و الله يا انا اكلنا هواء ....احوال الشارع الامريكي...
 

انا احد الطلاب في الولايات المتحدة الامريكية والقصة و مافيها اني كنت نايم يوم الثلاثاء الصبح وكان عندي كلاس الساعة واحدة الظهر والله و انا نايم ولا يطق خويي الباب هو كويتي ويقول بو جاسم افتح الباب بسرعة و انا ارزعة مدة عند الباب و الله وانا افتح لة الباب بعدين يوم اشوف ذاك البرق اللي شق الصالة شق وهو يغني ويقول صكة الصكة و يطامر قلت ميدة هيه مقومني من النوم علشان اتمرقص لي و الله انك داج قال ميدي اقول رح وشف السي ان ان وش صار قلت وش صار وانا اشوف هاغبرة قلت وش السالفة جابوا الثمامة فيذا قال لا اي ثمامة انتلابعد هذا تفجيرات صايرة قلت لا والله قال شف وانا اشوف هالتكسير والغبرة قلت بس هذا بيقولون عنة عرب قال الاقد قالوا قلت و الله ياللي اكلنا هواء والله ويجلس عندي وانا ماغير اهلي ادهروا علي والشباب واحد منهم يوم دق علي قال ميدي اخس يا الارهابي قلت وعععععوة فضحنا ذا والوالد يقولي لاتطلع من البيت والوالدة تقول عود الرياض والله ويوم جت الساعة 12 وانا اطلع انا وخويي لمطعم صيني وانتغدى وانصك ذيك الزقيرة ونروق وانروح للكلاس و احنا نمشي احس بنظرات غريبة فيها حقد كني انا اللي مفجر هالحين واللة وادخل الكلاس واجلس الا اللي يوسوس بخوية و اللي يناظرني بطرف عينة وانا استاذنت وطلعت و رحت للبيت و بعدين رحت العب كرة الساعة 6 و الحالة مختبصة و انا عادي وارجع البيت الساعة 8 والقاء مسج من السفارة تقول لا تكون بلحالك ولا تطلع بعد الساعة 9 ولاتروح لكلاساتك لمدة اسبوع و خلكم متجمعين دايم واذا صار حارش مارش اتصل بسرعة وانا في نفسي لا واللة النكبة انكبنا ....
واللة وانطق في البيت الى الساعة 2 ولا واسمع الباب يطق وطقة واحد مهبول و انا اروح و استل السكين من المطبخ واجي و انادي مين who is this والله ما افتح الا لين تقولي من انت واللة وينطق ويقول انا صاحبك فلان افتح الباب هو كويتي واللة و اقلطة ويتكي وهو ضايق صدرة ويقول ياخوك انا عندي محاضرة وكلهم امريكان مافية الا انا العربي الوحيد و ما ادري اروح ولا لا قلت يارجال رح واذا احد من سلقهم قال ميدك شئ اشتك علية قال خلاص و اللة واقوم الصبح و اروح الجامعة و كل الانظار علينا حنا الخليجيين خاصة والله وانا اجتمع بالشباب كلهم واقولهم والله ما يبيلها كلنا نجتمع في بيت واحد ولا نطلع ولا نسوي شئ قالواما تصلح ننقسم لثلاث فرق كل فرقة فيها 15 واحد ونقسمهم كل اربعة مع بعض قلنا خلاص والله وانا جالس اتغدى في المطعم واسمع ذاك اللي يقول العرب هم كذا و المسلمون خاصة ويدعون ان الارهاب ضد دينهم حنا لازم نبيد المسلمين و الله وانا اهج من المطعم بكبرة .......


ان صار شئ جديد كتبته لكم ....


اخوكم الصغير / محمد الراجح

أبو راجح انتبه لنفسك بس.. .
وبلا زقيرة بلأ خراط هذي حيااااااة وموت الله يستر عليكم.... .
يعني اجلسوا وخلوكم سواء ولأتكثرون طلعات.. .
والله يكون بعونكم .. .

هلا اخوي محمد
 

مرحبا بك اخي محمد واسأل الله العلي القدير ان يحميك انت وجميع الاخوة العرب والمسلمين في شتّا انحاء العالم وخاصة في امريكا واتمنى ان ينصركم الله بنصره وان يشدكم بقوة منه وان يبعد عنكم اولاد الحرام وان يعمي بصيرتهم عنكم وان يحميكم من تهورهم وكيدهم انه سميع عليم .
اخي محمد خذوا حذركم وحيطتكم والله يوفقكم انشالله . والله يمهل ولايهمل ولن ينساكم الله من عفوه وكرمه ونصره وعليكم بقوة الايمان والتمسك بالاخلاق الحميدة والفضيلة ولاتخشوا في الله لومة لائم .
لك تحياتي وقلوبنا معكم .

انا شاك فيك يالراجح :rolleyes:


شكلك لك علاقه بالتفجير :rolleyes: اعترف ولا توجع راسي :mad:

هلا والله اخوي محمد :

اخوي انتبه على روحك ترى والله يحطون حرتهم فيك .

و الله و انا اخوك ترى ثمامتهم غير ثمامتنا ...... انتبه لروحك

و ان احد قال لك شي ...... قل انك تعرفني و ما عليك :D

كلّها كم يوم و تهدا ردود الفعل القويّه فلذلك انتبهو هاليومين ولا تروحون لا لجامعات ولا لغيره والله يوفقكم ان شاء الله ...اللهم من أراد الاسلام و المسلمين بسوء فاجعل كيده في نحره اللهم انّهم لا يعجزونك .....

الحمد لله على سلامتك اخوي محمد

انت وكل العرب والمسلمين في امريكا, تبون النصيحة اقضبوا الا رض لين تزول

هذة الاحداث

ابي اسالك اخوي محمد كم تبعد تكساس عن موقع الانفجار

لى قريب درس هناك

قريبي يدرس هناك واتمنى منك موافتي

باخبار السعوديين هناك

الله يستر بس

وزي ماقال عاشق النمر

يمدحون التونه والله

الله يستر الله يستر


والله يحمينا ويحمي جميع المسلمين

:confused: اللهم إحفظ جميع المسلمين هناك ، وأكفهم شر إعدائهم ،
اللهم من إراد المسلمين بالشر فرد كيدهم في نحورهم ..

أخوي محمد
ما عليك من أحد
أنت تقول إنك ما سويت شيء طيب ليش خايف:confused: :confused:
وأنا مع العاشق شكلك مسوي شيء

امززح يالغالي
الله يستر عليكم ويحميكم ويكون بعونكم أنت وجميع إخواننا المسلمين

اخوي محمد الله يحفظكم من كل مكروه وازبن البيت يا خوك ترى ياروح ما بعدك روح

بعدين من قالك ان ثمامتنا غبره

لا بالعكس ثمامتنا خضار وامطار و(سنو) بعد

وشكلك تتوجد على ثمامتنا ولا جلسة على الأعصاب في نييورك

لكن لايهمونك اللي يناظرك بنص عين طير عليه عيونك الثنتين وما جاك مهوب عندي

السلام عليكم ورحمة الله
 

اخوي محمد الله يكون في عونكم
ولاتنزل ولاتخرج الي اي مكان لحالك وتجمعوا مع بعض وانشاء الله اليومين هذي وتستقر الاوضاع
وتقبل تحياتي