نادي الهلال السعودي - شبكة الزعيم - الموقع الرسمي - امس انا وباص الهلال قمة المأساة

[align=center]

مرحبا ..
كل عام وانتم بخير وصحه وسلامه..
واعاده الله علينا وعليكم بالخير والمسرات ..
(( ابدخل بالموضوع دايركت لاني طفشانه وزعله ومنقهره وكل بلاء بي ))
امس كانت مباراة الهلال والحزم بالرس .. ومن قبل اسبوع وحنا نخطط وشلون نشوف الهلال وباصهم ومن السبت بالليل بدات سالفتنا ..
ماغير بالتليفونات والجوالات .. ناس يقولون الهلال بعنيزه رايحين يزورون النجمه .. وناس يقولون انهم جايين الرس ونازلين بالفندق .. وهاتوا اشاعات وقيل وقال
المهم اصبحنا يوم الاحد ورجعت من الدوام قلت : يابنت مالك الا انك تدقين على الفندق وتسالين ..
وادق ويرد علي الهندي :
الو ..
ايووه ..
هذا الهلال كلوب club موجود فندق ..؟
ايووه .. ايس في..؟
من متى موجود ..؟
من امس ..
طيب متى روح ملعب ..؟
روه الساعه 4 ونص .. لا لا الساعه كمسه .. 5 .. ايس في ..؟
طيب مع السلامه ..
هذا الكلام الظهر ..
المهم عملت اتصالاتي للي بمرهم (( عامله لي رابطة مشجعين )) قلت لهم تجهزوا 4 ونص بنروح للفندق ..
جاء العصر وصحيت وخبيت البيت وطلعنا .. طبعا دقيت على الفندق مارد علي احد قلت بس (( نصب علي الهندي )) رحنا للفندق واثره خلااا خااالي ... مافيه غير هندي يكنس ..
قلت بس نصب علي الهندي :furious:
ونروح لنادي الحزم .. يووووه يالسيارات والناس زحمه مووووت المهم كانوا الشباب متجمعين مافتحوا لهم البوابه قلنا قلعتهم احسن عساهم مايدخلون مالنا الا بعد المباراه خلونا نروح نشوف الطرق اللي ممكن يمرون فيها عشان نخطط ونتكتك تكتيك سليم وتوصلنا الى انهم راح يروحون مع طريق الدوارات
قلنا : خلاص الوعد بعد المباراه ..
تابعنا المباراه والصراحه ماكان الهلال بالفورمه (( كعادتهم اذا لعبوا برا الرياض ))
كانت الخطه تقتضي (( قلبنا فصحى )) خروج الاخ من الملعب قبل بعشر دقايق تفاديا للزحام وقبل بـ 15 دقيقه وانا ادقدق عليه (( بسرعه اطلع قبل الزحمه .. انجز علي ..))
المهم رحنا والله يالشوارع غير طبيعيه .. السيارات مليااات الشواارع وكلن طالع من السيارات وماسك الاعلام وتصفير وبواري وطراطيع وشروخ والدوريات عند كل اشاره لجه بشكل ..
حنا رحنا بطريق الدوار وبتلنا ندور من عرض هاللي يدورون مترنا الشوارع رايحين جايين ..
والعالم كلهم داقين الفلشر عاد المشكله اننا عائله حالتنا حاله كل مامرينا عند سياره دنقنا روسنا عند رجلينا مانبي احد يشوفنا .. اذا اقبلت سياره قال اخوي (( اسجدن .. الله لايفضحنا .))
المهم استمرينا ندور وكل من طنب بواري قلنا هذا باصهم (( طبعا مجهزين جوالات الكاميرا وماسحين مقاطع الفيديو .. والدربيل معنا ..))
قلنا بنروح للنادي نتاكد الباص طلع والا لا .. خلص البنزين وحنا ماغير ندور ..!!
رجعنا للنادي وامة لااله الا الله مجتمعه
صفطنا على جنب ونسمع اللي يصرخون والدوريات بشده قلنا بس طلع الباص ...!!!
وقفنا نحتريه ((( عاااد هنا قمة الغباء وقمة الدجاجه (مأخوذه من الدجاج ) وقمة التناكه (ماخوذه من التنك)))
وقفنا من جهه.. والباص راح مع الجهه الثانيه... ونحتري.. وننتظر ياربيييه ليش السيارات خفن شوي والدوريات تحركوا ..؟؟!!
وش السالفه يابنات وش الخطه ..؟؟
المهم اجريت اتصالاتي (( واكتشفنا ان الباص طالع من شوي وماسك خط عنيزه)) قلنا بس مابدهاش يالله افرك له والحقهم طبعا مرينا من عند النادي عشان نطلع وكانت الاشاره حمرا يووه يالفضيحه اللي جنبنا وورانا وقدامنا شباب طالعين من السياره ويشجعون وحنا ظهورنا راحت فيها رووسنا عند رجلينا مانبي احد يشوفنا..
وربي اننا نمشي 160 وكل شوي نقول ايه اللي قدامنا داقين الفلشر (( البلاشر على قولة الدبشه اللي معي( بلاشر على الخدود) اسمه فلشر)) اكيد انهم السيارات اللي ورا الباص بسرعه الحقهم وامهاتنا يدقدقون علينا يالجوالات وينكم ..؟؟
ونقولهن هذانا عند النادي نحتريهم
المهم بتلنا ماسكين الخط والدربيل يدور بيننا بالسياره نحاول نشوف الموكب
وشيئا فشيئا (( رجعنا للفصحى)) بدأ اليأس يتسلل لقلوبنا ... والله نمشي ولا بين احد
قلنا خلاص تعدينا البدايع ولاشفنا احد رجعنا وبالرجعه وقفنا عند محطه (( وانا باقي في داخلي بصيص من امل)) قلنا نسال الهندي حق المحطه ..!!
(( محمد فيه شوف هذا دوريات ونادي مروا من هنا ..؟
ايووه من سويا هذا هلال ايجي هالحين رووه ))
قلت ايه الشكوى .. بس برضوو مابترت الامل قصدي ماقطعته .
دقيت على الفندق ورد على مصري ..
(( لو سمحت الهلال نازل بالفندق والا طالعين ..؟ لا واللهي (( بكسر الهاء)) دول اول ماخلصت المباراه مشيوا ..!!
وين مشوا ..؟
للريااااض..))
هاللحين بس استوطن وعشعش اليأس بقلوبنا وعلت محيانا خيبة الامل وبدات دموعنا تمطر بغزاره قهرا وشبة كبدا ُ وحزنا ُ على وضعنا ..
قلنا يالله خيره ماتدرون يابنات يمكن لو لاحقينهم كان ضارب علينا كفر ولا صاير لنا شئ ..!!
وبعدين حنا احسن من غيرنا على الاقل طلعنا وشفنا الناس .. !!
قالت وحده : ياويلي اللي مايطول العنب حامض عنه يقول ..!!
قالت الثانيه : والله الغبن كيف نمسح مقاطع الفيديو ونفضي الجوالات على لاشي ..!!
والثالثه تقول: ايه حنا مثل ابو نوره يوم يقول (( لو تنادي على البشر كلهم يجون الا انا من لهفتي ماجيت رحت ..)) حنا من لهفتنا رحنا عن الباص ..
ورجعنا للرس الشوارع فاضيه مافيه حس لاحد (( الشوارع فاضيه والبيت داكن والنوافذ كلها صمت وغرابه ..))
قلبناها خاطره ..
المهم دخلت البيت وانا دموعي بعيوني منقهره وربي مكسور خاطري يعني ماتسوى لهفتي وربي شلت على الهلال وحز بنفسي وشدعوااا ليه ماصبروا شوي ...؟!!
يعني وش يضر سواق الباص يوم طلع قال بالميكرفون (( يالجماهير وراناااا بنروح مع هالطريق ..!!))
على الاقل يراعون شعورنا يتجملون وربنا ماراح نلحقهم للرياض بس البدايع وراجعين ..
اصلا باين من لعبهم انهم مالهم نفس وودهم يرجعون اليوم قبل بكرا ..!!
اااه يالقهر .. ياضيقة الصدر .. عقب كل هالتخطيط والخبه .. مانشوف احد..!!!
المهم كملها الاخ الكريم الثاني دخل ومعه الاعلام مستانس كشرته من هنا الى هنااا (( وانا اضرس عليه ودي اقوم واطحنه .)) :gunbandan
.. فاتك ..<< هو قالي .. قالي هو ..!!
<< على بالها روايه انجليزيه
فاتك شفت ابو سلطان .. ياحبيله سلم علينا وحيانا لااا وياسر الياس قمة التواضع والذوق قلت له ..(( غريبه يعني ..؟؟ طول عمر الهلالي ذووق بكل الاحوال من مستوى ذووقه تحدد ميوله ..))
ويجلس يوريني مفاطع الفيديو اللي مسجلهن (( مثل مقاطع الفيديو حقاتنا ))
المهم ماعطيته وجه منقهررره وزعله احس انه لازم يرد اعتباري من الهلاليين خلاص خنقتني العبره وربي ماراح اكمل والله ماتسوى كل اللي سويناه ولا طلعنا بشئ ..
اااه ... ااااه ...

s116s s116s s116s :cry: :cry: :cry: [/align]