلطلون ويقولي وش السالفه
انا قلته ما تحس انه مو وقتك لاني ما ابي الولد يشوفني وانا مجمع الشباب عاد وقتها الولد انتبه ودرى ان هذولا اخوياي وانه اذا قرب مني بياكلها على راسه وصرفها وشاف الجوال وقام يصرف ان الرقم ما لقاه ومشى على اساس ان يوم السبت ابي اقابله وبيعطني فلوسي وابرجعله جولاته المهم الولد قام يماطل وبالاخير قلتله اذا ما جيني اليوم انسى الجولات وبعدها سحبت انا عليه والجوالات معي الحين
للمعلوميه الحكه ما تسوى القصه الي صارت كلها لانها بس بويه بس والله كلفت 800 ريال والحكه قد اصبعين بس بصراحه انا ما احب ان ينضحك علي وانا اتفرج حقي يضيع قدامي واسكت ما فيه امل
بس خلاص خلص الموضوع
توصون على شي؟؟
ايه صح الي يبي الجوالين يقولي لان المزاد سيكون في يوم الاحد 3 ايام كاس العالم
تعرفون هذا مو اي جوال

ويالله

تشــــــــــــــــــــــــــــــــــــــــــــــــــــــــــــــــــاو