السلام عليكم ورحمة الله وبركاته

هلا بكم أصدقاني الهلاليين ..

بعد غياب إجباري أعود إليكم <== قسم موب محبوس

..

..

..

موضوع خفيف ظريف ولطيف

موضوع عن الزعامة اللي كل من هب ودب صار زعيم ..

عن الألقاب الهلالية المسلوبة عيني عينك

قالوا عالمي .. قلنا معليش ..

قالوا نادي وطن .. قلنا نمشيها موب مشكلة ..

قالوا قلعة الكؤوس .. قلنا مافيه مشاكل كلو يمشي


عالمي من بطولة آسيوية وحدة صادفت أول بطولة لكأس العالم .. ولقبوا بهاللقب

بينما الهلال ونجومه يواصلون تحقيق أرقام عالمية ومع ذلك يسلب منه اللقب

سامي سفير .. ويشارك مع نجوم العالم ..

الهلال يحتل مراكز متقدمة عالميا حسب التصنيف العالمي .. ويأخذ نادي القرن الآسيوي

نجومه هم من أكثر اللاعبين حصولا على الجوائز القارية ..

موب فريق انتهى من عشر سنوات

وزي ماقالت كوكب الشرق ... العالمية فين وأنت فين زالمها ليه دايم معاك يانصر



نادي وطن ..

نادي الوطن هو من يحقق أكبر عدد من البطولات الخارجية

هو من يشرف الوطن خارجيا بلعب وأخلاق ..

هو من يمد المنتخب بالنجوم .. ولم يكتفي باللاعبين فقط .. بل للمدرب والطاقم الطبي واللياقي ..

نادي الوطن هو اللي يقدم لاعبين يلعبون لأجل الوطن وليس لأجل المادة ..



قلعة الكؤوس ..

والله شبك حمام موب قلعة .. وين الكؤوس اللي تتكلمون عنها ؟؟

بصراحة الزعيم وبس .. وإمبراطورية الكؤوس وقلعته هو الزعيم ولا غيره




الألقاب هذي ما أطالب فيها .. بالعكس من حق أي فريق يلقب فريقه بلقب يعجبه

وعمر الزعيم مالقب نفسه بلقب فريق ثاني حتى لو كان الفريق الثاني مايستحقه ...


لكن ..


اللي فقع راسي وأقلق مشاعري <==== ....

هو لقب الزعيم اللي كل الفرق صارت تخاشر الزعيم فيه ...


فريق تايلندي يلقب بزعيم الزعماء الزعيميين

يجيك فريق مدري من وين يسمي نفسه أزعم أبو شي

فريق صومالي يسمي نفسه زعيم زعيم آسيا ومن يعز عليه


يعني حاجة تخليك تمسك بطنك من الضحك .. وين ياناس .. ستوب ستوب نشرب سنتوب


والزعامة تقشير بصل كل من بغاها اخذها ؟؟



أنا من المتابعين لقناة الكأس القطرية ...

وفيه شريط الرسائل ... وخذ من الرسايل اللي تاخذ العقل


رسايل من عيناويين .. ورسايل من اتحاديين ونصراويين ومدري من ومن ..

حتى فيه جماهير من الوحدات الأردني صارت تسمي فريقها الزعيم



هزلت ثم هزلت فاهتزلت

آخر زمن .. صدق اللي اختشوا ماتوا



6 بطولات آسيوية وخذ لك مشكل بطولات مافيه بطولة دخلها الزعيم الا ذاقها ..

الزعيم هو من يملك قاعدة جماهيرية من وجهة نظري انها الأولى وليست الثالثة آسيويا

وبالأخير يقولون زعيم ومدري وش


اللي يضحك بنادي العين ان رصيده بطولتين خارجيتين وحدة منهن اسيوية

والوحدات مادري وش يبي بالضبط ..

والنصر بصراحة ماودي أقول شي اللي فيهم كافيهم لو أشوف نصراوي عطيته ريال من كثر مارحمهم

الاتحاديين أقول لهم اذا وصلتوا بطولات الهلال حلال عليكم اللقب



لا زعيم الا الهلال ... واتركوا عنكم لقب منتم كفو يصير لكم




بالنسبة لمباراة الهلال الآسيوية أمام العين الإماراتي ..

أتمنى من الجماهير الهلالية مساندة الزعيم في مباراة الرياض ... اللي هي مباراة الأياب

نبي الملعب يكون مليان .. الزعيم يستاهل حضورنا ..

واذا نبي البطولة لازم نكون يد وحدة لاعبين وجماهير ..

وحنا اللي نقدر عليه حضورنا للملعب ..


ياشباب انا ينرفزني مثلي مثل اي هلالي كلام فريق يمس زعامة الهلال أو تسيده لآسيا ...

وأشوف كلامهم في منتدياتهم وفي الرسائل على القنوات شي يرفع الضغط ..

ومايسكتهم ويسب افواههم الا حضورنا القوي داخل الملعب وفي المدرجات ..

أبي من هالحين كل الجماهير في جميع مناطق المملكة تحضر نفسها لمباراة الاياب ...

تكفون لعيون الهلال وابوسلطان .. نبي حضوركم


تحياتي لكم .. أبو ساري

ولي عودة ..