السلام عليكم ..

اولا هلالنا قوي .. ومب معنا ان تعادلنا مع النصر اننا ضعيفين ..
اذا كان فريق يلعب قدامك بـ 9 بالدفاع و 1 بالهجوم وش تبون يسون اللاعبين ؟

اقسم بالله العظيم اني بالملعب واشوف لاعبي النصر وهم بهالطريقه ..
9 بالدفاع وواحد بالهجوم .. ولاادري ليش يموتون اللعب كذا ؟!!!

الشي المهم اللي يجب على ادارة الهلال تعرفه هو شي واحد ..
خط الهجوم عندنا من اقوى الخطوط .. الجابر والقحطاني والعنبر والصويلح ..
والحين الجمعان وجيلسون .. مانعاني ولا مشكله بهالخط نهائيا ..

خط الوسط من اروع الخطوط بفريقنا .. ولا له داعي اقول الشهلوب ونواف وكماتشو ..

لكن يرحم والديكم يادارة الهلال خط الدفع نكبه .. ونكبته ليتها تكون على نفسه بس ..
المشكله ان هالخط يجني على الفريق كامل وعيلنا كجمهور محب لفريقنا ..

يعني حرام يطلع هالجمهور الهلالي كله مستاء .. مثل الجمهور الي حظر مباراة النصر !!
والسبب غلطه دفاعيه .. مستحيل فريق كبير مثل الهلال توجد فيه مثل هالغلطه !!

لو تكلمنا بواقعيه .. بعيد عن التعصب .. المفرج صار لاعب مفلس فنيا .. ادنى من رقصه ..
والعلياني يثبت صحة كلامي .. خلاص المفرج مب هو اللاعب اللي نعتمد عليه بخط الدفاع..

قدامنا بطوله كبيره الي هي بطولة اسيا .. وواجب علينا المحافظه على اللقبين الي حققناها
السنه اللي فاتت .. حرام تروح هالبطولات بغلطة مدافع مفلس فنيا بصراحه .. مثل المفرج ..

السنه الماضيه ابدع المفرج رغم بعض الهفوات .. الحين المفروض يتبدل بافضل منه .. لازم ادارتنا
تعرف ان الهلال فريق عريق .. وقدامنا فرق قويه راح نقابلها ... لازم نبحث عن البديل باسرع وقت ..

الجهه اليمنى بعد .. والله ماعرفت للياس .. هو دفاعي ولا هجومي .. اذا جاته هجمه ماعرف يرفعها ..
واذا جت هجمه ضده اكلوه وهو يضحك .. مايعرف ابجديات تحرك المهاجم اللي قدامه بالكوره ..
شفنا بندر تميم شلون خلاه شوارع ... حقيقه لازم نعرفها ونحاول اننا نبحث عن البديل ..

مافيه الا الخثران وتفاريس رغم ان تفاريس بدا يتغطرس مدري وش جايه .. ولازم يكون للادارة
وقفه حازمه معه عشان يرجع تفاريس الي نعرفه ونحبه .. مب تفاريس الحالي اللي مدري وش يبي !!

الله يوفق فريقنا ان شاء الله لاعتلاء منصات التتويج مثل ماهي العاده ..
والله يساعد الامير محمد بن فيصل على تحملنا كجمهور محب له والله ومحب لفريقنا البطل ..

محبكم ...