مع الخيل ياشقراء على الدبك = على الله وبالله خير ياطير

ورى الشبك مايظهر ورى الشبك = مؤبد وحكمه حكم تعزير

ليا رافقك يومين حاربك = معاصير توميبه معاصير

ولو غاب عنك ايام عاتبك= ولاتندهش من شيٍ يصير

تسحب به الحرمه وسحبك = وهو عنده انه سالم الزير

لياصاحبت حرمتك صاحبك = ولو زعلوها عقله يطير

وتوجعك طلعاته ويتعبك = تقارير تصدرله تقارير

ولا تقربه وحذر يناسبك = ولو جاب لك وزنه دنانير

نصيحه ترى النكبه بينكبك = وخله يولي مامنه خير

ولايخدعك شكله ويعجبك = ترى فيه من جنسه مشاهير

تبي تكشفه خله يخاطبك = من اول حديثه يعكس السير