نادي الهلال السعودي - شبكة الزعيم - الموقع الرسمي - صغير السن ولكن (قـدها وقـدود) .. تـصـمـيـم ..

رائع واختيارك للابيات اروع واسمح لى بكتابه كامل القصيده

أنا ربتني الدنيا على جزل العطا والجود***ونفسي للوفا والطيب وفعل الخير جزامه
وأعارض منهج الهابط وأوافق للصعود صعود***وأسيّر نفسي بعقلي مدام النفس هدامه
ولا تثّر بي البسمة ولا كحل العيون السود***ولا يقوى على قلبي صغير الحسد وأجسامه
أردّ الجود بأمثاله وأقابل بالجحود جحود***وترى لا خير في رجلٍ يوطّي للردى هامه
وعندي مع أهل العِليا مواثيق وثلاث عهود***أوفي له مطاليبه وأودّه وأرفع أعلامه
أعايش مركب الدنيا على متن القدر مولود***أبعرف هو صحيح إنّ القدر بالناس دوّامه ؟
ومن وين الزمن مقبل وإلى وين الليال تقود***ومن في هالزمن يقدر يوجّه خطوة أقدامه
ومن له بالزمن غاية ومن عنده هدف منشود***ومن منّا قدر يعرف خفايا مقبل أيامه ؟
عرفت إنّ الشقا باقي ، عرفت إنّ الحسد موجود***عرفت إنّ القدر يفرض علينا بأسوأ أحكامه
لقينا بالعرب حاسد وشفنا بالعرب محسود***وبه ناسٍ لنا ضامت ، وبه بالناس منظامه
وينقص بعضنا خوّه وينقصنا وفاء وعود***مدام الحسد باقي وبعض الناس نمامه
ولا ترجى بها الدنيا من ربوعك يجيك اسنود***ولا تشره على رجلٍ عيونه خانت أقدامه
وقابل خطوة بخطوة وجازي بالصدود صدود***تناسى غلطة الصاحب عليك بلحظة اخصامه
ولا تخطي ترى لصبر الحليم اليا سلاك حدود***تروّى واعرف بضرب الحديد تفكك لحامه
تجنب كسرة الخاطر ولو حبل الزعل مشدود***تراك بكسرة الخاطر حكمت القلب بعدامه
ولا تزعل على رجلٍ بذل لك ولرضاك جهود***ولا تامن من الحاسد رضاه ورفعة ابهامه
نبي نصبر على الدنيا قلوبٍ بالحياة زهود***مدام إنّ البخت عيّت توّفق رمعة سهامه
وأنا ما قلتها راجي ولا أطلب بعدها مردود***ولكن الفتى ودّه يحقق جملة أحلامه
وبمشي لآخر الدنيا ولو كلّ الأنام اقعود***وعن وجه الزمن بكشف حقيقه وأرفع الثامه
صحيح إني صغير السن ولكن قدها وقدود***وأنا عندي مع الدنيا مواقف ترفع الهامه
طموحي يملي العالم ولابه للطموح قيود***مدام إن الأمل طبعي ( عرين وصرت ضرغامه )
خلقنا الله من ترابه ولأحضان التراب نعود***تحت رمل الثرى نبقى تغطي جسمنا خامه
سلفنا ما لحقناهم تحت قاع التراب رقود***ولا يبقي من الميت سوى ذكراه وعظامه
ولو طال العمر فاني وترى عمر الفتى محدود***وكلٍ يطلب المولى يبيحه يحسن ختامه
وأنا بلّغت بلساني وربي والأنام شهود***وصحف البيّنة جفّت وعنها رفعت أقلامه