السلام عليكم ورحمة الله وبركاته
أصدقائي صديقاتي فلذات كبداتي .. أعزائي وأخواني من الدم الأزرق ..
خمسة بعين العدو إن شاء الله
هذا الهلال ... وقت الجد جد .. ماعنده لعب عيال
قسم النتيجة خمسة ... وماسك راسي على كل هجمة تضيع .. أبي ستة والا سبعة
الحمد لله على المستوى والنتيجة ... مع تحفظي على سمسوديل حكم المباراة
هالحكم نظامه نظام دوريات .. لازم يخلص دفتر المخالفات اللي معه .. أنواع الكروت الصفر
بس طلع شديد
شوفوا الموري جاب قول .. وهدف ممتاز .. بس أبدا مايصلح ظهير أيمن ... يصلح وسط أيمن ... <== والله ياهي خطمة
نرجع للزعيم ..
وكيف قدر يمسح المستوى المتواضع والصورة البائسة التي كان عليها أبان إشراف كندينيو ... <== هي كذا تقال ؟
بصراحة .. كل ماشفت الهلال ذيك الفترة .. أنقهر .. وكرهت شي اسمه كرة قدم وأتجهت لمشاهدة لعبة كرة المضرب
بس جيوفاني بدّع صح ؟ <== تراه كاتب الموضوع وهو سهران ومواصل
بصراحة جيوفاني قدم مستوى كبير .. صلح هدفين ... وجاب هدف ...
لاعب مكسب للوسط بصراحة ومطلب مهم في الوسط ..
وكل من انتقده قبل وقال عنه صفقة فاشلة قبل ياخذ فرصته رد عليه جيوفاني بمستويات ممتازة من مباراة القادسية
جيوفاني ياناس لاعب عالمي وكبير .. وله خبرته الكبيرة في الملاعب ...
مهم كأهمية سامي في الفريق .. لاعب يلعب بعقله وفكره ...
قد يطلع لي واحد ويعكر صفو سريرتي ويقول لي : ياخي جيوفاني ثقيل ....!!!
بقول له : الثقل صنعه
وقد مثلا يطلع لي واحد ثاني يقول : ياخي جيوفاني شايب وكبير ...!!
بقول له : والله جمهور الهلال ماكان باللي توقعناه أمس ..
بيقول لي ليه ...!!؟
بقول له لأن اليوم أربعاء .. والهلال محقق بطولة ولي العهد ... والناس ماوراها شي ... والدخول مجاني
وجماهير الهلال أكبر من اللي حضروا الملعب
بيقول لي تتوقع الجماهير تجي عشان مجاني والا غير مجاني ؟؟
بقول له لأ موب على كذا .. بس هذا دافع أكبر يشيل معه الناس كلهم لأنه موب دافع حق التذاكر
وقد يقول لي : طيب وش فيها لو دفع ...
ثم آخذ طفاية التتن اللي مهب لي أبد .. ثم أصكه بجبهته .. وأقول له : تراك أدوختنا
المهم ياجماهير الهلال مباراة الاتحاد يوم الاحد ... والعين يوم الاربعاء ... يعني ماتجون أزعل عليكم وأدقكم
المهم نرجع للخماسية ..
ونرجع لحارس المرمى
<===== حتى الموت
يناس قسم بالله أتوقع هالحارس بيعتزل وبيبيع خضرة بأوزباكسان
مايعني ان الحارس مايعرف .. ولا يعني ان الفريق كان ضعيف ...
بس لو شفت الاهداف كلها ملعوبة وتدل على ان لاعبي الهلال لاعبين فكر .. موب لاعبين انبراشات وطقها والحقها
بس قسم رحمت الحارس ... تخيلت نفس مكانه
3 اهداف نفس الغلطة .... والله ياهي فشيلة ... أتوقع بيسمونه أبو ثلاثة تيمنا بأهداف الهلال
لو هم حاطين الخشبة اللي يحطونها وسط المزارع تخوّف الغربان كان ماجاء عليه الاهداف هذيك
الله يعينه بس .... وينسى المباراة
الصويلح ... موضوع ثاني ................ ياناس الصويلح مكانه أساسي ...
لاعب هداف ... ويدل المرمى .. <== كل الناس تدله
أما الصويلح وياسر بالهجوم ..... نبي نبتل تجيب أهداف
بالتوفيق للزئبقي ... يواصل على هالمستوى ويطوره .. وإن شاء الله نبي نكسب هجوم ناري يحرق كل الخصوم
كامل الموسى ... خالد عزيز ...
هالاثنين يطربوني اذا حجّروا للاعب
ينشبون له لين ياخذون الكورة ...
ماشاء الله قسم لاعبين يمثلون ثقل دفاعي كبير ....
أتمنى يشترون عقد الموسى ... لأنه لاعب وجوده مهم .. وغيابه مؤثر ...
الموري بصراحة لاعب فنان ولاعب شوّيت ...
بس لاتحطونه ظهير أيمن ... لاعب يحتاجه الهلال وسط أيمن ...
أتمنى الخثران يكون ظهير أيمن ... بصراحة قدم مستوى كبير عبدالعزيز في المباراة اللي راحت ...
أنا تابعت المباراة على قناة دبي الرياضية ...
المعلق كان جدا جميل .. لو ماشفت القناة كان قلت المعلق سعودي ...
أنا كنت أتابعها على الإيه آر تي ... بس المعلق جاب لي المغص ... غيرت القناة لدبي ...
المعلق مدح بالهلال ... وجماهيره ... وهذا موب مستغرب على قناة مثل دبي ...
أحب هالقناة لحياديتها ...
كليبر ... وآآآآه من هالمدرب ....
ذكي وثعلب ... يعرف شلون يلعب ...
الله يوفقه مع الزعيم ... ويجيب لنا التأهل ... ومن بعده الكأس الآسيوي .. بوابتنا للبطولة العالمية بإذن الله ..
آسف على الإطالة ... بس قبل مانهي الموضوع ...
تمنياتي للزعيم بالتوفيق في مباراته الجاية قدام الاتحاد ....
واتمنى حضور الجماهير عشان نتأهل للنهائي ومن بعد الكأس ونحقق شي غير مسبوق على مستوى العالم ..
جميع البطولات المحلية خلال سنتين متتاليتين ....
بالتوفيق للأزرق وان شاء الله الجماهير ماتحتاج دعوة ..
أبوساري