|
مالفرق بين الاحتراف واحترافنا؟الجزء الاول اخواني محبي الزعيم قد يكون موضوعي ليس بالجديد ولكن مهم والذي دعاني لكتابته المفهوم الخاطيء للاحتراف لدينا!!! فالاحتراف الذي وضعت له انظمه في الفيفا مبني على اساس الا وهو الخصخصه للانديه الرياضيه وهو لايوجد لدينا فاحترافنا اجتهاد ومبطن حيث تستره كلمة وانظمة احتراف وفي جوفه العديد من المشاكل ولعلي استعرض نقاط اساسيه: 1)الخصخصه: في الدول التي تطبق الاحتراف جميع انديته مخصصه وتعتمد على ايرادتها من الاحتراف ذاته فالنادي يستقطب نجوم مشاهير لاستثمارهم وبينما لدينا يستقطب للصرف عليهم 2)مكافات البطولات: هدفهم مادي بحت حتى في البطولات فبطولة كاس اوربا بالملايين والنقل التلفزيوني بالملايين فتخيلوا ان اخر فريق في ترتيب دوري اوربا يحصل على قيمة بطولاتنا المحليه والاقليميه والقاريه مجتمعه!!!!!! ففرق اوربا في دوريها تحرص على تحقيق مراكز متقدمه وتخطط للبطولات الاوربيه والقاريه لتكسب مبالغ وتزيد من ايراداتها وتحقق ارباح واهتمامها الاساسي على بطولة اوربا وعوائدها اما نحن فنسعى في احترافنا لتحقيق بطولات لتزيد الانجازات ونصرف الملايين لذلك دون تحقيق الهدف المادي اي بمعنى اخر اسلوب الهواة لازال عالقاً في مفهومنا ولن نتطور بذلك بطولة العرب اكثر بطوله فيها مورد مادي وستفشل وتخسر الشركة الراعيه اذا لم تشارك الاندية الجماهيريه فيها(فابتعاد الهلال عنها وعلى حسب كلام مدير القناة خسر 200.000 مشترك!!!) ونحن لانساعد على تطويرها لاننا نعترض التشفير ونحاربه على الرغم انه ادخل لخزينة النادي 5 ملايين العام الماضي (3.5مليون عقد دعائي مشروط على شركة دله +1.5 مكافاة المركز الثالث) 3)استثمار اللاعب في الاحتراف الاوربي يستفاد من اللاعب ويستثمر فيحصل النادي على 30% من قيمة عقود الاعلان و80% من قيمة قميص اللاعب(وبيع لبكهام بعد توقيعه العقد وبعداسبوع منه ماقيمته 40 مليون دولار!!!!!) وفي احترافنا اللاعب له 100% من قيمة العقود الاعلانيه والنادي ولا شي!!!! ولايوجد بيع قمصان لاعبين!!!!!!!!!!!!!! 4)النقل التلفزيوني يحقق النادي وحسب جماهيريته ايراد كبير من التشفير ويدفع له جزء من قيمة العقد قبل الموسم(ومردود ذلك يعود لشركة النقل)فالفريق يستفيد من المبلغ والاستعداد ويساعد على شوق الجماهير لمتابعة الجديد للفريق وتشترك قبل الموسم في القنوات المتخصصه وصاحبة الامتياز ولدينا نجلس سنه (وبالقطاره تدفع الفلوس) تروح للرعايه وتجلس كم شهر وبعدين يصرفونها ومافيه عدل لان كل نادي ياخذ النص طبعاً بعد خصم حق الرعايه30% 5)المباريات المنقوله والتذاكر في اوربا لايوجد نقل عام لاي مبارات فالجماهير التي لاتملك اشتراك تضطر للحضور الى الملاعب وحتى الاماكن العامه(المقاهي المطاعم الاسواق) تدفع مبالغ مضاعفه لعرض المباريات وعندنا اشترك بدش واعرض وماعليك تقهو ويطلع المقهى بارباح طائله والنادي والشركة الراعيه تعاني من شح الحضور والسبب المبارات في الرياض تنقل( والعالم متسدحه قدام التلفزيون!!!وماتحضر) ولو كانت مباريات منطقة الفريق غير منقوله كان الحضور صار بكثافه واستفاد النادي والاحتراف لدينا لايحمل الا اسم فاللاعب ينتقل بعد ال28 سنه من ناديه ويذهب الى نادي اخر والمقابل( المسطره!!!!!!!!!!!) والمسطره الدوليه ياجماعت الخير حطت للانديه التي تحصل على ايرادات من اللاعب فاللاعب ينتقل في اوربا بعد 5 سنوات وناديه استفاد منه مادياً وعندنا يصرف عليه سنين واخرتها يروح بالمسطره سؤالي هل عندنا احتراف صحيح؟؟حتى نتعامل بالمسطره!!!!!!!المعتمده من الفيفا هذا الجزء الاول ولقائي معكم في جزء ثاني حول هذا الموضوع |
[align=center] إقتباس:
إقتباس:
إقتباس:
إقتباس:
ولك كل الشكر يالغالي ،، [/align] |
الهلالي موت اشكرك على ردك الجميل |
نضام الإحتراف عندنا الله يخلف عليه.. التكديس و اللعب بالنظام من قبل رأساء الأندية ما يحتاج نوظح اكثر.. شكراً على الموضوع.. |
إقتباس:
ولكن نطرح الموضوع لعدم الخلط بين الاحتراف المعتمد في الفيفا والمطبق لدينا فهناك اسس ومعاير نفتقدها |
لاتفهمني غلط عندنا نسمع بلأحتراف وياليت تطبق الخصخصه على الأنديه الكبيره وتقتطع عنها اعانات الرئاسه وتضاف الى الأنديه الصغيره كتجربه والله يعطيك العافيه اخوي |
مـقــارنة بما قلــت .. فاحترافنــا غريب جدا جدا ..!! :) و ان شاء الله تنفذ الخصخصه و غيرهـا من الامور الهامه بالاحتراف لنرى الدوري السعودي من اقــوى الدوريــــــــات ..!! :) ألف شكر لكـ اخــي ..!! :) |
نضام الإحتراف عندنا الله يخلف عليه.. :d مع تحياتي : الشاااكي |
اي احتراف هو باقي عندنا احتراف تكديس تخريب على باقي الفرق شاكر لك طرح هالموضوع المفيد |
أخوي mix2002 شاكر لك موضوعك المتميز s60s |
مايبغى لدورينا الا الخصخصة |
مشكور على هذا الموضوع :d |
مشكور على هذه اللفتة الجميلة موضك مافيه أحسن منه لكن من يسمعك و الله حلول كثيرة لتطوير الرياضة في البلد لكن الروتين البطالة المبطنة ووووووووووووو. |
عندي بعض النقاط المهمة اللي حبيت اقولها بخصوص هالموضوع: -للأسف أن حنا نتباهى بدورينا وأنه من أفضل الدوريات عربيا وخلافه وحنا لم نطبق الأحتراف بمعناه الحقيقي وإذا ما اهتمينا بالأحتراف وطورناه راح نشوف الدوري يقل مستواه سنة بعد سنة حتى يفقد بريقه تماما. وحنا نشوف التكاليف المادية للأندية اللي كل مالها وتزود كل موسم بالله وين راح تجيب تكاليفها منه إلا بالأستثمار!! وإحنا نشوف كل الدوريات اللي كانت اقل منا زمان صارت تنافسنا هالحين وتعدتنا بعد. واللي يشوف الدوري القطري والأماراتي يعرف هالشي. يكفيك انهم حاطين قناة خاصة للدوري. إخراج على كيفك! وإثارة تحمسك للمتابعة! ماهوب مثلنا الله يخلف! قناة تجيب أشياء مالها سنع! بالله من يتابع منكم عالم الكريكيت! وش شايفينا ذولي هنود على غفله! المفروض يكون تركيزهم على الرياضات اللي يهتم فيها الشارع الرياضي هنا في السعودية! ويكون متابعتهم للدوري على رأس اهتماماتهم . مهوب يجيبون لي برنامج آخر الليل ويالله يجيبون ملخص قصير عن الدوري! ولا بعد نصفه مقابلات!!! فلذلك لازم نركز على الأعلام جدا جدا. عموما انا سمعت إن فيه قناة رياضية لروتانا بتفتح قريب لكن إلى حد الآن ماشفنا شي. -بالنسبة لبطولة اسيا القادمة 2009 ماراح يشارك فيها إلا المنتخبات اللي مطبقة نظام الأحتراف الشامل والعالمي (على حد كلام ابن همام في مقابلته مع الجزيرة) ويقول انه ما فيه إلا اليابان وكوريا بس اللي طبقوا هالنظام صح (يعني هل هو بعقله إن اليابان وكوريا بيلعبون على النهائي وبس وهذي البطولة!!) ومعنى هذا ان كل الدول الأسيوية راح تسعى انها تطبق هالنظام وإن صار وقعدنا حنا نتمطط في تطبيقة فقولوا على بطولة اسيا السلام!!===> ماش ماتدخل المخ إن منتخبنا مايشارك فيها لكن هذا كلام ابن همام!! -وبرضوه بالنسبة لبطولة كأس العالم 2010 راح يكون مستوى الكورة متطور جدا واذا قعدنا على ماحنا عليه اعتقد ان التأهل ماراح نحلم فيه. وان تأهلنا راح نقابل منتخبات متطورة جدا مقارنة بمنتخب لا يحمل أي لاعب محترف خارجيا. وفي هالحالة الله يعين على درازن الأهداف!! -اما بما يتعلق بجانب استثمار اللاعب فترى اللاعب السعودي له صيته في كل مكان ولنا في لاعبنا سامي مثال كبير. فهاهو مثل مانشوف مؤهل انه يكون افضل لاعب في اسيا وداخل تصنيف افضل ثمانين لاعب في العالم وتحدثت عنه جميع الرأي الرياضي العالمي بإسهاب. أعتقد هالشهرة وهالمجد اللي وصل له لو وجد الإدارة الأستثمارية الناجحة راح يجد قبول وكسب كبير جدا. وانت شفتوا وشلون ذيك الكورية المعجبة بياسر القحطاني وصورت معه وطلعت في الجرايد. هذا أكبر دليل ان نجومنا لهم إعجاب وشهرة مو على النطاق الخليجي والعربي فقط! بل على نطاق عالمي. -لازم يكون عندنا إهتمام بالجانب الجماهيري. لابد إن حنا نعطي الجمهور حقه في التشجيع عشان تطلع المباراة بشكل حماسي وممتع. بس يكون هالأهتمام في حدود. يعني ما نخلي الحبل على الغارب ونخليهم يسوون اللي يبون. ولانكبتهم ونمنعهم من فعل أشياء تعبر عن حماسهم في نطاق المعقول. -لازم يكون فيه ملاعب اضافية تناسب حجم المباريات بين الفرق. يعني مو معقولة انه تجي مباراة للشباب والحزم في نص الموسم وتكون في استاد الملك فهد ويصير معظمه فاضي. لازم تكون هالمباريات في ملاعب تناسب حجم الفريقين وأهمية المباراة. -في النهاية. اتمنى ان الإتحاد السعودي يركز على هالجانب بشكل اساسي عشان يكون كورتنا بمشيئة الله في طليعة الدول المتقدمة في كرة القدم وستظل كذلك انشاء الله. |
شكرا على الموضوع المتميز |
مشكور اخوي على طرحك للموضوع ... لكن حنا دايم نتكلم عن الخصخصة وحقوق النقل وحقوق الاعلانات ولا نلاحظ ان الأندية عندنا الحين داجة ومديونة وهي يصرف عليها .. طيب من اللي بيتوهق ويشتري نادي اذا تمت الخصخصة ؟! وحقوق النقل لو بيعت على قنوات مشفرة بتقل نسبة المتابعين وبالتالي تبي تأثر شعبية اللعبة وبالتالي تقل نسبة الحظور مع الوقت وتصير مثل حظور مباريات دوري الكويت ! وحقوق الاعلانات هي الاندية لاقية اعلانات وردتهن ؟! بعدين الاعلانات اللي عليها الكلام هي من الشركات العالمية اللي مداها طويل , والشركات العالمية ما درت ان عندنا كورة أصلاً تركيزهم على اوروبا وأمريكا الجنوبية . المشكلة عندنا هي ان موقعنا بعالم كرة القدم المفروض مثل الدول العربية بأفريقيا ننتج لاعبين ونبتعثهم لأوروبا بالبداية بعقود متدنية وبسيطة لين ينعرف اللاعب السعودي عندهم , بعدين يصير استثمار الاندية عندنا مبني على انتاج اللاعبين وبيعهم . وعلشان نقدر ننتج لاعبين مناسبين للاحتراف لازم نهتم بالقاعدة . والقاعدة موب يعني الناشئين والشباب بس , انما القاعدة تشمل أندية الدرجة الأولى والثانية والثالثة اللي الحين هي بسابع نومة .. وسلامتكم . |
إقتباس:
اخوي الغالي كلامك صحيح وانا عندي مقال يخص اللي قلته بس ابحث عن بعض المعلومات اللي تدعمه |
هلال sa كلامك رائع واتمنى يكون لك كتابات حول هذا الموضوع والكلام للجميع نطرح نقاط ونتمنى ان نضع الحلول ونزيل العقبات منتدانا فيه عقول كبيره ومتى ماصار تفاعل راح توصل فكرتنا للمسؤلين |
اقولكم مستحيل يطبق الاحتراف عندنا مثل اوروبا ولاسباب طبيعةالمجتمع لاتسمح بتطبيق الاحتراف اذا تطبق وحط خطين تحت اذا مايحتاج شرح اكيد |
والله ياخوي الاحتراف عندنا مو سيء لذاك الحد انا معك فيه بعض الاخطاء لكن لا تنسى ان بعض الدول العربيه ماتطبق الاحتراف وان شاء الله ان الاحتراف عندنا متطور من يوم للآخر والله يوفق انديتنا السعوديه s60s |
اين الاحتراف الاداري حقوق التذاكر وهي اهم ايرادات الانديه بيع القمصان ونري الجميع يرتدي القمصان المقلده دون اي عقوبة على المحلات التلى تبيع القمصان المقلده من الشركة الاصلية فعلا الاحتراف عندنا فاشل. |
لك الشكر يا : ( MIX 2002) على الموضوع الجميل و بيض الله و جهك وماقصرت وبيض الله وجهك يا ( helali ) على الإطروحة الجميلة ، ، ، ، ، ، ، ، ، و أزيد عليك يا أخي الفاضل إن ما ينقصنا في إحترافنا إلا الجـــــد و إحترام النظــــام و و و و و التمارين الصباحية و إلا المحترفين الأوربيين و ش زودهم علينـــــــــا وهذي الرسالة أوجهها لأمير الشباب و الرياضه و نائبه أبو فيصل { أرجو من سيادتكم أن تفتحوا مجال الإحتراف للاعبين ، حتى لو اضطررتم أن تدفعوا لهذه الأندية قيمة احتراف لعيبتنا ،،،، صدقوني أن ثمرتها أكبر بكثير من توقعاتكم } . إنظروا يا أخوان لما فعله الكوريون ـ تعلمون يا أخوة أن الإتحاد الكوري قام بهذه الخطوات 2000 إذا ما كنت غلطان ، قام بإرسال لا يقل عن 6 لاعبين ... وإنظروا الآن ما هو وضع المنتخب الكوري .... إنظروا ما ذا فعل في كأس العالم 2002 ...... بل أنظروا كيف هي قيمة اللاعبين الآن ، وبأي أندية يلعبون الآن ..... أرأيتم التضحية التي فعلوها الأتحاد الكوري .... علماً أن ربعنا أفضل منهم بمراحل من الناحية الجسمانية و المهارية ..... *** تخيلوا يا الحبايب لو أن الاتحاد السعودي فعل ما فعله الكوريون مع هؤلاء اللعيبه ما ذا سيحدث : {{ محمد العنبر ، ، ، سعد الحارثي ، ، ، أحمد الصويلح ، ، ، عيسى المحياني ، ، ، نواف التمياط ، ، ، محمد الشلهوب ، ، ، أحمد الدوخي ، ، ، ياسر القحطاني ، ، ، سعود كريري ، ، ، مشعل الموري ، ، ، رضا تكر ، ، ، المنتشري }} وغيرهم من الأسماء التي لا تحضرني الآن ــــــــــــــ والسلام يا زينه من كلام ـــ آسف على الإطالة أرجو إبداء رأيكم الصدقي لأخوكم الحب الصدقي |
والله اخوي الاحتراف عندنا مره متاخر والله يكون بالعون ان شاء الله s60s |
الفرق ان الاحتراف عندنا خرب الكره السعوديه كلها وخاصه الدوري ما فيه منا فسات زي اول كان الهلال وكان الشباب وكان النصر وكان الاتحاد وكان الاهلي ايام الغشيان والهريفي والثنيان والمهلل والعويران وموسى نضاو والداودي وفواد انور عبد الجواد وغيرهم كثير كان ننتضر المباره بفتره طويله اليوم صارت تجي المباره ولا احد داري عنها كله بسب الاحتراف صار الواحد ياخذ فلوس وخلاص حت ينسقونه والله حرام |
| الوقت المعتمد في المنتدى بتوقيت جرينتش +3.
الوقت الان » 07:09 PM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd