ام ترثي ابنها(نواف) الذي توفي في حادث سياره
رحمه الله واسكنه فسيح جناته



يالله يامنزل تبارك والاعراف
………………………يافارج الضيقه عزيز الجلالي
تجبر عزا قلبي على فقد نواف
………………………وتمدني بالصبر لفراق غالي
جاني خبر نواف معدوم الاوصاف
………………………يوم الربوع وقلت عزي لحالي
اصغر اخوانه جا يخبر بما شاف
……………………… والدمع من العين على الخد سالي
بعد العشا قلبي من الهم ينلاف
………………………والموقف اللي صار فوق احتمالي
قلت اخبروني عل ماصابه خلاف
………………………قالوا بسرعه لو سمحتي تعالي
نشدت وينه قالوا انه بالاسعاف
………………………ويمكن لشوفه مايجيلك مجالي
ويوم فجعوني صار بالقلب خفخاف
………………………اركض وصاب العقل مثل الهبالي
ورحت لحبيب القلب والدمع ذراف
………………………وحلو النبا له صورة في خيالي
لقيت نور العين ملحوف بلحاف
………………………واللي هناك يقدمون العزا لي
ويوم الخميس محمل فوق الاكتاف
………………………للمقبره شالوه جمع الرجالي
ولولاي اخاف الله لاعدي بمشراف
………………………واني لاشق الجيب مماجرى لي
لكن عساه بجنت الخلد ينشاف
………………………ويغفر له المعبود منش الخيالي



ابيات تحزن