ماني قايل ممنوع دخول الصبايا والصغنونين لان الموضوع خالي من الكحول قصدي من السيكو سيكو ( اية هين بس )
دريشة ( على وزن مدخل او مقدمة )
كل واحد مننا عندة قلب وكليتين صح بس مو كل واحد مننا عندة حسن نية صح ( الله من زين المقدمة اللي هذا اولة ينعاف تالية) القصد احياناً تسوي شي بحسن كلية اقصد بحسن نية ولكن تنقلب على دميجك الدعوى كلها واحياناً الحب يجي لمك بعد ما مليت من الركض وراة من شارع لشارع وعاير لعاير ( احلق شنبي وفوقة حواجبي اذا كانكم فاهمين شي هذا يسمونة علم الفلسفوفة مادرستوة عندكم ) واحياناً يكون عندك احلام ( مهوب الطقاقة ) تبيها تتحقق زي مثلا الزواج ( متى ياكريم اعرس وافتك من الشحططة ومن النواشف) بس يكون لك او لس شروط وكل واحد وخنبقتة اقصد شروطة
عن نفسي ابحث عن " ريانة العود" تلك الفراشة الطائرة المحلقة بين الورد تلك اللمبة عفواً الشمعة المولعة ليل نهار زي ميد 24 ساعة تلك التي صمتها لهو معنى واذا حتست لها معاني تلك التي تبسم اذا قامت من النوم وتضحك مهوب تقوم وهي مادة بوزها شبرين وربع والشياطين واقفين على شوشتها تلك التي تهبك حياتها مهوب تنهبك تلك التي ودي اقول مرافقها هاااه اقول والا لا تلك التي تغنى لفيروز وهيا تقطع الزلطة في المطبخ مهوب تقعد تتاغر وتسمع لام حديجان تلك التي تعرف تكشخ وتتزبط وتحط مكياج مناسب مهوب تلبس فستان الوانة متطاقة مع بعض والوجة تقل لوحة زيتية من المكياج واللي رافعً ضغطي تلقا طرف الشلحة طالعة من تحت الفستان تلك التي تستقبلك باالحب والشوق لا رجعت للبيت مهوب بورقة الطلبات وتلك وتلك تلك من ابحث عنها تلك هي ريانة العود وصفقني اذا لقيتها ( وجة نظر قابلة للكسر )
الزبدة هذي القصة وبس وياشين الخمبقة اللي مالها سنع قال ايش مقدمة ياالله سووووؤ يا صطى فرغلي ربنا يهد حيلك ياشيخ
كانت الدنيا برد برد + ثلج وعصرية احد ( عقبال صباحية عرسي يارب ) قمت من النوم متكسر وعطشاااااان ( للفاهمين بس ) وشبكة عنكبوت لازقة على عيوني لان صار لي نام حول 15 ساعة وخرت الكنبل ووخرت فيكي عني دايم دايم القاها في حظني لا قمت من النوم
ملاحظة كبيرة كبر راس البعير فيكي هذي لعبة شريتها من زمان وتعودت ما انام الا وهي جنبي اوكية خخخخخ( لعبت عليهم المخفات
واطلع للبرندة انا وخلاقيني الشورت واصلاً للركبة والفنيلة منشقة من عند الدلعة والشعر كل شعرة مزاعلة الثانية والقشرة ماخذة راحتها على الاخر ومنتثرة على كتوفي وسعابيلي مملطخة الوسادة وبقاياها على براطمي وباقي عشاي منطول عند السرير وحالتي حالة وقفتادور االشمس ابي كود الشمس
تصقعني كود الجراثيم تروح عن جسمي وابي اشم هواء طبيعي وصافي ( ما تلام انت من النوع اللي اذا نام طلعت منة انواع الروائح )
وجالس اطالع في هاالناس رايحين وجايين واللي يلعب كورة وهذي جالسة تفلي راس خويتها من الصيبان وفيذااك ناس ماغير صقع من لعب الكيرم وهذيك جيرفي بنت جيراني تسبح في المسبح ( دايم القاها في المسبح ليش مدري كل هذا رياضة يعني ) وانا جالس اطالعهم وجالس لحالي امارس هوايتي الصباحية التي لا تحتاج الى مجهود يذكر ومعظم الشعب يمارسها بس كل واحد ومزاجة ووقتة الا وهيا تدخل اصبعك في خشمك وتقعد تبرمة تبرمة لييين ما تشوف ظفرك طالع من عند عينك ولازم تسوي هاالهواية وانت واثق من نفسك مهوب اذا طالعك احد تستحي وتوقف لا بل خش بعينة وكمل شغلك وخصوصً وانت واقف عند اشارة المرور ( لي ذكرى مؤلمة عند اشارة مرور حيث شفت واحد يطاق مع خشمة وباالاخير طلع اسف ما اقدر اكمل الى اليوم وانا احلم فية واتخرع ) ( اللي يبي يعرف وش طلع من خشمة يرسلي على الايميل وهو الخسران )
قلت يا ابوالبزايز وين ناوي تروح اليوم ( متعود اشاور نفسي دايم ) وين وين بس لقيتها ورا ما انقز للمتحف حق الشخابيط والرسوم واتفرج وباالمرة اخذ شوية معلومات عنة لان عندي بحث علية واصور جنب كم لوحة وارسلها للعيال في الرياض واوريهم اني صرت انسان متطور اروح لمتاحف مهوب قهاوي والله واطقلك هاك الترويشة وعينك ماتشوف الا النور وفرك بهاالشعر بخمس انواع شامبو من ظمنهن حق البزارين اللي مايحر عيونك لاصرت مفتح واصلي واكسر لي بيضتين على علبة تونة مع شوية زيتون واغلقها بكاس شاهي تلقيمة مع شيشة يحبها قلبك يوم بديت اصحي
وادخل غرفة ملابسي واوقف ساعة افكر وش البس وش البس لازم اشخص ولو انا بروح لمتحف كل اللي فية ناس مثقفين ( الا انا طبعاً) واللي يشوفني وانا واقف افكر يقول هذا عندة 3 بدلة مع عدتهن وياحسرة كل اللي عندي بدلة ابوي الشهبى والبنطلون البرتقالي وشورتين وفنيلة علاقي فوشية وصروال سنة جايبة معي للذكرى ( يلعن ام الذكرى ياشيخ الناس تاخذ معها خاتم قلم ساعة للذكرى وانت صروال سنة ) اوالله وقلت مابدهاش انشاالله محد حوش وافتح السامسونايت واطلع القميص البوني ابوكم طويل شارية من شارع الوزير من عند لبناني خف بي وقال " هيدا لايئ عليك يخزي العين شو ما احلاك فية
سدئني الصبايا راح يدوبو فيك لما تلبسوة ويركضو وراك كمان ولو معلوم هيدا ما ببيعوا الا للشباب الحبيبة متلك" ( وانا صحيح وقلت ما دام البنات راح يذوبون فيني بشرية وشريتة ووزيتة علشان اكشخ بة عند زوجتي لا تزوجت هي اكلف ماعلي والا لغيرها عندي البنطرون البرتقالي لا خلا ولا عدم هذاك مسمية خاطف قلوب العذارا ) بس قلت ياالله بلبسة اليوم ومحدن بداري والبس لك جينز تركي اللي عطاني اياة بعد ما اعرس لانة ماشاالله ربع وكرش بعد العرس ( زي العادة اكل في النهار و لعب مصارعة تالي الليل) وزودن باالنعمة كبرت ام احمد حقتة مدري وشلون خخخخ
واسفسف شعري على جنب الللللله يوم غديت ابوهنود والعافية واطلع علبة الفقس واحط شوي منة عند اذاني ( دهن العود عندي فقس ارخص وصحي)
نزلت تحت شغلت الستمية حقي ( آاااة ياوجدي علية الا ما يجي ياباني منة كودة ارخص شوي ) وادوس للمتحف بعد ما لبست النظارة الشمسية وفتحت ثلاث زراير من قميصي وصفت الكموم لين المرافق على بالي حركة ومحد قدي ( والله ياالثوب علي ويخب بعد) وصلت ودخلت وبصراحة المكان كان روعة كل شي رخام وذهب وعالم وطبعاً بنات بينهم وهو اهم شي عندي دفعت رسوم الدخول وبديت ادوج بهاك المتحف وادوج وصايراً خفيف كل لوحة امر من عندها وامشي بعد ما اطقلي صورة جنبها على بالي " تورست " والناس يوقفون ويتاملون بااللوحات قلت بلا فضايح بس سو زيهم واوقف عند لوحة صغيرة وفجاءة حسيت بدون ما التفت انو فية انثى بجنبي عرفتها من الريحة( معلوم اكبر ما فيك خشمك ) وما التفت عليها قل خلك ثقل وسو نفسك فنان تشكيلي وتامل بااللوحة اللي قدامك والله وزي العادة احط ثلاث اصابع على خدي الايسر وواحد من الاصابع بغا يخالف امري ويروح لخشمي يحسب اني بمارس هوايتي واجلس اتامل في اللوحة ومرة اقرب لمها ومرة ابعد واقول اممم اممم والبنت مازالت موجودة جنبي قلت بس يكفي كذا اللحين وقت الخشة معها وبسرعة البرق التفت عليها مستغلاً اني غاسلن شعري ومتوقع انة بيرقص ويهفهف مع قوة الالتفاتة زي دعاية صنصليك بس العرادة عرادة والله مايرقص لو ايش ماكان يوم ناظرتها كانت هي تناظرني واستحت ووخرت عيونها عني شي غريب شفتة لالالا هذي ماهي مخلوق بشري زينا هذي الحورية اللي تطلع من البحر ولها زعانف من عند الرجلين ( عزالله ان افلام الكرتون لعبت بروسنا لعب) آية في الجمال الشعر ذهبي والوجة فلقة القمر ليلة 36 " بعد الشيح لا تشرهون الشهر يصير 39 يوم " والبراطم خطر ما تفظخ من زود ماهي مستوية والعيون فناجيل وخظر والجسم عود خيزران مايكسره الهواء وصاكتن علية بذاك الجينز اللي حازة حز ومدري شلون لبستة شكلها مدهنة جسمها بوازلين قبل لا تلبسة وش بعد وش بعد شفت اية والخشم اصلاً مالها خشم مدري شلون تتنفس ( يخلف الله علينا تسان الواحد مننا كل اشباهة خشم في خشم واذا اقبل عليك ما تميز هو فلان والا علان من زود ماالخشم مغطي الوجة ذكرى مؤلمة * مرة صورت صورة اربعة في ستة ملونة وما طلع الا خشمي بس في الصورة
بعد لحظة صمت دامت بين عيوننا حسيت انها مكتوبة لي وانها نصفي الاخر اللي انتظرة منذو مبطي ومافية اجمل واقلع من لغة العيون وعلى راي الشاعر الكبيرلما قال في لغة العيون وكيف انها ابلغ من الكلام بكثير حيث قال " ما كول ما يلمعو ذهبن" ---------> والله ما اعرف غيرة خخخخخ
تكلمت وقالت هاااي اسفة اذا كنت قطعت عليك إيحائك الفني الله الله شوفو الاسلوب والادب مهوب نعم خير ضايع لك شي في وجهي
قلت لا ابد ( صدقت ان عندي ايحاء فني مادرت اني اغني في نفسي واقول" قال الجميحي في حب البيض زادت شجوني" للمعلومية هاالاغنية للفنان عبداالحيم حافظ سجلها جلسة على الاورق قبل ما يموت طالعتها وانا مسبل عيوني وفاتحهن نص فتحة لفترة قصيرة والخشة طبعاً مفتوحة زي العادة وبعدها قلت لها بصوت يملئوة البحة مما ادا الى انتثار بعض السعابيل التي خرجت مني عليها " وشلون ينقطع ايحائي الفني وانا قدامي اجمل صورة شفتها في حياتي " ( يا جماعة احس اني استهلكت كل انواع النصب في حياتي وشكلي ببلش لا تزوجت من وين بجيب نصب على مستوى لمدح ام عيالي ) استحت وحمرت خدودها زودن على حمرتها وقالت بين عليك فنان تشكيلي صح على العموم انا اسمي شانيا؟ جيت بقول اية وعادي يعني اول مرة انصب بس والله قوية اي فنان تشكيلي خلتني اتذكر ايام حصة الفنية لادخل علينا المدرس وتوة صاقع لة الزقارة والعقال مايل وقال يالله ارسمو نخلة اذا كان اسبوع الشجرة والا قال ارسمو اشارة مرور اذا كان اسبوع المرور وهذا تدريسهم وباالتالي تاخذ 1 من 1 باالله وشلون اصير فنان تشكيلي وهذا هو اللي درسوني لدرجة انة خلاص معد اعرف ارسم الا يا نخلة طايرن سعفها والا اشارة مرور منسدحة حتى اذكر يوم اني صغنون قال لي ابوي ياالله ارسمني وانا ابوك ورنا رسمك واجلس ساعة ارسم وارسم وباالتالي رسمتة وفوق راسة سعف واقف ومعلق تمر بآذانة وراسمة بوسط حوض والبزبوز يخرخر على راسة
المهم وين طلعنا برا السالفة اية قلت لها والله انا متذوق للفن التشكيلي فقط واسمي بيزاا ( اهون شوي ) قالت انا مثلك بعد ( ياشين التقليد ) قلت لها ترا عندي لوحات كثيرة مرة مرة ونادرة في شقتي ومن ظمنهن لوحة موناليزا وارثها من ام جدتي خزنة اللة يرحمها وكانت شرتها من مزاد فني في اسبانيا ايام ماكانت رايحة فيذااك تصيف مع رجلها فليز ولد طوني ( قايلكم فيني عرق لبناني ما تصدقون) ويعني اذا تبين تجين تشوفينهن ماعندي مانع (خخخخخ اخطط على بعيد خلاص تلكعنا عقب ما كنا ننعزم علشان نشوف الحمام في السطح صرنا حنا اللي نعزم) قالت والله عرضك مغري بس ما اقدر وبينما حنا نسولف ومن زود ماجسمي بدا يتكسر مع الخثرة بسبتها هي وسواليفها مديت يدي ابي اتسند على اقرب جدار( راعي طويلة ) ومادريت الا وكفي غاطسن بااللوحة اللي قدامي واثرها مرسومة والعالم الله بتشكيلة مائية مهيب تشكيلة خشبية لان البوية لزقة بيدي وفجاة
دق جرس الانذار( علشاني لمست اللوحة تكنلوجيا وبس) والعالم اختبصت وانا وخويتي ( خلاص صرنا اخويا ) معهم وش السالفة حريق والا هجوم مسلح
الا والله يجيلهم خمسة عسكر جايين مشوتين لمي ويصارخون وقف وقف !! انا يوم شفتهم جايين لمي بغيت اصيح من الخرعة بس قلت ياروح ما بعدك روح واحط رجلي مع هاك السيب واركض واركظ وهم عيال شحيبر يصارخون وقف احسن لك المكان محاصر ياربي وش انا مسوي والله ماسويت شي بس والله ما اوقف اخاف يلبسوني تهمة ومادريت الا هاك البنية خويتي شانيا ماغيرها تركظ جنبي ! قلت وش عندس تركظين معنا هم يلاحقوني انا !
قالت والله ما اخليك انا معك على الحلوة والمرة انا حبيتك من اول ما شفتك وابي اكمل حياتي معاك ( قايلكم خقت معي مابغت شي ) قلت كفو والله اخت رجال وبنت حمايل " وكل هاالسواليف صارت وحنا نركظ في هاك السيب الطويل والشرطة ورانا وفي اخر السيب لقينا مصعد ونركب فية واظغط على اخر دور رقم 14 واشوى انك الباب قبل لا يجون ونروح للدور 14 وانا ماني مصدق اللي صار ولا تسالوني وش سوينا في المصعد ابد تعرفنا على بعض عن قرب واثبت لها ان الرجال مخابر مهوب مظاهر بمفهومي الشخصي البحت والله من زين المفهوم خخخخخخخخخ
الدور كان فاضي ومافية احد واقعد ادور وادور قالت وش تدور قلت ابد كودني القاء مطرحة ازين من البلاط ( علشان نجلس والله هذا قصدي ) قالت لي بعدين مو اللحين ( قصدها على الجلسة اوكية ) وقالت بس قلي ليش الشرطة تلاحقك ؟ وش تشتغل فية باالضبط مخدرات والا سلاح ؟ يوم صرت انتفض قلت لعنبو حيس هذا وجة واحد راعي مخدرات والا راعي سلاح انا حتى ما اعرف اشغل النبيطة وغير البندول ما آكل قالت شكلك ملكع زيادة عن اللزوم لكن انا يعجبني الرجال ( ابشركم صرت رجال ) اللي زيك مايعلم يسراة وش سوت يمناة وشكلنا بنشتغل مع بعض طول العمر وبنكون ( بتشديد الخاء وضرب الواو وعفط الراء ودحج القاف ) بزنس قلت والله هذا مناي انا بعد وش بلاني وذبحني غير الشغل وش رايس نبدا هااللحين في الشغل ( اقصد البزنس ) شوي الا والمصعد جاي لدورنا ياربي وش الحيلة هذي اكيد الشرطة جت لمنا ؟ قلت وش رايس نطب على سطح العمارة اللي جنبنا ( تاثير افلام كرتون) والله وتمسكني مع يدي ونروح للدرج وننزل لين الدور الاول وكانت هي قدامي في الدرج وتناقز وكل شي يناقز معها خخخخخ ونطلع من عند باب المخزن ولا كان فية احد وتاخذني معها في سيارتها وحطت رجلها وماتشوف الا غبار الشارع ورانا
----------- اعزائي المشاهدين اسعد الله اوقاتكم بكل خير نرجو من حضراتكم التحول الى القناة الثانية لمتابعة المسلسل -----------------------
----------- المسائي بعنوان " حب داخل سطلً من زجاج " بطولة بيزاا وباسكال المشعلاني اما الان فننتقل بكم الى استديو الاخبار --------------
---------- واللي ما تطلع عندهم القناة الثانية صافية يصكون التلفزيون ويروحون يلعبون مصاقيل--------------------------------------------
---------- عند عتبت بيتهم اصرف من البهذلة وفر الاريل وعدل الاريل تقل بيطلعون قناة HOB على غفلة -------------------------------------
تابعو معنا الجزء الثاني لمعرفة
سر بكاء بيزاا " مع اني دايم اصيح واول يعيرني العيال ببريق صياح " ( سر يعني لغز مهوب السر اللي في بطني لأن اللي في بطني قليب مهوب سر أوادم )
بيزاا يدخل السجن ولكنة قابل فيذاااك
لماذا وجة بيزاا تفقع وصب دمة ؟
من هي جينت ولماذا انقذت بيزاا من السجن وهل؟
نشكر كل من عاونا وفزع معنا لانجاز الجزء الاول من القصة وهم
بقالة السعادة ( عشر كراتين صلصة + بسكوت ابو ميزان + 5 خيش رز ابو بنت + 78 علبة لبن مقاس لتر )
بنشر الإصلاح ( 4 جنوط مقاس 14 + 1 رقعات في راسي لتخفيف التنسيم اللي فية + 14 لستك مليانات موية للاستخدام الشخصي
بوفية اليالي الملاح( 45 سندويش كبدة + 56 مقلقل + 15 شكشوكة )
وشكر خاص لشركة حبيليص للبناء والتلييص لأنهم عطونا الإذن بإستخدام قلامتهم لكتابة هذا الموضوع
ولا يفوتني الشكر لوزارة المواصلات البنقلاديشية وعلى رئسهم ريالو ولد نوير لانهم وفرو لنا المستلزمات الصحية كا الأدوية و الوسايد
بيزاا -----> خخخخخخخ


--------------------
منقول من موقع الاقلاع