ســــــــالوفتين تعجبـــــــــــــــكم - نادي الهلال السعودي - شبكة الزعيم

العنـا · #1 07/12/2005, 02:56 AM

سلامن عليكموووووووووووو ايها الرفاق والرفيقات والاصحاب والصاحبات والخلان والخليلات

>>>>>> أها عاد وش خليلاته

عندي لكم سالوفتين وباختصرهم عشان فيني النوم لاني توي قايم :p مو هم يقولون الزود مثل النقص

قبل كم يوم كنا في مجلس وقص علينا واحد من الشياب قصتين حلوتن جدن وقررت ان اقصها لكم يارجال ولكن يانساء وبيني وبينكم ترى ابو ريمان الغثيث كان معنا والله يا هو سال اسئله يحلفون ان الشايب داخ وبعد ماطلع ريحه الشايب الضعيف قعد ينتقد القصه الاولى بس الثانيه ما قال فيها ولا شي ولا انتقاده وحده >>>>>>>>> اموت في اللغه انا من يومني صغير وهم يسموني سيبويه الصغير
تبون تعرف السبب ليه ما انتقدها ولا نص ولا ربع انتقاده السبب موجود قبل الغمزه الاولى في القصه الثانيه ;)

خلونا نخش في السالوفه الاولى قبل لا امل واهون

كان فيه شخصن ما اسمه المهادي شيخ في قبيلته وكان رايح مع ربع له ما ادري وين خلو ابو ريمان يعلمكم انا ما اهتم بالتفاصيل الغير مفيده >>>>> الا والله ناسي احفظ اللي يعجبني بس

بعدين مرو جنب ناس من سبيع وشاف المهادي وحده وحده والله ياهي وحده >>>>>>> يقاله شايفها الحين المهم المهادي وقع في الحب

يقولون هم سلبته

المهم المهادي صرف ربعه قالهم روحو وبالحقكم >>>>> اي هين صفقني وفكر المهادي بطريقه توصله للبنت الموووووووووت المهم قرر يسوي فيها مريض بالصرع وتجيه نوبات تشنج وكلما شاف له واحد توقع انه بيساعده سوى فيها ان الحاله جته وقام يتشنج عشان يختبر هالرجال

وبعدين طاح في واحد اسمه مفرج السبيعي كان هو الوحيد اللي تحمل المهادي ومعه تشنجاته وقرر المهادي يصارحه فلحقه وقاله شف انا ماني مريض ولا شي المساله وما فيها كذا وكذا

مفرج طلب منه وصف البنت وعلى عرض عرفها بسرعه بس ما علم المهادي وقال له مشينا للبيت >>>>>> نصاب ما فيه بيوت امرح عندي والصباح رباح ولما وصلوا لضيافه مفرج نادى مفرج بنت ولما جت وشافت الرجال الغريب اللي هو المهادي رجعت وسال مفرج المهادي هذي هي البنت؟ قال المهادي عز الله انها ذي :sad: قاله مفرج عينت خير امرح وباكر يصير خير ومن باكر راح مفرج وقال لابوه السالفه واتفقوا يزوجونه بعد ما عرفو انه شيخ في قبيلته خاصه ان ابو مفرج هو شيخ القبيله وتزوجها المهادي >>>> اي يلحق ربعه قلت لكم اي هين وبعدين دخل عليها المهادي وشافها ضايقن صدرها قال يمكن دلع بنات

وبدا يتسولف معها ويلطف الجو ويحكي لها انه شيخ مهب عادي شوي الا البنت صارت تبكي ويوم شاف دموعها المهادي قال والله ان ورى هالدموع سالفه مير اعرفها قالت له مفرج ولد عمي وانا يتيمه وعمي رباني وكنت مخطوبه لمفرج اللي احبه حتى جيت انت

وينتخي المهادي ويقول سواها مفرج والله انك حرام علي حرمه امي علي

>>>>>> وناسه

مدري ليه بغيت اطب على الشايب يوم قالها وبعدين صار ينوم بمكان وهي بمكان وبعد كم يوم قال لمفرج خويه انا رايح لاهلي اضبط الامور >>>> معه حرمتين وخايف يتصفق وخلو البنت عندكم حتى اعود وابي معي واحد من الصبيان ولا عليك امر قال مفرج ابشر وراح المهادي ومعه الصبي ويوم ابعد ارسل الصبي وقاله قل لمفرج ان بنت عمك طالق ويوم درى مفرج سال بنت عمه وعلمته بالسالفه وتزوجها وعاش معها

وبعد فتره تغير الحال على قوم مفرج وشانت احوالهم وفكر مفرج يلفي على المهادي وكان عنده ثلاث عيال طبعا رحب به المهادي اللي كان عنده حرمتين وحده عندها ولد واحد ووحده عندها بنات وقال للي عندها ولد واحد روحي عند جارتك ولا تاخذين شي غير ملابسك اللي عليك >>>> ولا بعد

المهم قبل ما تروح مره المهادي ام الولد قالت لمره مفرج ولدي يطلع من الفجر للصيد ولا يرجع الا بعد ما انوم ويجي ينوم جنبي فان دخل عليك لا ترتاعين قالت مره مفرج خير وجا الولد وشاف مره مفرج نايمه يحسبها امه ونام جنبها وجا مفرج ولقى رجال جنب حرمته وضربه ومات

قامت مره مفرج وقالت لمفرج السالفه وقال مفرج مصيبتي صارت مصيبتين

وراح للمهادي وقاله بيت شعر >>>> كلمت ابو ريمان خذته منه ام اني باحفظه اي طيب يقول البيت
سريت منك اول الليل مسرور مسرور وعودت مجرم ميس من حياتي حياتي >>>> الكلمه الاخيره مو من البيت بس عدتها زي الرجاجيل :p قال المهادي عين خير وش السالفه وعلمه مفرج :sad: قال المهادي حرص حرمتك لا تقول شي وتعال معي وخذو الولد ورموه في ملعب الصبيان ويوم اصبحو من ذبح ولد المهادي من ذبح ولد المهادي وكتم المهادي ومفرج الخبر وساقو ربع المهادي سبعميه ناقه فديه عطى المهادي ام الولد ميه ومن عطى الباقي

عطاها مفرج وقاله خلها مع حلالي لا يشكون الناس في الموضوع

المهم مشت الايام وجت بنت المهادي وقالت له ولد مفرج يتحرش فيني قال ابوها المهادي ابعدي عنه ولا تغدين لحالك >>>> يمديكم على تغدين

واربع سنوات والمهادي صابر بعدها قالت البنت ان لحقك ياابوي بعرضك شي لا تلومني

وكان المهادي يلعب كل يوم مع مفرج ام تسع مدري وش اسمها في وقتهم قال الشايب الاسم بس ضيعته من كثر النوم :p المهم اللعبه كلما حركو حصاه قال اللي يحركها ارحلو ولا رحلنا وذاك اليوم المهادي كان يقول ارحل يا قصيري ولا رحلنا فهمها مفرج وشاور حرمته وقالت له انت كل سنه تقول للمهادي بروح ويرفض اذا اصبحت قله وبتعرف وش يقصد

وفعلا يوم اصبحو قال مفرج للمهادي ودنا نمشي فقال المهادي ودنا بجلستكم بس بكيفكم

تاكد مفرج ان الموضوع وراه سالفه وغادر هو وعياله ويوم غربت الشمس ترك عياله وعود على خويه متخفي وسمعه يقول قصيده طوييييييييله يتحسر فيها على روحه مفرج فهم منها مفرج ان فيه احد من طرفه مضايق بنت المهادي واستنتج مفرج انها الصغيره لانها احلاهم >>>> والله وناسه ما يتغطون من اول وعود على عياله وجلس يسولف معهم ويسحبهم

قالهم لو كنت مكانكم وفي شبابكم ما فوت بنت المهادي ذيك الزينه قال الكبير والله يابوي ما نقصنا شر بس سوايا ابوها منعتنا وقال اللي تحته نفس الكلام والصغير قال لابوه لو قعدنا يابوي زود يومين كان ماتركت البنت

ويلقط مفرج السيف ويقطع راس الولد ويحطه في خرج الناقه>>>> لا يجيني بزر يسال عن الخرج وشو ولا يحسبه منطقه الخرج هذا الكيس

اللي يحملون فيه على البعير ويرسل واحد من عياله الثانين للمهادي براس ولده الصغير ولحقه المهادي ورجعه وعاشوا بسلام

السالوفه الثانيه

واحد اسمه بداح العنقري ;) كان ابوه راعي خير مقرقش مكشكش >>>>>> وانا اقول بعض الناس وين يجيبون الفلوس منه

المهم كانو البدو لما تجدب الارض يجون ابو بداح وياخذون منه ولما تجي الامطار والخيور يرجعون له اللي ياخذون عاد بفايده بدون ربا مهب ربا الله واعلم ما احط بذمتي شي

بس المفروض ان بعض الناس يتاكدون لا تصير فلوسهم حرام المهم كان ابو بداح لما تجي الامطار يروح للبدو ياخذ حلاله ومنها يطلع ويتفرج ولما كبر بداح شوي صار يروح مع ابوه ولما كانوا عند ناس شاف بداح بنت داخ عندها بغى يرقمها ما قدر

>>>> كووووووووول ابو ريمان المهم قال لابوه ابيها قال ابوه يصير خير راحو لشيخ القبيله لانها كانت بنته قال شيخ القبيله انا متعهد لها انها توافق بنفسها على زوجها وتقدم لها كثير من فرسان القبيله ورفضت وما جبرتها >>>> احس انه نصاب بس يبي يصرف بداح وابوه وشاورها ورفضت وقالت خيال الحضر زين تصفيح عشان بداح حضري وتقصد ان الحضر مهب زي البدو يعني خكاريه

يعني شكل بس ولا فروسيه وشجاعه ما عندك احد خرطي ابو ريمان الجد كان يرقم بكروت او بلاتووووث :p المهم رجع ابو بداح وولده وتعب بداح لان البنت سلبته وصار بداح الفارس اللي كل يوم يطلع ويروح ويجي ويصيد ما يبعد عن البيت ويوم صوب طير مرتن من المرارير وطاح الطير وكان يتالم ويتاوه انبطح :p بداح جنبه وصار يون مثله ويقول فيما معناه انك يا طير كسير وانا مثلك كسير ويوم شاف ابو بداح ولده على هالحال قاله يا ولدي خذ خيمتك ورح يم عرب الشيخ فلان واقعد حولهم تشم الهوا اللي تشمه البنت وتشوفها بين وقت ووقت تسلي نفسك >>>> ماعلينا شرهه

وفي يومن من الايام غزت وحده من القبايل قبيله البنت وخذو الحلال وراحو فرسان القبيله يبون يستردون حلالهم وصارو ما عندك احد بعذر البنت لو ما بغت تتزوج منهم يوم رجعو وشافهم شيخ القبيله قال اللي بيرجع الحلال له بنتي

كروها ثانيه >>>>>> صكه بلوت صارت ومن جد ما عندك احد

رجعو ما قدرو وقتها ركب بداح الخيل وخذ سيفه ورمحه وصارو البنات يتهزون فيه ويقولون اللي ما قدرو عليه الفرسان بتقدر عليه انت يالحضري ولحالك

سفهم بداح >>>> اللي يشوفني يقول قاعد معهم وراح وتبع الاثر ولما اظلم الليل وبالحيله اوهم القبيله السارقه انه ما هو لحاله وانهم كثير وباغتهم وشق صفهم وقالهم هذا واحد من فرسانا اذا ما تركتو الحلال ومشيتو بنهجم كلنا وهو ما في غيره >>> ليتهم خلوه كان تتغير السالوفه ونضحك شوي او يموت ويصير ما فيه ابو ريمان :p المهم خافو وتركو الحلال ورجع بداح بالحلال وقال قصيده باحطها لكم لانها عندي ويقول الشايب ان البنت بعد ما سمعت القصيده اهدت نفسها على بداح بس بداح المغرور :p رفضها مثل مارفضته من قبل

الله لحـد يـا مـا غـزينـا وجينـا

ويامـا ركبنـا حاميـات المشاويـح

ويامـا علـى أكـوارهـم اعتلينــا

ويامـا ركبناهن عصيـرن مراويـح

ويامـا تعـاطـت بالهنـادي يدينـا

ويامـا تقاسمنـا حـلال المصاليـح

وراك تزهـد ياريـش العيـن فينـا

تقـول خيال الحضر زيـن تصفيـح

الطيـب مـا هـو بـس للظاعنينـا

مقسمـن بيـن الوجيـه المفـاليـح

البـدو واللـي بـالقـرى نازلينــا

كلـن عطـاه الله من هبَّـة الريـح

يـوم الفضـول بحلتـك شـارعينـا

بالشلف ينحونـك سـوات الزنانيـح

يوم انجمر رمحي خذيـت السنينـا

وادعيت عنك الخيل صـمّ مدابيـح

هيـا عطينـا الحـق هيـا عطينـا

وإن مـا عطيتينـاه والله لا صيـح

أصيح صيحـة مـن غدالـه جنينـا

وإلا خلوجن ضيعوهـا السراريـح

يا عود ريحانـن بعـرض البطينـا

ومنين ما هب الهوا فاح لـه ريـح

لا خـوخ لا رمـان ولا هو بتينـا

مشمـش البصـرة ولا بالتـفافيـح

وخـدن كما قرطاستـن في يمينـا

وعيـون نجـل للمشقـا ذوابيــح

صخـف بلطـف بـانهـزاع بلينـا

يا غصن موزن هزعه ناسم الريـح

انت والله ما يستحي جدك

اللي عنده سؤال بالله عالخاص بس خاص ابو ريمان

مع السلامه :p