نادي الهلال السعودي - شبكة الزعيم - الموقع الرسمي

نادي الهلال السعودي - شبكة الزعيم - الموقع الرسمي (http://vb.alhilal.com/)
-   منتدى الجمهور الهلالي (http://vb.alhilal.com/f28/)
-   -   حســـبــي الله عليـــــهم .. (( صـــور )) (http://vb.alhilal.com/t293259.html)

اسير المحبه 09/04/2006 02:19 AM

حســـبــي الله عليـــــهم .. (( صـــور ))
 
فــي البداية .. ألــف ألـــف مــبرووك فوز الزعـــيــم .. وهذي عادات الازرق .. من بطولة لبطولة والزعيم من يطوله

@@@@@@

بصراحة ماكان ودي اطرح الموضوع في هالوقت .. خاصة انه وقت فرحــه ... بس لما يصير لك الموقف اللي صار لنا وللكثير من الجماهير اللي شفتهم .. راح تعذرني ..

في البدايـــة .. الكل كان يطالب بحضوور الجمهوور .. من الرئيس الى اعضاء الشرف مرورا باللاعبين ... الكل كان يطالب بحضور كرنفال الفووز الهلالي ..

ومن الساعه 4 ونص .. ونحن في الملعب ..
من الساعه 4 ونص ونحن نشجع ..
من الساعه 4 ونص واصواتنا راحت من التشجيع :D

كل هـــذا لعيــوني الزعيــم .. ويستاهل اكثــر ..

لكن المصيبة لما تجيك مصيبتك من من جمهوورك .. ياجماعه اللي صار والله مايسكت .. اللي صار راح يخلي الجمهوور يمتنع عن حضوور الملاعب .. وانا اولهم ..

مثلي مثل اي مشجع رايح الملعب افرح واشجع فريقي .. مارحت عشان اطلع وبعدين يكسرون سيارتي ..

القصة بالتفصيل :

بعد ماانتهى تسليم الميداليات .. طلعنا من بوابه 4 .. المهم اول ماركبنا السيارة .. ونشووف قدامنا زحمه وفجأة وبدون سابق انذار .. تجمع على سيارتنا اكثر من 20 واحد .. ماندري وش يبون .. وقاموا يشوتون السيارة وهزوا السيارة هز .. طبعا احنا 3 .. يعني مستحيل نسوي شئ عليهم .. المهم قفلنا البيبان وحاولنا نمشي بس كان فيه سيارة قدامنا ... مصيرهم كان مثل مصيرنا .. طاحوا بهالاشكال .. وجينا بنرجع ورا ومع الاسف نفس الشئ السيارة اللي ورانا لها نفس المصير .. الوضع كان غريب .. تخيل كل سيارة عليها 20 الى 30 واحد .. وكل واحد مع عصيان الاعلام وجالس يرافس بالسيارة .. والقهر انك ماتدري وش يبون .. المهم مع كثر الضرب .. قزاز سيارتنا تكسر وخويي راحت عينه :cry: .. هذا غير الضربات اللي جت على البيبان .. والحمدالله رحمه من ربي .. لقينا مخرج وطلعنا منه .. وستر الله ماصدمنا واحد من هاللي يمشون ..

الزبده .. انه لما مشينا كنت اشوف جنبي سيارة كورولا .. اعتقد ان راعيها الله يهديه نزل من السيارة .. والمسكين ضربوه ضرب مايعلم فيه الا الله ..

صور من سيارتنا اللي تكسرت .. طبعا الصور كانت بالليل ومو واضحة مره :

http://www.bebsi.net/uploads/faab9994d5.jpg

هذا قزاز السيارة الخلفي متكسر .. ولاحظوا علم الهلال يرفرف :cry:

http://www.bebsi.net/uploads/ffaed790dc.jpg

http://www.bebsi.net/uploads/87cc1b5fad.jpg

ضربه على باب السيارة .. بالعصا مدري برجله الله يكسر رجله .. الله يشله قولوا آمين

http://www.bebsi.net/uploads/c28f57d959.jpg

أمووت واعرف وشولن حاكين السيارة :confused:

http://www.bebsi.net/uploads/30c9996b2f.jpg

ضربه من الباب الثاني .. والله لو اننا يهود ماسووا كذا






ياجماعه الموقف اللي صار صعب انه يوصف .. واللي يقهرك ان هالاشكال ماسكة علم هلال ويقالها تشجع ..

طيب لنفرض اني جيت انا واخوي الصغير وشاف هالاشياء . وش يكون موقفه .. اكيد بيكره شئ اسمه ملعب ويكره شئ اسمه هلال ..

اتمنى من كل قلبي .. قبل مايطالب اللاعبين والرئيس بالحضوور .. انهم يقدرون موقفنا ويعرفون وش اللي حاصل خلف اسوار الملعب .. صدقوني الواحد ماتسوى عليه تتكسر سيارته .. والثاني تنفقع عينه .. والسبب هالجحلط

فواصـــــــــل::

@@ من ضمن الاحداث الغريبه اللي حصلت .. ياسر القحطاني قبل ماتبدأ المبارة جا يبي يرمي الفنيله للجمهور .. المسكين جاه شرخ مدري صاروخ مدري وش تسمونه ذا :D ... الزبده انه جاه وانفجر تحت رجله .. طيب لنفرض انها جت بعينه .. وش راح يصير :cry: ........ امووت واعرف هاللي راميها . كان يفكر بعقله والا بشئ ثاني ..

@@ محمد بن فيصـــــــل .. انت على عيني وراسي وكل شئ لعيون الهلال يهـــون .. لكن صدقني بعد اللي صار امس .. صعب اني افكر انا او غيري من اللي صار لهم الموقف انهم يحضرون للملعب مره ثانيه .. يعني لما تجي المباراة الجايه والحضور قليل .. اتمنى انك ماتلوم الجمهور .. المفروض نلوم هالعسكر اللي تاركين هالجحلط.

@@ ادري ان معظم اللي يسوون هالاشياء مالهم اي علاقة بجمهور الهلال .. ولكن مجرد حضورهم يجعلنا نبتعد عنهم .

@@ آه بس لو عددهم قليــل .. كان ممكن نرتكب فيهم جريمة قتل .. بس صعبه 3 على 30 :confused:

** نسخة من الموضوع لمنتديات شبكة الهلال.
** نسخة من الموضوع لمنتديات مدمي الشباك.
** نسخة من الموضوع لرئيس نادي الهلال.

تحــــيـاتي وتقـــديــري

محب الذئب9 09/04/2006 02:27 AM

الله يعوضك خيييييييييير

والله ينتقم منهم إلى سوو كذا

والله من جد شى يخلى الواحد ما يحضر للملعب

والجحلط هذولا تقووول انهم ماهم برجال امن

<<<<<<<مقهور وربي مقهور

Mr Hilale 09/04/2006 02:35 AM

انا احس انهم الهمج المتخلفيييييييييييين

رجال الاضرار مدري الامن

مدري كيف مسمينهم رجال امن الحمد الله والشكر كل واحد راز خشته جعلها .........

وانا القزاز الخلفي انكسر

حسبي الله عليهم

الأمل البعيد 09/04/2006 02:40 AM

تخلف من امهـ والله...!!!

مستغرب أناا...ماابرحت العقول المتنكهـ لـ الحين...!!!

نااس كل همهاا التخريب والبربسهـ...!!!

الف مبروكـ البطولهـ

والله يعوضكم خير يـ الغالي

وحسبي الله ونعم الوكيل


تحياتي

khalid999 09/04/2006 02:41 AM

موانت اول واحديشتكي في المنتدى فيه مثلك واجد

اهم شي انكم سلمتو والحديد بداله حديد والله يكون بعونكم

انا كنت ناوي احضرفي الملعب بس تأخرت وجتني رساله من جوال الهلال ان الجماهيرغفيره 0وقلت ماني محصل مكان كويس0والحمدلله اني مارحت ومثل مايقولون كل تأخيره وفيهاخيره

وماني حاضراي مباراة خلاص
يمدحون ولدالخاله ناصرالاحمدوالاوربت

نايـــف 09/04/2006 02:44 AM

تدرووون ليييه عشان الدخول ببلااااااااااش اتحداكم نشوف هالاشكال اذا كان الحضور بفلوووس الاا اذا طبوا مع السوور

فتى الأمل 09/04/2006 02:49 AM

الله يعوضك إن شاء الله .. والحمد لله على سلامتك

المشكلة أكثر من سبع سيارات صار لهم نفس الشيء...

عصابات الله لا يوفقهم

**ABU S3OOD** 09/04/2006 03:41 AM

لازم توصل للمسئولين

! ما يهزك ريح ! 09/04/2006 03:48 AM

الصور ترفق لجريدة الرياض والجزيره وماراح يقصرون بنشر القضيه

جد شي ماينسكت عنه ابد

ارفففففع

<<الأزرق المتوهج>> 09/04/2006 04:09 AM

:D يارجال ...أنت كسروها قدددددام عينك ... أنا يوم جيت إلا هم مكسرين الزجاج الأمامي والخلفي ...وزجاجة باب السائق والراكب الأمامي ...لا وماخذين الاستمارة؟؟؟ مدري وش يبون فيها مع إنها منتهيه !!!!!!!!!!!
وأوراق خاصة لي ماخذينها وريموت المسجل ...الظاهر يحسبونه جوووووووووال:D :D :D
... على العموم ...الاستمارة ...طلعنا جديدة اليوم لأن اللي اخذوها منتهية ....لكن الأوراق الخاصة ...والله ماتنفعهم بشء لكن الظاهر يبون يخربون وبس ....بالنسبة للزجاج ... الأنسان ماهمته القيمة ...لكن قهر تجي تلقاهم مكسرين السيارة ولاعبين فيها كذا ...زين بعد إن الهلال فاااايز والا كان علوووووووووووووووووووم ... مدري متى نتخلللللللللص من هالعينات

هـلالـي للنخاع 09/04/2006 04:12 AM

الله يعوووضك خير إن شاء الله

انت وكل من حصل له نفس الشي

والله اني كنت افكر اوقف سيارتي بالحي اللي مقابل للاستاد

بس قلت لا اوقف على طريق جابر والحمد لله جيت اركض لسيارتي بعد ما شفت الهوايل بطريقي للسياره :confused:

بس الحمد لله ما صار شي

والله يشل يد كل من فعل هالافعال

إقتباس:

الرسالة الأصلية كتبت بواسطة اسير المحبه
@@ من ضمن الاحداث الغريبه اللي حصلت .. ياسر القحطاني قبل ماتبدأ المبارة جا يبي يرمي الفنيله للجمهور .. المسكين جاه شرخ مدري صاروخ مدري وش تسمونه ذا :D ... الزبده انه جاه وانفجر تحت رجله .. طيب لنفرض انها جت بعينه .. وش راح يصير :cry: ........ امووت واعرف هاللي راميها . كان يفكر بعقله والا بشئ ثاني ..

اخووي انا اعترف انه انا اللي رميت القنبله وربي ما كنت قاصد اذي ياسر :sad:

بس فكرت مع تحيه اللاعبين لنا تنفجر بس راحت على ياسر وكنت بالمدرج العلوي واللي كانو عندي عارفين اني ما كنت قاصد حتى من ردة فعلي :wallbash:

بس الحمد لله ما صار بياسر شي

ولعلمكم اقسم بالله اني جاي من الجبيل 400 كيلو ورجعت بعد المباراه ولعيوون الزعيم وابو سلطان تهوون

والحمد لله رجعت وانا راضي ومستانس :D

nasoory 09/04/2006 04:32 AM

والله شي يقهررررر

هذا اللي يجينا من المباريات المجانيه

المفرووض مافي ولا مباراة ببلاش تدفع تدخل والله ماتشوف هالاشكال

زعيمي في العلالي 09/04/2006 06:05 AM

الله يعوضك إن شاء الله .. والحمد لله على سلامتك

Mr.Za3eem 09/04/2006 06:19 AM

والله اني حاس بقهرك ,, والحمدلله على سلامتك وسلامة
من كان معك ..

لكن الي ابغى اعرفه ليش يسوون كذا ذالحثاله ,, ياخي واحد يمشي مع
اخوياه ليه تعتدون عليه ؟؟؟ والله شي يقهر ,, فعلاً في ناس عايشين مثل
الحيوانات او اردى ,, الله يهديهم او ياخذهم

وبالنسبه للعسكر ورجال الأمن ,, فهم شاطرين يحكون كروشهم ويستهبلون على
الجمهور الحاضر ,, أما مسألة انهم يأدون واجبهم بضمير ,, فقليل والله منهم الي
يسويها ..!! واتمنى ان يفتح تحقيق ,, ويبحثون عن الفاعلين ,, ويعاقبونهم اقصى
عقاب ,, لأنهم حيوانات همجيه

عاااشق الدوخي 09/04/2006 06:29 AM

حسبي الله ونعم الوكيل عليهم


الوقت المعتمد في المنتدى بتوقيت جرينتش +3.
الوقت الان » 09:28 PM.

Powered by: vBulletin Version 3.8.7
Copyright ©2000 - 2024, Jelsoft Enterprises Ltd