"مكالمة في ليلة العيد :

@ ألو
# هلا
@ كيف الحال
# الله يسلمك
@ وش مسوي ؟ كيف الأهل ؟ وش الجديد ؟
# أبد والله جديدنا القديم ما من جديد ! أنت وش عندك ؟! وش بتسوي باكر ؟!
@ أبد والله تخبرنا ما لنا و للذبح حنا بس ننتظر بالبيت و نأكل !
# يعني محفول مكفول !
@ الرازق في السماء و الحاسد بالأرض !
# ما قلنا شيء ! بس نقول ناس و ناس !
@ من معك ؟ أسمع صوت !
# معي ( أبو ريمان ) تسلم عليه ؟ يسمعك !
@ هلا ( ابو ريمان ) !
# هلا بك !
@ تصدق من شفناك أول مرة و تعرفنا فيها على بعض معد شفناك ؟!
# العذر و السموحة ! القصور مني و لا ( العنا ) ما يقصر و دايم يوصل سلامك ، وافي والله و ما يجي قصور ! بس عساه يوصل السلام لك ؟!
@ والله يوصله بالجملة ! خبرك ما عليه شرهة !! قلنا بنعايدكم بس !
# يا عسى عمرك طويل و عساك كل عام بألف خير .
@ تأمرون شيء ؟!
# ما يأمر عليك عدو .
@ في أمان الله .
# في أمان الله .
مكالمة يوم العيد :
@ ألو !
# نعم ( العنا ) أنا مشغول ! في شي ؟!
@ لا بس بغيت أقول لك ( فلان ) مات !!
# ؟!؟!؟!؟!؟!؟!؟!؟! مين ؟ كيف ؟ وشلون ؟ متى ؟ وش القصة ؟
@ أمس بعد ما كلمنا من البيت طلع يجيب ثياب العيد و ....
# وش فيك ؟ اذكر الله ! كمل ! أقول وينك فيه ؟ بالبيت ! أنا جايك !
من كلام البيت :
@ ما لبس ثيابه ! جابها جديدة و ما لبسها !! أمه حيييل تعبانة ! صار له حادث شين بطريق الملك فهد !! توي أدري ما صليت عليه ! ما علموني ؟!


تعيدنا ما فكرنا بناس تعيدوا بالمستشفيات !
تعيدنا ما فكرنا بأيتام تعيدوا بين جدران دورهم !
تعيدنا ما فكرنا بناس كانوا يتلقون العزاء بيوم العيد !
تعيدنا ما فكرنا بناس حرمهم ضيق العيش يتعيدون مع الناس !
اللهم لك الحمد كما ينبغي لجلا وجهك و عظيم سلطانك ..
يا رب لا تؤاخذنا بظلمنا لأنفسنا و تقصيرنا !"