#1  
قديم 09/03/2006, 03:52 AM
زعيــم مميــز
تاريخ التسجيل: 26/09/2005
المكان: الرياض
مشاركات: 3,589
ذبحني الأندومي

السلام عليكم ورحمة الله وبركاته

ذبحني الأندومي

(دراما - تشويق - اندومي- واحد شاورما بدون مخلل)


في يوم غابر عاصف ليلاً... بارد شتاء....اشرقت شمس يوم جديد <<< لا تدققون على التعبير تكفون

قمت من النوم فوجدت الغمص يملى عيوني ( حتى ظننت انني اعمى )......والسعابييل تملى ارجاء الغرفه (لأني نسيت لا اسكر فمي قبل ماانام )

(راح نقلب عامي هاللحين <<< من زين الفصحى اللي فوق )

لقيت كيسة الأندومي قدامي........ايه نعم......فطوري اندومي ....وغداي اندومي .... وعشاي اندومي ....... حتى سحوري اندومي بعد.....بس اندومي بطعم الخضار <<< لاعاد تنكت تكفى
هذا الواقع اللي مااقدر اغيره.....وهو انه من خشونة اظافري والفقر ملازمني ...ماعندي مصروف شاورما بسبة الفقر الشديد .... وصرت اشوف الفقر في كل مكان.....في الثلاجه....في مخباتي... حتى انه كان يطل علي مع الدريشه .... لدرجة ان الميانه طاحت بيني وبين الفقر......حتى انه صار يسير علي كل يوم......وصار يجيب خويه "الجوع" معه..... وصرنا افضل ثلاث اخويا.........حتى جاء "العطش" علشأن يكملنا رابع ببلوت <<<< اقول ماكأنها مصخت

مسكت كيس الأندومي ...وافرغته في قدر (بكسر القاف واذا ماقدرت تكسره خل المنتشري ينبرش عليه ).....وبينما كنت مفهي والسعابييل توقطر في القدر.....طق باب الغرفه عندي.......يوم فتحته لقيت دحيم المارج ماسك كورة جمبه
ولابس بدلة رياضه ضيقه عليه...... حتى سرته قامت تويدز (تويق) علينا من تحت .....وقال: هاه يابو شطب تجي تلعب معنا كورة في الملعب (تكفى ياستاد الملك فهد اشوى انها حارة مسورة ).....قلت له: قدام بس اخلص اللي في يدي (الأندومي طبعاً ).....ويوم بلعت الأندومي....جيت ركض عند درجي....واطلع البدله حقتي الخضراء اللي مخططه بأبيض
ومكتوب على صدرها وزارة المعارف <<<< تراه مايدري ان اسم الوزارة تغير

وانزل للملعب....وسط حضور جماهيري كبير (المشكله ان الجمهور طبو في الملعب بعد)....طبيت معهم واقعد اشووت ذا الكورة يمين ويسار....انا ماادري مع من لكن اهم شي ان اجيب قوول بغض النظر عن مرمى الفريق المنافس
طبعاً نمشي على القانون الصادر من الفيفا والمصدق من عند الأتحاد السعودي اللي يقول: اخر واحد حارس

شوي الا توصل الكورة لدحيم ....وهو اللي يشوتها فوق....وكانت رايحها لمرمانا.....وانا كنت اخر واحد عند القول...قلت مابدهاش ان راح ارد الكورة....واجيك وانقز....واطلعها برجلي "دبل كيك" من حلق المرمى(طبعا نسيت اني انا الحارس).....واجيك محول على رأسي.....صحيح انه مؤلم.....لكن مايهم اهم شي اني خلصت الكورة من المرمى.....ويجون افراد فريقي ويشيلوني على الأعناق....وسط تصفير وتصفيق من عيال الحارة....والبنات المعجبات يطلطلون من درايش بيوتهم ... وقلت لهم خلاص رجعوني لغرفتي مابعد الدبل كيك شي ...... وراحو زفوني عند غرفتي ....وخلوني اريح هناك بعد ماسويت لهم الأنجاز الكبير .... من زود الوناسه نمت وانا مبتسم مثل هالأطخم >>>

صباح اليوم الثاني طق الباب .....فتحته لقيت شخص لاعبه بوجهه الثعلبه....قلت له يالحبيب فلوس ماعندي ...تبغى زكاة رح شف في اخر الشارع فيه هيئة اغاثة....كودك تلقى شي يسد حاجتك


قال: ماعرفتني؟؟؟ انا "رومان ابراموفيتش"رئيس نادي تشيلسي الأنجليزي <<< ترى هذي صورة خشتي
قلت له: الملياردير الروسي البطران ماغيره...يالله ان تحيه
قال: قل ماشاءالله <<<< ايه هين قال كذا
قلت له: بشرنا وش اخبار تشيلسي عساه طيب <<< يحسب ان تشيلسي رجال
قال: اقول لا يكثر بس....انا جاي هنا علشاني شفتك امس بالجزيرة الرياضيه وحسيت ان فيك موهبه كرويه وحبيت اعرض عليك انك تنضم للفريق...لأن فيه مبارة ديربي بين تشيلسي وارسنال ابغاك تلعبها ....هاه وش قلت
قلت له: قدام للصدام والريوس مفصول

وصلت لندن ....واخذتلي اجره وعلى ملعب تشيلسي .... في الطريق حصلت اشياء غريبه ..... لقيت كتابات على جدران
مثل Chelsea is high high and Arsenal is under my sandals ...ترجمتها : تشيلسي عالي عالي وارسنال تحت نعالي ....بصراحه شكيت قلت انا بلندن ولا بالنسيم .....واللي زاد شكي ان حصلت قبل حديقة "الهايد بارك" خيام يبيعون "حطب نص استوى" للي وده يكشت في "الهايد بارك"..... والله اني حسيت اني في حدى شيش السفانيه ....والله منتو بهينين يالسعوديين ثقافتكم وصلت لندن <<< ابد تراه مايقصد شي


دخلت الملعب.....لقيت المدرجات مليانه جمهور..... والشقر كثر التراب (بعذرهم ذا الأوربيين يلعبون زين....لاقين ذا الطخوم يستعرضون قدامهم....مهو بحنا الله يخلف علينا ....انتم جربو يالاتحاد السعودي وافتحو المدرجات للجنس الناعم....وشوفو كيف اللعب بالملعب والمدرجات )........لقيت تكارنه متجمعين في اخر المدرجات ويشجعون ارسنال ويقولون: We will eat u Piece Piece....We will eat u like Barshomy ...ترجمتها: اخاف يزعل علي ابو يعقوب

بدة المباراة .......طبعا المدرب الله يخسه حاطني احتياط (ماعندهم اكرام الضيف ثلاث ايام)......تقدم ارسنال بهدف سجله تيري هنري.....وانا قاعد احاول بالمدرب يدخلني الملعب وهو رافض .....انتهى الشوط الأول ....بدء الشوط الثاني
وانا مازلت بالأحتياط.....جاب هنري الهدف الثاني .....بعدها قفلت الأخلاق.....قلت للمدرب ياتدخلني ولا ترى ابذب البدله بوجهك .... قال المدرب: وش عنده رونالدو الغفله"قالها المدرب مستهزئاً ".... وبعد شد وجذب بيني وبين المدرب رضا هذا الأخير انه يدخلني...يوم دخلت الملعب ....تفاجأت بالحكم واقف قدامي ويمنعني من دخول الملعب!!!!

قلت للحكم: خير وش المانع!.....قال الحكم: هماك سعودي؟...قلت له: لا اندونيسي منتهيه اقامته اكييد سعودي "قالها ابو شطب مازحاً غاضباً ".......قال: وش حيثكم بالسعوديه ماتلعبون الا ثلاث اجانب......قلت له: وانت وش حارق رزك ان شاءالله نلعب بربع لاعب دورينا وبكيفنا....قال:دام الدعوة كيف اجل جب ورقة من المرور (عفوا ) ورقة من الفيفا علشأن تدخل الملعب انا الحكم هنا بكيفي.....وبعدها صار الحكم يلعب برموشه مثل هذا الأطخم>>>

وانا اطير زي البرق لسويسرا مقر الفيفا......واجيك وادخل على رئيس الفيفا بلاتر.....وارمي شماغي على مكتبه (مع اني ماكنت لابس شماغ!)....وقلت له: تكفى وترى تكفى تهز الرياجيل
قال بلاتر:خير ان شاءالله.....قلت له: ابغى ورقة من عندكم مختومه عندي مباراة مهمه الأن والحكم مانعني من اللعب....قال:الحكم صادز(صادق) لازم ورقة بس مهو كل واحد نعطيه ورقه....قلت له: يعني تبغون شهود ومزكيين ولا وش السالفه....قال: لا مايحتاج مثلك عارف ياما وياما مشينا ملفات مهي بكامله وعقود لاعبين واهداف يعني لا يخدم بخيل (ملعون بلاتر ).....قلت له: انت كم تبي بس لك مني شيك مفتوح (كله على حساب ابو ثعلبه ابراموفيتش )......يوم قلت له شيك مفتوح شفت سعابيله تقوطر على المكتب وعلى طول يطلع الورقة لا ومختومه بعد (اتوقع لو زدت المبلغ شوي كان هتكت عرض بلاتر )....اول ماخذت الورقة واحط رجلي....واسمع بلاتر يناديني: يابو شطب وين الحساب؟؟.....قلت له: الحساب يوم الحساب <<<< حركات عرابجة بوفيات النسيم

جيت طاير....وصلت الملعب وباقي دقيقه على نهاية المباراة <<< ترى حنا في عصر السرعه لا تدققون كثير
والنتيجه هدفين لهدف لصالح ارسنال.....واجيك واحذف الورقة في خشة الحكم....وانطلق واخذ الكورة....واجيك طاير متجه للمرمى.....يوم وصلت المرمى وهو ينبرش علي هنري بكبره <<< تراه مايعرف الا ذا اللاعب من ارسنال
ويصفر الحكم عن ضربة جزاء....اول ماطحت مسكت الكورة وحضنتها وقلت مايشوت البلنتي الا انا <<< ابتدائي

قلت هذي فرصتي اني ادخل بوابة العالميه.....اجيب هدف تعادل لفريقي من اول لمسه.....ولا وش الفرق بيني وبين بيكهام اساساً.....بس نفرق بالشكل اكيد ....طبعاً الطخامه لصالحي <<< يارجال يحلفون ان رونالدينهو اطخم منك
يوم جيت ابسدد البلنتي احترت....ماادري اشوت يمين او يسار....بس قررت في النهايه اني اشوت وسط....اضمن انها اذا ماجت قوول فأنها راح تصفق خشة الحارس....يعني كسبان في النهايه

واجيك واشوووت الكورة


طااااااااااااااااااااااااااااااخ



نكمل القصه

طاااااااااااااااااااااااااخ






شوي الا اشوف الأندومي منتثر في كل مكان بالغرفه .....والقدر مصقوع في الجدار ومنكسر ....واصابع رجلي متورمه وتصب دم.....اتضح اني شت القدر بدل الكورة
يعني كل السالفه اللي فوق طلعت حلم يقظه ......يعني مافيه لا شهره ولا فلوس......مافيه الا اندومي .....لا منتثر بعد

اااااااااه يالأندومي.....ذبحتني يالأندومي



theـنهايه



مايمكن لطشه من القصه الداجه:

- الأندومي اثبت انه افضل وجبه للعزاب....... لا بريال بعد

-نطالب وبشده فتح المدرجات عندنا للجنس الناعم.....مع الأخذ بالعلم توسيع مدرجات الهلال <<< بينجلد

-ترى فيه رادار في طريق العليا قبل الدائري الشمالي....والمرور صيد بالعالم.....لاتقولون ابو شطب ماقالنا


(منقول)
اضافة رد مع اقتباس
  #2  
قديم 09/03/2006, 04:09 AM
موقوف
تاريخ التسجيل: 18/10/2004
المكان: أورانس,, حيث الأمان
مشاركات: 2,727
ههههههههههههههههههههههههههههههه

الله يقلع شياطينك ....

ذلحين بعد ماجرجرتني و هبلت بي.. جاي تقول لي .. منقول..

ياخي فرحت ان عندنا واحد يكتب ادب ساخر .. طلع لاطش الموضوع ...

بس ع العموم حلوه .. زي هذيييييك اللي في بداية المدرج ...
<اخوك من المطالبين بفتح المدرجات للنساء والولاده اقصد والمواليد ...
علشان اللاعب ماينشغل باله على اهله . اذا بكاء الورع رمى عليه ماء ...

سلام,,,
اضافة رد مع اقتباس
  #3  
قديم 09/03/2006, 04:48 AM
زعيــم مميــز
تاريخ التسجيل: 26/09/2005
المكان: الرياض
مشاركات: 3,589
شرايك بس تعبت وانا انقل هههههههههههههههههههههههههههههههه
الادب حقي شوي شوي بيجي مع كثر النقل ان شاء الله
ومشكور عالرد
اضافة رد مع اقتباس
  #4  
قديم 09/03/2006, 06:26 AM
الصورة الرمزية الخاصة بـ عريب عبدالله
إشراقة المجلس العام
تاريخ التسجيل: 13/10/2004
المكان: الرياض
مشاركات: 3,979
هههههههههههههههههههههه
أنت عسل موتني ضحك
أنا ما أواطن ريحة الأندومي
ياحرام كيف عايش عليه
ترى الجبن أرحم
أن شاء الله تصير لاعب محترف لكن نصيحه لاتقرب نادي الرياض
ما عندهم الا الطفره وياخذون منك ما يعطونك
روح ريال مدريد يبون حارس بدال كزيلاس وأنت مؤهل
بأكلمهم لك أبشر
بالحب والإشراق
اضافة رد مع اقتباس
  #5  
قديم 10/03/2006, 02:25 PM
زعيــم فعــال
تاريخ التسجيل: 31/10/2005
المكان: في مدفع الارسنال
مشاركات: 328
تسلم أخوي
لاكن الارسنال عالي عاليي وباقي الفرق تحت نعالي
أما عن فتح المدرجات للنساء (( جعلي أموت قبل اليوم هذا اللي تفتح المدرجات للنساء )) وان شاء الله ما راح تفتح لأنها لوفتحت راح تخرب الدنيا زياده
اضافة رد مع اقتباس
  #6  
قديم 10/03/2006, 06:29 PM
زعيــم مميــز
تاريخ التسجيل: 26/09/2005
المكان: الرياض
مشاركات: 3,589
مشكورين على مروركم
وااتشرف بكم بما ان هذا اول موضوع اكتبه
والجاي اكثر ان شاء الله
اضافة رد مع اقتباس
  #7  
قديم 10/03/2006, 07:03 PM
الصورة الرمزية الخاصة بـ أول العنقود
زعيــم مميــز
تاريخ التسجيل: 29/04/2005
المكان: ســـــواح ...!!
مشاركات: 2,868
هع هع هع هع ...إلخ

كيفي هلالي !!

تعال صك فمي ميت من الضحك


بس ياليت تحط المباراة في آسيا و تروح لابن همام تعطيه الفلوس
اضافة رد مع اقتباس
  #8  
قديم 13/03/2006, 09:20 PM
زعيــم مميــز
تاريخ التسجيل: 26/09/2005
المكان: الرياض
مشاركات: 3,589
مشكور لمرورك أخوي أول العنقود
وأتمنى أن الموضوع نال إعجابكم
اضافة رد مع اقتباس
  #9  
قديم 15/03/2006, 01:44 AM
زعيــم مميــز
تاريخ التسجيل: 23/10/2005
المكان: ღبَحْر الٍهَوًٍىٍآღ
مشاركات: 4,063
خخخخخخخخخخخخخخخخخخخخخخخ
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 12:10 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube