ماذا قال سامي لنواف في غرفة العلاج الطبيعي؟
 

السلام عليكم ورحمة الله وبركاته ...
مساء الخير لكل الهلاليين الغاليين ... :) .....

طبعاً لم أكن معهم ولستُ أعلم الغيب فأنا في القصيم وهم في الرياض ولكنني تخيلت ما دار بينهم من حوار... وترجمته بهذه الكلمات ..
------------------------------:) اللقـــــــاء -----------------------------------

بعد عودة نواف من فرنسا إلى أرض الوطن سليماً معافا وبعد أن من الله عليه بالعافية بعد العملية التي أجراهافي الرباط الصليبي .... تواجد في النادي لكي يكمل مراحلة العلاج الأخيرة .... وتصادف وجوده مع وجود الكابتن الرائع والخلوق السام جداً سامي ..... التقيا عند مدخل مركز العلاج الطبيعي في النادي وعندما رأيا بعضهما بعد كل هذه المدة تعانق عناقاً حاراً أحس منه كل من شهد اللقاء أنهم أخوة التقيا بعد عناء طويل وبحث مضي .... حتى أن من كان موجوداً وقتها في النادي ورأى ذلك العناق صفق لهم كثيراً وهو يوقول في داخل نفسه الكبــــــار كبــــار ... (الله لا يحرمنا منكم ومن شوفتكم ).. بعد أن انتهى العناق دار بينهما هذا الحوار الخيالي طبعاً ....


-----------------------:) الحـــــــــوار -------------------------------------

سامي :: الحمد لله على سلامتك يابو بندر ..... ما تشوف شر انشاء الله .... أخبار الإصابة انشاء الله احسن :) ..

نواف :: الحمد لله والله يسلمك يابو عبد الله كل شيء تمام والإصابة زالت انشاء الله وانا في مراحل التقوية الحين ..

سامي :: الحمد لله والله فقدناك يالغالي كن لك سنين عنا ... النادي والمنتخب تحس أن فيه نقص كبير والله انك فقيدة ....

نواف :: جعلك ما تفقد غالي يابو عبد الله تسلم والله .... وهذا من طيبك .

سامي :: يالله شد حيلك نبيك تشارك معنا في كأس العالم انشاء الله ترانا بإذن الله نبي نتأهل .... وتبي تكون أنت مشارك معنا ...

نواف :: انشاء الله وانا الحين مواظب على العلاج الطبيعي ويبي لي شهرين على الرجوع وانشاء الله أكون معكم ..

نواف :: الا واش اخبار المنتخب الحين بعد المدرب سلوبودان؟ ..تمام ؟

سامي :: والله يابو بندر المشكلة ماهي في المدرب وبس المشكلة أكبر من هذا

نواف :: خير انشاء الله واش السالفة ؟ :( تراك روعتني .

سامي :: لا لا لا لا تخاف بس أقول ان المدرب هذا اسلوبه وهذا لعبه ... لكن حنا الحين نواجه حرب من الإعلام ومن الجماهير ومن كل مكان ... يبونا نفوز في كل مباراة مهما كانت .. وإذا حصل إخفاق مهما كان بسيط ...يالله غيروا المدرب واللاعبين واخصائي العلاج والمترجم ومدير الكرة والباص حق اللاعبين !!!! شيء يقهر بصراحة ..

نواف :: والله انك صادق .... مشكلتنا أن الصحفيين أو بعضهم ما يعرف إلا ينتقد بس وانتقاد ماهو في محله بس يبي اللي يوافق هواه ورغباته حتى لو كان تغيير كل اللاعبين .. وهذي المشكلة من زمان ...ولو أن اللي مثلهم يوقف عند حده كان شفت شيء ثاني وما تمادوا بهالكلام حتى أنهم صاروا يقولونه كل يوم وكل وقت وكل مناسبة .... وانا اتوقع أن بعضهم يتمنى خسارة المنتخب علشان يكون كلامه وتوقعاته صحيحة عند الجمهور والناس والمسئولين ويقول هذا اللي انا حذرتكم منه حصل ..

سامي :: تصدق يابو بندر فيه قناة تلفزيونية انت تعرفها زين متخصصة بالرياضة وبالهجوم علي انا بالذات من دون كل اللاعبين مع اني ما اتذكر اني سببت لأي واحد منهم أذى والا جرحته بكلمة .... يتعمدون يتركون المتصلين من المملكة واللي ما يبون اسم سامي الجابر في المنتخب ... يتعمدون يتركونهم يقولون اللي يبون ....
وما عندهم استعداد يقفلون الخط أو يقولون ولو كلمة حق يسئلون عنها يوم القيامة .. انا واش سويت للمنتخب علشان اعامل بهذي الطريقة . ليش؟ :(

نواف :: ما عليك منهم يابو عبد الله ... وهذا وانا اخوك من الكره اللي اعماهم عن شوف الحق .. والتعصب اللي يعيشون فيه تراه هو السبب ... وما يزيدك كلامهم والله الا حب من جمهورك ومنا حنا اللاعبين ولا يهمونك .:)

سامي :: هم ما هموني بقدر ما سببوا الم لأني والله مليت من هالأسلوب ... من يوم عرفت الهلال وبرزت معه في بطولات الناشئين وانا اواجه هالهجوم من كل مكان حتى من اللي كنت اتوقع منهم العقل الرزانه صاروا هم اللي يهاجمني اول .. وصاروا يفتخرون باللي يقولون عني في الجرايد .... مليت والله مليت منهم ومن الكورة ومن الرياضة كلها ..

نواف :: لا لا تقول هالكلام أنت مقدارك عند جمهورك جمهور الهلال والباقين ما عليك منهم .. والمثل يقول ( القافلة تسير والكلاب تنبح ) ... وحنا وانا اخوك معك وعون لك ووجودك في الملعب له طعم وله ثقل ويشعرنا بالراحة ويشعر الجمهور الهلالي بالنشوة وانا الفوز يمكن يتحقق في أي وقت :) لا يهمونك بس..

سامي :: المشكلة أن بعض جمهور الهلال صار الحين يصدق كلامهم :( وصار يقول مثل مايقولون .

نواف :: هذولا ما يسمون هلاليين هذولا تلقاهم وقت البطولة والفرح بس أما غيره تلقى لهم فرق ثانية ولا يهمونك مثلهم مثل غيرهم .:)

سامي :: تصدق أن بعض الجماهير في مباراة البحرين يسب ويشتم لما نزلت الملعب
وكثيرين والله اسمعهم واقول في نفسي انا ودي ادري واش سويت لهم علشان اواجه كل هالسب والشتم .... يكفي اني العب وابوي في المستشفى ... جسمي في الملعب وعقلي وتفكيري معه في المستشفى .... ما فيه ناس تقدر ؟ ما فيه ناس تحس اني اعاني منهم ومن كلامهم الجارح ؟ ليش ؟ كل هذا لأني هلالي ؟ كل هذا لأن واحد قال لهم أن سامي يلعب بالواسطة ؟ طيب كل هالمدربين اللي مروا على الهلال والمنتخب يعرفوني علشان يلبعوني بالواسطة ؟ كل هالبطولات اللي حسمتها للنادي وللمنتخب بالواسطة ؟ ما ابغى اتكلم عن نفسي وعن الأهداف اللي سجلت وصنعت للمنتخب علشان يتأهل 94و98 لكأس العالم والأهداف اللي سجلتها بكأس العالم وكل هذا واسطة او اني ما اعرف العب ولا اصلح اكون رأس حربة :( والله انه شيء يقهر بصراحة .

نواف :: كل الكلام اللي قلته انا اعرفه واشهد عليه .. وانا قلت لك قبل انهم ما يهاجمونك علشان مستواك فهم اول الناس اللي يدرون انك لاعب ممتاز وكبير والدليل على كلامي انهم قبل مباراياتنا معهم ولما تكون انت خارج التشكيلة لأي سبب من الأسباب اصابة او غيرها تلقاهم يتباشرون انك ماراح تلعب المباراة ولما تلعب تلقى مدربهم يبني خطته على وجودك وعليك انت اذا قدروا يوقفونك خلاص يعتبرهم قدموا مستوى ممتاز وما اعتقد انك نسيت المرشد والداوود بها السرعة :) .

سامي :: انا الحمد لله عندي ثقة بنفسي وبامكاناتي بس يضايقني الهجوم علي وانا مع المنتخب ... خلني ارجع للهلال ويومها يقولون اللي يبون انا ارد عليهم بالملعب ... حتى يوم كنت في انجلترا صحافتهم ما تركوني يدورون علي أي سقطه ويكبرونها حتى لو لعبت ممتاز بس ما سجلت قالوا انه ما سجل بس ولا يقولون انه لعب ممتاز ..

نواف :: ما عليك منهم ولا يهمونك وخلنا في المنتخب والتأهل لكأس العالم وابيك ترد عليهم بالملعب . :) .

سامي :: ابشر والله وانا ابسوي كل ما اقدر انا واخواني اللاعبين والمدرب وانشاء الله نتأهل بس الله يفكنا من بعض الجماهير اللي تبي تكحلها عمتها ولو يجلسون في بيوتهم كان احسن .

نواف :: الا انت واش عندك في غرفة العلاج عسى ما شر ؟

سامي :: لا ابد شد خفيف في العضلة ومادام عندنا اجازة ثلاثة ايام قلت استغل الفرصة واجي لغرفة العلاج :) .

نواف :: ما تشوف شر انشاء الله .:)

سامي :: ما يجيك الشر انشاء الله وشد حيلك انت بعد ترى الموسم طويل والمشاركات كثيرة .:)

نواف :: الله يعين :)

سامي :: يالله مع السلامة يابو بندر وخل نسمع صوتك لو بالتلفون .

نواف :: مع السلامة ابو عبد الله ولا توصي حريص انا معكم اول بأول ..

------------------------------------------------------------------------------:)

*** لاعب النجمة الجديد عيسى ابو قدعة ُأحسُ أن الهلال بحاجة لمثل هذا اللاعب ووجوده مع فريق مثل النجمة لن يفيده .. كما انه لاعب صغير في السن ولم يكلف النجمة الا 80الف ريال فقط وهو مراوغ وهداف ... فلو فاوضت ادراة الهلال النجمة عنه وطلبته منهم فلا اعتقد انهم سيرفضون اذا كان المبلغ مغري ... كما ان ادراة الهلال سبق ان تنازلت للنجمة عن مبلغ مليون ريال قيمة انتقال بدر ابانمي للنجمة والتي حددت من قبل لجنة الإحتراف ...

كما انا ادراة النصر بعد ان سجل فيها هذا اللاعب هدفين رائعين بعد ان راوغ المدافعين والحارس ومن ثم اتبعهم بالداوود تفكر فيه جدياً ولكن لا اعتقد ان النجمة ستتنازل عنه لهم لأن النصراويين لم يحسنوا الأدب معهم وعاملوهم بكبر وفوقيه ..

فهل تحقق ادارة الهلال هذه الأمنية فلن تندم ابداً بإذن الله ويدعم قولي هذا الهدف الثالث للنجمة في مرمى الأنصار من نفس اللاعب فهو موهوب حقيقة ....

*** آسف على الإطالة ...

هلا هلا هلا بالسيناريست هلا بالمخرج هلا بالكاتب المبدع :)

عزيزي سيناريو اللي يقرأه بدون المقدمه يتوقع انه فعلا هو اللي حدث وان الكلام هذا هو اللي دار بين سام 6 وشيخ الصاغه , ,,,

اخوي شاهين , شدني رد سامي هذا :

وانا ودي اقول لأبوعبدالله ان هالقناه ولولا هالطريقه لما استمرت حتى يومنا هذا , نعم هم اختارو الطريق الاسهل للشهره واختارو الاسلوب اللي يوصلهم لهدفهم ( المادي البحت ) بكل خبث وبكل لؤم !!!

انا اعرف زملاء اشتركو في هذه القناه والسبب هو انهم يريدون ان يتابعو هذه الاتصالات ( المضحكه ) والتي تتفوق على احسن المسرحيات الفكاهيه ,,
وايضا يرغبون في رؤية شلة المركاز وهي تبدع في كل ماهو خبيث وسيء ,,


ايضا ياغالي ابي اقول لأبو عبدالله ان كل اللي يحصل له امور مبرره وإذا لم يتعرض لها هو فمن هو المؤهل للتعرض لها , الكل يرغب في الشهره , والشهره طريقها النجوم , وانت المع واكبر واهم النجوم فلا تلومهم إذا رأيتهم يتشبثون بك فأنت ذهب وأنت مصدر الشهره , فلا تبخل عليهم من كرمك ,,,

اخوي الحمد لله على عودة نواف بالسلامه وان شاء الله نشوفه في اقرب وقت والاهم انه مايستعجل على العوده ونحن سننتظر لقياه بكل الحب ,,,

تحياتي لك ,,,
العوّاااام ,,,

يا حبايب....ياقصمان
 

عيني عليك بارده أخوي ماشاء الله عليك والله ثم والله لقد تأملت فيك قول العرب الحكمة ضالة المؤمن <----------(واحد على باله):cool: بس بيني وبينك الله يهني هالمنتدى قلي ليش؟!!قلت لي ليش!!والله أقولها بكل صراحه كاتب مثلك يعتبر غنيمه......والله العظيم بالله الكريم إني ما اجامل فعلاً أخذت كل مشاعري وأحاسيسي وأنا أقرء المقال الذي(الرومانسي) بين(911)11نواف 9وسامي........................واطلب منك طلب نريد تكرر مثل هالمقال بس يكون عن قمرهم حبيبنا نور عيوننا تاج رؤسناالكابتن الأسطوره الرياضيه الخالده/ سامي عبدالله الجابر.
*سلب عقلي قولوا مين؟أقول سامي... :cool: :D

يعطيك العافيه
اخوك عزوز

موضوع رائع وفكر جميل وخيال خصب تحسد عليه (اللهم لاحسد) .....


شاهين انت تستحق الاحترام فعلا على هذه المواضيع الجميله ....

ولكن احب ان اوضح لك نقطه مهمه .....ابوعبدالله اكبر من ان ينظر لهده القناه وايصدر منها او لتلك الفئه المسكينه من الجماهير واكبر من ان يشغلوا باله ....وشكرا

هلا اخوي
 

مشكور على هالحوار اللي وانا اقراه حسيت انه حقيقه

الله يعطيك العافيه على هالخيال الخصب.

رااااااااااااااائع

ابدعت يا شاهين و كأنك دخلت جوا احاسيس سامي
صراحه ... لاتعليق ... كفيت و وفيت


تحياتي ,

موضوعك رااااااائع وصياغتك للحديث اروع ومشكور

أخوي SHAHEEN
 

تصدق ما بقي إلا يوسف شاهين يخرج هالسيناريو وأسم الفيلم لقاء العمالقة:D
يعطيك ألف عافية متى جلست معهم ( واحد يحسبه صدق ):D :D

تسلم يمينك اخوي شاهين ...

وكان اللقاء تم ما شاء الله عليك ...

ياليت بس الناس المتعصبين ينظرون لهذه الكلمات

كي يحسوا ...

((سامي :: تصدق أن بعض الجماهير في مباراة البحرين يسب ويشتم لما نزلت الملعب
وكثيرين والله اسمعهم واقول في نفسي انا ودي ادري واش سويت لهم علشان اواجه كل هالسب والشتم .... يكفي اني العب وابوي في المستشفى ... جسمي في الملعب وعقلي وتفكيري معه في المستشفى .... ما فيه ناس تقدر ؟ ما فيه ناس تحس اني اعاني منهم ومن كلامهم الجارح ؟ ليش ؟ كل هذا لأني هلالي ؟ ))

ياليت بس يفكرون فيها مجرد التفكير

وكل الشكر لك اخي شاهين ...

هلا والله بالجار
يعطيك العافية أخوي شاهين
كتبت وأبدعت
أتوقع ما بقى شي بقلب الذيب ما قلته

هلا أخوي شاهين
يعطيك آلف آلف آلف عافية على ها الحوار اللي صراحة( ما هي بصراحة بعض الناس) قريته وأعتقدت أنه فعلاً دار بين سامي ونواف ، أما القناة أياها فلا تلومهم فاقع مرارتهم سامي والزعيم ويبون أي شئ يسيء لسامي والزعيم ولكن خلهم في حالهم وأدعوا لهم بالشفاء .
ويعطيك آلف عافية مرة آخرى أخوي شاهين على هالحوار وسلامتك.

:o بقدر ما انا مبسوط من الرد والحوار اللي كتبته يا اخ شاهين

:( الا ان فيه حاجه مكدرة خاطري

لكن ودي اقول ادعوا لوالد سامي بالشفء العاجل

يالله انك تشفيه وتقومه بالسلامة

هو وجميع المسلمين

قولوا امين

وانا بصراحه كل مادخلت على موضوع فيه كلام عن سامي بالمنتدى

تبادر الى ذهني والده (الله يقومه بالسلامة ويشفيه )

وعذرا على الاطاله

والسلام

الله يعطيك العافيه

صراااااااحة كن الكلام اللى قلته صار حقيقة

وودي الذيب والذهبي يجتمعون مرة ثانية في اي مبارة على شان نشوف الطقطقة

واللعب الصح(ماهوب بربسة نور والغامدي);) :mad:

شكرا لكم جميعاً ..
 

**الذيب الازرق ... شكرا لك ...
وسيجتمعون قريباً بإذن الله تعالى وسترى منهم العجب :) ..

**majroah2001 ... الله يعطيك العافية ... وجزاك الله خير .. والله يشفي والدنا والد الجميع ويمده بالصحة والعافية والسلامة .. زوما قصرت اخي الكريم ..

**الزعيم 2000... الله يعافيك انشاء الله ومشكور على هالكلام الرائع ...
والله يشفيهم والا يفكنا منهم ..

**راعي المحبة... هلا بك ولي الشرف بجوارك والإبداع نتعلمه منكم ... :)

**صدى الامس... وتسلم يمينك والله يعافيك .... وهذا مجرد حوار خيالي ... ومشكور على المداخلة التي اتشرف بها حقيقة منك ومن كل هلالي .:)

** جاكم الذيب ... الله يعافيك وبالنسبة ليوسف شاهين طماع قال اذا كان فيها نواف وسامي نزود المبلغ شوي قلت ما عليه يستاهلون . هههههههه..

** صمام الامان ... انت والله الرائع لك مني كل الشكر ..:)

** Hilali From Canada .... شكرا لك وصراحة احرجتني بهذا الكلام الذي لا استحقه والروعة انتم اهلها ونحن نستمدها منكم ... :) شكرا لعى مداخلتك ..

**ارفع راسك انت هلالي... الله يعافيك والشكر
لك انت اخي الكريم على تواصلك مع الموضوع ..

** المتميز.... شكرا لك اخي الغالي ... وهو كما قلت ولكن كثر الضرب يفل الحديد وسامي بشر والبشر له حد معين من الصبر ولا بد ان ينفد مهما كانت قوة الشخص ومقدرته على الصبر ..:)

** 3azoz ... الله يعافيك :)

**غوار.... ليس لدي رد على كل كلمة قلتها الا انني لا استحقها ولكن لكرمك ولسموا اخلاقك قلتها فلك مني كل الشكر والغنية الحقيقية وجودكم معنا في هذا المنتدى :) ..

** العوام ..... وجود شخص مثلك ومثل الأخوة الكرام الباقين في موضوعي حقيقة يزيدني شرف ومكانة .... فلا تبخلوا علي بالتوجيه .... لك مني كل التقدير اخي العوام
:) .