نادي الهلال السعودي - شبكة الزعيم - الموقع الرسمي - بدون تشنج وانفعال تعالو شوي ابيكم

مقدمة:
أنا مشجع هلالي من عام 1406 ،المعلومة هذي قلتها عشان بعض الناس مايقولي مندس أو كلام فارغ لأن كلامي يمكن ما يعجبه.
أول شي hard Luck للجماهير الهلالية الهزيمة المريرة، اي والله مريره لاني وقت المباراة أكلت ثلاث حبات بندول اكسترا من الصداع والقلق اللي جاني بسبب اللعب التعيس.
أنا راح أحلل الوضع اللي صار وأطرح وجهة نظري وأتمنى انه يكون فيها شي من المنطق والواقعية،
أولا: رئيس الهلال الغالي اللي نحبه أبو سلطان:مافيه مشجع هلالي منصف مايعرف انك تحب الهلال مثل حب المشجع أو أكثر ونعرف حجم التضحيات اللي سويتها عشان هلالنا، بس هذا ما يعفيك من المسؤولية لأنه نحب دائماً انك تكون بالمقدمة ويشهد علينا الله انه نحب الهلال ياخذ كل البطولات هالموسم مو بس عشان الهلال لا برضه عشان يضاف في سجلك كأول رئيس يحقق انجازات متميزة بالمملكة، مسؤوليتك باللي صار انه انت الرئيس ولازم تتحمل نتائج الفوز والخسارة ولا تقول بعد المباراة انه جماهير العين مميزة(اياك اعني واسمعي ياجاره) عشان نحضر للمباراة وهذا اللي بيصير ان شاء الله،والجمهور ماراح يدخل المستطيل الاخضر ويسجل أهداف الجمهور هو وسيلة مساعدة إضافية وليس وسيلة رئيسية، ولازم تتحرك لحل المشكلة، ومو معناته انك تعطي الصلاحية كاملة للمدرب انك تترك له الحرية بالتصرف بدون مناقشة علمية وفنية مع العلم ان فيه حسب معلوماتي لجنة فنية وفيها الكابتن عبدالعزيز الخالد اللي لازم يكون له دور فعال.
ثانياُ: منصور الأحمد:حبيناك وانت لاعب وحبيناك وانت إداري عشان كذا لازم تتكلم مع المدرب وتحشره بزاوية يوم تشوف الخطأ يصير وانت أحرص من المدرب لعدة اسباب لأنك وطني وهلالي صميم والمدرب يهمه اسمه بس خلونا واقعيين فلوسه ماشيه وهذا الأهم له.
ثالثاً: كاندينو:ما أقول الا للسن أحكام وأنت مدرب كبير مهما اختلفنا معك بس بنفس الوقت لازم تفرق بين قوة الشخصية والبربسه وبعدين تراك فاقع مرارتي من حركتك البايخة يوم نزلت الخراشي اساسي قدام الاتحاد وهو راجع من اصابة والحمدلله قدم مباراة كبيرة ويوم جت المباراة اللي بعدها وكانت قدام الأهلي استبعدته ورجعت العنبر اساسي وهو راجع من اصابة، والله انك خبل.
رابعاً: اللاعبين:
- الدعيع: أبو فواز أنت ملك الشباك يا بعد عمري.
- كامل الموسى: الهلال مو الوحدة واترك حركات الانبراشات اللي مالها سنع، واترك الحركة القديمة اللي اذا جاك اللاعب عطيتك ظهرك وقاعد تلف ودي اعرف اخرتها وشي طبعاً معرفه يا مقطوعة يا اوت عليك، اسمع نصيحتي انت لاعب عندك مهارات بس حاول تستفيد منها بطريقة أفضل.
-خليل: ياخي ودي تلعب مرة وحدة وانت مو مكتف يديك.
- تفاريس: انت مدافع ولازم تفهم هالشي كويس وخلك بمنطقتك واترك النرفزة اللي مالها سنع واترك المناقز اللي يجيب العيد، ولازم تقرصون اذنه يا إدارة.
-عزيز: مسكين ظلموك بالمركز الجديد وانت مركزك المحور وبس وحاول انك ما تتركه لانك بتنتهي بمركز ثاني.
-البرقان: ياخي انت قديم الين الحين فيه أحد يزلق.
-الشلهوب: ؟؟؟؟؟؟؟؟؟؟؟؟؟ أكثر من علامة استفهام على مستواك اللي صاير بانحدار، وشكلك مفهي بالمباراة الأخيرة،راجع حساباتك.
- الغامدي: انت لاعب ممتاز، بس تكفى واللي يرحم والديك فك الكورة من رجلك لا تأخر اللعب.
- كماتشو: هذا اللاعب يرفع ضغطي بعض الأحيان يلعب بمزاجه ولااااااااااااااااااااااااازم يا ابوسلطان تقرصون اذنه وتفهمونه ان المطلوب منه ان يصنع كور ما نبغاه يسجل وانا ملاحظ انه صاير بالفترة الأخيرة فيه أنانية ويبي يسجل بأي طريقة كثر الله خيرك ودنا انك تسجل بس مو على حساب انك تنسى مهمتك الرئيسية وتحوسنا، وانتم شفتوه يوم شات أحمد الصويلح الكورة في آخر المباراة وضربت برجلك وعصبت على الصويلح انت صانع لعب لازم تفهم هالشي.
- سامي: يا بعدهم، وما أقول الا كلام (فارس عوض) معلق ابوظبي الرياضية يوم قال (من وجهة نظر فنية خروج سامي خطأ لكن انا مبسوط ان سامي خرج لأنه هو المتحرك بالشوط الأول) هذا كلام المعلق.
- ياسر: حبيب قلبي اللعب يبيله ركود واترك المهايط عنك ولازم تقنعنا ان صفقة ناجحة، واحمد ربك انك مانطردت بسبب تصرفك الأرعن اللي جابو منه الهدف، تكفى ركز بالمباريات الجاية.
خامساً: التغييرات- الغنام: من يوم جيتنا وانت مستواك متذبذب.
- تركي الصويلح: لااااااااااااااااااا تعليق والله يذكر النزهان بالخير والله انه مفتح جنبك ياخي أول مره اشوف لاعب يشوت بوز وأول مره اشوف لاعب يشوت الكورة برجله اليمين وتضرب رجله اليسار وتطلع آوت (الله يهديك يا كاندينو)
-أحمد الصويلح: أنت لاعب فنان بس مالك ذنب باللي حصل لأنه لو لعبنا بعشر مهاجمين بهالطريقة ماراح نجيب ولاهدف بس فيه كلمة للدبيخي قالها اعجبتني يوم قال (انا استغرب من هالتغيير التقليدي اللي ماله داعي وش الشي اللي مو موجود بسامي وموجود بالصويلح) صراحة تحليل اعجبني.
-جيوفاني: ليش يا عالم ما تحشرونه وتخلونه يلف على الملعب عشرين لفه عشان ترجع لياقته والا وش نبي فيه وهو يلعب على الواقف.ونفس الكلام لسامي لازم لك برنامج لياقي مكثف يا بطل.
نواف التمياط:تكفى لاتزعل يا أبو بندر وراح تلعب ان شاء الله وراح توريهم انت مين.
سادساً: وجهة نظري بطريقة اللعب:يا شباب احنا عندنا مشكلة بالظهير الأيمن طيب ليش ما نبتعد عن الطريقة التقليدية أربعة أربعة اثنين ونغير طريقة اللعب وتصير ثلاثة خسمة اثنين.
سابعاً: يا عالم لازم يرجع عزيز لمركزه ولازم نحارب عشان هالشي. واذا لازم تلعب بظهير تقليدي ياخي حطو الغامدي والله ينفع والا جيبو واحد من الأولمبي.
ثامناُ: ليش العصبية والنرفزة للاعبين اللي مالها سنع أكيد فيه شي مانعرفه.
تاسعاً: الجمعاااااااااااااااااااااااااااااااااااااان وينه يا عالم وش فيه غايب أكيد مسوي له حركة جديدة والا هالرزعة مو من فراغ.
أخيراً: أتمنى ان مشاركتي الأولى تعجبكم وطرحي يكون مناسب وأبو سلطان بقولك ان الجمهور بيحضر بس بيطلع من الملعب اذا فيه لاعبين من شاكلة تركي الصويلح مانفرض عليك شي بس مافيه سبب يقنعنا فيه وانا مستعد اعطي موظفيني اجازة لكل مباريات البطولة الاسيوية ونبي بنفس الوقت اجراءات تصحيحية وسريعة واحشر المدرب بزاوية وأتمنى ما تلغي عقده لأنه بصراحه ما راح يتغير شي لأن العلة بالمدرب وغيره.
أتمنى التوفيق للزعيم وأتمنى انه الوضع يتغير ونرجع لمستوانا القديم حتى لو انهزمنا مو مشكلة بس على الاقل مستوى. ولا تخلون اللي ماخذ مقلب بنفسه مثل سبيت خاطر وشلته يعتقدون انهم لاعبين زي الناس.
نبيها تااااااااااااااااااااااااااااااااريخية المباراة الجاية مع العين ولازم لاعبين المنتخب يلعبون وش فرقنا عن الاتحاد يوم عطوهم تسهيلات كبيرة.