هارد لك يا هلال

خيرها في غيرها


اليوم كنت أمام التلفزيون الأخلاق رايحة فيها لكن تفاجأت بأني أتحمس مع فريق والله يذكرني بالإبتدائي

اليوم الهلال كان دمار بسبب المدرب اولاً وثانياً اللاعبين اللي ما يحملون المسؤولية البتة

يعني قمة البرود واللعب الرتيب والممل

اليوم كان الفريق من أكبر رأس ( سامي ) لأصغرهم (عبدالله الجمعان ) ماعدا العبد السلام اللي ماني ممدحه لأنه في أول المشوار
أنا قلت لأصغر لاعب وهو عبدالله الجمعان
يا عبدالله والله أنك أنت وجيوفاني اليوم قمة السلبية يعني أحر ماعندنا أبرد ماعندكم
الجمعان اليوم يمرر كل كورة وهو مايدري من وراه ( شكله مشبه على الفنايل)
ترا يا عبدالله اللعب الجميل مو تشوت الكورة وخلاص بدون حتى ماتتكلف أنك تناظر من عندك
جيوفاني ماني قايل إلا الله لا يردك من فاشل تقول يتمشى ببيت أبوه
العتيبي والله أنك بطل في متابعة الكور وهي تلج شباكك يعني لو تتمغط شوي جبتها ولا أقولك وش طلعك من نكبة

وكان خصمنا اليوم هو فريق عرض الأزياء العالمي اللي لو تكلمه طاح وفيه شد حتى أني غيرت القناة أكثر من مرة أبي أتأكد أنا أشوف عرض أزياء ولا كرة قدم ولا بروفة لدعاية
يعني اللاعب يشطفه ويطيح تعدي منه يطيح تلعب أوت ويطيح
و الحكم البريء اللي والله قلب المباراة عطف وحنان على الفنانين اللي أصيبوا كلهم ماحط إلا 5 دقيق بدل ضايع يعني

ما قصرت يا حنون يابو ألب كبير

و المشكلة أن اللاعبين مسوين فيها أخلاق من الجابر لين العبد السلام كل واحد يطلع الكورة وهو شايف أن اللاعب يمثل
بس العطف والحنان الله لا يحرمنا منكم


يا لاعبي الهلال تدرون أنكم الموسم هذا ما فزتوا برا السعودية ولا في أيه مباراة
يعني لو طلعتوا برا دجيتوا ؟؟؟؟

عيب والله عليكم بالله نادي الشباب اللي مافيهم خبرة يلعبون بثقة أمام جماهير السد وانتم ما تدبرون والملعب فاضي

يعني مو كل مباراة لازم جمهور ولا مانلعب
وكل واحد منكم تقول أمس لاعب مباراة في المونديال




لللإدارة أقول..................

مانبي لا أوكاشا ولا موكاشا و لا نبي أي لاعب أكبر من 31 سنة كفاية جيوفاني الله يقلعه


والله أنكم تموتون الواحد قهر يا لعيبة الهلال