|
محمد بن فيصل ينتقد الجمهور الهلالي ( انتقادك مردود عليه) تفاجأت صراحة بانتقاد ابو سلطان لجمهور الهلال وثناءه على جمهور العين ومصدر التفاجأ مني يوم قال ان جمهور العين كأنه جمهور اوربي يدعم ويؤازر الفريق من اول المباراة الى اخرها اولا وقبل كل شي بس بوضح اني هنا انتقد فقط والنقد ما يجي الا من المحب سواء كان النقد قاسي او لا انا اولا ببين الاسباب التي ادت الى تفوق جمهور العين على حد كلام اميرنا الشاب 1- ملعب صغير يمتلئ بسرعه اما في الرياض فالملعب كبير جدا وما امتلى الا في مرات معدوده 2- مضمار صغير عشان كذا طالع صوت الجماهير عالي بسبب قربهم من الملعب اما في الرياض فالمستطيل الاخضر بعيد جدا عن المدرجات عشان كذا الصوت يضيع والدليل شف الجمهور الانجليزي والجمهور الايطالي والفرق بينهم 3- رابطة جماهير محترفه تعرف بالضبط وش تبي من الجمهور والجمهور وش يبي منها اما في الهلال فرابطه عنيده ومتفرده بالقرار وجميع الانتقادات اللي جتها كان الرد منهم ( لا تغيير) وللمعلومية رابطة العين ما تغني مواويل واغاني عاطفيه بين الشوطين ( والسبب لانهم رابطه محترفه تعرف ان الهدف هو اثارة الجهور مهوب الرقص والطقطقه ) وشي مهم عن رابطه العين انها تغني اغاني سهله على الجمهور بحيث تكون جملها قصيره عشان تكون سهلة على الجمهور ( وللمعلومية حنا هنا في المنتدى طالبنا اكثر من مره ان اهازيجنا تتغير مع الاحتفاظ بالاهازيج السهله اللي يحبها الجمهور وتسوي العجايب في الاعبين بشرط تكون الكلمات اللي يرددها الجمهور قصيره وقويه ) غير كذا تكلمنا كثير عن ان رابطة الهلال تبدى بالاهازيج قبل المباراة بساعه او اكثر وهذا الشي يسبب تعب الجماهير قبل بداية المباراة والافضل ان الرابطه ما تبدى الا قبل المباراة بدقايق . وايضا فيه الكثير والكثير من الانتقادات للرابطه بحاول مع بعض الاعضاء حصرها في موضوع واحد للفائده ويمكن ان شاء الله تلقى ترحيب من الرابطه . 4- مجلس الجمهور العيناوي منظم جدا جدا جدا على عكس مجلس الجمهور الهلالي ( اللي ما نبخسه مجهوداته الجباره ) لكن يعاب عليه سوء التنظيم واي شخص بيروح للملعب بيلاحظ العشوائيه اللي المجلس عليها بذكر بعض الامثله الاعلام توزع بشكل عشوائي وغالبا تكون في المدرج السفلي فقط ( ليش ما توزع عند البوابات بحيث كل واحد يا خذ له علم ) ايضا عندك الرول ( انا حضرت اغلب مباريات الهلال ولم استطع ان احصل على رول واحد) والسبب ايضا العشوائيه والدليل ارجع الى مباراة اعتزال الثنيان وبتشوف ان الرول استخدم بشكل خاطئ وان اللي معهم الرول فقط في المدرج السفلي مع ان الرول يكون احلى اذا كان من المدرجات اللي فوق ايضا ارجع واقول ( ليش ما توزع عند البوابات بحيث كل واحد يا خذ له رول ) وبعدين عند الجمهور العيناوي قصاصات الاوراق الصغيره اللي طالبنا فيها كثير ووعدنا بها اكثر وفي الاخير ( ولا شي) 5- يا سمو الامير شوف وش سوت ادارة العين الاماراتي مع كل هدف من العاب ناريه وغيرها وشوف لما دخل الاعبين ارض الملعب كيف كانت الالعاب الناريه في استقبالهم وكيف اثارت الاعبين والجماهير ) سمو الامير حنا اكثر منهم عدد واكثر منهم وفاء ونادينا افضل لكن الامكانيات اللي يلقونها في الملعب ما تتوفر لنا وانا اوعدك لو تم توفير كل الاشياء اللي قلتها انا ولا غيري صدقني لا عين ولا غيره بيقدر يوقف بوجه الجمهور الهلالي ياسمو الامير الجمهور يحتاج للقياده الصحيحه سمو الامير الجمهور له متطلبات لتحفيزه على الحضور ولاثارته داخل الملعب من اول المباراة الى اخرها اتمنى ان الموضوع يوصل واتمنى ان صوتي يسمع وان كنت اخشى ان يضيع بين هذه المواضيع الكثيره اللي لا تسمن ولا تغني من جوع اتمنى ان اي احد يقرا الموضوع ما ياخذه بشكل حساس لان حنا بشر ومعرضين للخطأ والانتقاد من المحبين هو الطريق للتصحيح . خاتمه جمهور الاهلي الراقي يستطيع ادخال الشعله وقنابل الدخان للملعب وحنا في الرياض ممنوع علينا من يستطيع ان يا خذ حقنا |
غريبه هذا الكلام من ابو سلطان ملعب القطراه لا يكفي إلا لـ15الف متفرج بينما استاد الملك فهد (رحمه الله) يكفي لسبعين الف متفرج (الفرق 55الف كرسي) |
كلام يعور القلب بسم الله والله قويه في حق جماهير الزعيم عامه و خاصه إلي راحوا للعين و تعبوا أنفسهم للأسف ما أخذ بلإعتبار إن أصغر ملعب عندنا ياخذ نص أهل الإمارات. طبعاً كلنا أمس شفنا الجمهور العيناوي مشعلل و إلي جذبني كثرة الأشياء إلي يسونها من ألعاب ناريه و الأوراق والأقمشه الممتده من أعلى المدرج إلى أسفله.,اعجبني رئيس رابطة العين ماقعد أبد و بآخر المباراة مسك الشعلة. الجمهور العيناوي سوى أشياء كثيره فعلاً أحرجتنا للأسف رابطتنا كل مباراة تقول فيه مفاجأه قوية و بالنهايه طيران ولا فيه لا مفاجآت و لا يحزنون الإداره الهلاليه ممثله بأميرنا الغالي لازم توقف مع مطالب الجماهير.وتهجد أمن الملاعب إلي كل يوم قانون و كل يوم مانعين شي أخوي كاكاو الجماهير الهلاليه تحظر للإستمتاع بالزعيم و الدليل إن الموسم الماضي أول مابدى سامي يبدع بدت تمتلي المدرجات و طبعاً الفريق ككل كان ممتاز الموسم هذا الوضع في تدهور و الجمهور صار ما يتحمس يحضر للمباره ياخي يكفي إن جماهير العين تجي و تقعد على كراسي نظيفه مو على صبات و لا يتفلقون بقوارير مويه. ختاماً أنا متأكد إن أميرنا الغالي ما قال هالكلام إلا لشحن همة الجمهور الهلالي للحظور أكثر و المؤازره في هذي الفتره الحرجه. وألف شكر للجميع |
أنا أضم صوتي لصوتك ... والله معك حق بعدين المقارنة بين الجمهورين ما تكون إلا اذا كان الملعب واحد .. ملعبهم هذا ابو عشر آلاف متفرج .. لو يلعب فيه الهلال في الدوري عندنا بتلقاه كل المباريات مليااااااان وفل |
ملعب القطارهـ يـ تسع لـ 12 الف متفرج فقط............!!!! واستاد الملكـ فهد.....70الف.......!!!! تحياتي |
والله انك صادق في كل كلمة |
المقارنة بين الجمهورين ما تكون إلا اذا كان الملعب واحد .. |
والله من حق اي مشجع هلالي يزعل على مايبدر من ابوسلطان من غير المعقول اذا شفت جماهير الهلال تحضر في بعض مباريات الهلال في الرياض يطلع منك كل هذا الكلام لماذا هذه المقولة التي تقول أن جماهير العين عددهم لا يتجاوز 10 الاف مشجع لكنهم أفضل من 40 الف نشجع ساكتين من المقصود بهم اليسو نحن هل لا تفتخر بمشجعين الهلال الله يسامحك وينك أبوسلطان يوم حضرنا مباراة الهلال والنصر ولا شفناك جيت عند المدرجات وحييتنا أنا جاي من الخرج وناس جايين من الشرقية على الاقل شفت جماهير الهلال اكثر من جماهير النصر مر وحيهم أو أشكرهم على الاقل قل كلي عشم فيكم أن تكملو الحضور في المباريات القادمة بدل أن تلوم جماهير الهلال لماذا لا تلوم الاتحاد السعودي لكرة القدم بتخفيض أسعار التذاكر وتحسين الملاعب من ناحية الخدمات وأن يتم أدخال المشروبات والمأكولات من أجل الاستمتاع وأنت تشاهد المباراة هناك في أوروبا أبوسلطان وأنت تعلم ذلك يعتبرون المتفرج للمباراة كسائح يهتمون به ويوفرون كل سبل الراحة ويدخل الى الملعب المتفرج قبل المباراة بعشر دقائق فقط أو خمس دقائق ويجد مكانه شاغر لأن رقم التذكرة برقم الكرسي ليس مثل مانفعل هنا حجز أماكن من قبل الحضور كل شخص يقول المكان هذا محجوز أين النظام نحضر قبل المباريات في بعض الاحيان بساعات والشمس تضرب في وجوهنا كل هذا من أجل من لا نشرب الماء داخل الملعب ونهلك من العطش في المدرجات بسبب من الله يسامحك أبوسلطان الي يده في الماء مو مثل الي يده في النار أنت مرتاح في دكة الاحتياط تشرب وتفعل الذي تريده لكن حط نفسك في مكانا بالمدرجات ومتأكد مليون % أنك سوف تقدر أوضاعنا |
يا حبي لك تسلم والله من زمان كان ودي احد يقول مثل هذا الكلام تسلم والله |
يعني مو عاجبه العجب ول الصيام في رجب ؟؟ هذا بدال ما يشكرنا الي خاطرنا بانفسنا من الشرقيه للعين ؟؟؟ ليه يا بو سلطان لييه ؟؟ |
انا اضم صوتي لكم لكن في حاجة بغيت اقوولها ان ابو خليل الله يجزاه خير يحاول انه يتم توزيع أوراق زي اللي في مبارة النصر والهلال وغيرها مكتوب فيها اهازيج الهلال حتى يتعود عليها الجمهور ونكون بصوت رجل واحد ... معليش يابو خليل الصوت ماكن يوصل واضح للجماهير اللي الدرجة اللي فوق في استاد الملك فهد (( رحمه الله ))عشان كذا ماكان فيه تجاوب من الجمهور معك كثير المفروض انه يتم توزيع مكبرات الصوت في انحاء الملعب ويكون عند كل مكبر عضو من الرابطة يحمس الجمهور القريب منه حتى نكون بصوت رجل واحد هذا اللي حبيت اقوله ولكم كل تحياتي الــدم الازرقـ............................................................................................. ........................................... |
تسلم والله واضم صوتي معاكم...اقل شي عشان خاطر الجماهير اللي راحت !!!! |
يا شباب ترى موب معنا هذا إنقاطع المدرجات حبنا الأول و الأخير للزعيم صحيح مجروحين بس صابرين. |
لله درك يا بطـــــــــــــــــــــــــــــــــــــــــــــل كلامك والله صح والله منطقي ياعيني عليك هذا التفكـــــــــــــــــــــــــــــــــــــير تحياتي لك وعتبي على ابو سلطان مع انها غريبه شكرا |
منو العين ؟؟ ويعني أيش القطااره ماعب القطاره صغير جداَ والا ملعب الملك فهد ( أهل الإمارات كلهم ما يملونه مهو عاد العين ) الزعيم أكثر جمهور بشهادة المدرجات |
| الوقت المعتمد في المنتدى بتوقيت جرينتش +3.
الوقت الان » 01:02 PM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd