#1  
قديم 06/09/2005, 07:09 AM
زعيــم مميــز
تاريخ التسجيل: 11/12/2004
المكان: السعودية - الرياض
مشاركات: 1,659
ثالث ثانوي على كف عفريت (دعوة للمناقشة)

[align=center]السلام عليكم ورحمه الله وبركاتة
شخبارركم إن شاء الله بخير

مثل منتم عارفين الدراسه مابقى عليها الا كم من يوم ,,
عشان كذا حبيت اناقشكم مناقشه سريعه عن ثالث ثانوي (التحديات و المطلوبات)
لان مثل منتم عارفين ثالث هي الزبدة ,,عشان كذا نبي الكل يشارك ويفيدنا
يعني اللي مثلي في ثالث نبي نعرف وش استعدادته وهو ناوي هالسنه يسوي شئ او يخليها مثل غيرها
ونبي نعرف راي اللي مروا على هالمرحلة وكانت لهم من افضل المراحل وش كان نظامه في ذاك الوقت وكل صغيرة وكبيرة من الممكن انها تفيدنا
ونبي راي المدرسين والمدرسات اذا وجدوا
ويبقى السؤال
ماهو المطلوب في ثالث ثانوي؟

ــــــــــــــــــــــــــــــــــــــــــــــــــــــــــــــــــــــــ

وأبي رايكم بعد في دراسه الأنجليزي باحد المعاهد خلال العام الدراسي
هل بتشكل برايكم ضغط او لا ؟
لأني بصراحه ودي اتعلم قليمزي

أنا اتمنى مشاركة الجميع سواء من اصحاب الخبرة او من هم مقبلين على هذا التحدي ,,
وسأبوح بما لدي عندما اسمع رايكم

سلامي لكم
[/align]
اضافة رد مع اقتباس
  #2  
قديم 06/09/2005, 07:21 AM
فيو
تاريخ التسجيل: 25/01/2002
المكان: .. الحـــبيــ الرياض ـبـه ..
مشاركات: 15,376
[align=center]
هـلا بـك ،،،

إقتباس
ونبي نعرف راي اللي مروا على هالمرحلة وكانت لهم من افضل المراحل وش كان نظامه في ذاك الوقت وكل صغيرة وكبيرة من الممكن انها تفيدنا

نظامي مثل نظامـ كل سنـه
أول ماجي أحط رأسي وأنامـ ولا أقومـ إلا العصر أو المغرب إذا قمت طلعت ثمـ رجعت ودخلت نت إلى الساعـه 1 .. بعد الساعـه وحدهـ أرتب دروسي وأنامـ
وإذا مافيني نومـ رحت مواصلـه

يعني ماعمري خبرت فتحت كتاب وجلست أذاكر من دون أختبار ... الحين تطورت إذا صار علي أختبار ماذاكرت ع حسب المزاج ،،،

نصيحـه لا تناظر نظامي وتندمـ ... لآن ترى ماجبت نسبه كويسـه جبت في الثمانين ،،،،

إقتباس
وأبي رايكم بعد في دراسه الأنجليزي باحد المعاهد خلال العام الدراسي
هل بتشكل برايكم ضغط او لا ؟

كان درست بالإجازهـ ... نصيحـه لاتدرس خل كل تركيزك ع ثالث ثانوي
وبعد ماتخلص خذ لك دورهـ




بالتوفيق لكمـ ... وترى ثالث مافيهـا ضغط نصاااب اللي يقولكمـ أنها ضغط
دجخلت وطلعت منها بسلامـ لا ضغط ولا يحزنون

ع فكرهـ ... ترى صعب جداً عليك تغيير النظامـ
أتذكر كنت أقول إذا جيت بثالث بدرس ولا راح أفكر أطلع ولا راح أدخل نت .. جت وراحت وأنا ع حالي ولا غيرته
النت ماتركتـه أتذكر أدخل وأزعـج اللي في المنتدى وأقولهمـ أدعوا لي بكرا ع أختبار







بالتوفيق للجميع











الفيروسه الزرقاء [/align]
اضافة رد مع اقتباس
  #3  
قديم 06/09/2005, 07:28 AM
زعيــم متواصــل
تاريخ التسجيل: 18/08/2005
المكان: AL REEM
مشاركات: 86
أسأل الله التوفيق ... قبل كل شيء........
اضافة رد مع اقتباس
  #4  
قديم 06/09/2005, 07:54 AM
الصورة الرمزية الخاصة بـ صدى الامس
عميد المجلس العام
وعضو سابق بلجنة تطوير المجلس العام
تاريخ التسجيل: 26/02/2001
مشاركات: 4,222
[align=center]
هلا ..][ فـهـد ][.. ..

أول شئ الله يوفقك ويسهل امورك وكل مسلم يارب . .


والله يعينك على ثالث .. سنة ترفع الضغط وتجيب الهم :sad: ما يمديك تحك رأسك من صعوبتها ومن الكرف اللي فيها













لا تكون تحطمت بس


يالغالي ثالث ثانوي .. على حسب نظامك .. كان نظامك في السنوات اللي قبل حلو وتذاكر اول بـ أول صدقني تمشي معك زي الحلاوه لان ما فيه شئ يتغير .. لكن ان كان نظامك مشي حالك .. وذاكر وقت الإختبار بس صعب انك تجيب نسبة كبيرة وحلوه ..

يعني مسألة انك تبي تغير النظام اللي متعود عليه هذا شئ مستحيل ..

إقتباس
ونبي نعرف راي اللي مروا على هالمرحلة وكانت لهم من افضل المراحل وش كان نظامه في ذاك الوقت وكل صغيرة وكبيرة من الممكن انها تفيدنا

النظام عندي كان .. اول ما ارجع أحل الواجبات (( يووووه والله يالكلمة ذي قديمة الحين صرنا نقول وين الواجبات ;) )) هذا اذا كان فيه واجبات .. وانسى ام الكتب وشكلها بعد .. وآخر الليل رتب دروسك وبس .. طبعاً كل واحد واللي تعود عليه اول شئ كنت مسوي نفسي بذاكر اول بـ أول .. اول اسبوع قلت ما فيه شئ .. الأسبوع الثاني ايه تونا وانت ماشي لين آخرتها قفلت معي وقلت انا منب كفو اني اسوي نفسي دافور .. لكن الحمد لله جبت نسبة اكثر من حلوه وكانت من احسن سنوات الدراسة ليه ما ادري

<< تراه داخل شرعي يعني لا تأخذ بــ كلامه



إقتباس
ماهو المطلوب في ثالث ثانوي؟

المطلوب اشياء واشياء .. اهمها انك تعدل نظامك .. يعني كل يوم لازم تذاكر وكل يوم لازم تراجع .. بس مب كل وقتك !! ترى قسم بالله ساعة تكفيك وزياااادة لا تتعب عمرك وتكره عمرك في الدراسة .. اهم شئ تركز على الدراسة ولا تنتبه لـ أي شئ يشتت تركيزك .. ما اقول خلك 24 ساعة على الكتب .. لا .. لكن وازن بين كل الامور وخل الدراسة هي الأولى ..

إقتباس
وأبي رايكم بعد في دراسه الأنجليزي باحد المعاهد خلال العام الدراسي
هل بتشكل برايكم ضغط او لا ؟

ليتك أخذتها في الإجازة يكون احلى وتكون متفرغ لها بشكل تام ..

شف هي ما راح تشكل ضغط إذا كنت مرتب امورك من قبل .. يعني اللي تعودت عليه في السنوات اللي فاتت .. كانك متعود والله على تنظيم الوقت وكل شئ صدقني ما راح تغير ولا تشكل ضغط ..
لكن من الأفضل والأحسن انك تخلي تركيزك على ثالث وانت ابخص ;) ..


ربي يوفقك ان شاء الله ..






برايفت فيو ..

إقتباس
دجخلت وطلعت منها بسلامـ

[/align]
اضافة رد مع اقتباس
  #5  
قديم 06/09/2005, 07:58 AM
رحمه الله واسكنه فسيح جناته
تاريخ التسجيل: 19/08/2003
المكان: الرياض عاصمتنا الحبيبة
مشاركات: 3,703
Post

[align=center]

لي عودة
مشكلة الصيف لازم تشيك على موية رديتر الكمبيوتر ولا يعلق

[/align]
اضافة رد مع اقتباس
  #6  
قديم 06/09/2005, 08:00 AM
فيو
تاريخ التسجيل: 25/01/2002
المكان: .. الحـــبيــ الرياض ـبـه ..
مشاركات: 15,376
[align=center]^
^
^
^
والله كنت أبي أعدلهـا حتى أقول بسرررررعـه قبل لايجي صدى ويمسكهـا
بس كل ماعدلتها علق علي قلت طحتي في مصيدة صدى
مالك إلا الإستسلامـ
[/align]
اضافة رد مع اقتباس
  #7  
قديم 06/09/2005, 09:42 AM
زعيــم مميــز
تاريخ التسجيل: 11/12/2004
المكان: السعودية - الرياض
مشاركات: 1,659
[align=center]ياهلا بكل اللي شاركوا

الفيروسة الزرقاء

إقتباس
نظامي مثل نظامـ كل سنـه
أول ماجي أحط رأسي وأنامـ ولا أقومـ إلا العصر أو المغرب إذا قمت طلعت ثمـ رجعت ودخلت نت إلى الساعـه 1 .. بعد الساعـه وحدهـ أرتب دروسي وأنامـ
وإذا مافيني نومـ رحت مواصلـه


أتوقع في ذاك الوقت آخر شئ تفكرين فيه الدراسه ,,نظام عجيييب

إقتباس
يعني ماعمري خبرت فتحت كتاب وجلست أذاكر من دون أختبار ... الحين تطورت إذا صار علي أختبار ماذاكرت ع حسب المزاج ،،،

الأولى هذا نظامي السنه اللي طافت ,, لكن الثانيه ماقد جربتها
تدرين بجربها وبرد لك خبر بس على مسؤؤليتك << بدينا

إقتباس
كان درست بالإجازهـ ... نصيحـه لاتدرس خل كل تركيزك ع ثالث ثانوي
وبعد ماتخلص خذ لك دورهـ

عاد والله كنت ناوي أخذها بالعطلة لكن ماقدرت اقاوم النوم والطلعات
بصراحــة متحسف كثييير لاني ماخذتها بالصيف :sad:

إقتباس
بالتوفيق لكمـ ... وترى ثالث مافيهـا ضغط نصاااب اللي يقولكمـ أنها ضغط
دخلت وطلعت منها بسلامـ لا ضغط ولا يحزنون

أكييد على مسؤؤليتك مافيها ضغط << من اليوم وهو يحملك مسؤؤليات
اتمنى كذلك ,,
والله يوفق الجميـع

إقتباس
ع فكرهـ ... ترى صعب جداً عليك تغيير النظامـ
أتذكر كنت أقول إذا جيت بثالث بدرس ولا راح أفكر أطلع ولا راح أدخل نت .. جت وراحت وأنا ع حالي ولا غيرته
النت ماتركتـه أتذكر أدخل وأزعـج اللي في المنتدى وأقولهمـ أدعوا لي بكرا ع أختبار

هذا اللي انا خاايف منه كيف اغير النظام انا اتوقع بيصير لي مثل ماكنت تقولينه
بترك النت وكل وقتي بذاكر ,,ومن هالكلام وفي الأخير يطلع ماعندي الا الدجة
النظام هو المشكلة

أسعدنــي تواصلك فيــّو ,,

[line]
ابو ريم
ياهلا بك اخوي
إقتباس
أسأل الله التوفيق ... قبل كل شيء........

اسال الله التوفيق لي وللجميع
شكراً على الأضافه

[line]
صدى الامس
اهليييييييييين وسهلييين وميه مرحبتييييييييين

إقتباس
والله يعينك على ثالث .. سنة ترفع الضغط وتجيب الهم ما يمديك تحك رأسك من صعوبتها ومن الكرف اللي فيها

(وجة انقلب لونه ازرق من ردة الفعل السلبية )

إقتباس
يالغالي ثالث ثانوي .. على حسب نظامك .. كان نظامك في السنوات اللي قبل حلو وتذاكر اول بـ أول صدقني تمشي معك زي الحلاوه لان ما فيه شئ يتغير .. لكن ان كان نظامك مشي حالك .. وذاكر وقت الإختبار بس صعب انك تجيب نسبة كبيرة وحلوه ..

انا نظامي نذاكر قبل الاختبار ,,لكن بكل تاكيد اطمح لتغييره
وهينا مربط الفرس ,,لان تغيير نظامك مو بالأمر السهل ولكن على الاقل بحااول جاهداً الاضافه علييه

إقتباس
يعني مسألة انك تبي تغير النظام اللي متعود عليه هذا شئ مستحيل

راحـت علي


إقتباس
النظام عندي كان .. اول ما ارجع أحل الواجبات (( يووووه والله يالكلمة ذي قديمة الحين صرنا نقول وين الواجبات )) هذا اذا كان فيه واجبات .. وانسى ام الكتب وشكلها بعد .. وآخر الليل رتب دروسك وبس .. طبعاً كل واحد واللي تعود عليه اول شئ كنت مسوي نفسي بذاكر اول بـ أول .. اول اسبوع قلت ما فيه شئ .. الأسبوع الثاني ايه تونا وانت ماشي لين آخرتها قفلت معي وقلت انا منب كفو اني اسوي نفسي دافور .. لكن الحمد لله جبت نسبة اكثر من حلوه وكانت من احسن سنوات الدراسة ليه ما ادري

ياقدمي واجبات اذكر اخر مرة حلييت فيها الواجب في البيت يوم اني في الابتدائي
حتى امي كنت تحلة موب انا
صدى قرب اذنك شوئ ,,لاتكون انت واحد من اخوياي والله أنك نفس نظامي سبحانه وقدرو عليييك ,,الاتكاليه هذي الخوف منها كل يوم نأجـل

إقتباس
<< تراه داخل شرعي يعني لا تأخذ بــ كلامه

قبح الله ردك ,, مو مشكلة نستفيد


إقتباس
اهمها انك تعدل نظامك .. يعني كل يوم لازم تذاكر وكل يوم لازم تراجع .. بس مب كل وقتك !! ترى قسم بالله ساعة تكفيك وزياااادة لا تتعب عمرك وتكره عمرك في الدراسة .. اهم شئ تركز على الدراسة ولا تنتبه لـ أي شئ يشتت تركيزك

صحيح كلامك ساعه او ساعتين تكفي يومياً ,,والاهم الانتباة لشروحات المعلم
والواحد احسن له يخلي عنه الفهاوة اثناء الشرح
بكل تاكيد افدتني بهذه الاسطر القليله

إقتباس
ليتك أخذتها في الإجازة يكون احلى وتكون متفرغ لها بشكل تام

:sad: قهـــر


إقتباس
شف هي ما راح تشكل ضغط إذا كنت مرتب امورك من قبل .. يعني اللي تعودت عليه في السنوات اللي فاتت .. كانك متعود والله على تنظيم الوقت وكل شئ صدقني ما راح تغير ولا تشكل ضغط

بالنسبه لـ تنظيم الوقت عندي أسمع بالشئ هذا صراحة
مع اني ودي انظم وقتي بس ماقد ضبطت معي ,,
اتوقع راح تكون صعوبه كبيرة لان مافيه وقت يمديك تروح للمعهد
متى تنام ومتى تروح ومتى ترجع ومتى تخش النت والله حوووووسه :sad:
اشك انها بتسوي ضغط


إقتباس
ربي يوفقك ان شاء الله ..

ويوفق الجميع

صدى يادب ,, وش فيك على فيـــّو والله مستقعد لها بقوة ,,
أسعدتني هالاضافه كثير ياصدى

[line]
لوحة مميزة
ياحبني لك يااخي

إقتباس
لي عودة
مشكلة الصيف لازم تشيك على موية رديتر الكمبيوتر ولا يعلق

كلها منك الله يهديك قايل لك لاتشغل المكيف وانت على النت بس ماسمعتني ,,
يالله الحين توهـق دور لك ورشه فاتحة على هالصبح

شكرا للجميع على المشاركة

في انتظار البقية
سلامي لكم
[/align]
اضافة رد مع اقتباس
  #8  
قديم 06/09/2005, 10:45 AM
زعيــم مميــز
تاريخ التسجيل: 17/05/2005
المكان: قلب الزعيم
مشاركات: 2,235
نصيحه واسئل مجرب اجتهد كلها كم شهر وتخلص لاتكاسل

وبعدين اخر السه اذا رحت تقدم يحذفون الملف وبجهك
اضافة رد مع اقتباس
  #9  
قديم 06/09/2005, 12:23 PM
زعيــم مميــز
تاريخ التسجيل: 21/06/2004
مشاركات: 2,846
هلا بك اخوي فهد . .

اول شي الله يوفقك ان شاء الله وهاذي السنة هي الزبدة شد حيلك عشان ترتاااح ;)


نظام المذاكرة : اذا ماكنت متعود من اول على نظام مذاكرة صدقني بتتعب وفي النهاية

ماراح تقدر تضبط مذاكرتك على النظام اليومي ، انا حليتها بحركة حلوة وهي اني جبت

مدرسين خصوصيين وصرت اتابع معاهم المواد بحيث اني اراجع معاهم واسترجع معاهم

ومنها تذكير والله اني ارتحت


الاشياء المطلوب انك تركز فيها : المواد العلمية اهم شي الرياضيات تنقص درجة بست درجات

والكيميا والفيزيا والانجليزي والاحياء الدرجة بأربع درجات يعني كسر ظهر حاول انك تركز

عليهم من بداية السنة عشاان تقدر تجيب نسبة محترمة في الفصليين وطبعا لاتجحد الموااد

الثانية بس ركز على المواد العلمية اهم شي


اختبار القدرات : اختبر الاختبارين الاول والثاني لانه يعوض النقص الي يجي في النسبة وكل

مازادت درجة القدرات كل ماصارت نسبة قبولك في الجامعة اكبر


دورة الانجليزي : انا انصحك خلك في دراستك حاليا والدورة لاحق عليها في الصيفية الجااية

وان كنت تبي الجد انا ماانصحك تاخذ دورة ابدا في السعودية اطلع برا لبريطانيا وادرس هناك

يكفيك على الاقل انك بتمارس اللغة مع ناس بس هنا مااعتقد بتحصل هالميزة


ختاما الله يوفقك ويوفق كل طلاب ثالث ثانوي ان شاء الله



سلااااااااااااااااااااام
اضافة رد مع اقتباس
  #10  
قديم 06/09/2005, 01:51 PM
زعيــم متألــق
تاريخ التسجيل: 23/08/2004
المكان: الـريــV.I.Pــاضـ
مشاركات: 1,058
[align=center]

هلا فهـد .. وموضوع جيّد للتناقش

أنا مشكلتي مشكله ياخوك .. من أولى متوسط إلى ثاني ثانوي ماقد حليت واجب أو حفظت أو شي من هذا القبيل .. أحتري الإختبارات تجي وأذا جت ورقتين تحفظهم وتخش الإختبار وأنتهى الأمر ..

كذلك الحال سنطبق عندي في ثالث في الفصل الدراسي الأول .. أنا لا أنكر أني راح أجيب مدرس رياضيات وكيمياء وأنقلش فقط لاغير .. خصوصاً هذا الفصل اللي هو الفصل الأول عشان أجيب نسبه بنت كلب

وأنت عارف نظامي وصعبه أغيره .. لأني أعرف غيري كثير طلعوا من ثالث ..

مثلاً قال واحد منهم :

دخلت على ثالث وأنا كلي همه وإجتهاد أتابع كل درس وأراجعه بالبيت يوميا أسبوع أسبوعين يوم جا الثالث بديت أأجل والرابع ألين سحبت كلياً .. والسبب يرجع لأن هذا الأخ العزيز مثل نظامي النايم ما قد ذاكرت أبد في حياتي وسط السنه وأذا جا المصري يشرح مغير فهاوه ولا قشم حب ولا طقها علك ولا سولف أذا المدرس زلابه

وثاني يقول .. أهلي ضغطو علي بالمذاكره وأنا كني تحست شوي وصرت اذاكر وجبت بالفصل الأول 92% بجهود واحد من اللي قدامه .. والفصل الثاني جااب 71 يوم أنكب وماصار أحد قدامه !!

( أعتمد على غيره ) وصار يموه على أهله أنه يذاكر ( الدلخ )

أكيد عرفته يافهد

عموماً أنا زي ماقلت لك .. مدرسين خصوصيين للمواد العلميه .. ماراح أجيبهم من بداية السنه ( لا لا ) راح أدرس كذا اسبوعين ثلاث .. بأشوف كيف المدرسين وشرحهم وبأشوف اللي أحتاج أني أجيب مدرس للماده الفلانيه

مع أني متأكد أن البلا فيني ولو بيدي الأمر جبت كل المدرسين ( خخخخخخخخخخ ) يعني ما أتوقع المدرسين اللي عندنا وأنت خابرهم مش كويسين .. بس البلا في الفهاوه المشكله يقولون أني ذهين نوعا ماا بس لين شرح المصري عجزت أفهم لابوها من دراسه

أنا بأبدا السنه كالسنوات الماضيه .. بنشوف ونحلل ونستنتج وقبل الأختبارات كذا بأسبوعين نجيب لنا مدرسين خصوصيين حول ثلاثه كذا .. ويستمرون إلى نهاية الفصل وإلى نهاية السنه إذا كانو منتازين

أهم شئ يارجال نطيع الله ونأدي الفروض ونطيع الوالدين ( مو هالسنه بس ) لا كل السنين عشان التوفيق .. وأنا متأكد أن فيه ناس من جنبها بس جابو نسب عاليه كله من دعوات الوالدين ورضاهم عليه ورضا الرب أولا وأخيرا عليك


الله ييسر .. وبتستنتج مع الوقت أني ماراح أتغير صالح هو صالح اللهم مدرسين خصوصين ومذاكره قبل الأختبارات بفتره بسيطه بس


بالتوفيق للجميع .. تحيتي القلبيه لك

أخوك
[/align]
اضافة رد مع اقتباس
  #11  
قديم 06/09/2005, 02:17 PM
خبير سيارات
تاريخ التسجيل: 15/02/2005
المكان: USA, CO
مشاركات: 5,499
[align=center]
إقتباس
ونبي نعرف راي اللي مروا على هالمرحلة وكانت لهم من افضل المراحل وش كان نظامه في ذاك الوقت وكل صغيرة وكبيرة من الممكن انها تفيدنا
ونبي راي المدرسين والمدرسات اذا وجدوا
ويبقى السؤال
ماهو المطلوب في ثالث ثانوي؟

السلام عليكم

انا خلصت الثانوي و الحمد لله على النتيجه

النتيجه اللي تخرجت به هي 88,65%

شوف اخوي فهد

مرحلة ثالث ثانوي مرحله نفسيه و انا الاختبار النهائي من الوزاره نفس الكلام

كلها وجع راس و شيلة هم و ضغط و سكر و كل هالامو

ر بس تراها مرحله نفسيه

لا تعقد نفسك

نصيحتي لك

رتب جدولك اليومي

بحيث يكون وقت للراحه و وقت للدراسه ووقت للمدرس الخصوصي و وقت للوناسه زي الطلعه و النت و زي هذه الاشياء

بعدين سالفة المدارس الاهليه و الدرجات لا تهمك

اذا انت في مدرسه و مرتاح فيها و مدرسينها ممتازين لا تغيرها

انا تخرجت من مدرسه حكوميه و مدرسيناها ممتازين خاصه حق الكيمياء و الاحياء

بعدين نصيحه مني

لا تهتم في الاسئلة المهربه او اللي تسربت

تراها ما تفيدك في شي

الا اذا بغيت تعرف طريقة الاسئله فهذه انا ايدك فيها لاني كنت اسويها

كانت عندي اسئلة الرياضيات و الكيمياء و الاحياء و الفيزياء كلها للاربع العوام اللي قبل اختباري

والحمد لله استفدت منها شوي

احرص على الحل بيدك اذا تذاكر الرياضيات

لان الكتابه تدخل لك المعلومه في راسك و تثبت لمده طويله

لا تعتمد على الحفظ الا لمواده
ــــــــــــــــــــــــــــــــــــــــــــــــــــــــــــــــــــــــ

إقتباس
وأبي رايكم بعد في دراسه الأنجليزي باحد المعاهد خلال العام الدراسي
هل بتشكل برايكم ضغط او لا ؟
لأني بصراحه ودي اتعلم قليمزي

والله زي ما قالوا لك الشباب

لو انك مستثمر وقتك في الاجازه و داخل لك معهد انجليزي افضلك

و من ناحية انها بتسبب لك ضغط

فهذا شي اكيد

لان ماراح يكون عندك وقت للدراسه و المدرس الخصوصي و الوناسه

إقتباس
أنا اتمنى مشاركة الجميع سواء من اصحاب الخبرة او من هم مقبلين على هذا التحدي ,,
وسأبوح بما لدي عندما اسمع رايكم

اتمنى اني افدتك في النصايح اللي عطيتك اياه

ونشوف ردك علي[/align]
اضافة رد مع اقتباس
  #12  
قديم 06/09/2005, 06:46 PM
زعيــم مميــز
تاريخ التسجيل: 05/07/2001
المكان: الرياض
مشاركات: 5,074
استجابة دعوة :

أخي فهد ،،،

هي سنة من سنين عمرك و إن لم تبتديء بعد فما هي إلا أيام ستمر كاللحظات و تصبح ماضياً إن أحيانا الله ..

تذكر ( و ما خلقت الجن و الإنس إلا ليعبدون ) ..

قد لا نشهد نهاية العام ؟! و إن شهدناه سنضحك سوياً على هم حملناه !!

أخي لا تحفل بشيء ! فمن يعلم أين يكون الخير ؟! فقد يكون الخير في ما نكره و قد يكون الشر في ما نحب ؟!

خذ الأمر ببساطة و لا تحملن الأمور أكثر مما تحتمل ..

ابتعد عن الشد ، أقبل على الدراسة برغبة ، استمتع بها ، لا تمارسها كواجب و مارسها كوسيلة تريد بها تحقيق بعض أهداف حياتك ..

لا تزد من الضغوط ( معهد لا ) و استرخ بالقدر الذي تستطيعه ..

لا تنسى بأن الكلية التي ستدخلها محددة ليس من الآن ؟! و إنما من سنين أقل بأربعة أشهر من سنين عمرك الحالي !!

ابذل الجهد البدني الذي لا بد و أن ينتهي ، و ابتعد ما استطعت عن الجهد النفسي ..

تذكر أيضاً أن الرزق مقسوم و الأمر محتوم و أن ما أنت ماض فيه ليس إلا سبب ! حكمة الخالق ( و جعلنا لكل شيء سببا ) ..

الابتدائية .. المتوسطة .. الثانوية .. الجامعة .. العمل .. مراحل حياتية زمنية ليست بحد ذاتها الهدف من الحياة !!

إقرأ حرفي و لا يدعونك للخمول و لكن شد العزم بقدر معلوم ، فلست بحاجة إلى أن أذكرك بأن هذه السنة قد تؤثر في مسيرتك بعد التخرج من الثانوية ..

حقك علي و على كل محب : وفقك الله لما يحبه و يرضاه ..

اللهم أعط فهد ما تمناه @ و بلغه من خير الدارين مناه

تحياتي لك يا رجل و استبشر خيراً ..

نظامي لم يتغير في أي من السنين باستثناء السنين الأولى بالطبع ..
عودة فعادة النوم ( القبيحة ) !! فقط حل الواجبات و المذاكرة فقط في ليالي الاختبارات ..

ليس هو الأسلوب المثالي و لكن حاول أن تخصص جزءاً من جدولك اليومي للمذاكرة و لو ساعة واحدة ..
و لتحقيق أعلى النسب في نهاية العام راجع أسئلة الوزارة للسنوات العشر الأخيرة بتركيز يفوق التركيز على المنهج !! فهم يدورون في نفس الحلقة و لا بد أن تلاحظ ذلك بنفسك ما إن تبدأ في مراجعتها ..
اضافة رد مع اقتباس
  #13  
قديم 06/09/2005, 07:01 PM
الصورة الرمزية الخاصة بـ واحد زاحف
زعيــم مميــز
تاريخ التسجيل: 30/01/2004
المكان: الرياض >><< ريدنق
مشاركات: 3,566
[align=center]بجيكم اول يوم اناظر واطبق :p ..

الحين بفلها ..[/align]
اضافة رد مع اقتباس
  #14  
قديم 06/09/2005, 08:16 PM
موقوف
تاريخ التسجيل: 29/04/2004
المكان: في اللفة !
مشاركات: 7,555
استعن بالله أولا ..!!


بالنسبة للنظام اليومي .. فكل بحسب طبيعته ..!!


لكن نصيحة من محب .. لا تتجمع عليك الدروس .. وخذ كل يوم بيومه ..!!


واذا مرة مرة .. خربت يعني .. جمعها لنهاية الأسبوع ..!!


ولا تتساهل أكثر من كذا ..!!



وبالنسبة للدورة .. كان دخلت دورة بالعطلة طيب ..!!

أو انك تآخذها الإجازة الجاية ..!!




شقرن ..!!
اضافة رد مع اقتباس
  #15  
قديم 06/09/2005, 11:48 PM
زعيــم مميــز
تاريخ التسجيل: 21/03/2004
المكان: مسنتر بالمجلس العام
مشاركات: 5,764
[align=center]اجل وراك ثالث
بالتوفيق مااعرفك انا
شف وانا اخوك ثالث بالنسبه لي كانت سنه عاديه جدا
والله العظيم ماكنت اطق لها خبر ابدا
طبعا قبل ماتبدا السنه كنت اقول براجع كل يوم واراجع دروس الاسبوع في نهايته
ومنها هالكلام طال عمرك ويشهد الله علي ماشفت من ذا شي
ليلة الاختبار افتح اذاكر
النصف الثاني كان اخر اختبار عندنا هو الاحياء ذاك اليوم فتحت الدفتر لقيت الصفحات فوق التسعين
كلها شرح ورسمات وقلق اعوذ بلله ,,, لا وبعد ناقص
قلت يارجال رزقك مكتوب على ربك وامزع الدفتر طال عمرك وهم دفوني الى 55 ونجحت
مااعلينا من هالكلام
ثالث بالنسبه للمراحل الثانويه اللي قبلها ,, اختلافها فقط هو انها اخر سنه في حياتك في المدارس
افقلني ياشيخ ان ماكانت فله وسااعه صدر وتوقيف عند باب الوكيل والمرشد كل يوم يناديك
تبي وجهة نظري احس انك شايل همها من الحين راح تتعب يابعدي
خل الوضع طبيعي المكتوب بيصير سواءا بتاخذ 98 % والا 69 % << نسبتي دجه

هي راس مالها طال عمرك ترجع من المدرسه تاخذ لك قسط من الراحه الى المغرب
لا قمت وعينت خير راجع اللي درسته اليوم بصوره سريعه وانتهى الموضوع
خلاص وش تبي بعد ؟ ودك تسنتر قدام الكتب 24 ساعه ؟
تبي تفلح لا تفكر في نسبه ابد ياكثرهم اللي فوق الثمانين مالقوا شي
وياكثرهم اللي تحت السبعين والحين في احلى الوظايف

صدقني ياخوي يافهد ان اصعب مراحل ثالث ثانوي في الممملكه هي السنه اللي تخرجت منها
اول مره يطبق التراكمي مدري وش
العالم والله ماتدري وش السالفه تدرس وبس
الله لا يوفق هاللي اخترعه
الله يوفقك ويسهل امرك ياخيي وعقبال مانبارك لك بالنسبه 79 % قصدي 97 %
تحيه لك [/align]
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 05:32 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube