مساكم أو صبحكم الله بالخير ( كل واحد يختار اللي تناسبه)
بصراحه لي أكثر من سنة وتسع شهور ما شاركت ولا تابعت المنتدى (مرحبا بك يا alhawey 11.آخر زيارة لك كانت في » 01/03/2004)
وما أدري هو من حقي اني أطب عليكم كذا على طول وبدون مقدمات؟؟
ظروف أشغلتني جداا وأخذت وقتي وتفكيري كله وطلّعت براسي الشيب :::::::::> بس جاز لي الشيب أحس انه معطي جو لخشتي
المهم عن التميلح والكلام الفاضي
اللي يشوفني وانا جالس اكتب
ما يقول ان الهم وضيقة الصدر مصلحين لي حصار مع كل جهه
بس يــــــــــــــالله لك الحمد كل ما لها الامور وتزين والدليل اني رجعت أخربط عليكم بالمنتدى
أبدخل بالموضوع على طول
بس قبل لاأدخل تذكرت سالفة ما أدري هي صارت بوقت الصحابة أو التابعين أو تابع التابعين أو هاليومين ، المهم انها صارت، وهي قصة طويله بس ابعطيكم المقطع الأخير منها.....واللي يلقى صعوبه في فهم بعض الكلمات أو الجمل يقرأ المكتوب بين القوسين...
يقولون هذي وحده(يعني مره = امرأه) خيّروها بين قتل زوجها و أبنائها أو قتل اخيها
...الله يكفينا الشر...
عاد المرأه هذي اختارت انهم يقتلون الزوج والابناء
يوم(عندما) سألوها ليش قالت ان الزوج والابناء يمكن تعويضهم(قصدها انه من الممكن ان تتزوج مره أخرى وتنجب بزران) لكن الاخ لايمكن تعويضه
ترى قضت القصة ، و أدري اني ساقط بالسواليف
لكن هذا يحدث بسبب انقطاعي الطويل وضعف لياقتي ، لكن اللي أبيه من هالسويلفه( سالفه صغيره) ان المرأه عرفت ان تختار الاختيار السليم...
ياجماعة مافيه أغلى من الأخ و
الاخت مهما حصل بينهم من تباعد ومهما كانت الأسرة مفككه تبقى العلاقة بين الاخوان كبيره جدا ولها مردود عاطفي رائع عند المرأة وعند الرجل قد لانحس به الا عند المواقف الصعبة أو بعد مرور فترة من الزمن....( معليش تحمّلوني مره أتكلم بالعاميه ومره أتفلسف بالفصحى
)
أما ليش أنا ركزت على الاخت؟؟ فالسبب عندي بسيط جدا وعبارة عن جزئين ، الاول اني ابتكلم عن تجربتي والثاني وهو باختصار انه للأسف الشديد 80% من الشباب أوالرجال(ويمكن فئة الشباب أكثر) ما يجلسون مع خواتهم ولايتكلمون معهم الا باحدى الكلمات التاليه:
السلام عليكم...وين أمي... أبوي جا...حطي غداي...جيبي لي ماء...تبون(تبغون= تريدون) شي...اسألي امي بكم تبون خبز...من اللي يبي يودّيكم...متى أجيكم...معكم الكروكي حق القصر(متعقد من العروس
)...شغّلي مكيف غرفتي...وين الجريده.......الخ من الاسئله و الاوامر اللي ما لها سنع...
يجلس مع اخته ويسولف
فهذا نادر جدا ، أو يروح معها يتمشى بالسوق ويشتري لها شي لو بمائة ريال ( الحريم ما يملئ عينهن شي بأقل من مائة
)
فهذا لايمكن ، أويتعشى معها بمطعم راقي ولا فيه قلة حيا
فهذا مستحيل ...
وما ينطبق على الأخت ينطبق على الأم مع الفارق ان الأم لها تقديرها واحترامها أكثر من الاخت...
أبرجع للسبب الأول ، لي اخت شقيقه أعيش معها في بيت واحد لا أعرف عنها الا انها اختي الاصغر مني سنا و التي تجيب على أسألتي وتنفذ أوامري ، ومن خلال ظروف سفري معها للخارج بغرض العلاج استطعت خلال شهرين أن أعرف معنى علاقة الاخ بأخته ، وعرفت اني كنت مقصرا جدا معها...
في أول الأيام التي قضيتها معها اكتشفت ان اختي( التي نادرا ما أجلس معها ونادرا ما تتحدث معي) لديها الكثير لتقوله لي ، فقط كانت بانتظار أن أعطيها الفرصة، ومع مرور الأيام وصعوبة الظروف التي واجهتنا ازدادت معرفتي بأختي وأصبحنا نقضي الوقت الطويل بدون ملل ، فالحديث معها في مشاكلنا العائلية الخاصة أو في الامور التي تعاني منها أو في الامور التي تخصني كان حديثا رائعا خرجنا منه بحلول كثيره ، والحديث معها في شتى المواضيع الاخرى جعلني أطّلع على ثقافتها العاليه في الكثير من المجالات( وأنا قبل كنت أقول بنفسي ودي اجلس معها بس وش أسولف فيه!!) حتى اني كنت أسولف معها بالسياسه لساعات...
يمكن بعضنا يستحي انه يتكلم عن تجربته مع أهله
لكن صدقوني ما عرفت واجبي تجاه اختي ولا عرفت بساطة وجمال العلاقة اللي بيننا الا من خلال هالتجربه ، وانا انقلها لكم بشكل بسيط ومختصر وكل اللي أتمناه ان كل واحد منا سواء ذكر أو أنثى يسأل نفسه لماذا نعيش غرباء عن بعض ونحن اخوة في بيت واحد؟!! (وانا هنا اتكلم عن الاغلبيه حسب المجتمع اللي أعيشه)...
أما السؤال اللي أتمنى مشاركتكم بالاجابة عليه ، من يتحمل مشكلة انعزال الاخوة عن بعضهم؟؟الأخ...أم الأخت...أم الوالدين
منوّل( يعني في السابق) كنت استحي أقول لأختي أي كلمة تبيّن لها مكانتها عندي ولو كانت عاديه جدا ولا تسألوني عن السبب ، الحين ياكثر ما تقول اختي " الله يعافيك كلفت عليك يا خيّي(تصغير اخوي)" بسرعه أقول " أفا عليك بس..والله ماعندي أغلى منك الا أمي"..
معليش يمكن الموضوع مهوب(ليس) مرتب لكن عذري معي;)
تحياتي للجميع
والتحية والاشواق خاصة لكل من مر عليه اسم alhawey 11
وتذكره
بس يوم تذكرت ان خويي مدرّس قلت يمكن انه غلطان يحسبنا نسولف عن طلاّبه؟! لأني أشوف ان العكس هو الصحيح (يحترمونك + يحبونك) وذا لقيت مجتمع بهالصفات تأكد انك راح ترتاح نفسيا وعاطفيا ::::::>قووويه عاطفيا ذي
الوضع العادي
