حسكه وانا .. وابو لينا وددسنه ..
مدخل اومخرج ....
في البداية كانت القصة محبة
وفي النهاية انتهى كل الغرام
والحكاية مدري وشهي الحكاية
من سمعها قال أي والله حرام ..
كانوا ثلاثه رجال .... موترهم الددسن
اعرفكم على ابطال هذه القصة وهم :
ابو لينا : شاب وسيم في عمر الزهور عنده مشكلة من يوم كان صغير اذا قصرشعره كش على فوق
ولا في امل يتعدل كنه اناتل >> جمع انتل
حسكه : شاب مثل القمر تعطيه خمسين سنه
من اول نظرة..
طلع له الشنب في رابع ابتدائي ويوم أخذ الشهادة الابتدائية ترك الدراسة ودخل العسكرية ويقول انه الحين كولونيل برتبة جندي اول !!
انا : واعوذ بالله من كلمة انا محدثكم مسوي اختبار شخصية وطلعت النتيجة 5 بصري 5 سمعي 10 حسي ..>>> يعني رومانسي
وانا مشجع هلالي سابق ومشجع هلالي لاحق و سابق ولاحق عندهم عيال عم وهم حاضروجميل
المهم ابو لينا صديقي وحسكه صديق ابو لينا وانا صديق حسكه
وحنا الثلاثة اصدقاء >>
بداية الفليم ...
أبو لينا كان معاه ددسن غمارة وكنا نروح ونجي فيها وكانت هناك مشكله كبيرة تواجهنا وهي مين اللي يجلس عند الدريشة
وكان حسكه دايم يجلس في النص لأنه نحيف الرجال جانا يوم زعلان ويوم قلتله اركب قال اركب انت !!
أنا صرت أدخن
ولازم أجلس عند الدريشة >> تبطي
قلتله والله لوتدخن بيدينك ورجلينك تبي تركب في النص
والا دونك الغمارة تاسع بعير >>>
وفي مرة من المرات قال أبو لينا ليش مانستغل وقتنا والددسن
ونشتغل بزنس >> ونصير بزنس مان
قلت أنا والله فكرة حلوة وقال حسكه قدام الريوس خربان
وكانت أول تجربه لنا هي بيع الفواكه والخضروات
وصرنا نروح كل يوم مكان ونبيع الفوكه وصرنا ناكل كل يوم تفاح وموز وعنب ويالله من فضلك لين صار جسم حسكه مثل فيروز:p
وأبو لينا طلع له خصر يحبه قلبك
وأنا صرت برشاقة فاتن حمامه
وقررنا تأليف كتاب(( ذكريات دببه سابقين ))
ولكن لان الزين ما يكمل .. داهمتنا في أحد الأيام البلديه وحنا نبيع وصادرو الطماطم والخيار والتفاح والموز وكل شي >>> اموت واعرف وين ودوه ؟؟
وأعطونا كرت أصفر قابل للتلوين
وحنا كنا شادين ظهرنا بالكولونيل حسكه بس الرجال طلع خرطي وقال لنا ياأخي وش أسوي هذي البلدية
مو من اختصاصي خلونا نغير النشاط ..
قال له أبو لينا وش نسوي نبيع فصفص
قال لا نبيع شمع >> الاخ ما عنده شماغ
قال أبو لينا أقول لايكثر إدفع القطه بعدها اقترح
بعد هذ ه الحادثه المؤسفة قرر ابو لينا أن يسافر إلى جدة للإستجمام أو الإستحمام >> اختر الإجابة الصحيحة
واتفقنا إننا نهدي النشاط شوي يوم شفنا كل العيون علينا...
<<<الاخوان مهربين مخدرات
وفي يوم الأربعاء وصلت ابو لينا للمطار بالليل ورجعت للبيت ووقفت الددسن قدام البيت ودخلت وحطيت راسي
وما قمت إلا على صوت الوالدة الله يحفظها تصحيني لصلاة الفجر
ويوم طلعت من البيت ما لقيت الددسن عند الباب وأدور حول بيتنا لعل وعسى يمكن أبو الشباب مدحدر:p ولا أنا موقفه مكان ثاني ولكن للأسف وقعت الطامة الكبرى والمصيبة العظمى وصارت الددسن مسروقة
وضاعت علومي وبدال ما روح المسجد دخلت غرفة حارس المسجد وسمعت الإقامة بعد الصلاة ونسيت الفجر كم ركعة وصليت وأنا في حالة لايعلم بها إلا الله
وبعد الانتهاء من صلاة الفجر رحت إلى قسم الشرطة سيدى .. ودخل على العسكري وأقوله ودي ابلغ عن سيارة انسرقت الليلة
قال أنت راعيها ... قلت لا
قال هي باسمك ... قلت لا
قال عندك تفويض ... قلت لا
قال تعرف رقم اللوحة ... قلت لا
وشوف العسكري كنه عصب قلت ياولد ادرك الموقف قبل أن يتأزم >> حلوه يتأزم
وقول للعسكري مبادراً >> برضوا مبادرا حلوه
طال عمرك راعي السيارة خويي وهو مسافر والمفتاح عندي
قال العسكري اجل لازم تروح لمرور الناصرية وتطلع برنت كامل عن السيارة بعيدن تجي تبلغ
واشد رحالي وكلي اسى وحزن إلى مرور الناصرية وأنا ادعي الله انه ييسرها ..
وبعد عدة محاولات ويمين يسار ويسار يمين طلعت البرنت ولله الحمد
ورجعت للعسكري مستانس ولا احد قدي وسويت اني مستقعد له وعطيه البرنت بكل ثق وهدوء:p
ابو الشباب اخذ البرنت واثباتي وقال بكل برود انت الحين بنحطك بالتوقيف
قلت : توقيف !! خير انشاء الله وش انا مسوي !
قال : الشكوك تحوم حولك انك سارق السيارة !!
قلت : وش تحوم طال عمرك هذي صارت حمام ماهي شكوك .. انا جايكم برجليني ويديني وجميع الاعضاء وبكامل قواي العقلية والجسمية.. وتقولي سارق السيارة ...
قال : وهو معصب وماسك الطفاية متولم يفك راسي انت بتنطق في التوقيف لين يجي راعي السيارة ويتنازل عن القضية >>>
قلت : ابو الشباب وشي القضية.. انا اللي مشتكي واذا هي على الددسن بقريح >> طلعت قلة الخاتمة
واتوقع انك تمزح الله يرجك ياشيخ كككككككك
العسكري قلب لونه فوشي ثم صار ارتكوازي
ثم كلاسيكي >> على فكرة كلاسيكي هو لون :p
وقال : انت مايبلك توقيف انت شكلك مجرم متمرس مكانك الحاير ..
قلت : لا تكفى الا الحاير اذا انت ملزم ودني دار الاحداث ارحم واهون
قال : لا .. ترد علي بعد .. انت يجب ان يصدر فيك حكم تعزير شرعي ايه الارعن
قلت : أنا ارعن .. لماذا يامولاي السلطان هل انا تيمور لنك او هولاكو ايه النمرود
في هذه اللحظة أظلمت الدنيا امام عيني لمدة 30ثانية كان فيها برق ورعد واعاصير ورياح وامطار .. ويا الله من فضلك ياكريم
وبعد هذا الحمام الدافئ استيقظت وانا اقول :
اصبحنا واصبح الملك لله ...
وكأن العسكري رأف بحالي ونكسر خاطره علي
فقال لي عندك احد يكفلك فقلت ايه بس لازم اروح له اكلمه
ورجع لكم بعد ساعة >> يبي الفكة
قال رح بس ياويلك تتأخر اكثر من ساعة
قلت (في قلبي) : طلباتك اوامر ياشيخ
وما يبيلها مشاور من القسم الا خوينا حسكه ودق عليه هلا حسكه
الموضوع كيت وكيت...
وهذا تخصصك يا كولونيل ابيك تكفلني
ابو الشباب يوم سمع ان فيها كفالة كبر راسه
وقال تعال لي المكتب ويصير خير ...
انا انهبلت بصراحة اول مرة ادري
ان حسكة عنده مكتب !!
ويوم وصلت له لقيته جالس في غرفة تحت الدرج
واقول له ماشاء الله هذا مكتبك .. طيب وين حطين الدينمو حق الماء
لايصير عندك في الدرج
وينظرني حسكه بطرف عينه ويقول انتطرني بره
انا انصدمت من لهجته وتعامله معي
وبغيت اصكه بكف بس قلت اصبر
وشوف اخرتها معه وش بيصير
وبعد ساعة من الانتظار طلع لي وقال لي والله الموضوع
ما هو بيدي وانا حالف اني ما اكفل احد
ومدري يمكنك سارق السيارة !! وانا ماني ناقص مشاكل >>> يانذل
واقول لحسكه وانا مغبون اشد الغبن الشرها
علي يوم جيتك ..واطلع من عنده وتذكر سفيانة شغالتنا يوم كانت تصرفه دايركت
واذا هاوشتها كانت تقول هذا نفر مافي كويس
والله عندك بعد نظر ياسفيانة >>
ويوم شفت الامور معقدة كذا قلت مالي الا أخرب اجازة ابو لينا واعلمه بالموضوع .. واتصلت عليه وبعد المقبلات .. قلتله ابو لينا الددسن انسرق;)
ابو لينا رغم انه يحب الددسن الا ان الصدمة كانت معقولة وسألني انت متاكد قلت ايه
قال طيب بلغ بسرعة قلتله مقدر !!
قال ليش قلت لاني مطلوب حيا او ميتا
وبعد ما فهم الموضوع قال خلاص انا راجع على اول طيارة للرياض انشاء الله
واستقبل ابو لينا يوم السبت في المطار ونروح سيدى الى القسم ويوم شافني العسكري قال وينك يالمجرم
قلتله رحت جدة اجيب راعي الددسن
ويدخل ابو لينا في هذه اللحظة ويقول ممكن ابلغ عن الددسن انا راعيها وهذا خويي قال العسكري ها الحين نقدر ناخذ بلاغك ..
والحمد لله اخذت اثباتي وثبتت برائتي وطلعت مع ابو لينا على البيت وكان اول قرار اصدرناههو فصل حسكه نهائيا من الشركة وجعل مكانه شاغرا لحين وجود الشخص الكفؤ ..
عفوا نسيت اقولكم وش صار على الددسن
لالالا مايحتاج الموضوع طااال وقصة الددسن سالفة ثانية على العموم اذا لقينا الددسن ببشركم انشاء الله .. وياليت تدورون معي على الددسن
خاصة الشباب والشابات اللي يدورون في التحلية بصراحة انا اشك إن اللي سارقه يدور به في هذا الشارع ...
وهاكم صورة من برنت الددسن
ددسن غمارة 85 ابيض وجهه طايح لوحته 01508070110(( الرقم للبيع ))
على فكرة فيه نظارتي الشمسية على الطبلون ودفتر تاريخ تحت المرتبة وفي حبل ازرق في الغمارة واهم شي فيه ثلاث بيلات شاي ماركة السيف حق الوالدة لا اوصيكم عليها
سلاااامي واشواااقي للجميع ,,,
بقلم / ماجد مقبل ..