بسم الله الرحمن الرحيم


استغربت مثل مااستغرب اكثر من حظر مباراة امس او من تابعها في التلفزيون الحظور الجماهيري الاقل من المتوسط

وصراحة انا وصلت المغرب توقعت اني ماراح القى مكان الا ورى الباب

ولكن جيت ولقيت الاماكن اكثرها فاضية


وصراحة ضاق صدري على ابو سلطان لاني حاس انه راح يطلع عن اللي بداخلة تجاه الحظور الجماهيري في يوم من الايام

وماخاب ظني وكلنا شفنا ابو سلطان وشلون كان متنرفز بعد المباراة وكذلك الموضوع اللي كتبة في شبكة الزعيم

وشبكة الهلال

المهم ماعلينا نرجع لسالفة حظور مباراة امس

صراحة لو تقعد تفكر شوي طلعت بعدة اسباب لقلة الحظور الجماهيري في كل المباريات وليس مباراة امس فقط

وخلونا نتذكر ابرزها
اولا : وجود القنوات الفضائية اللي تغنيك عن الحظور وزيادة مثلا انا حظرت المباراة وشفت الاعادة اليوم على الاي ار تي كانت صراحة مباراة ثانية يعني فرق السما عن الارض

ثانيا : ابتعاد اكثر الشباب من سن ( 15 - 24) عن تشجيع النوادي السعودية واذا كان يشجع تلقاه يشجع ( بالاسم ) فقط يعني تراني انا هلالي بالاسم او نصراوي بالاسم ولو سالتة عن تشيكلة الفريق الاساسية ماذكر لك الا سامي والدعيع والشلهوب والتهائهم باشياء ثانية مثل ( الدوران ) و( السربتة ) في هالشوراع او اقامة المعسكرات في ( المقاهي )او الهث ورى بنات خلق الله او اما ستار اكاديمي وسوبر ستار وصار اخر همهم كرة القدم

ثالثا : وجود بعض من يسمون انفسهم عاشقي برشلونة والريال والارسنال ويقعد يبلش مخك رونالدينو سو وزيدان فعل وانتوا ودوريكم هالخايس وهلالكم الفاشل ولو تسالة عن ترتيب فريقة المفضل في الدوري تغير لون وجهه والله يخلي البلوتوث اللي عرفهم بهالفرق ولا هم وين والكورة وين

رابعا : عدم وجود المواصلات خاصة للفئات السنية اللي مابعد استلموا سيارات فلذلك تلقاهم يجون بليموزين رايح جاي غير تذاكر الدخول غير العشا فلذلك تلقاهم يفضلون مشاهدتها في التلفزيون

خامسا : غلاء التذاكر وسوء الخدمات في الملعب فالاسعار ( مدبله ) والموية ( حارة ) والبيبسي ( غسال بيبسي ) ومافيه الا بيسي موية ساندويتش جبن اي خدمات واي بطيخ

سادسا : رجال الامن والسكيورتية اللي في الملعب اللي تشوف خشته كنه شام ريحة ( فطيس ) ويقعد يكلمك بطرف خشمة ويرفع صوته وينافخ على ايش ياسعادة اللواء


سابعا : انشغال اغلب من عمرة فوق (25 -- مالا نهاية ) في الاسهم وفي معارض السيارات وفي اشغالهم الاخرى يعني قليل تلقى الحين ناس فاضية ولا ننسى موظفين الدوام المسائي وغيرهم


ثامنا : عدم وجود شاشات في الملعب تشتغل على طول وماادري ليش ( مانين ) علينا بشاشتهم هالخايسة وليش مايشغلونها طول المباراة

وبعد هذا كله اشوف ان حظور امس كان معقول وجيد واما اللي يحظرون المباريات النهائية فاتوقع انهم في ذاك الوقت يقدمون المباراة على اشغالهم اما في المباريات الاقل اهمية يقدمون اشغالهم على المباراة

وبالنسبة لابو سلطان انت ياابو سلطان ماقصرت معنا ومع الهلال اعطيتنا كل شئ وبخل عليك بعض جمهور الهلال بالحظور الى الملعب ولكن هذا هو الواقع ياابو سلطان وعلينا ان نرضى به الجمهور تغير ورجعته صعبه

وبعد هذا كله اقول للجمهور اللي حظر امس


يعطيكم العافية على حظوركم والله يبيض وجيهكم

معليش شباب عندي سؤال محيرني

مدافعين الوحدة يوم هدف سامي الثاني وين كانوا رايحين له ؟؟؟؟

مع احترامتى لارئيك بس الحضور الجماهيري سئ فقط في اكبر مدينة بالسعودية وهي الرياض لاكن اذا كان مبارة الهلال خارج ارضة فأن الوضع مختلف تمام
واكبر دليل لكلامي سوف تشاهدة في مبارة الهلال والوحدة القادمة
وشكراً

وانا اوافقك الرأي اخوي

صـــــــــــــــــــــــــــــــــــــــــــــــــــــــــــــــــــــــــدقــــــــــــــــــــــــ ــــــــــــــــــــــــــــــــــت

مشكور على موضوعك الرائع والى الامام دائما يافهوووووووو

لصراحه كلام سليم 100%

كلام سليم

والله اني صدمت يوم شفت هالعدد
صراحه ابو سلطان يستاهل الي يحضر كل المباريات عشانه
والله الرجال قدم الغالي والنفيس عشان هذا الكيان وارضاء هذا الجمهور
يعني انا بسأل الان هم راضين على زعل ابو سلطان وابتعاده عن الحضور مع الفريق

واتمنى من ابو سلطان يعذرنا هالمره ونوعده بأننا بنبيض وجهه
بس لايبتعد عن الفريق فليس لنا غنا عنه وهو بطولتنا الاغلى
وشكراً

يعطيكم العافية شباب على مروركم

[QUOTE=FhOoOoO][SIZE="5"][COLOR="DarkSlateBlue"][COLOR="Purple"]بسم الله الرحمن الرحيم سادسا : رجال الامن والسكيورتية اللي في الملعب اللي تشوف خشته كنه شام ريحة ( فطيس ) ويقعد يكلمك بطرف خشمة ويرفع صوته وينافخ على ايش ياسعادة اللواء [

انت ياابو سلطان ماقصرت معنا ومع الهلال اعطيتنا كل شئ وبخل عليك بعض جمهور الهلال بالحظور الى الملعب

آآآآآآآآآآآآآآآآآآآآآآآآآآآآآآآآآآآآآآآآآآه والله ماقهرني الا زعلة ابو سلطان
ليييييييي كذا ياجمهور الهلال
قلتوا نبي ياسر جابه لكم
قلتوا نبي لاعب عالمي جابه لكم
قلتوا نبي ونبي وماقصر حقق اللي تبون
وهو يبي الحضور فالملعب وتبخلون عليه بساعة ونص والله عيييييييييييييييييييييب
ارجوا ان المباريات القادمه نكون كلنا متواجدين

الله يسامحكم الا زعل الغالي

J @ M @ L

رحيم المنشاوي

شكرا لكم على مروركم