مساء الخير اخواني :d

بصراحه انا من النوع الي يدخل ويقراء .. يعني منيب احب ارعص على الكيبورد

بس بصراحه قريت موضوع لاحد الاخوان .. تطرق فيه لعرض موبايلي

بيني وبينكم انا عميل عند الاتصالات .. والحين شقحت لموبايلي بعد عرض احلى رقم

انا منيب قايل نصبوا .. او غيرها .. انا بشرح لكم الي صار لي .. وكيف اشتركت

وانتم براحتكم تبون تشتركون او لا شي راجع لكم ... بس للفائده عشان محد يدرعم الا عنده علم

وعشان اختصر عليكم الطريق .. ومايفوتكم الحدث الاهم .. بوضح لكم طريقة الاشتراك بموبايلي او art

اول شي art سنه كامله 1500 شامله كأس العالم .. هذا الي سمعته .. مع اني قبل شهرين .. قالو لي الاخوان في art ان الاشتراك بكأس العالم 1700 ريال :wallbash:


اما موبايلي وانا اخوكم هذا عرضها الي انا اشتركت فيه


اول ماجيت يم الشركه صفطت عند الاستقبال صور بطاقتي :d ثم عطاني ورقه عبيت فيها بيناتي .. ومهيب مثل الاتصالات اكثر من فورم وانواع القلق خخخخخخ ... وبعدها بطريقة المواقف .. قال لي رجل الامن طاوله رقم 4

ولا مطار هيثرو حاطين بوابات خخخخخ :razz: .. بعدها جلست الا واحد استقبلني بأبتسامه :) شرح لي الوضع

قلت له الله الله بالرقم المميز ;) تحسبون قال لي زي بعض الشركات :nono: انت وحظك خخخ << مب يقصد احد :d

قال لي كيف تبي شكله قلت رقم وصفر رقم وصفر زي هيك .. الموهم طلع لي كل الارقام بالكمبيوتر .. ولف الجهاز علي .. وقال تنق واذا ماعجبك شي نغير الصفحه .. واخذ راحتك لاتستعجل ;) .. مع العلم ان هذي قوانين الشركه والموظف مايتدخل .. الا اذا طلب العميل رأي الموظف :clap:


بصراحه انا انلحست مع الارقام .. يعني لك عليها يقال لها فضي للامانه .. الموهم رسيت على رقم بكتبه لكم بس بطريقه مشفره 00(؟)0(؟)0(؟)056 ترى الي بدال الاستفهامات رقم موحد على باقي الاستفاهامات يعني زي بعض

الموهم بعدها رعص اوكي وعطاني الشريحه في اقل من ثانيه << وعليكم الحساب خخخخخ

طبعاً قبل لاخذ الشريحه شرح لي الاشتراك ..

هناك خمس باقات ..

1- باقية 25 ... فيها 25 دقيقه مجانيه ورسمها الشهري 40 ريال بعد ماتخلص الدقائق المجانيه تحسب الدقيقه 0.43 هلله

يعني يطلع عليك الحساب بالكامل مع الاشتراك art المجاني والرقم الفضي ..

40 ريال رسوم الباقه + 45 ريال تأسيس وتؤخذ لمره واحده بس + 900 سعر الرقم مع art

985 ريال لمدة شهر ولو لسنه قدام ... احسب اربعين كل شهر

40*12 + 45 ريال تأسيس تؤخذ لمره واحده بس +900 سعر الرقم مع art

1425 ريال :d

2- باقية 100 ... فيها 100 دقيقه مجانيه ورسمها الشهري 65 ريال بعد ماتخلص الدقائق المجانيه تحسب الدقيقه 0.37 هلله من موبايلي الى موبايلي وسعر الدقيقه من موبايلي لشركة الاتصالات 0.41

يعني يطلع عليك الحساب بالكامل مع الاشتراك art المجاني والرقم الفضي ..

65 ريال رسوم الباقه + 45 ريال تأسيس وتؤخذ لمره واحده بس + 900 سعر الرقم مع art

1010 ريال لمدة شهر ولو لسنه قدام ... احسب 65 كل شهر

65*12 + 45 ريال تأسيس تؤخذ لمره واحده بس +900 سعر الرقم مع art

1725 ريال

3-باقية 250 ... فيها 250 دقيقه مجانيه ورسمها الشهري 110 ريال بعد ماتخلص الدقائق المجانيه تحسب الدقيقه 0.37 هلله من موبايلي الى موبايلي وسعر الدقيقه من موبايلي لشركة الاتصالات 0.41

يعني يطلع عليك الحساب بالكامل مع الاشتراك art المجاني والرقم الفضي ..

110ريال رسوم الباقه + 45 ريال تأسيس وتؤخذ لمره واحده بس + 900 سعر الرقم مع art

1055 ريال لمدة شهر ولو لسنه قدام ... احسب110كل شهر

110*12 + 45 ريال تأسيس تؤخذ لمره واحده بس +900 سعر الرقم مع art

2265

4- باقية 500 ... فيها 500 دقيقه مجانيه ورسمها الشهري 190ريال بعد ماتخلص الدقائق المجانيه تحسب الدقيقه 0.33 هلله من موبايلي الى موبايلي وسعر الدقيقه من موبايلي لشركة الاتصالات 0.39

يعني يطلع عليك الحساب بالكامل مع الاشتراك art المجاني والرقم الفضي ..

190ريال رسوم الباقه + 45 ريال تأسيس وتؤخذ لمره واحده بس + 900 سعر الرقم مع art

1135ريال لمدة شهر ولو لسنه قدام ... احسب 190 كل شهر

190*12 + 45 ريال تأسيس تؤخذ لمره واحده بس +900 سعر الرقم مع art

3225 ريال

فيه باقه 1000 دقيقه بس ماتصلح لكم انا اشتركت 500 دقيقه مجانيه لانها الانسب لي لاني باخذها مكالمات خصوصاً 500 دقيقه مجانيه اربع ساعات شي


ملاحظات :-

1- اذا انتهى الشهر ومادفعت قيمة الاشتراك الي مقرر على كل باقه راح يمسكونك الباب او بالاصح يقفلون قنوات art الين تدفع الرسم الي عليك سواء 40 او 65 او 110 او 190

2- اذا اجريت مكالمه تلفون ثابت او موبايلي او الاتصالات يخصم من رصيدك على حسب الدقايق الي كلمتها يعني مالها تسعيره .. مثال .. اذا كلمت جوال الاتصالات خمس دقايق .. مايروحون يضربون الخمس دقايق بالتسعيره ويخصمون .. لي يخصم من رصيدك خمس دقايق .. فهمتوا قصدي << ليتك ماتشرح :d

3-العرض جاري على كل الباقات .. يعني ماتجبر على باقه معينه .. مثلاُ انت مشترك عشان البطاقه art ماتبي تكلم بشريحتهم ... اخذ باقة 25 تكلفك 40 ريال واذا انتهت كأس العالم اجحدهم لاتسدد خخخخخخخ او كنسل اشتراكك

اما اذا انت راعي مكالمات وسهرات قصدي راعي بزنس بس بزنسك اخر الليل ;) اخذ 500 دقيقه مجانيه تريح راسك من الفواتير وتسدد كل شهر 190 ريال ..

على العموم القنوات هي الباقه الاساسيه اربع قنوات رياضيه وثنتين افلام عربيه والحكايات طلعت كم ؟؟؟ عشر قنوات << من علمك الحساب :nono:

وتضاف عليها ثمان قنوات كأس العالم :clapping: :thumbup:

اول اسبوع راح تفتح لك كل القنوات ... عشان تنهبل على القنوات بعدها تنحصر في القنوات الاساسيه .. وبعدها تبي تشترك بقناة زياده تدفع زياده << حرتكات صالح كامل :d

لك الحريه تنتقل من باقه الى باقه اخرى يعني مثلاُ انت اشتركت باقة 25 تقدر الشهر الجاي تغير الى باقة 100 او العكس من 100 الى 25



في الختام ياحبايبي .. هذا توضيح كامل .. حبيت تكونون على بينه .. وتكون الصوره كامله امامكم .. ولكم حرية الاختيار .. اما مقهى وتعميره (( اللهم زدني فيها جهل )) :d .. او زحمة بشريه في كافي وماتمخمخ ..

او اشتراك art 1500 او رقم فضي واشتراك ...;)

بعض الشباب دور ناس مهيب راعية كوره وتبي ارقام مميزه .. واستفادو من العرض طلعوا رقم لخوياهم وخذوا بطاقاتهم خخخخخخ:d

وبالتوفيق للمنتخب التوجو :d

<< نصراوي مب عاجبته تشكيلة المنتخب خخخخخخخخخخخ

امزح امزح << حس بمشاعيب فوق راسه :clap:

اخوكم ومحبكم الهلالي <<< امداكم على الذل :d

taxi :yes: