رحـــلة من الخُبر إلـــــى حجز الناصـــريه - نادي الهلال السعودي - شبكة الزعيم

هلالي الظهران · #1 21/02/2006, 03:56 AM

السلام عليكم ورحمة الله وبركاته

أسعد الله هالوجيه والخشش السفره بالخير والمسرات .. شاكر لكم حسن اصغائكم مع اطيب الاوقات واحلى الاماني:p ,,

[ انتــــــريـــه ]

..وانقلبت السياره وارتطمت في الحاجز الاسمنتي واصبحت جزء لا يتجزأ منه ,,

^
^

مدخل مال امه اي دخل بالموضوع بس لزوم الاثاره والاكشن

,,

[ المدخل الرئـــيسي]

في الفتره الماضيه غبت عن المجلس والشبكه عموما لظروف خاصه حتى الردود كنت مقل جدا فيها وحبيت اصافحكم بهالموضوع مصافحه بسيطه على قد الحال واعيشكم معي هالموقف امتدادا لمواقف سابقه,,

تحذير .. اي اخطاء املائيه او نحويه في هالموضوع انا غير مسئوول عنها .. بالعربي لااحد يستقعد سمعت يا صدى ولا تهون فيو

,,

تنويه.. الموضوع مسكة خط ومشواار .. يعني الضعوف حقين الدايل اب يفصلون العداد حتى ماتوصل الفاتوره الحد الائتماني

.. واللي يدخل بدون مايرد جعل اصابيعه داء النقرص

,,

[ تمهيــــد ]

في نهاية اسبوع احد اسابيع الفصل الدراسي الماضي كانت عندي مناسبه خاصه بالرياض وكان من الواجب علي حضورها..

العاده جرت بعد نهاية المحاضرات نتوكل على الله ونمسك خط الرياض لكن هالمره لظرف طارئ لخويي (مهند) اضطرينا نحرك بعد صلاة المغرب مباشرة....

نبذه سريعه عن مهند .. شاب ظريف خفيف الظل ومشهور بتسميه خاصه وهي الوحش

.. سبب هالتسمية ان هالادمي مشعّر بصوره عجيبه

.. يعني هالظريف يحلق دقنه قبل لا ينام واذا صحى لقاها اكثر من قبل لا ينام

.. حاول بشتى الطرق حتى حلاوة الجسم حق البنات مانفعت معه

..

اللي يهمنا في شخصية مهند انه انسان نحس لنفسه وللي حواليه:p .. مثال بسيط .. في احد السميسترات كانت عندنا ماده نبي نضيفها للجدول وكل السكاشن( والله ماعرفت معناها بالعربي:p ) مقفله ونحتاج موافقه من رئيس القسم .. راح مهند لرئيس القسم وكلمه عنه وعني وقاله الدكتور ابشروا بس مروني بكره .. من بكره رحنا للدكتور .. دخلت انا اول وعطاني الدكتور الموافقه لاضافة الماده .. خرجت ودخل بعدي مهند وهو واثق لانه مكلم الدكتور من امس لكنه خرج بدون الموافقه

.. حن قلبي عليه وقطعت موافقة الدكتور حتى لا يحقد علي

,,

المشهد الاول.. المفاجـــأه..

صلينا المغرب والعشاء جمع .. فللنا السارة بنزين .. دخلنا السوبرماركت وخرجنا بمؤونة الخط

.. توكلنا على الله ومسكنا الخط..

في ذيك الليلة كنت رايق جدا وماشي على مهلي تقريبا على 160 .. الجو رايق خصوصا في الليل يصير خط الرياض متعة .. الجهاز اللي يكشف الرادار شغال .. الخط مريح .. وكل شي ولله الحمد على سنقة عشره

..

تجاوزنا اخر تفتيش قبل الرياض والامور احلى مايكون .. وصلنا حدود الرياض .. دخلنا الرياض ونقز الملقوف مهند وسكر الجهاز اللي يصيد الرادار .. انا ما اهتميت خلاص وصلنا بالسلامه ..

وانا في طريقي احط مهند في بيتهم وماشي في شارع التخصصي .. وانا في نفسي احمد الله معي مهند ولا اخذنا مخالفه والجو كان صافي وكل الامور على ما يرام .. انقطع حبل افكاري بسبب سياره صغيره من خلفي يكشح بالعالي بطريقه مزعجه جدا

.. بعدت عن السايد اليسار ورحت للسايد اللي بالمنتصف وهالسياره وراي والتكشيح ماتغير .. بغيت اكع الفرامل في نص الطريق واحوس مندوبه واتلاقط معه .. لكن جاني صوت مهند والضحكه في عيونه يقولي وقف صادووك يافالح

هذي سيارة المرور السري

..

في ذيك الفترة كان بالرياض حمله شرسة للمخالفين والمتهورين ..

جنبت على اليمين ونزل العسكري باتجاهي .. فتحتله الدريشه .. من غير سلام هات الرخصه والاستماره.. قلتله ابشر ما طلبت شي .. الحين انا اللي مسوي فيها الولد الذرب واللي بيدحلسه بالكلام:p .. ما امداني اقوله عسى ماشر الا هو معطني مقفاه ويقول الحقني

..

مشينا مسافه قصيره .. ورجع المرور السري ووقف على جنب .. لكن هالمره اتفاجئت بالمنظر اللي شفته .. صحيح كنت اسمع بالحمله بس ماتوقعتها لهالدرجه

.. اكثر من 15 سياره موقفه على جنب ودوريات و7 سطحات شايفه شغلها سحب بهالسيارات..

نزلنا انا ومهند للضابط وحاولنا نفهمه اننا جايين من الشرقيه وان الاهل ينتظرونا واننا طلاب بالاضافه الى كم كذبه بيضا

.. ابتسم الضابط بخبث وقال .. غيرك كان اشطر

..

انتظرنا نصف ساعه الين الدوريات جمعوا الغله واكتفوا بالعدد اللي جمعوه

.. حررت المخالفات للجميع .. اتجهت لنفس الضابط وقلتله خلاص امشي الحين;) .. ابتسم ايضا بخبث وقال .. بتمشي بس بعد 24 ساعه بالحجز ان شاء الله وتسدد كل مخالفاتك:p .. الشيء الوحيد اللي نجحت اقنع فيه الضابط انه مايسحب السيارة وخليت مهند يروح فيها ويكون جاهز اي وقت اتصل فيه .. على بالي بيوصلونا المركز بعدين يقولون لاتعودها

..

كان عدد الموقفين تقريبا 17 او 18 وكانت فيه خمس سيارات صغيره ( الانترا) سيارات المرور السري هي اللي بتحمل هالضعووف للحجز

.. ناداني واحد من المرور السري وفتح الباب اللي ورا وقالي اركب .. كان فيه ثلاثه شباب راكبين ورا والسياره ضيقه بعدين اشكالهم ملحجه

.. قلتله ماني براكب .. قالي على كيفك الدعوه .. قلت انا مخالف على عيني وراسي بس ما تستعبدونا وتحشرونا مثل الدجاج ..المهم اركب ماتركب .. اركب ماتركب ..الين طفش مني قالي روح للضابط وتفاهم معه..

رحت للضابط نفسه وجلست اناظر فيه

.. قال خير وش بعد.. قلت ابد سلامتك وقفولي تاكسي يوديني الحجز

.. هالمره ابتسم لكن حسيت ان وده يطقني

.. قال وشفيك زود ماتركب معهم .. قلت السياره فيها ثلاثه ومالقيت مكان .. سال واحد ثاني من المرور السري كم معك قال ثلاثه .. قاله الضابط فيه مكان قدام .. رد عليه خله يجي..

انا اقول في نفسي وش هالفله اول مره اركب دوريه وقدام بعد

,,

المشهد الثاني .. داخل السيارة

..

ركبت السياره .. الوضع هدوء.. العسكري مقفل الدرايش ويسمع البلاغات من الجهاز اللي عنده .. مشينا والعسكري الله يهديه طاير فينا ميتين والسياره يالله تمشي .. صادف ان قدامنا واحد مهو راضي يبعد عن الخط .. جا العسكري يبي يضرب بوري .. مكان البوري جهة الراكب على اليمين ومع طول السيقان ما امداه يضرب البوري

فكلفني بهالمهمه ;) .. ضعطت الازرار وكان صوت البوري فله ذكرني بهذاك افلام كرتون حق النعامه والثعلب اللي يقول بيب بيب

..

وحنا ماشين على نفس الوضع ..الدرايش مصكره والسياره مكتومه وريحت الشباب بدت تطلع

.. بحركه لا اراديه وانغز المكيف على اثنين

.. التفت علي بحقد يقول سيارة ابوك :p .. قلتله ياخي انكتمنا ومابي افتح الدريشه حتى تقدر تسمع البلاغات.. عطاني ذيك النظره وكمل طريقه .. الى ان وصلنا عند وحده من الاشارات .. الاشاره خضرت واللي قدامنا مامشى .. بحركه اراديه هالمره واضرب البوري

.. التفت علي وهو مفرقز عيونه باستغراب .. واضرب البوري مره ثانيه واقوله شف الحمار ما يبي يمشي

.. ناظرني وهو مفرقز وانا ابتسم .. مامسك نفسه هالمره وضحك

.. هو وضحك من هنا والجحلط اللي ورا فكوا ضحك وعيوا يسكتون:p .. من بعدها سحب على الجهاز وهاتك يا سوالف

,,

المشهد الثالث .. حجز الناصريه

..

اثناء جلوسي بالسياره وانا افكر واتخيل شكل الحجز شلون خصوصا واني اول مره ادخله:p .. والصوره اللي في بالي زنزانات مثل اللي في المسلسلات واقول عسى مافيها كلبشات بعد :p ..

نزلنا من السياره .. دخلنا المركز .. جا معنا عسكري دخلنا للحجز وصكر الباب من ورانا

..بصراحه تفاجئت من المكان

.. كانت مثل الصاله الكبيره وغرف مفتوحه عليها من كل جهه .. والصاله مليانه .. مجموعه تلعب بلوت ومجموعه يدخنون ومجموعه يسولفون وفي كل مكان واحد منسدح ونايم

.. وانت ادخل واختار المكان اللي تبيه

..

جلست واقف مكاني خمس دقايق استوعب المكان .. وشد انتباهي واحد خال جثه اسود واقف مكانه بنص الصاله ولابس ثوب نوم ورافعه الين نص فخذه

.. واقف يقول يا شباب انا طالع الكورنيش اللي يبي يخاوي يركب وراي

ويحرك يده كانه يعشق السياره

.. شوي سكت بعدين قال وشفيها هذي مهيب راضيه تشتغل

.. شوي يقول ياشباب نبي فزعه احد ينتع السياره

..

انا قلت ايووووووه من اولها كذا

.. ماتسوى علينا يروح الشرف الليله

.. رحت وجلست في ابعد مكان من هالشاب اللطيف

.. انتبهت لاربعة شباب شكلهم محترمين ومرتبين وجلست اناظر فيهم:p .. قالوا حياك تفضل معنا .. بدون مشاوره نقزت معهم

.. بعد ما تعرفت عليهم ..طلع واحد موظف في الاتصالات والثاني مدرس ابتدائي والاثنين الباقين طلاب في الكليه التقنيه وطلعوا نفس وضعي

.. والله وهاتك يا سوالف وضحك ووناسه ..

بعد مافقدت الامل انهم يطلعوني.. كانت الساعه 12 تقريبا.. دقيت على الوالد اللي من حسن حظي انه كان بالرياض ..

انا : الو .. السلام عليكم ..

الوالد.. وعليكم السلام .. وينك تاخرت؟؟!!

انا: انا موقف في حجز الناصريه ..

الوالد: وش تسوي هناك؟!!

انا: ودي اخربها واقوله العب كوره هناك بس مالها داعي اقعد الويك اند كله بالحجز .. ولا وشرايكم

.. قلتله مسكوني على مخالفة سرعه وتوقيف 24 ساعه .. شفلك حل وطلعني:p ..

الوالد: وش اسويلك بنص الليل واكلم مين هالحين الناس نايمه .. خلاص الصبح ان شاء اشوفلك حل

.. تبي شي ؟؟!!

انا: ابد سلامتك .. وانا اقول في نفسي يا قاسي ولدك ملحط بالتوقيف وانت بترقد

ووالله مشى الوقت في سوالف وضحك وبلوت والدعوه فلللله .. والله كاني بالاستراحه مع خوياي مع فارق المكان

..

على الساعه 4 دخل موقوف جديد .. كان صغير في السن تقريبا 17 سنه .. والولد حليوه وواقف نفس وقفتي يوم دخلت ومفجوع من المنظر

.. حسيت بمعاناته وقلت للشباب خلوه يجي معنا

.. قالوا اووكي بس نخاف يفهمنا غلط

.. قلتلهم انا بكلمه وبالفعل جا وتعرف علينا وجلس معنا .. الولد اسمه محمد الغامدي وابوه عقيد .. ساله واحد من الشباب ابوك عقيد ليه ما يطلعلك

.. قال عيوا يطلعوني

.. قلت حركات تطورنا والله :p .. كنت بنطق بس الله سلم

..

جا وقت صلاة الفجر .. قمنا وتوضينا وصلينا ..والراقدين محد تجرا وصحاهم :p .. من ضمنهم الخال الاسود (البعبع

) شوي قام من نفسه .. قال صليتوا .. قلنا ايه .. وبدون وضوء قام وصلى الفجر ثلاث ركعات

وجلس مكانه .. شوي قام يسال.. يا شباب انا فاتتني ركعه صح

..

ههههههههههههههههه الله يلعن ابليسه والله نص ساعه متسدحين ضحك

..

المهم .. بعد الفجر جابوا عدس وفول وقالوا يالله فطوركم

.. والله لو في ابو غريب ماسووا كذا

.. انا والشباب اللي معي جايعين وزود على كذا الشباب اللي يدخنون خلصت مؤونتهم .. طقيت صدري وقلتلهم عندي اللي يبي يجيبلنا الاغراض;) ..

طبعا مافيه الا مهند

.. صحيته من النوم وقلتله تعال مرني خلاص بطلع .. طبعا مافي حل غير كذا علشان يقوم

.. بعد ربع ساعه رجعت دقيت عليه كان توه طالع .. قلتله وانت جاي جيب معك فطور واحسب حساب سته وجيب معك اكبر عدد من بكتات الدخان تقدر تهربه لنا:p ..

بعد نص ساعه ناداني الضابط باسمي .. رحت لقيت مهند وهو مطنقر يقول هذا اللي يبي يطلع

.. طنشته وقلتله هات اللي معك

.. تاكد الضابط من اللي في الكيس ودخله .. انا شفت الكيس كله اكل ومافيه دخان وماقدرت اسال مهند قدام الضابط .. دخلت للشباب ومعي الفطور .. كان مهند جايب سندويشات و6 علب همبرجر

.. انا في نفسي اقول الله يفشلك يامهند ما جبت الدخان وفوق كذا همبرجر على الصبح

..
واحد من الشباب اشتهى الهمبرجر وفتحه لقا وسطه علبتين دخان

.. فتحنا العلب الباقيه كل علبه فيها بكتين

.. الله يرجه مهند جايب دخان اكثر من الاكل

..

على طاري الدخان .. فيه باكستاني حاقد عليه الى الان .. مع اني لا ادخن ولا هم يحزنون .. يبيع الدخان بجميع انواعه البكت الواحد بــ 15 ريال

.. يعني صافي ربحه من البكت عشر ريال

,,

ومشى الوقت على احلى مايكون .. الين جات الساعه 7 .. جاني اتصال من الوالد..

الوالد: السلام عليكم ..

انا: وعليكم السلام..

الوالد بغضب مكتوم

: كم المخالفات اللي عليك؟؟!!

انا : بعد مابلعت ريقي وحسيت بالوهقه .. اخر شي اذكره انها 1800 ريال..

الوالد بحقد .. مخالفاتك يافالح 2650 مع الــ 900 حق امس يعني 3550 ريال

..

انا: ........ وش تحتروني اقول اكيد اكلت تراب وانطميت

الوالد: اذا تبي تطلع دبر نفسك .. طوط طوط

رجعت للشباب وانا اقولهم .. ابشروا جالسلكم على الاقل ثلاثة ايام

.. وكملنا الجلسه ولا كانه صار شي

.. شوي النوم قام يسوي معنا حركات بايخه وينغزنا

.. قاومناه وكملنا السوالف اللي لو جلست ثلاثة ايام والله مامليت منها

..

المشهد الأخير..

في تمام الساعه 10 العاده يجي الضابط ويعلن عن المفرج عنهم

.. الجميع كان بانتظار هالتوقيت :p .. والله وجت الساعه 10 وانا غاسل يدي ومطنش الدعوه وجالس ويا الشباب سوالف ولا كاننا بالحجز ..

المهم .. الضابط نادى على اول اسم ما انتبهنا له .. نادى الثاني ماعرفناه .. نادى الثالث محمد الغامدي

.. محمد كان توه نايم .. صحيناه بسرعه وحنا نكبر في راسه وهو مهو صدق انه بيطلع وماوده .. المهم طلعناه غصب سلم علينا وخرج والضابط كمل الاسامي .. كان من ضمن الاسماء المفرج عنهم

مدرس الابتدائي وواحد من طلاب التقنيه

..

بقينا ثلاثه .. انا وموظف الاتصالات وطالب التقنية .. شوي الا رجع محمد .. استغربنا .. قالي (عمر) تراك نادوا اسمك اول واحد

..

خرجت للضابط وطلعني للغرفه اللي برا ولقيت الوالد جالس وهو يناظرني .. اتوقعت تهزيء او شي من هالقبيل بس شكله رحمني يوم شاف شكلي وحالتي حاله

..

خرجنا من المركز والوالد يقول .. الحين لو اعطيتك هالمبلغ كانك استفدت منه ماهو افضل من ماتقطه في مخالفات

..الحين اشوفك تطلب مني ولا من امك فلوس علشان تسافر بين الفصلين

.. قلتله اصلا ما عندي نيه اسافر لاني ناوي اخيم في هالاجازه:p :p .. قالي ولا بلاش اقولكم والا دامني كبيت العشا كله بقول

.. قالي الله يطول بعمره .. لايكثر

..

[ الخلاصة ]

يا شباب لحد يسرع والله السرعه مو زينه :p .. عني الحين اذا صرت امشي بالرياض ما اعدي الميه ابدا واذا تجاوزتها اكع الفرامل كله الين اوصل 60

..
ومع كل اللي صار ما نفع معي

.. في اجازة بين الفصلين كنت راجع مع الوالده من مشوااار وللاسف قطعت اشاره وقدام الدوريه بعد بس والله العظيم ما دريت كانت السياااره مظلله على الاخر لظروف امنيه خاصه

.. والله كنت انزل راسي من الدريشه حتى اشوف زين ..بس وجود الوالده معي فادني لانها هي ما انتبهت بعد للاشاره وشفعت لي عند الوالد .. حتى الشرطي اخذ الرخصه والاستماره وقال اذا تبيهم تعال المركز

..
طبعا الوالده حكت السالفه للوالد اللي بدوره تفهم .. وقالي الله يطول بعمره روح خذ رخصتك واستمارتك .. قلت والله اللي مارحت للتوقيف بنفسي

.. والحمدلله انحلت هالمره بدون توقيف

..

- تمت-

سندريلا الهلال · #2 21/02/2006, 05:50 AM

بصراحه رحله ممتعه وناااسه هالحين انت تحمسهم يروحون يخالفون حتى النوم ما نمتوا من الوناسه هههههاهههههههههههههههههههههههه
الحمد لله على السلامه

والله يصلح قلوبكم ان شاء الله وتركدون عن هالسرعه اللي بتقضي عليكم

مشكور مره ثانيه

R a k a n · #3 21/02/2006, 07:22 AM

هلالي الظهران :

المشهد الثاني .

. داخل السيارة:ركبت السياره .. الوضع هدوء.. العسكري مقفل الدرايش ويسمع البلاغات من الجهاز اللي عنده .. مشينا والعسكري الله يهديه طاير فينا ميتين والسياره يالله تمشي .. صادف ان قدامنا واحد مهو راضي يبعد عن الخط .. جا العسكري يبي يضرب بوري .. مكان البوري جهة الراكب على اليمين ومع طول السيقان ما امداه يضرب البوري

فكلفني بهالمهمه ;) .. ضعطت الازرار وكان صوت البوري فله ذكرني بهذاك افلام كرتون حق النعامه والثعلب اللي يقول بيب بيب

.. وحنا ماشين على نفس الوضع ..الدرايش مصكره والسياره مكتومه وريحت الشباب بدت تطلع

.. بحركه لا اراديه وانغز المكيف على اثنين

.. التفت علي بحقد يقول سيارة ابوك :p .. قلتله ياخي انكتمنا ومابي افتح الدريشه حتى تقدر تسمع البلاغات.. عطاني ذيك النظره وكمل طريقه .. الى ان وصلنا عند وحده من الاشارات .. الاشاره خضرت واللي قدامنا مامشى .. بحركه اراديه هالمره واضرب البوري

.. التفت علي وهو مفرقز عيونه باستغراب .. واضرب البوري مره ثانيه واقوله شف الحمار ما يبي يمشي

.. ناظرني وهو مفرقز وانا ابتسم .. مامسك نفسه هالمره وضحك

.. هو وضحك من هنا والجحلط اللي ورا فكوا ضحك وعيوا يسكتون:p .. من بعدها سحب على الجهاز وهاتك يا سوالف

,,

العن ام الميانه الي كذا ياشيخ

المشهد الثالث .. حجز الناصريه:

اثناء جلوسي بالسياره وانا افكر واتخيل شكل الحجز شلون خصوصا واني اول مره ادخله:p .. والصوره اللي في بالي زنزانات مثل اللي في المسلسلات واقول عسى مافيها كلبشات بعد :p .. نزلنا من السياره .. دخلنا المركز .. جا معنا عسكري دخلنا للحجز وصكر الباب من ورانا

..بصراحه تفاجئت من المكان

.. كانت مثل الصاله الكبيره وغرف مفتوحه عليها من كل جهه .. والصاله مليانه .. مجموعه تلعب بلوت ومجموعه يدخنون ومجموعه يسولفون وفي كل مكان واحد منسدح ونايم

.. وانت ادخل واختار المكان اللي تبيه

.. جلست واقف مكاني خمس دقايق استوعب المكان .. وشد انتباهي واحد خال جثه اسود واقف مكانه بنص الصاله ولابس ثوب نوم ورافعه الين نص فخذه

..

ياخي ذا الخال سبب فتنه للمساجنين ولذلكـ من كثرة الشكاوي عليه تم الافراج عنه بكفاله :p :p

وعلى العمووم اهم شي ان ابوو عجب مب معكـ

بس السالفه كذا وانت كذا بعد

بص حجزز الناصرريه تراه صار عندي مثل بيتنا عايدي

كل يوم او يوومين وانا فيه

ترا ماسووي شي بس كله كمم اشاره وانا مدري مااخذ الا الحكومه وراي

وش اللي جابها والله مدري عاد المشكله اني اتلفت يمين ويسار قبل ماالقى احد

ماخذ الا هوو وراي صفط على جمب يا وانواع التكبيس

وابشركـ الخال الى يوومكـ ذا وهو في الحجز

مافيه امل يطلع

وعلى العمووم ماعلمتني يووم كفشووكـ يمكن اني معكـ ذاكـ اليووم

سالفه رائعه جدا جدا جدا

تشااو

فرصه ضايعه · #4 21/02/2006, 07:45 AM

وعليكم السلام ورحمة الله وبركاته

هلا فيك .... ياراعي حجز الناصريه

من قدك تطورات ...... سجون وحركات:p

إقتباس


	أسعد الله هالوجيه والخشش السفره بالخير والمسرات .. شاكر لكم حسن اصغائكم مع اطيب الاوقات واحلى الاماني:p ,,

أحرجتنا على ذا المقدمه

إقتباس


	..وانقلبت السياره وارتطمت في الحاجز الاسمنتي واصبحت جزء لا يتجزأ منه ,,

ياوووووووووووك

.....
كنه قدامي

...حشى فلم ذا

إقتباس


	مدخل مال امه اي دخل بالموضوع بس لزوم الاثاره والاكشن ,,

بعذري تحمست

إقتباس


	في الفتره الماضيه غبت عن المجلس والشبكه عموما لظروف خاصه حتى الردود كنت مقل جدا فيها وحبيت اصافحكم بهالموضوع مصافحه بسيطه على قد الحال واعيشكم معي هالموقف امتدادا لمواقف سابقه,,

ياحبك للتقليد

......
حتى في غيابي وحضوري تقلد

إقتباس


	تحذير .. اي اخطاء املائيه او نحويه في هالموضوع انا غير مسئوول عنها

أجل من المسؤل هاه

.....
بغيت استقعد لك بس رحمتك:p

إقتباس


	تنويه.. الموضوع مسكة خط ومشواار .. يعني الضعوف حقين الدايل اب يفصلون العداد حتى ماتوصل الفاتوره الحد الائتماني

زين قلتلي

....
إلى الحين وحنا ضعوف

....

إقتباس


	واللي يدخل بدون مايرد جعل اصابيعه داء النقرص ,,

الله يرجك

....
الحمد لله هذاني رديت;)

إقتباس


	يعني هالظريف يحلق دقنه قبل لا ينام واذا صحى لقاها اكثر من قبل لا ينام

الله يعافيه ولا يبلانا

....
أكثر الرجال كذا ولا أنا غلطانه

إقتباس


	اللي يهمنا في شخصية مهند انه انسان نحس لنفسه وللي حواليه:p

وش لك فيه دامه كذا

:p

إقتباس


	دخلنا السوبرماركت وخرجنا بمؤونة الخط

هذي أهم شي

إقتباس


	وماشي على مهلي تقريبا على 160 ..

أجل لا صرت مسرع كم تمشي

<<< تحب السرعه بس تسوي فيها ثقل:p

إقتباس


	وانا في نفسي احمد الله معي مهند ولا اخذنا مخالفه

اذكر الله .. لا تنظل نفسك

إقتباس


	في ذيك الفترة كان بالرياض حمله شرسة للمخالفين والمتهورين ..

مافاد فيكم إلا ذا الحمله

تشوف أغلبهم مثبت السرعه على 120

إقتباس


	ما امداني اقوله عسى ماشر الا هو معطني مقفاه ويقول الحقني ..

عز الله اللي رحت فيها:p

إقتباس


	ابتسم الضابط بخبث وقال .. غيرك كان اشطر ..

ياحليله ...
عارف حركاتكم

....

إقتباس


	اتجهت لنفس الضابط وقلتله خلاص امشي الحين ;) ..

والله ياأنت تسمع بالروحه

إقتباس


	الشيء الوحيد اللي نجحت اقنع فيه الضابط انه مايسحب السيارة وخليت مهند يروح فيها ويكون جاهز اي وقت اتصل فيه

زين ... احمد ربك

على الأقل ما تصير المصيبه مصيبتين

إقتباس


	قلت انا مخالف على عيني وراسي بس ما تستعبدونا وتحشرونا مثل الدجاج

أحلى ياقوي

.....
الصراحه مالهم داعي

إقتباس


	قلت ابد سلامتك وقفولي تاكسي يوديني الحجز

هذي قويه الله يرجك

شين وقوي عين بعد

إقتباس


	مشينا والعسكري الله يهديه طاير فينا ميتين والسياره يالله تمشي ..

خير أن شاء الله وش معجّله

إقتباس


	الدرايش مصكره والسياره مكتومه وريحت الشباب بدت تطلع ..

الله يخيسك

...
عساها بس مب صنان

إقتباس


	الاشاره خضرت واللي قدامنا مامشى .. بحركه اراديه هالمره واضرب البوري ..

ياسلام على الميانه

....

إقتباس


	من بعدها سحب على الجهاز وهاتك يا سوالف ,,

زي ايش السوالف يعني

...
<<< ياحبها للتطويل

إقتباس


	واتخيل شكل الحجز شلون خصوصا واني اول مره ادخله :p ..

هاه وش قلت

...
أول مره أدخله... قل غيرها

...
ما يمشي علينا نصبك:p

إقتباس


	جلست واقف مكاني خمس دقايق استوعب المكان ..

كني اشوفك فاق كشرتك

وبوهتك طايره

إقتباس


	ولابس ثوب نوم ورافعه الين نص فخذه ..

يسوي لكم حركات إغراء بس مافهمتوه:p :p

إقتباس


	شوي يقول ياشباب نبي فزعه احد ينتع السياره ..

فله والله ... عساك بس نتعت له سيارته

إقتباس


	انا: ودي اخربها واقوله العب كوره هناك بس مالها داعي اقعد الويك اند كله بالحجز .. ولا وشرايكم ..

هو يسألك يمكن صار لك شي ... وأنت على طول ودك تحارش

إقتباس


	والله كاني بالاستراحه مع خوياي مع فارق المكان ..

ممدى صاروا أخوياك

...
عساك بس خذت أرقامهم:p ... عشان ماتنسون بعض

... خاصه أن المكان اللي تعرفتوا فيه على بعض خطير

...

إقتباس


	قالوا اووكي بس نخاف يفهمنا غلط ..

أبو التفكير :p ....

إقتباس


	قلتلهم انا بكلمه وبالفعل جا وتعرف علينا وجلس معنا ..

وش المعنى أنك أنت اللي تكلمه;)

إقتباس


	وبدون وضوء قام وصلى الفجر ثلاث ركعات وجلس مكانه .. شوي قام يسال.. يا شباب انا فاتتني ركعه صح ..

أكثر شي مزّع بطني من الضحك

....
الله يرجه .... ودي أقابله :p ....

إقتباس


	وجيب معك اكبر عدد من بكتات الدخان تقدر تهربه لنا :p ..

الله يصلحك ...
تعينهم على الشر أنت

...خلك في فطورك أحسن لك;)

إقتباس


	واحد من الشباب اشتهى الهمبرجر وفتحه لقا وسطه علبتين دخان ..

يا حسافه الشهوة

....
وين المروجين عن خويك

.... يعرف يهرب بعد

إقتباس


	يبيع الدخان بجميع انواعه البكت الواحد بــ 15 ريال ..

أحسن شي سواه

...
مب مثلك تروح وتشتري لهم

....

إقتباس


	انا: ........ وش تحتروني اقول اكيد اكلت تراب وانطميت

تستاهل ...
أجل3550

.... منك لله ... الله يعين أبوك;)

إقتباس


	يا شباب لحد يسرع والله السرعه مو زينه :p ..

توك تقول كذا .. بعد ايش

خالي يسرع بس من شاف ذا الحمله وهو مثبت السرعه على 120 وإن زاد 125

كان ما يهمه يدفع بس يوم حطوا الدعوى فيها سجن هون:p
يقول أدفع فلوس بس مايسجنوني;)

إقتباس


	كانت السياااره مظلله على الاخر لظروف امنيه خاصه ..

يازين السيارة اللي كذا

....
آخذ راحتي فيها

... حتى مره ركبت وحده نفس النمونه وقعدت أحط كحل وروج ماأمداني أحطه في البيت

إقتباس


	- تمت-

وأخيراً مابغيت تخلص:p ....

الزبده

أن هالحمله هي اللي فادت فيكم:p .... ولا منول محد يهتم;)

يالله تعبت أنا وطولت

كن ردي أكبر من موضوعك

ننتظر مواقف أخرى معك ياراعي التوقيف
<<<< مسكتها عليك .. الله يعينك

AMJADG · #5 21/02/2006, 07:48 AM

والله قصتك ممتعــــــــــــــــــــه مره،،

شكرا

روما 2005 · #6 21/02/2006, 02:29 PM

الله يرجك رجا مبرحا ... هع

المشهد الثاني يفطس من الضحك ,,,

مشكووووور اخوي . .

كنترول الزعيم · #7 21/02/2006, 03:39 PM

قمه المتعه ها الرحله

يعطيك العافيه

وفي انتظار مواقف جديده

تحياتي لك --------- يا منسم

تيماوي · #8 21/02/2006, 04:20 PM

@ الله يسعد هالخشه بالخير والمسرات ..

@ اقول شكل القصة موسالفة يوم او يومين ...!!! إنا فاقدينك من مده ...

@ يعطيك الف عافية على هالمشاركة الحلوة ... وبصرحة صلاة الخال شئ ,,

لـهـفـة الـخـاطـر · #9 21/02/2006, 05:08 PM

الحمد لله عالسلامـه ..

وترا التفاتيش بكل مكان بالرياض انتبه ..

حتى بحارتنا اذا تجاوزت 50 يصكونك مخالفة

H U N T E L A A R · #10 21/02/2006, 05:31 PM

(( بـعـد قـراءة الـمـوضـوع سـريـع سـريـع ))

مـاكـأنـك أخـوي جـحـت ( سـفـط ) خـويـك مـهـنــد

.

ولد وايل · #11 21/02/2006, 06:03 PM

تسان دقيت علي اطلعك

دبــل كيــك · #12 21/02/2006, 06:18 PM

مـوضـوووع كـاااتـبـه هـلاااالـي الـظـهـرااان ... بـحـاااجـة لـحـكـر بـراااد مـن حـلـيـب الـزنـجـبـيـل ...

بـعـد مـاااحـكـرت الـبـرااادي ... اللـي بيشـرب بالبيـاااالـة يـصـف بالطـااابـور اللـي علـى اليـمـيـن ... واللـي مـعـه كـوووب يـغـيـره ويـشـووفـلـه بيـااالـه ويـرجـع يـصـف سـرااا بنـفـس الطـااابـوور اللـي علـى اليـمـيـن ...

طـيـب طـيـب يـااااهـلاااالـي كـرااانـي .... ذكـرتـنـي بـأيـااام كـااان يـقـوول الـنـشـرة ووراااه أربـع لـوحـااات بهـااا خريـطـة الـسعـوووديـة واشـك انـه هـو اللي راااسـمـهـااا بـنـفـسـه كـااانـت تخـتـلـف عـن خريـطـة المملـكـة اللـي كـنـت أشـووفـهـااا بـعـلبـة الهـندســة ...

إقتباس


	..وانقلبت السياره وارتطمت في الحاجز الاسمنتي واصبحت جزء لا يتجزأ منه ,,

الـلـه يـسـتـر ... مـعـد هيـب اثـااارة ...الااا حـرقـت الـفـيـلـم كـااامـل ... بـس تـبـي الصـدق وربـي كـنـي أتـخـيـل كـااامـري مـنـقـلـبـة مـرتـطـمـة مـن جـد ولـوونـهـااا كشـمـيـري بـعـد بـس اصـبـحـت جـزء لااا يتـجـزأ مـنه ... الـجـملـة ذي بالـذااات عيـت ضـفـااايـر مـخـي تـتـخـيـلـهـاااا ....

إقتباس


	في الفتره الماضيه غبت عن المجلس والشبكه عموما لظروف خاصه حتى الردود كنت مقل جدا فيها وحبيت اصافحكم بهالموضوع مصافحه بسيطه على قد الحال واعيشكم معي هالموقف امتدادا لمواقف سابقه,,

تصـااافـحـنـااا ؟!! ومـصـاااافـحـة بـسـيـطـة ..!! يـااارجـل خـضـخضـتـنـاااا وحـسـتـنـااا حـوووس ... تـدري انـي ارد عليـك وأنـااا حـااااط مسـاااكـة اللـي بـجـنـب بـااااب الـددســن مثـبـتـهـااا بالجـدااار .. خـفـت اتـفـاااعـل واتـكـرفـس تحـت الكـرسـي ....

إقتباس


	في نهاية اسبوع احد اسابيع الفصل الدراسي الماضي كانت عندي مناسبه خاصه بالرياض وكان من الواجب علي حضورها..

راااعـي واااجـب ... وسـبـعـة أنـعـاااام ....

إقتباس


	نبذه سريعه عن مهند .. شاب ظريف خفيف الظل ومشهور بتسميه خاصه وهي الوحش .. سبب هالتسمية ان هالادمي مشعّر بصوره عجيبه .. يعني هالظريف يحلق دقنه قبل لا ينام واذا صحى لقاها اكثر من قبل لا ينام .. حاول بشتى الطرق حتى حلاوة الجسم حق البنات مانفعت معه ..

قـوولـه مـااالـه إلااا يـدهـن نـفـسـه بـزيـت خـرووع ... وينـسـدح علـى حصـيـر في عـز الـقـاااايلـة .... عـنـى مـعـد يـفـرق بيـن لـووون الجـلـد والشـعـر ... وراااح يـرتـاااح علـى الأقـل مـن نـظـرة النـااااس ....

إقتباس


	في ذيك الليلة كنت رايق جدا وماشي على مهلي تقريبا على 160 .. الجو رايق خصوصا في الليل يصير خط الرياض متعة .. الجهاز اللي يكشف الرادار شغال .. الخط مريح .. وكل شي ولله الحمد على سنقة عشره ..

160 ومـاااشـي علـى مـهـلـك ..؟!! أنـااا وربـي مـااا أتـعـدى الـ120 لـو اقـعـد ع الـخـط يـوووميـن ....يـاااكـااافـي بس ... لااا وأحـقـد علـى اللـي يـتـجـااااوزنـي ...مـاااغيـر ابـاااري التـريـلاااات ع الـخـط ...

إقتباس


	لكن جاني صوت مهند والضحكه في عيونه يقولي وقف صادووك يافالح هذي سيارة المرور السري ..

مـااا أدري ليـه في ذااا الـمقـطـع بـالـذااات تـخـيـلت وجـه مـهـنـد

إقتباس


	في ذيك الفترة كان بالرياض حمله شرسة للمخالفين والمتهورين ..

بيـنـي وبيـنـك ... تسـتـاااهـل ... :p

إقتباس


	ما امداني اقوله عسى ماشر الا هو معطني مقفاه ويقول الحقني ..

إقتباس


	رحت للضابط نفسه وجلست اناظر فيه .. قال خير وش بعد.. قلت ابد سلامتك وقفولي تاكسي يوديني الحجز .. هالمره ابتسم لكن حسيت ان وده يطقني .. قال وشفيك زود ماتركب معهم .. قلت السياره فيها ثلاثه ومالقيت مكان .. سال واحد ثاني من المرور السري كم معك قال ثلاثه .. قاله الضابط فيه مكان قدام .. رد عليه خله يجي..

نـنـتـقـل الحـيـن للـمـشـهـد الـثـااانـي ... 3.2.1 .. اكـشــن ...

إقتباس


	وحنا ماشين على نفس الوضع ..الدرايش مصكره والسياره مكتومه وريحت الشباب بدت تطلع .. بحركه لا اراديه وانغز المكيف على اثنين .. التفت علي بحقد يقول سيارة ابوك .. قلتله ياخي انكتمنا ومابي افتح الدريشه حتى تقدر تسمع البلاغات.. عطاني ذيك النظره وكمل طريقه .. الى ان وصلنا عند وحده من الاشارات .. الاشاره خضرت واللي قدامنا مامشى .. بحركه اراديه هالمره واضرب البوري .. التفت علي وهو مفرقز عيونه باستغراب .. واضرب البوري مره ثانيه واقوله شف الحمار ما يبي يمشي .. ناظرني وهو مفرقز وانا ابتسم .. مامسك نفسه هالمره وضحك .. هو وضحك من هنا والجحلط اللي ورا فكوا ضحك وعيوا يسكتون .. من بعدها سحب على الجهاز وهاتك يا سوالف ,,

مـوقـف كـوووميـدي ... يستـحـق تصـوويـر ...

المشهد الثالث ..

جلست واقف مكاني خمس دقايق استوعب المكان .. وشد انتباهي واحد خال جثه اسود واقف مكانه بنص الصاله ولابس ثوب نوم ورافعه الين نص فخذه .. واقف يقول يا شباب انا طالع الكورنيش اللي يبي يخاوي يركب وراي ويحرك يده كانه يعشق السياره .. شوي سكت بعدين قال وشفيها هذي مهيب راضيه تشتغل .. شوي يقول ياشباب نبي فزعه احد ينتع السياره ..

ههههههههههههههههه

انا

إقتباس


	قلت ايووووووه من اولها كذا .. ماتسوى علينا يروح الشرف الليله .. رحت وجلست في ابعد مكان من هالشاب اللطيف .. انتبهت لاربعة شباب شكلهم محترمين ومرتبين وجلست اناظر فيهم .. قالوا حياك تفضل معنا .. بدون مشاوره نقزت معهم .. بعد ما تعرفت عليهم ..طلع واحد موظف في الاتصالات والثاني مدرس ابتدائي والاثنين الباقين طلاب في الكليه التقنيه وطلعوا نفس وضعي .. والله وهاتك يا سوالف وضحك ووناسه ..

بـس وش شـعـوورك وردة فـعـلـك لـو أن الـخـاااال مسـكـت مـعـه ان مـااااينـتـع المـووتـر غيـرك ... أو كـااانـت عـيـنـه طـوول الـوقـت بـعـيـنـك ... يعـنـي طـااالـب حـرش

؟؟

إقتباس


	وانا اقول في نفسي يا قاسي ولدك ملحط بالتوقيف وانت بترقد

غـيـرك كـااان ابـووه سـألـه .. هـاااه وش الـقـضـيـة هـااا المـرة ... هـذا اذا اتصـل بأبـووه وقـااالـه انـي كـاااشـت الـصـمـااان ....

إقتباس


	الساعه 4 دخل موقوف جديد .. كان صغير في السن تقريبا 17 سنه .. والولد حليوه وواقف نفس وقفتي يوم دخلت ومفجوع من المنظر .. حسيت بمعاناته وقلت للشباب خلوه يجي معنا .. قالوا اووكي بس نخاف يفهمنا غلط .. قلتلهم انا بكلمه وبالفعل جا وتعرف علينا وجلس معنا .. الولد اسمه محمد الغامدي وابوه عقيد .. ساله واحد من الشباب ابوك عقيد ليه ما يطلعلك .. قال عيوا يطلعوني .. قلت حركات تطورنا والله .. كنت بنطق بس الله سلم ..

كـنـه اووريـااا نـاااقـز الجـبـل بالـغـلـط أجـل هـاااه

جا وقت صلاة الفجر .. قمنا وتوضينا وصلينا ..والراقدين محد تجرا وصحاهم .. من ضمنهم الخال الاسود (البعبع ) شوي قام من نفسه .. قال صليتوا .. قلنا ايه .. وبدون وضوء قام وصلى الفجر ثلاث ركعات وجلس مكانه .. شوي قام يسال.. يا شباب انا فاتتني ركعه صح ..

ههههههههههههههههه الله يلعن ابليسه والله نص ساعه متسدحين ضحك ..

هههههههههههههههههههههههه

إقتباس


	واحد من الشباب اشتهى الهمبرجر وفتحه لقا وسطه علبتين دخان .. فتحنا العلب الباقيه كل علبه فيها بكتين .. الله يرجه مهند جايب دخان اكثر من الاكل ..

هـذا راااعـي تـهـريـب ...

إقتباس


	على طاري الدخان .. فيه باكستاني حاقد عليه الى الان .. مع اني لا ادخن ولا هم يحزنون .. يبيع الدخان بجميع انواعه البكت الواحد بــ 15 ريال .. يعني صافي ربحه من البكت عشر ريال ,,

فـيـه واااحـد يقـولـووون يبيـع الـدخـااان مفـرد علـى ريـاااال ... فـي أحـد مرااكـز الـتـدريب الـعـسـكـريـة ...

إقتباس


	الوالد: اذا تبي تطلع دبر نفسك .. طوط طوط

أكيـد سـويـت نفسـك قـدااام أخـويـاااك انك طـاااق حـنـك مـع الـوااالـد ولاااكـن شي صـااار ... تبي الصـدق حـلااااتـهـااا لـو يـدق عليـك واااحـد بـعـد الـطووط ذي وانت مسـوي منسـجـم

إقتباس


	[ الخلاصة ] يا شباب لحد يسرع والله السرعه مو زينه .. عني الحين اذا صرت امشي بالرياض ما اعدي الميه ابدا واذا تجاوزتها اكع الفرامل كله الين اوصل 60 .. ومع كل اللي صار ما نفع معي .. في اجازة بين الفصلين كنت راجع مع الوالده من مشوااار وللاسف قطعت اشاره وقدام الدوريه بعد بس والله العظيم ما دريت كانت السياااره مظلله على الاخر لظروف امنيه خاصه .. والله كنت انزل راسي من الدريشه حتى اشوف زين ..بس وجود الوالده معي فادني لانها هي ما انتبهت بعد للاشاره وشفعت لي عند الوالد .. حتى الشرطي اخذ الرخصه والاستماره وقال اذا تبيهم تعال المركز .. طبعا الوالده حكت السالفه للوالد اللي بدوره تفهم .. وقالي الله يطول بعمره روح خذ رخصتك واستمارتك .. قلت والله اللي مارحت للتوقيف بنفسي .. والحمدلله انحلت هالمره بدون توقيف ..

الـسـرعـة مـهـيب زيـنـة .. والـعـجلـة بـكـل أمـوور الـحـيـاااة بـعـد مـهـيب زيـنـة ... وكـل مـطروووود مـلـحـوووق ... والـسـعـة لااا بـااارك الـلـه فـي الـضـيـق ... الـسـعـــة ....

مـمـااا اسـتـفـدته مـن هـذا الـمـوضـووع ...

ان اسـمـك عـمـر ... وعـاااشـت الأسـااامـي ...

انـك اخـذت درس ومـتـوكـد انـك منتـب مـعـود مسـرع مـرتـن ثـاااانـيـة ...

دمـك خـفـيـف .. وان النـحـاااسـة فيـك مـهـيـب في مـهـنـد حـاااس انـك ظلـمـتـه ... وعلـى طـاااري مـهـنـد سلـمـلي عليـه ...

أخــوووك // دبــل كيــك ...

الهنوووف · #13 22/02/2006, 01:39 PM

إقتباس


	السلام عليكم ورحمة الله وبركاته

وعليكم السلام ورحمه الله وبركاته

إقتباس


	أسعد الله هالوجيه والخشش السفره بالخير والمسرات .. ,,

اسعد الله هالوجه السمح

إقتباس


	شاكر لكم حسن اصغائكم مع اطيب الاوقات واحلى الاماني

يؤيؤ هذي طرده من البدايه خلنا نقرا ثمن قلنا شكرا >>>>>>>> ثمن = بعدين

إقتباس


	..وانقلبت السياره وارتطمت في الحاجز الاسمنتي واصبحت جزء لا يتجزأ منه ,,

وشو من مات الله يرحمه

إقتباس


	[ المدخل الرئـــيسي]

عوائـــــــــــل

إقتباس


	في الفتره الماضيه غبت عن المجلس والشبكه عموما لظروف خاصه حتى الردود كنت مقل جدا فيها وحبيت اصافحكم بهالموضوع مصافحه بسيطه على قد الحال واعيشكم معي هالموقف امتدادا لمواقف سابقه,,

اهم شي رجعت

إقتباس


	تحذير .. اي اخطاء املائيه او نحويه في هالموضوع انا غير مسئوول عنها .. بالعربي لااحد يستقعد سمعت يا صدى ولا تهون فيو ,,

اثاريك مثلي تراني ام الاخطاء

ياخي عقولنا اكبر من اننا نبحلق بالرد مرتن ثانيه ماعندناش وقت نكتشف اخاطئنا>>>>الله من العذر

إقتباس


	تنويه.. الموضوع مسكة خط ومشواار .. يعني الضعوف حقين الدايل اب يفصلون العداد حتى ماتوصل الفاتوره الحد الائتماني .. واللي يدخل بدون مايرد جعل اصابيعه داء النقرص ,,

انا مالي شغل اذا قال شي ابوووي بوريه موضوعك وتناقش معه عاد

الحين متى بيبدا الموضوووووووع: D

إقتباس


	وانا في طريقي احط مهند في بيتهم وماشي في شارع التخصصي .. وانا في نفسي احمد الله معي مهند ولا اخذنا مخالفه والجو كان صافي وكل الامور على ما يرام .. انقطع حبل افكاري بسبب سياره صغيره من خلفي يكشح بالعالي بطريقه مزعجه جدا .. بعدت عن السايد اليسار ورحت للسايد اللي بالمنتصف وهالسياره وراي والتكشيح ماتغير .. بغيت اكع الفرامل في نص الطريق واحوس مندوبه واتلاقط معه .. لكن جاني صوت مهند والضحكه في عيونه يقولي وقف صادووك يافالح هذي سيارة المرور السري ..

سايد

وشو
يعني طريق والا مخرج

إقتباس


	انا اقول في نفسي وش هالفله اول مره اركب دوريه وقدام بعد ,,

احلى يالكشخه قدام منتب سهل اجل

إقتباس


	وحنا ماشين على نفس الوضع ..الدرايش مصكره والسياره مكتومه وريحت الشباب بدت تطلع .. بحركه لا اراديه وانغز المكيف على اثنين .. التفت علي بحقد يقول سيارة ابوك .. قلتله ياخي انكتمنا ومابي افتح الدريشه حتى تقدر تسمع البلاغات.. عطاني ذيك النظره وكمل طريقه .. الى ان وصلنا عند وحده من الاشارات .. الاشاره خضرت واللي قدامنا مامشى .. بحركه اراديه هالمره واضرب البوري .. التفت علي وهو مفرقز عيونه باستغراب .. واضرب البوري مره ثانيه واقوله شف الحمار ما يبي يمشي .. ناظرني وهو مفرقز وانا ابتسم .. مامسك نفسه هالمره وضحك .. هو وضحك من هنا والجحلط اللي ورا فكوا ضحك وعيوا يسكتون .. من بعدها سحب على الجهاز وهاتك يا سوالف ,,

فلــــــــــه اجل الله يرجك رجا مبرحاا

إقتباس


	اثناء جلوسي بالسياره وانا افكر واتخيل شكل الحجز شلون خصوصا واني اول مره ادخله .. والصوره اللي في بالي زنزانات مثل اللي في المسلسلات واقول عسى مافيها كلبشات بعد

..

عيني بعينك يالتسذووب
اول مـــــــــره اجل
اعترف مانيب معلمتن احد ;)

إقتباس


	نزلنا من السياره .. دخلنا المركز .. جا معنا عسكري دخلنا للحجز وصكر الباب من ورانا ..بصراحه تفاجئت من المكان .. كانت مثل الصاله الكبيره وغرف مفتوحه عليها من كل جهه .. والصاله مليانه .. مجموعه تلعب بلوت ومجموعه يدخنون ومجموعه يسولفون وفي كل مكان واحد منسدح ونايم .. وانت ادخل واختار المكان اللي تبيه .. جلست واقف مكاني خمس دقايق استوعب المكان .. وشد انتباهي واحد خال جثه اسود واقف مكانه بنص الصاله ولابس ثوب نوم ورافعه الين نص فخذه .. واقف يقول يا شباب انا طالع الكورنيش اللي يبي يخاوي يركب وراي ويحرك يده كانه يعشق السياره .. شوي سكت بعدين قال وشفيها هذي مهيب راضيه تشتغل .. شوي يقول ياشباب نبي فزعه احد ينتع السياره ..

يامــــــــــامي يمه يروعون بسم الله احس في ذيك اللحظه تقول في نفسك وش الله جابني فيذا الله لايعيد الرياض

إقتباس


	انا قلت ايووووووه من اولها كذا .. ماتسوى علينا يروح الشرف الليله .. رحت وجلست في ابعد مكان من هالشاب اللطيف .. انتبهت لاربعة شباب شكلهم محترمين ومرتبين وجلست اناظر فيهم .. قالوا حياك تفضل معنا .. بدون مشاوره نقزت معهم .. بعد ما تعرفت عليهم ..طلع واحد موظف في الاتصالات والثاني مدرس ابتدائي والاثنين الباقين طلاب في الكليه التقنيه وطلعوا نفس وضعي .. والله وهاتك يا سوالف وضحك ووناسه ..

سبحان الله دخلو قلبي ذا الثلاثه

>>>>>>

إقتباس


	بكتات الدخان تقدر تهربه لنا

إقتباس


	بعد نص ساعه ناداني الضابط باسمي .. رحت لقيت مهند وهو مطنقر يقول هذا اللي يبي يطلع

ياحليلهم مثل المسلسلات
يقول
محمد عندك زياره

إقتباس


	على طاري الدخان .. فيه باكستاني حاقد عليه الى الان .. مع اني لا ادخن ولا هم يحزنون .. يبيع الدخان بجميع انواعه البكت الواحد بــ 15 ريال .. يعني صافي ربحه من البكت عشر ريال ,,

علشا نه لاقي له ناس مالهم عقووول

انا من دخلت شامتن ريحتن شينه اثاريها الدخان سبحان الله

يوووووووه احسن انها قصه

الحمد لله انتهت على خير

يوه جاني النووووووووووووووووووم

يسلمو خيو على هيك حكايه بس انتبه مرتن ثانيه

كلك 9 ذوق52 · #14 22/02/2006, 02:12 PM

أضحـكـ الله ضروسكـ ، ضرسن ضرسا . . !!

عليكـ مغامــرات ولا عــدنان ولينــه . . !!

الـنـادر · #15 22/02/2006, 04:46 PM

والله قصه دراميه و فكاهيه و اكشن

<<<وش بقى من انواع الافلام يا شباب

والله انك ما تستحي بعد

تقوم ابوك من النوم في انصاف ليول و تقوله طلعني

الا وراك ما دقيت عليه اول ما مسكوك في التفتيش عشان يدبر امور

بس اللي اعجبني في قصتك

إقتباس


	على طاري الدخان .. فيه باكستاني حاقد عليه الى الان .. مع اني لا ادخن ولا هم يحزنون .. يبيع الدخان بجميع انواعه البكت الواحد بــ 15 ريال .. يعني صافي ربحه من البكت عشر ريال ,,

الا يعجبك

لا يخلي احد يدخن

و

سلام عليكم