ابو نورة وابو شذى في النكبة طويلة المدى -- جديد مسطح الكورة في رمضـان سالفتن مضحتسه - نادي الهلال السعودي - شبكة الزعيم

abdulmajeed_1 · #1 08/10/2005, 11:50 PM

[align=center]كل عـــام وانتم بخير .. ومبارك عليكم الشهر[/align]

[align=center])
&
)
&
*
*
#@
&*
(
_
+
|
|
(_
^

الصراحه عقدتي البداية .. قلت أخربط لعل الخجل يذلف بعيدا ً عني

ولكن هيهات هيهات .. :p :p ..

ولكن خطرت وخطمت ببالي فكرة الا وهي تشليح المقدمة الشهيره للأخ الدكتور والمهندس

والطيار و الضابط والفريق ركن أول و سواق التكسي : ابو سارة اللي يقول فيها :

قالوا تحبه : قلت بالحيل بالحيل

قالوا تعزه : قلت بالحيل بالحيل

قالوا توده : قلت بالحيل بالحيل

قالوا تحبه : قلت الظاهر ما هجدكم ابو ساره

وشوي ولا تخرب فينا الطيارة وتطيح

ونطب في أم الموضوع

أدري إنكم تتقلبون وتتعصرون لكي أبدأ قصتي

راح أعطيكم نبذه و

بقولكم متي صارت .. بعدين بقولكم الشخصيات .. مدخل .. ثمن بطب في أم القصة ;)

بسم الله الرحمن

هالقصة حقيقية صارت لي قبل اسبوعين ويوم وثلاث ساعات وخمس طعش دقيقة وثانية تقريبا ً

بديرتنا بنجد البهية

:

والشخصيات هم :

الوالد العزيز الغالي يحفظه الله .. << والله لو يدري كان علوم

ماي برذر الكبير ----> ابو داحم -> راعي الـ GX-R -> يشوت باليسار وقدام المرمى دايم محتار

ماي برذر اللي اصغر ----> ابو شذى -> معلق التيوس ووضعه دايم محيوووووس

وماي فرند واعز أصدقائي ----> ابو ناصر -> نصراوي بس حبوب

ويحب سامي واهم شي عنده يتأهل فريقهم لربع النهائي في بطولة ابطال العرب

ومحاتسيكم ----> ابو نورة شايت الكورة ومضيع الطبشورة

و ابو ابراهيم ----> واحد جاينا يفزع ;)

وابو صالح ----> خوي ابو ابراهيم وجاينا فزاع

:

مدخل له علاقه بالقصة اللي مابعد بدت

:

في الصباح الباكر والبزارين بمدارسمهم وبعد ما افطرت وعينت من الله خير قلت ياولد ماودك تشطف

الإستراحه ؟؟ (و الوالد يتانس اذا عرف ان احد عياله شطفها )

تدري ؟ قدااااااااام

<< خبركم الريوس مفصول من قبل لاصير ابو نورة وشلون وانابو نورة ؟

<< ابو الثقه ياناس ..

رحت وشطفتها ( الضمير راجع للإستراحه

) ورجعت وانا بالطريق

خابرن طريق مختصر .. ;) هالطريق كله رمل يشفط الموتر شفط

ونزلات وهويات غير طبيعية

والمشكلة مايختصر الا تقريبا دقيقتين

هاه اجربه ولالا ؟ .. وفي هالأثناء ترن ترن ترن ابو ناصر يتصل بك .. انا الصراحه ماستغربت هذي عوايده

انا : ألوووووو

ابو ناصر : هلا والله هلا .. اخبارك .. أفطرت ولالا ؟ .. ابو نورة ! أقول ؟

وشرايك بالنصر ؟ تتوقع يفوز ببطولة ابطال العرب ؟ بس خل عنك وش رايك بالحارثي .. الخ

انا : هلابك أكثر ووووووين الناس غريبه يوم كامل ماتصلت ؟

(( وخلال هالكلام والا السياره راحت في امها وغطست

))

انا : ابو ناصر معليش والله مشغوووووووووول ادق عليك بعد شوي

<< افلقني

واقوم وأطفي الجوال .. واحك راسي شوي

وافكر وافكر وافكر .. ثمن ارجع وافكر وافكر

قلت بسم الله وادددعس ومن هنا ومن هنا ومن جرف لـ دحديره

لكن الحمد لله اني بالنهار واشوف الطريق

وابشركم رجعت سالمن غانم للبيت

:

السالفة الرئيسية :

من بكرا رحنا للإستراحه ( الزقرت فقط = الوالد وابو داحم وانا وابو شذى )

بعد صلاة العشا وكلن جا يبي يسري

قرر الوالد العزيز ماهو آتي :

هو وابو داحم يرجعون بموتر الاخير عشان عندهم كم شغل

وانا وابو شذى نرجع ملحطين بموتر الوالد السياحي حق المزرعه

والوعد على العشا في البيت

ركبنا الموتر وابو شذى نفسه ببروستد مع ميرندا حمضيات

وانا نفسي بفصفص

<< ابو المزاااااج

شاورت ابو شذى نرجع مع إختصاري ولالا ؟

قال أعرف طريق جمبه زين مافيه غراز ، قلت : متأكد ؟

قال : أجل بسلامتك

قلت انا : أجل مشينا لمه

وصلناه

وأول ما مشينا معه قلت لـ ابو شذى سالفة أمس يوم دق ابوناصر وتوهقت

قااااااااال ابو شذى طلبتك ورني تغريزتك حقت امس .. !

قلت : لازم ؟ الحين ليل ويمكن ماتشوف !

قال : اجل بسلامتك

<< لقاها ابو شذى

قلت : أجل تآمر أمر

وأدق الريوس وفي هالأثناء : ترن ترن ترن ابو ناصر يتصل بك !

قلت : عز الله اللي بنتوهق زي ماتوهقت امس

وأرد عليه بسررررعه : هلا والله ابو ناصر مشغول مررررررره مع السلامه

ابو ناصر : وش دعوى أمداني اتكلم ؟ ( وقعد ياخذ ويعطي ويستخف دمه )

وأنا كنت أكلمه كنا تونا طابين طريقي حق امس ... قفلت السماعه بدون شعور

0

شوي شوي

شوي شوي

شوي شوي

محاولااااااااااااات

ودعساااااااااااااااااااات

وكان الطريق فيه ارتفاع بسيط ثم تجيك هويه غير طبيعيه

أكلناها الله يجيركم ..

ومدري وش صار ما أسمع الا دميجة ابو شذى تصافق بالسقف

ويميل الموتر

وأفقد السيطرة على المركبة وينشب الموترعلى جمب .. لو انه سباق رالي مانشبت كذا

أحس ان خشتي حول الارض وراس ابو شذى على كتفي

ورجلينه شوي ولا يطلعن مع الدريشه .. بس اللي محيرني أذكر اني شفت رجل جمب وجهه

حالتنا حاله

قسم بالله لو بقعد اشرح لكم حالتنا ووضع الموتر وطريقة النطله أحتاج

مدرس رياضيات وكيمياء ودكتور من مستشفى شهار

كل شي صار بسرعة حمزة ادريس

ونقعد خمس دقايق !

يوم صحصحت واناظر لـ أبو شذى ولا فاقع ضحك

مدري وش اللي جاه

قلت لايكون الولد راح في خرايطها مع الضربة بس !

وش فيك تضحك ؟ قال : الله من زين السواقه

أنا الصراحه بغيت اطلع مفتاح العجل وافلقه مع جبهته

وانزل ولا ريحة الزيوت على كيفك

و ابو شذى نازل ويناظر وانا قاعد احاول بالسياره تطلع

بائت كل المحاولات بالفشل الذريع للأسف

كانت الساعة 8 ونص أو حولها

قعدنا نحاول ( دعس + تحفير + دفدفه + هز + تنسيم كفرات .. الخ )

الين ما وصلت الساعة عشر الا ثلث تقريبا ً بعدين كل واحد مسك له كفر وقلبه مركا

والسيارات بعيدة عننا تقريبا ً أقرب شارع حوالي كيلوين ونص :sad:

والصراحه ماتشوف يدك من الظلام .. ونعيق مدري نهيق الكلاب عند اذنك

وخربت الترسيمه حقتي و سكسوكة ابو شذى قلبت بيضاء

وننتظر وننتظر

قال ابو شذى خلنا ندق على ابو داحم يفزعلنا بجيبه اللي بازن به على الأمه جمعاء

تذكرت انا ان الوالد معه وقلت عز الله اللي أكلناها اذا عرف

قسم بالله ان يحرم يخلينا مع بعض مره ثانيه ( خابرن الجريات وثنائي الزحفان

)

وهاتك ذب وحش في مخاليق ربي الى ما

وصلت الساعة 10 حكم

والا نور جيب جاي .. وحنا الواحد منا يوم شافه نط ذيك النطه اللي كنك بالمدرجات وسامي توه يسحب بالخوجلي

قرب قرب وصل عندنا يوم وصل والا مهب اللي انت تبي ..

قال : أي خدمه يا شباب ، وش فيه موتركم ؟

قلنا : سلامتك يالطيب بسيطه متعلق بس

قال : أجل مع السلامه

<< قفلت الأخلاق بعد طيحة الوجه وعطوه كم ذبه على ******* مشفر *******

ابو شذى رجع للكفر اللي متكي عنده :sad:

وانا رجعت للكفر حقي

سوينا استديو تحليلي وقلبناه توب 10 على كم حشة ببعض الاوآدم

وصلت الساعه تقريبا ً 10:15 والا نور سيارة قدييييييييييييمه مررررررررره

حقت محلات السباكه وأنط واقعد أكبس له واحرق البوري احرااااااق

اثنين شوي شوي يمشون واشكالهم سباكين من جد السواق لابس بدله والثاني مدري وش لابس ;)

قربوا

لين وصلوا عندنا

ابو شذى نط ومن زود التهور قال

صديق روح يجيب جيب ، صديق انتا يقدر يسحب هذا سياره ؟

شوي ولا يضحك الراكب ويقول : عسا ماشر ! وشلون صرتوا كذا ؟

دور وجه ابو شذى

قال معك ابو صالح وذا اللي يسوق ابو ابراهيم .. قلنا لهم والنعم

والصراحه ما ادري الى الحين هم دروا اني ابو نورة واللي معي ابو شذى ولالا

قال بسيطه ياشباب .. وينادي خويه ويجيبون الواير

ويركبه ويطيح ويركبه ويطيح حوالي خمس مرات بعد مابدا يسحب

(وهو ينشب موترهم)

وننزل العفريته ومفاتيح العجل ونحاول فيه الين طلع

(رجعنا لموترنا)

ونقعد نسحب فيه الى الساعه 12 الا ربع مدري 2 الا ربع

أذكر ان فيها 2 وبس

وأخيرا ً يطلع

يوم طلعت سيارتنا قال ابو ابراهيم :

ادعس وبعّدها شوي من هنا .. أنا ماصدقت خبر ودعست

اشوف بالمرايه ولا رجال قاعد يلحقني ويشر بشماغه ويلعلع

أثره ابو شذى خايف اني نسيته

وقفت بعيد وجيتهم كعابي

أنا الصراحه مدري وين أدور وجهي عقب كلمة ابو شذى اول ماجوا

قلت : الله يسلمكم ماقصرتوا مار عشاكم الليلة

قال ابو صالح :

استراحتنا قريبه ونبيكم انتم تعشون معنا

قلت : مستحين منكم والله يكفي اللي سويتوه ( اتذكر ابو شذى وهو يركض وراي وافقع ضحك

)

راحوا ..

والساعة تقريبا ً ثلاث وحنا بالبيت

* لقــطــــاااااااات :

* أبشركم كان الوالد نايم ومن بكرا عطاني محاضرة بسيطة بعنوان ( وراكم تأخرتوا ) يحسب السالفة دوران وعشيات ..

* ابو شذى كان يبي يصور الموتر بجواله وهو متعلق شافني عطيته نظرة حقد غير طبيعية
طاح الجوال مدري حطه المهم ضاع ومالقاه الا ابو صالح

* الله يكرمكم نعالنا الى يومكم ماندري وينها

* الله يكرمكم الموتر طرش زيوت لين قال بس

* وحنا بالطريق راجعين للبيت بعد المأساه قال ابو شذى تكفى دق على خويك ابو ناصر وارفسه
مع السماعه

* وقفنا الموتر عند المحطة اللي جمب البيت نظرا ً لشكله اللي سوف يثير اشتباه الوالد

وقعد بالمحطة يومين بعدين بالصناعيه كم يوم

وقلت للوالد : أبد تغيير زيت وتلميع كفرات << أتحدى أي هندي بالعالم يسلكها .. ;)

* ما أكلنا شي ذيك الليله لا بروستد ولا فصفص

ومحد افتقدنا على العشا ابشركم

* اكتشفت ذيك الليله ان فيه شباب سنايديه وذيابه ..

* اكتشفت أيضا ً ان الناس مو على مواترهم وان الرجاجيل مخابر مهب مظاهر ..

* اكتشفت اني قائد محنك واذا صرت بالموضوع ازهلوا ابوه

<< بعد سالفة نهيق الكلاب

* اكتشفت ان ابو شذى عطه السر وانساه ..

<< الله يستر لا يفتح النت ثم يكب السالفه عند الوالد

** والحقيقة ** هالسالفة مغامرة ليلة وحدة من أصل مغامرات

و ماخفي كان أعظم
يعني ترقبوا مغامرات ابو نورة على سبيس تون

:
:
:
.

ومضـــــــة :
ترا القطاعة اثم والوصل كفاره ** كفر عن ذنوبك اللي كنت مذنبها

:

^
^
يبو البنت اذا ومضاتي واصلتك مسج سو نفسك ماتدري وسلكها طلبتك

إهداء هالموضوع لـ -- النكبة & معلق التيوووس --

أحس إن الإبتســــامات واجدهـ

أخوكم

ابو نورة ضارب الهوى بوية ومضيع الطبشورة وحاليا ً شايت الكورة

:

حبذا لو نشوف التفاعل المبهر مع السالفة

;)

:

حبذا اللي شاف الإعلانات لهالموضوع انه ما انصدم

وانه يطب ويرد

:

حبذا لو اني أختم الموضوع خلاص قضت السالفه

:

حبذا لو ماتقرون عشان بختم الحين

:

حبذا لو لايكثر وتضغطون على زر الرد

[/align]