10/08/2001, 09:27 PM
|
| زعيــم فعــال | | تاريخ التسجيل: 12/04/2001
مشاركات: 307
| |
فضيحتي في الامارات ... اهداء للأخ/ j.a.j مع فائق الاحترام.
ملاحظه هامه جدا : هذه القصه حقيقه ولكني اضفت عليها بعض الاشياء
لزيادة الحبكه الكوميديه واتمنى ان أكون وفقت في ذلك :
في يوم من الايام وقبل عيد الاضحى بأيام قليله كنت جالس أنا وبعض
الاصدقاء ( اخويا السفر) وكنا قاعدين نرتب لروحه (خته) في العيد عشان
نوسع صدورنا فيها . المهم اتفقت أنا واثنين من العيال على السفريه
لكن اختلفنا على المكان او الديره اللي بنذلف لها . فينا اللي يبي
القاهره وفينا اللي يبي الشام وفينا اللي يبي دبي لكن استخرنا وقلنا
دبي... دبي . مافيه مشكله خصوصا ان الاجازه قصيره ودبي فيها اللي
يسد اللزوم.
اتفقنا على القطه وكانت 1500 ريال على كل واحد شامله كل شي ماعدا
العربده كلن يعربد من كيسه الله لا يهينه ونسيت اقول ان اخونا ابوثامر
الله يطول عمره تكفل بالسياره وهي كابريس 2000 ماشاء الله تبارك الله .
يوم الرحله كان 8/12/1421 الساعه 6 مساء ودزينا وتعرفون اخوكم
مسيك طاره ومجود الدريكسون ولاعن ابو جد الكابريس والاخ / ابو ثامر
داق والديها نومه ولاهوب داري وين شرقي.........؟؟؟
أما خوينا الثالث زياد (ابو صالح) فهو من يوم مشينا من الرياض الى
دبي وجواله في اذنه مافصل ابن الحلال (مسوي حبيب وراعي غزل)وأنا والله
العظيم اني داري ان كل خوياته طقاقات من هاللي في العروس لكن ماودي
اعكر مزاجه واخليه يزعل مني.
واصلت السواقه الين دبي وكانت الساعه 4 الفجر وبعد ما تشاورنا اتفقنا
نسكن في فندق انا اعرفه زين واحب ربع فيه واسمه(سانت جورج) دخلنا
حجرتنا ودقيناه نومه (تعرفون انا ذابحني الخط والسواقه وهادني التعب
وزياد منفجر راسه من الجوال وابوثامر اصلا نايم خلقه).
الساعه2 الظهر صحينا من النوم وغسلنا وجيهنا ولا مسحنا الا في المطعم
تغدينا وعينا من الله خير ودزينا لمركز حمر عين ( اللي كلكم تعرفونه)
في المركز صار كل واحد منا يترزز وكل واحد منا اخذ له عايره وقام
يتلفت في الرايح والجاي ( نسيت اعلمكم ان اخونا زياد مسوي فيها
مغزلجي وموصينا ان كل واحد منا يحاول يتميلح ويتصيد له بنيه عشان
تسهر معاهفي الديسكو الليله لانه هو ضامن له وحده وواثق من نفسه
بالحيل المملوح ) .
من كثر الوقفه والمشي انهد حيلي وقلت ياولد خلني بأخذلي
كويس عصير وأبرد على كبدي اللي شبت ضو ولا لقيت أحد يعطيني وجه
مع اني مملوح ودمي خفيف لكن وين اللي يقدر ؟؟؟؟؟
ويوم جلست اشرب العصير طبعا وأنا قاعد على الطاوله الا هاك البنيه
اللي تطرح الطيور من السماء يوم جت وجلست بالطاوله المقابله لي
ويوم جلسنا حوالي خمس دقايق يوم جن ثلاث بنيات وجلسن معها وبصراحه
كلهن حليوات لكن خويتي الاولى مامثلها وطلبوا عصير وقعدوا يشربون
ويتضحكون وانا قاعد اتميلح واطالع واحاول اسمع وشيقولون لكن ماقدرت
المهم البنيه خويتي تقريبا كل دقيقتين ثلاث تطالع فيني وتضحك
عاد أنا قلت ياأبو خلوووود الدعوه مايبيلها شرح البنيه اكيد متعلقه
وانا بعد تراني فطين شوي واللي زادني ثقه هو القميص والبنطلون اللي
أنا لابسهم (شاريها من البطحاء ومطلعتني كني سواق سيرلانكي).
لقطت الجوال وكلمت على اخوياي زياد وابو ثامر وقلت لهم ترى الوجه
من الوجه ابيض يالربع ودوروا لكم تاكسي يوديكم للفندق أنا تراني
ماني بيمكم الليله (مفتاح السياره معي لاني أنا الدليله) قالوا :وشلون
أكيد لاقي لك شي يالمليعين قلت:العلم جاكم وبكيفكم انا ماعلي منكم
وبس .
عودت اطالع في خويتي اللي ماتأخذ الا وتبسم في وجهي وفي الآخر مرت من
عندي وطالعتني بنظره كلها اعجاب (حسيت كذا) وضحكت هي يوم انا عاد
تشققت ورحت وطي المهم قمت وراها ولان حظي مقرود كان المركز مليان
شباب ويوم شافوا رفيقتي طاروا وراها (الله يطيرهم) وتوهقت انا لاني
خابر انها تبيني لكن كيف اكلمها (لا واللي مجنني اكثر انه في الامارات
اللي يمسكونه يعاكس البنيات يجلدونه ويشهرون فيه وهذا اللي مروعني)
المهم عقب مطارد وملاحق يقطع النفس حوالي ساعه وتعرفون بعض ها الملقف
اللي بس ودهم يخربون على الاجواد ويقطعون ارزاق الضعوف مثلي وقفت
البنت عند هاك الكشك الصغير اللي يبيع ساعات في الدور الثاني
(هاك العويره اللي صاده عن العالم قلت : ياولد فرصتك يالحر عطها
الرقم علشان تنسقون لسهرة الليله خصوصا انها لابسه عبايه كتف ومخصره
وملامحها الخليجيه اوضح من الشمس لا والبدي الله لايوريكم هبال.
جيتها وسلمت وما ردت لكنها تبسمت قلت ياولد البنيه تحاول تثيقل
شوي وتتدلع عليك والا الدعوه تراها اغصبني واتغيصب .
ماعليه كلمتها مره ثانيه وقلت : كل عام وانتي بخير ( اسلوب واحد
قديم ) والتفتت علي وهي مبتسمه وحركت شفايفها وانا ودي اطير من
الفرحه لانها بتكلمني اخيرا حنت علي وبتعطيني وجه لا وبحر زيادوووه هو
وقزيمان ابو ثامر ياسلاااااام.
لكن صارت الفاجعه يوم تكلمت :
_
_
_
_
_
طلعت البت طرمى !!!!!!!
عودت لخوياي وانا اجر الخيبه معي وقعدت أهلس عليهم من هالسوالف واني
سويت وسويت وانها واعدتني بكره مثل هالحزه في نفس المكان كل هذا
وخوياي الخبول مصدقين وعودنا لفندقنا عشان نريح شوي قبل السهره
ونتعشى وبعدين بنروح للسايكلون ( أحلى مكان للمطامر والعربده عندي)
وفي هاك الليله:
صار لي موقف عنيف جدا جدا ومحرج ومضحك بالحيل في نفس الوقت لكن
اعذروني عن عدم ذكره احتراما لاأداب المنتدى وتعليماته
ملاحظه :
اخواني الكرام اتمنى ان اكون اجدت في صياغة اسلوب القصة بالشكل اللي
يعجبكم ولكم حبي واحترامي. |
الوضع المتطور
