ذهب و لم يعد - نادي الهلال السعودي - شبكة الزعيم

juve1897 · #1 25/04/2007, 12:24 AM

ذهب ولم يعد

هذه قصة حقيقية في شخص لم يبلغ العاشرة من عمرة سافر للبحرين من أكثر من 15 سنه و بالتحديد في عام 1413 و لم يعد حتى و قتنا الحالي ..

هذا هو ما حدث لي في جوازات الرياض .. بعد نهايه جوازي السابق .. و طبعا أنتم عارفين الصيف قرب و السفر حان طاريه لازم الواحد يطلع جواز قبل الزحمة و يضبط وضعه مضبوط ..

فالي حدث أني قلت لازم أروح لجوازات الرياض أطلع جواز جديد .. فكلمت واحد من الشباب يوصلني للجوازات و زي ما أنتم خابرين الواحد إذا راح لازم يلبق عند الرئاسة العامة لتعليم البنات و يدقها كعابي حتى يدخل الجوازات

..

فوصلني زميلي للجوازات و نزلت من سيارته و قلت له " خلاص روح أنا برجع بتكسي علشان ما أربطك معي "

فراح بأمان الله و دخلت الجوازات و أنا معي كل الأشياء المطلوبة صورتين شخصية و الجواز القديم و صورة من بطاقة الشخصية .. دخلت و طلعت لدور الثاني لأقدم على جواز جديد .. فأخذت من الكاونتر نموذج طلب جواز و كتبت المعلومات إلي طلبوها مني .. و شافها العسكري و عطاني رقم .. في صالة BB

دخلت عندهم بالصالة و أنتظر إلين جاء دوري و جيت عند الضابط و عطيته الأوراق اللازمة و المطلوبة و بعدين صار يطقطق على الكمبيوتر

قال : أنت فلان بن فلان الفلاني ..

قلت : ايه ..

قال : متأكد

قلت : بطاقة الأحوال قدامك و لو تبي أعطيك الرخصة و أي إثباتات أخرى أنا ما عندي مانع أعطيك إياها .

قال : أنت رايح للبحرين عام 1413 و لا جيت حتى الحين

لما قالها لف مخي و لا أدري وش السالفة و بيني و بين نفسي كنت خايف الحين يقطوني بالحبس .. المهم و أرد عليه

قلت : كيف

قال : مكتوب عندي بالجهاز أنك ما جيت من البحرين من عام 1413

قلت : طيب كيف صرت قدامك الحين .. يعني أنا من ذلك التاريخ حتى يومنا هذا طلعت جواز سفر بين الجوازين .. و أيضا طلعت بطاقة أحوال .. و طلعت تصريح .. و بعدها رخصة .. و الحين مجدد الرخصة .. و مطلع استمارة سيارة باسمي و كل هالوثائق مب عاجبتك .. حتى البحرين أروح لها دائما من بعد ذلك التاريخ هذا غير أني تسدحت بالناصريه من أربع سنوات لما قطعت الإشارة و قدام الدوريه

.. << بس يمكن الحكومة أدري

قال : يمكن أنت جاي بطريقة غير شرعية

و قلت له : يعني تتوقع أني جاي أسبح من البحرين و أنا عمري وقتها 9 سنوات لو أني بطل أولمبي الحين حتى لو هو بطل أولمبي ما قدر يوصل سباحه <<< الحقيقه ما أدري أخاف إني جاي سباحة حرة ولا فراشة

قال : ما أدري ..

عاد قال لي .. أنزل تحت برى في الصندقة

.. و نزلت بالصندقة (( تقول عشة

)) الي برى الجوازات لدوامات المسائيه عند شباك الجالية التشادية <<< ما أدري ليه تذكرت الإتحاد

..

و لما نزلت عندهم هاك يا تحقيق .. و كيف إني جيت من البحرين من دون ما يدرون .. الحقيقه أبلشوني أكثر من اللزوم يعني أنا ذيك الأيام كان عمري 9 سنوات يعني بالله كيف تجي أجي بطرق غير شرعيه ..و بعد التحقيق و الشد و الجذب و الأسئله الي ما أدري وش تبي صار الواحد وده يشق ثيابة ويقول ما أبي جوازكم خلاص أنا بسافر في ربوع بلادي

و علشان يرضون أكثر بشغل أغنيه طلال مداح وطني الحبيب و طني الحبي و هل أحب سواه <<< قدييييييييييييييم :p

بعد التحقيق عطاني ورقة و قال لي روح فوق لدور الثالث إرسلها بالفاكس .. و بالصدفه حصلت واحد مهستر تقول راعي حشيش .. و جلست قام يسولف معي و قال وش جابك هنا و قلت له القصة الي صارت معي
و يقول لي ترى محاكيك له نفس القصة ..

و حنى نسولف جاء عسكري قال أنتم الأثنين جايين سوا .. رد المهتسر لا موبايلي و فاتوره بعد << أقولكم مهستر نعنبوا بليسك تمزح معهم و حنى بهالوضع :p ..

و أرسل الفاكس لمقر الجوازات الرئيسي و أستنى ساعه كاملة لين جاء لي رد منهم نزلت تحت لصندقه .. و أعطيهم الورقة و ختم لي فيها و قال تعال بكرى و قدم عادي

و أجي في اليوم الثاني و أقدم أوراقي عادي زي أي مواطن شريف ما جاء للوطن بطرق غير شرعيه

و جيت و رقيت فوق و عطيتهم أوراقي و قال تعال بكرة تستلم جوازك

و جيت في اليوم الثاني و أستلمت جوازي و هذه قصة ذهب و لم يعد من طق طق لسلام عليكم

السؤال إلي فارض نفسه كيف هذا الخطاء الفادح من إدارة حكومية كبيرة مثل الجوازات و كيف حتى الحين من ذلك التاريخ ما ضبطوا وضعهم و صححوا الخطاء و تاكدوا خاصة أن المفروض إن المعاملات الحكومية مرتبطة ببعض << ولا بس شاطرين في الإرتباط بما يخص المخالفات و غيرها لا تعليق ..

بس الحمد لله إنهم ما حملوني خطاء و احد غيري ولا كان رحت وطي .. بعدين ليش ما سألوني لما طلعت الجواز في السابق !!

و كلة كوم و كيف ما استفسروا عن هذا الخطاء من 15 سنه كوم ثاني

..على كثر المعاملات الحكوميه الي صارت من تطليع جواز لرخصة لإستمارة سيارة .. إلخ أضف الدراسه الإبتدائه و المتوسطة و الثانويه و المرحلة الجامعيه ما دروا إني موجود بالسعودية

و المشكلة لما تحاجهم بحجج قويه يقولون " تعلمنا بشغلنا

" <<< أبوك يالتصريف :p

في شيء مستغرب منه أنا من تلك الفتره رحت للبحرين عد و غلط كيف على كثر هالطلعات و الجيات ما دروا أني جاي من عام 1413 .. ولا بس متشطرين 20 ريال رايح 20 ريال جاي و 15 ريال تأمين إجباري

طبعا هذه القصة واقعية حصلت معي مع جوازات الرياض و قلت يا ولد أسدحها هنا بمنتدى الزعيم و خاصة إن القصة طريفة و غريبه في نفس الوقت ..و أخاف بكرة أروح للبحرين من جديد و أرجع و بعد خمس سنوات يقولون أنت حتى الحين ما رجعت من البحرين من عام 1428 الله يستر بس

أخيرا أقول الله يعز الحكومة

<< خاف