السلام عليكم ورحمة الله وبركاته

هلا وغلا أخواني أخواتي الهلاليين والهلاليات ..


قبل لا ابدأ بالموضوع .. أبي تعرفون شي واحد ...


أنا انسان هلالي .. وألزم ماعلي المصلحة الهلالية ... ومابراسي انقاص من أحد ... ولا مجاملة أحد ..

منتديات شبكة الزعيم من أقوى المنتديات العربية ... وليست من أقوى فقط .. بل الأقوى


فيها كتاب كبار ... ناس مثقفة وفاهمة ... ناس كبار ومحترمة ... عقليات عظيمة ..
زوارها من جميع أرجاء الوطن العربي ...

وهو تأكيد لزعامة الزعيم وقوة واتساع قاعدة الجماهيرية التي تعدت حدود الوطن ..



لذلك اتمنى من الإدارة تفهم الموضوع اللي ببدأ فيه ..

وعدم فهمه كموضوع فكرته ابخاص حق أحد ... أو الإساءة لأحد ...

بالعكس الموضوع فكرته الارتقاء بالمنتدى ... وفهم سبب الخلل اللي فيه ..
وأبي أسمع رأي المشرفين قبل الأعضاء ... مع إن الأعضاء الأكثرية ... وعندهم آراء وليس رأي واحد



كعضو من أكثر من 100000 عضو ... ورأيي يمثلني ويمثل مجموعة من الأعضاء اللي تكلمت معهم


شفت فيه انحدار حاد في مستوى قسم الجمهور الهلالي ...

مدري تقصير من الأعضاء .. أو من المشرفين ...



كنت ادخل الجمهور الهلالي ... عندي براد الشاهي ... ومبسوط حالي حال أي هلالي يشجع الهلال

أدخل أبي أشوف مواضيع ...

صدقوني الصفحة الأولى من المواضيع كنت أقراها كلها .. وأتابع الردود عليها ..

لأن المواضيع كلها جميلة بصراحة ...

فيه مواضيع اكتب ردي فيها ... واتابع الموضوع لين ينتهي ... بالاخير توصلني الفكرة .. اقنع او اقتنع ..



الوضع غير الآن ... بشكل كبير ...



أولا المواضيع .. أغلبيتها ماتعني نادي الهلال ... بالعكس ... نادي الهلال ماله طاري فيها ..


مواضيع أغلبها مكررة بشكل ممل جدا ...


مواضيع أغلبها اعلانات لمحلات تجارية ...


صارت المواضيع استفزازية اكثر منها للفائدة ...


مواضيع سب علني ... ودخول بذمم ناس ... وانتقاص من الرجال ... وانتماء لاعبين ...


مواضيع كاذبة ... تتكلم عن لاعب .. أو صفقة .. معسكر ..



ضاعت المصداقية ... وضاعت روعة المواضيع .. في شبكة الزعيم ..



والسبب بكل امانة ... المشرفين والمراقبين ...


ماشفت عمل من ناحية المواضيع ... ولا من ناحية التصرف مع الاعضاء اللي يكتبون مثل هالمواضيع


اللي تنقص من المنتدى ومن رواد المنتدى أكثر من إنها تنقص من الشخص المعني بالموضوع ..


أشوف المواضيع يتم الرد عليها بالـ40 رد إلى الـ70 ... والإشراف مايحرك ساكن ....



أبي أعرف ... هل منتدى الزعيم يسمح بالكلام هذا ؟؟


يعني هل منتديات الزعيم فتحت حرية الرأي ... بشكل انعدمت فيه الأخلاق ...


أجزم مليون بالمية .. إن المشرفين لم يروا المواضيع نهائيا .. والا كان الموضوع محذوف من قبل لايرد عليه ...

ليه المشرف مايتابع المواضيع ... دامه موجود ضمن قائمة المتواجدين ...


واذا كان ضمن المتواجدين ... وش يخليه مايتصفح المنتدى ... ويقرأ المواضيع ...


أدري متعب جدا ... إنك تتابع المواضيع اللي تنزل أول بأول ...


بس متعب ومع ذلك تطوع المشرف لأداء العمل قبل لايكون مشرف وهو عارف الوضع ...



رجاء خاص وللمرة الثانية ... أنا ماقلل من مجهود المشرفين .. لا ... أنا أقول مجهوداتهم واضحة

من خلال التغطية في الأخبار ... وقراءة شكاوي الأعضاء ...

لكن ورب البيت المواضيع فيها اهمال .. بشكل ملاحظ ...




تكرار المواضيع صار مرض وفايروس في المنتدى ... ينتشر يوم بعد يوم ....

يعني صاحب الموضوع الأصلي .. ضاع حقه .. وضاع تعبه في الموضوع ...


أدري من حق أي انسان كتابة موضوع ...



لكن انه يكرر موضوع .. هذا فيه حالتين :

1- انه يدخل يكتب موضوعه فقط ... ولا عمره اطلع على المواضيع الثانية .

2- انه بينفرد برأيه بطريقة أنانية .. من خلال كتابة موضوع .

فكل الحالتين مايستاهل ان الموضوع يتكرر ... ويحق اغلاق الموضوع ...



من ناحية المواضيع أم مصادر خاصة ...
صارت المواضيع فيها أخبار من مصادر مريخية أو من كوكب ثاني (( مصادر خاصة )) .

كل من طرأ له كتب له موضوع ... خبر أو اتصال مع لاعب هلالي .. او مقابلة ..


ليه مايتم التأكد من اللاعب نفسه من صدق الخبر ..

ولو صار كاتب الموضوع مفبرك المقابلة ... يتم شطبه من قائمة الأعضاء ..

لأن هالمواضيع فيها استخفاف بعقول الأعضاء ... وتلاعب بالمصداقية .. بحيث ماتكون الشبكة مرجع للجماهير ..

أنا كعضو ادخل الشبكة أبي خبر .. أبي شي جديد عن الزعيم ...

وفي حالة كل يوم قاري لي خبر ... وبالأخير يطلع غير صحيح ...

مستحيل بتكون عندي الثقة إني أصدق مواضيع أو أخبار من الشبكة حتى وإن كانت صحيحة ...


وين الأجراءات الإدارية لمثل هالحالة ؟؟ .. الله أعلم



عناوين المواضيع الاستفزازية فيها ....

صار عنوان الموضوع لا يمت بأي صلة للموضوع الرئيسي ....


بعض العناوين فيها سب .. وبعضها قلة ذوق ... وبعضها يتكلم عن شي .. تدخل شي ثاني ..

وبعضها صار بشكل صريح ... مطلوب 50 رد .. مطلوب 60 رد ...


إلى هالدرجة وصلت فكرة المنتدى عند بعض الأعضاء ...


صارت المواضيع تنكتب ... ليس للفكرة .. او لابداء رأي ..


صارت فقط لجمع أكبر عدد من الردود ... وإن شاء الله لو كان الموضوع مايستاهل ...


وين الإجراء من هالنوعية من المواضيع ؟؟ .. أبدا ولا شي





مواضيع تمس لاعبي الهلال ... بشكل تعدى منطق الانتقاد بعشرين كيلو ...
صار فيه تجريح ...


وكل يوم لاعب .... من المفرج .. لعزيز ... للفرج .. للموري ... للجمعان ... للبرقان ... والقادم أكثر


تجريح ... ومطالبة بألغاء عقود ... والدخول بالنوايا ... وخرابيط وكلام فاضي ..

والنتيجة ...


ضياع ثقة اللاعب في نفسه ... جرح اللاعب ... كره اللاعب للجماهير وهذا يقلل ولاؤه للنادي ..

وماينلام ... لانه يكون تحت ضغط ... مايخليه يفكر..


إلى الآن ماشفت مواضيع تطبب على ظهر لاعب .. او تطالبه بتقديم مستوى أفضل ..
إلى قلة من المواضيع اللي كتبها ناس تفهم ...

صار همنا التجريح فقط ... وسب الآخرين .. ونعتهم بأسماء ليست أسماؤهم ...


الاتحاد والبلوي وجستنيه وغيرهم من النصراويين والاتحاديين وباقي الجماهير الحاقدة والكتاب المتعصبون ..


كلهم مايستاهلون ذكرهم في المنتدى .... ولايستاهلون إننا ناخذ ذنوبهم ...
وعشان وش ..؟


المشكلة وقمة الغباء ... إننا نكتب بمنتدانا عنهم ..


يعني لو بمنتداهم بيكون الوضع أخف ... ولو إنه غلط ...



الانقاص من الآخرين موب من طبع الهلاليين ..


الهلالي يرتقي الذوق .... ويكبر بالانتصارات ... ويتزعم بالبطولات ...

وباقي الأندية وجماهيرهم نترك لهم الأسلوب الهمجي ....

اللي يعتمد على الانتقاص من الآخرين للوصول لمستواهم .. وليس الارتقاء لهم للوصول لمستواهم ..

شباب حنا ناس غير .. ولا تخلوننا نكون مثلهم ... ولا تعاملون المثل بالمثل الا بالشي الحسن ...

اما الشي الشين والغلط مافيه شي اسمه تعامل مثل بالمثل ...


لكن ... شفت إجراء لمثل هالمواضيع ومثل هالأعضاء .... نهائيا ..





التصاميم تملأ قسم الجمهور الهلالي ...
يعني مافيه منتدى تصاميم ... !؟!؟


أنا أعرف إن المصمم يبي الشكر ورأي الأعضاء بتصميمه .. فيدور المكان المزحوم بالاعضاء ...

لكن كثر التصاميم .. تضيع المواضيع اللي الواحد داخل الجمهور الهلالي عشان يقراها ...

لازم تفتح الصفحة الثانية والثالثة لين تلقى موضوع يهمك تقراه ...

ليه مايتم نقل أي تصميم مع وضع الرابط حقه ... ؟؟



موضوع ثاني ... كثرة الأسئلة عن لاعب .. وخلافه ... من أمور النادي ..
عضو يكتب موضوع يسأل ..

ليه مايكون فيه قسم مثل ماذكر أحد الأعضاء خاص بالأسئلة ...


واللي يجاوب يكون شخص قريب من النادي ... ويعرف عن اللاعبين والنادي ..



أتمنى من الإدارة الانتباه لهالشي ...




شي أخير ....


هل مواضيعنا ومطالباتنا وآراءنا تصل اللاعبين وإدارة النادي ...؟؟
ليه ماشفنا الجمعان يدخل المنتدى ويبدي رأيه فيما كتب الأعضاء ...

ليه مانشوف خبر من إدارة الأخبار عن سمو الأمير ورأيه في مطالبة عفو أو إيقاف ...

ليه مانشوف شكر من لاعب .. أو تأسف ..


كيف نعرف وصول كلامنا وقراءة مواضيعنا ...؟؟



إذا ماوصلت للمعنيين بالمواضيع ..... وش الفايدة من كتبها ؟؟؟

صرنا نرد على بعض .. أعضاء وأعضاء ...


بينما المقصودين من الموضوع مانشوف لهم خبر ...


سامي أكيد قرأ مطالبة الجماهير بالرجوع عن الأعتزال ...

قرأ مطالبة الجماهير بالبقاء مع الهلال وعدم الذهاب لأنجلترا ...


قرأنا خبر من الرياضية ... ولم نرى سامي ينفيه أو يؤكده ....


وليس سامي فقط ...

كل اللاعبين ... أخبار عنهم في الصحف .... ولا نرى تأكيد من اللاعب نفسه ...


مع العلم .. أن الشبكة أحق من أي صحيفة بالعالم في معرفة حقيقة الخبر المنشور ...


متى نرى التواصل من الإدارة واللاعبين مع أعضاء الشبكة جماهير الزعيم .... ؟


متى نرى المناقشات والأخذ بالرأي ...؟



والله لو الجمعان كتب موضوع يتأسف للجماهير ويطلب دعمهم في الفترة الحالية ...

والله والله بيجبر بخاطرهم ... وبيوقفون معه وقفة ترجعه لمكانه الطبيعي في خط هجوم الهلال ..









أنا هذا اللي عندي من ملاحظات ... ومن كلام أقدر أقوله ...

وهذا اللي حضرني في الوقت الحالي ....


ومع ذلك أطالب الأعضاء بكتب أي شي يشوفونه في المنتدى من الممكن اصلاحه ..

لنكون أرقى شبكة فكريا وثقافيا وأخلاقيا ...


إجراءات اتمنى اتخاذها واعتمادها ...
## ايقاف أي عضو يسيء للاعب هلالي أو أي انسان يشمل هذا الكيان .

## اقفال المواضيع المكررة ووضع رابط للموضوع الرئيسي فيها .

## إنذار أي عضو يتطاول على رئيس نادي أو لاعب من نادي آخر بكلام منافي للأخلاق وفي حالة التكرار يتم إيقافه فترة .

## انذار من يكتب مواضيع القصد منها دخول الاعضاء فقط وردودهم .. في حالة التكرار يتم ايقافه عن كتابة المواضيع .

## التاكد من صحة المواضيع اللي من مصادر خاصة .. وفي حالة فبركتها يتم شطب العضو .

## وضع جائزة لأفضل تصميم .. ويمكن تكون موجودة بس ماسمعت فيها .

## تكريم الأعضاء وشكرهم .. واختيار أفضل موضوع للشهر .. وأفضل سبق اعلامي .. وأفضل تغطية إعلامية .

## نقل أي موضوع مايخص الهلال من قسم الجمهور الهلالي .. مع انه هذا الي صاير بس ماشوف نقل

## تنزيل مواضيع تبين رأي لاعب أو عضو شرف من بعض الآراء اللي بالمنتدى عشان نعرف إن أصواتنا وصلت للمعنيين .



هذا اللي أقدر أقول ... وآسف لو قسيت بشي ... والعذر والسموحة لو في كلامي غلط ...

موضوع مايخص قسم الجمهور الهلالي ....

نقلة كبيرة عندما وضعت إدارة المنتدى شات الزعيم ..
صار اغلب وقتنا في الشات ... أخوان وأصدقاء ...

مشرفي الشات الحمد لله قايمين بواجبهم على أكمل وجه .. والحمد لله ..


لكن لسهولة التسجيل ... صار بعض المندسين يسجلون بالمنتدى لغرض احداث مشاكل بالشات ...
واطلاق السنتهم الملطخة بكلام شوارعي ... من سب للجماهير الهلالي وللكيان الهلالي ..

ومن هالموضوع .. أناشد إدارة الشات بوضع تشفير لبعض الكلمات ... الخارجة عن الأخلاق
واللي ماتمثل رواد هذا الشات اللي انا أولهم ...

لأن الشات صار جزء لايتجزأ من حياتي الانترنتية

تمنياتي للزعيم ولجماهيره بالسعادة والتوفيق ... والمزيد من الافراح والانتصارات ....


أخوكم أبو ساري