الحقوني أنا حامل!!(الجزء الثاني من اضحك مع بيزا بس لاتخافون هالمره قصيره)
السلام عليكم اخواني
هذا الجزء الثاني مع سلسلة اضحك مع بيزا (طبعا معروف بيزا أكيد)
وهذ عنوان الجزء الاول
http://alzaeem.com/vb/showthread.php3?threadid=22204
ويالله الحين مشينا للجزء الثاني( لحد يتأخر هاه)
________________________________
سلااااااام مافية وقت يا شباب على القصة عدل سوووؤ يا سطة
التاريخ 99\24\8
الحزة الساعة 13 الظهر
الحالة النفسية عال العال لانة ويكند
قمت من النوم وانا اضحك ومبسوط ( اول مرة اشوف واحد يقوم من النوم) علشانة ويكند ولا فية محاضرات ( طموح طالب ) ترجلت من سريري وفتحت البلكونة ( البرندة ) والا والله الجو غيم ومطر خفيف ينزل واطلع شتلات الورود اللي في الصالة للبلكونة ( ابوك يا الفرنسي ياراعي الورد )
الله وش هااليوم اللي من اولة شكلة وناسة رحت للمطبخ وفوحت الموية ماهو للشاهي ! لا علشان تساعدني الموية الحارة في قلع وتوخير
الغمص من عيوني ( عادي كل صبح كذا ) ! بعد حمام سريع وتراني كل يوم اسبح مهوب نظافة لا ! لالا علشان لا طلعت من الحمام لبست الروب اللي على شكل فوطة واجلس لابسة الى آخر الليل على بالي متحظر شكلة حركة انصح فية للعزاب !
زبطت الفطور الصباحي وهو عبارة عن ما يلي ( تونة + مربى + قطعة بيزاا بااللحم لقيتها نحن الكنبة وصخنتها + عصير بردقان للحفاظ على حيوية بشرتي ونعومتها وهذا اهم شي عندي) وتوني بسمي الا الباب يطق! ان لله منذا بعد اللي جاي ذا الحزة ؟
فتحت الباب الا هذي تانية بنت جيراني ( اية هذولا الجيران السنعين اللي يخلون عيالهم يسيرون على باقي الجيران )
استغربت ! تانيا جاية لشقتي ؟؟ وانا اللي كنت اترزز عند باب شقتي لاجت حزة رجعتها من الدوام واقول كودها تعبرني وترد التحية وهي والله ذيك الايام تمر من عندي وكنها مارة من عند جدار مدري ليش مع اني والله العظيم اتطيب والبس ازين ماعندي بس ياالله ارزاق
قالت اووة قود مورننق بيزا يو جست وك اب ديدنت يو ؟ ( الترجمة هي قالت تراك ناسي سيارتك شغالة كل امس وشكل البطارية فضت )
قلت قووود مورننق تانيا وانا مبعد عنها ماهو كلة ادب لكن ريحت اثمي دمارعقب التوم
قالت ترانى عازمينك على العشاء الليلة عندنا لا تخلينا عادلازم تجي وترا مافية احد بس انت وانا وابوي وامي
قلت حاضر ( اماة عشاء ببلاش) بس وش المناسبة ؟
انا قلت وش المناسبة وهي اللي وجهها قلب احمر وقامت تعفط يديها وقالت بحيا زايد واللة مدري امي هي اللي طلبت مني اعزمك مع السلامة !
صكيت الباب وانا اضحك واقول الله ياطيب ها الجيران طيباة ويا حلوهم بعد كملت فطوري وطلعت من البيت اتسكع في الشوارع
والاسواق الى الساعة 7 باالليل ( زي العادة )
استعديت للعشاء ولبست لبس عادي غير مكلف لانهم جيراني وعادي شباب يعني كلها شورت ازرق مشجر باحمر و اخظر واخر مرة غسلتة قبل شهرين
وفنيلة فوشية مزلطة من الاطراف والقصد منها استعرض اني محلق أباطي وليس استعراض عضلاتي لان ماعندي عضلات من الاساس
طقيت بابهم وفتحت لي تانيا باالمناسبة تانيا هذي عمرها 25 سنة موظفة في بنك غير متزوجة وبصراحة حلوة ( يارجال انت اي بنت تشوفها تقول عنها
حلوة حتى لو هي عتاب ) المراد رحبت فيني بإسلوبها الخاص ( لاتحرجوني ياشباب انتم عارفين الاسلوب ) وشدتني بلبسها المسكت وكان عبارة عن شورت ازرق ارفع من نص الفخذ بكم صانتي و تي شيرت سودا بدلعة كبيرة حدها السر ( البنت متحشمة باالحيل ) ابتسمت و اثنت على حسن ذوقي في اختيار الخلاقين اللي انا لابسهن ( انصب ) ! دخلت والا هذا ابوها جو ( اسمة جو )
جالس على الكرسي وحالتة حالة شايب فوق الثمانين وماسكن غرشة شيح في يدة يرضع منة ليل نهار قربت من عندة وانا اللي ازعق بذنة مساك اللة باالخير يا عم ! هااااه تسيفك اليوم اشوى شوي؟
تسان الجدار سمعني فهو سمع عطيتة اشكل وانا فاضي لة بعد الواحد مرتاح فيذا من هاالشيبان اللي عندنا عاد شلون اصالي هاالشايب المنتهي !
شوي والا جويسكي دخلت علينا ( ام تانيا ) وترحب فيني وتخم خمني وتهلي ( وعع ياشين ريحتها * من زين ريحتي عاد *) ! وشلونك ووين ايامك ياالقاطع ماتنشاف ؟
رديت عليها وانا ماني مرتاح ! ماش الحمار بدا يلعب في عبي ياربي وش عندهم ووش يبون من واحدشين زيي ؟
نسينا ايام ما كنتي تشتكيني على الشرطة وتقولين بيزاا ازعزنا بصجتة هو و ربيعاتة في الويكند ماغير داخلين طالعين لين الفجر !
والا تانيا يوم توصي ثلاثة زنوج يمردوغني عند باب شقتي على الصبح علشاني قلتلها ورا ما تشربين الشاهي عندي ( ثلاثة عاد واحد والله يكفي)
جلست العجيز على يساري و تانيا راحت تجيب القهوة والتمر ( انا مخربهم ومعطيهم شوية تمرسكري وقهوة ولو جيران )
وشلونك يا بيزاا ؟ هااااه ماتزوجت للحين ؟ وليش ياوليدي ترا الزواج ستر للرجال ( قلت قي نفسي آخر ناس يتكلمون عن الستر انتم أها بس )
قلت والله ياخالة جويسكي انشاالله النية موجودة بس لين اللحين ادور او باالاصح الاهل يدورون لي فيذاك !
شهقت ودخلت ديو ( الرقابة ) وقالت هذا كبرك اللحين واهلك هم اللي يختارون لك حرمتك ؟ وش فايدة الرجولة ياوليدي افااااااا بس افااااا !
بصراحة لعبت براسي ( من زين هاالراس كنها قدر مضغوط من تيفال ) وقلت لها والله انس صادقة اللحين انا اللي بتزوج والا اهلي ؟
ليش انا ما اختار بنفسي شريكة حياتي ( من زين حياتك علشان تدورلك شريك فيها ) و علشان تكون افكارنا متقاربة ( الله من زين الفكر والمبدأ )
ضحكت عجوز بليس وتسني بها تقول ياحليلة ما بغا شي ها الخفيف وطار في العجة ثم اردفت وقالت اية اية هذا بيزاا جارنا اللي يمشي على راية مهوب راي اهلة بعد كلمتها ذي حطيت رجل على ركبة ورسمت ابتسامة انتصار على براطمي الوردية ( عناد لبعض الناس )
بعد العشاء ضفيت الصحون مع تانيا ورحنا نغسلهن ( عادي شباب في امريكا ) انا اشطف المواعين وهي تمسحهن ولا بعد قاعد امزح معها ماني مصدق انها عطتني وجة والله من زين المزح ارش عليها الصابون على بالي انسان مزوح ودمي خفيف ويوم شفتها تضحك وانا اللي اكب طاسة الصابون على راسها ( قصدي امزح ) والا والله يوم بغت تلفعني با الملاس على جبهتي بس استخارت ! وبعد برهة اي لحظة جتنا
عجوز بليس وهي اللي تناظرنا وتبتسم وتقول يا الله لايقين على بعض ما ناقصكم الا قفص وتصيرون عصافير( قصدها قرود) انا فتحت كشرتي وضحكت بقهقة مسموعة ( يا شيني حتى وانا اضحك ) ومع الضحكة طاحت سعبولة مني بس اشوى محد شافها ! ومسحتها بفوطتهم !
تانيا بدورها تدلعت وحمر وجهها وقالت اوو مام يو نو ام اشاي قيرل ( الترجمة والله ابتلشت معكم ياناس تعلمو عنقليزي يعني كل شوي بقعد اترجم المهم هي قالت اوووة يا شينس يا يمة ورا ما تضفين وجهس وتخليني مع بيزاا يقول ان معة ضب يتكلم عنقليزي
شوي الا وتانيا حطت يدها اليسرا على جبهتا ويدها اليمنا على خشتها ووجهها قلب اصفر وقالت آه آه آه ! وفجأة راحت تركض بسرعة للحمام ! جيت ابلحقها اخاف تموت علينا بعد( قصدي كان شريف ) بس مسكتني امها وقالت على وين يا ابو الشباب ؟ قلت لعنبو بليسس ما شفتي وش صار لبنتس ! قالت ايييية ما عليك منها هذي شغلات حريم وانت ما تفهمها !
قلت اييية لالا انا فاهم حتى انتم بعد عندكم اسبوع مرور ( على نياتي ) الله يعينكم على غثا هاالبنات بس ! وقفت جنبي العجوز وقالت الله الله باالجد والجد الله الله علية اسمع يابيزاا وش رايك تتزوج بنتي تانيا ؟
يوم ما قالت ها الكلمة كأن فية احد لفعني بعجرا على هامتي !! تنحت( بضم النون ورفس الواو ) شوي وفكرت شويتين وفي الشوية الثالثة مدري لية فرحت ( يمكن علشان هذي اول مرة ام تخطبني لبنتها او باالاصح اول مرة بنت توافق على اني اكون بعلها في هاالدنيا ) قلت لها انتي جادة يا خالة بها الحتسوة ؟ قالت عما وهو فية مزح بعد بها الحتسي ! بتهوري المعتاد وعجلتي جيت بقول موافق
وخصوصً لما تخيلت شكلي انا وتانيا في الكوشة وبعدها رحنا لبيتنا ودخلنا غرفة النوم وبعد ما سولفنا وكلنا العشاء وقفنا قبال بعض وجت هي بتفك الكرفتة حقتي بيديها الناعمة ومن هول وصرقعة الموقف غمضت عيوني ( لانة اول مرة اكون بموقف زي كذا ) وحطيت يديني على يديها كلقطة رومنسية مني و بعد ثواني حسيت ان الكرفتة انفكت وفتحت عيوني علشان جا دوري اني افك شي بعد بس ما لقيت تانيا ولا لقيت كرفتتي ! لقيت ابوي قدامي ولفن على رقبتي حبل وبيدة الثانية عجرا ( ناوي شر ) وهو يقول والله خوش يا السربوت ياراعي السهر لأنصاف الليول انت رايح لأمريكا تدرس والا تعرس ! شهقت من الخرعة والحمدلله صحيت من ها الحلم الي يخرع ورديت على ام تانيا وقلت
لالالا ما اقدر مابي اتزوج بنتس لالالا مابي هاك العجرا تجي براسي ! ردت العجوز وقالت اي عجرا ياوليدي بس ! اسمع عاد واحكم يا بيزاا
انا بنتي حامل في الشهر الثالث ! حامل ؟؟؟ ما صدقت اللي قالت حااااااااامل ( ماسوينا والله شي غير اننا غسلنا الصحون مع بعض لهدرجة انا فحل ) قالت يا وليدي ماهو ذنبها المسيكينة ولد الحرام لعب عليها وعشمها باالعرس وبعد ما درا انها حامل حط رجلة وانحاش ! قلت عسى مهوب ديفيد اللي جط رجلة وانحاش انا قد شفتهم مع بعض في السيارة موقفين في آخر المواقف بنص الليل وجالسين كلهم على مرتبة وحدة يسون حركات مدري وشي ( الله على البرائة ) ؟ قالت لا بحل ياديفيد آة ياليت كل العيال مثلة رجال سنافي وصريح ( ) قالت هذا جيرند ولد ميشلوة ( ميشيل بس هي حاقدة على امة ) قلت ياخالة وانا وش دخلني في الموضوع ذا كلة انا ماسويت شي لبنتس ومالي علم بها الامور ( كثر منها الله لا يسفهك )
قالت ياوليدي انت عربي وفيك عرق الشهامة ( يالعنبو ذا العرق تسانة بيوديني في الف داهية ) والمرجلة وابيك تستر على بنيتي الله يستر عليك وهي
بتهنيك وتبسطك آخر بسطة خصوصن انها تمووووت فيك وفي ريحتك !! قلي وش ذنب ها الولد اذا جا للدنيا وما لقا ابوة وش ذنبة ما يلقا احد يقولة بابا ؟ وش ذنبة مايعيش زي كل البزارين اللي في الدنيا ؟ بعد كلامها ذا تاثرت مرة وطحت على بلاط المطبخ والدموع خمس خمس ( احب البزارين )
على ها البزر اللي مالة ابو وتخيلت لو اني بزر صغير وماعندي ابو يصفقني ويفشلني عن ربعي ويشيك على المسج حقي من وراي ويجي يترزز في المجلس اذا عزمت ربعي وهو على بالة يبي يعرف من اماشي ويسويلي فيها زكرتي ويلعب معنا بلوت ويقطع في الحكم ويفرش سراة وهذاك قايلن حبة خمسين !
وزودن على محاضرة شاهي العصر وعنوانها الثابت " انت ماتنفع انت نفعك لربعك ولو اقولك في يدي قلت لا "
في المقابل اي في الجهة الغربية بدل ما تشيلني عجوز بليس من الارض قامت تزود من ها الحتسي اللي يخلي قلب الواحد يتقطع مسكين ها الولد ما سوا شي وش ذنبة سو خير وصر ابوة وربة واهو يملا عليك بيتك بدل الوحدة وانت ابو الشهامة يا بيزاا انا خلاص دموعي وخشومي غطت وجهي والشهاق
يسمعة اللي بآخر الشارع ( انسان حساس ) وخلاص جيت بقول انا موافق خلينا نكتب الكتاب وننقذ البزر من الضياع الاسري بس كنت اوخر سعابيلي وخشومي عن براطمي علشان اقول موافق وفجأة سمعت صوت نسائي ناعم مغلف باالحنان وفوقة شوية ملح يقولي لا لا بيزاا لا لا تستعجل
قمت اتلفت يمين يسار ادور من وين جا ذا الصوت ولا لقيت شي شوي ورجع الصوت بس ها المرة تصيح وقالت حرام يا بيزاا عليك حرام لا تسويها !
ها المرة عرفت الصوت من وين جاي جاي من قلبي وانا اللي اغمض عيوني واقفل كل طرق الاتصال باالعالم الخارجي وادخل وسط قلبي كروح
اما جسمي زي ماهو منسدح عند العجوز ( بدت افلام الكرتون انتبهو ) وامشي داخل قلبي وامشي ورا صدى صوت البنت واخيراً حدد من وين يجي الصوت ( من الدور الثاني ) واركض واركض والا الارضية كلها دم ومواصير مدري وش سنعها في قلبي وانا اركظ مريت على قسم الارشيف في قلبي والقاء ملفات قديمة ومغبرة وطافحة دموع واقرا واحد من هاالملفات والفاها ملفات قصص ومغامراتي العاطفية واللي كلها انتهت با الفشل الكلوي ولقيت موظف الارشيف يبتسي ويشاهق قلت وش عندك انت بعد ؟ قال ياخي راعي ذا القلب مسكين قريت كل ملفاتة العاطفية وكلهن نهايتهن دموع ووداع قلت اي نهابات يا بوالشباب هو بدا اصلا قصة حب حقيقة علشان تنتهي ماغير عايش على الاحلام الله يعينة واطلع من الارشيف ودخلت في سيب مظلم طويل واركض بكول ما اوتيت من قوة ورا صدى الصوت واخيراً تسني شفت زول راعية الصوت
بس قهر لقيت شبك بيني وبينها والمشكلة هي راجعة ورا الشبك بحوالي متريت وماني قادر اشوف اشباهها من القهر حطيت يديني
على الشبك وصرخت باعلى صوتي انا مظلووووم يا بية اوو قصدي صرخت من انتي ؟ وليش تقولين لا ؟ ووش تبين جالسة في قلبي ؟
ردت بصوت هو الغنج بعينة وقالت انا زوجتك في المستقبل يا بيزاا انا ام عيالك وقلبك هو بيتك اللي تبي تسكني فية ( اللللللله على الرمنسية )
رديت بدون تفكير من عشم ابليس في الجنة الا انتي ام فيصل اثر صوتس حلو بعد
قالت لالالا انا ماني عشومة انا زوجتك اللي جالسة اللحين انتظرك عند اهلي على احر من الجمر انا اللي بقدر فنك وبصون مشاعرك واغرقك في بحر الحب والحنان بس تكفى لا تستعجل على رزقك يا بعدعمري لا تتزوج تانيا اصبر وانا والله لك وانت لي وش تبي اكثر من كذا؟
قلت طيب عندي سؤال يا زوجة المستقبل ممكن اشوف ركبس ومرافقس هن جايات مع لون البدي والا لا؟
ضحكت وقالت تبي تشوف كل شي بس بعدين مو اللحين وأقفلت مدرعمة من حيث جائت وهي تقول فكر بااللي قلت لك يا بعد عمري !
شفتها رايحة وانا اللي اطلع ولعاتي واسوي تششش اي ولعتها بس بنت الذين عرفت مقصدي و ركظت وما امداني اقز لون مرافقها شوي الا شلة يجيلهم 9واحد
واشكالهم غريبة ومدورة جايين لمي ؟ قال اكبرهم وين وين يا الشيخ ولاعة وانت في القلب جالس عسى ماشر ماتبي تعسل بعد ؟
قلت ومن انتم بعد ؟ قال انا كبير كوريات الدم الحمراء والخظراء وانا رأيسهم المعلم زينهم !
قلت أوووة انتم اللي كنا ندرس عنكم في مادة العلوم هااااه والله يا اشكالكم غلط بعد هااااااه بس قامو يطالعون فيني بحقد !
قلت لهم طيب مشكورين يا شباب على شغلكم ادري والله انكم تتعبون بس ارخصولي تراني تارك جسمي برا لحالة واخاف يجي احد يسرقة
مادريت الا بذاك الكف اللي عفط وجهي جايني منة ويمسكني مع رقبتي وهو يقول انت تنكت والا تستخف دمك معي ؟
قلت ياابن الحلال والله ثم والله انا راعي ذا القلب والجسم انا بيزاا وانا حر اولع في قلبي زي مابي وانت وش دخلك اهلك في الموضوع ؟
ما صدقني وقال طيب وشو الباس ورد حقك اللي تشغل فية جسمك لا قمت من النوم ؟ ( احفظو الباس ورد حقكم يا شباب يمكن يصير لكم ما صار لي وتقدرون تلقونة تراة مكتوب في آخر فتحت الخشم اليسرا بس انت اوقف قدام المراية وارفع خشمك وحاول تقز الرقم ولا تنسون تنضفون مناخيركم من البلاوي اللي فيها قبل علشان تشوفون زين
قلت ابوك للجنة هذا هو 97321( لحد يعلم رجائن )
قام يعتذر ويتاسف وان اللي سواه مجرد احتيطات امنية للجسم من اي هاكرز اي جرثومة !
تركتهم ورجعت مع طريقي وطلعت من القلب ولبست ثوبي قصدي جسمي وافتح عيوني والقاء خشتي في خشت تانيا وهي تنفخ وتنفخ !
دحجتها وقلت خير عسى ماشر وانا ماودي انها توخر بس وش اسوي الحياء مقطعني اربع اربع ضحكت وبكت في نفس الوقت من الفرحة وقالت انت حي ما مت الللللللله !! وجت عجوز بليس وقالت وجع يوجعك وش جاك ؟ طحت علينا وبس قلنا الولد جاة صرع الله يستر !
مارديت عليها قمت وانا ماني مصدق اللي صار واطلع من المطبخ وكني طالعن من قبر والعجوز تصارخ تعال تعال مارديت علي بتعرس على
بنتي وتصير شهم والا لا ؟
وتانيا ناشبة فيني وما سكة يدي لين وصلت باب شقتهم !
وخرت يديها بكول رقة وهدؤ مع رسم لمحة حزن في عيني معلنن لها وبكل اسف رفضي للزواج منها ( والله انها ما تفوت يا اللوح )
بدورها احنت رأسها اي دنقت محاولتن حفظ كبريائها وما استطاعت من دموع جرت على خديها ( سوري كتبت با الفصحى لان الموقف مؤثر وبعدين
المخرق عاوز كدة ) هارت قواي حزتها واحسست بشعور ما لأمة من داعي هل هو جوع ام خرمت شاهي مع زيقارة ام وشو لا اعلم ها هي تانيا ذوالخمسة وعشرين ربيعن صاحبة الشعر الغجري تلك التي تمتلك الجسم المسكت والركب والمرافق المتطابق لونهن مع لون الجسم تبكي قدامي بدموعن من دم ألمن وحسرة على رفضي للزواج منها وانا الذي كنت انطل وجهي على بنات ديرتي ذوات الشعر الاسود والجسم اللي ماتدري ان كانت مقبلتن ام مدبرة وفوق كول ذلك لون الركب والمرافق غير مطابق للون الجسم لكي يرضون يتزوجوني وما نلت منهن من شيئن الا ضيعة الوجة بعدالرفض وكأن لا يوجد غيرهن بذا الدنيا
في ظل هذة الاحداث خيم الحزن علينا وما كان ناقصنا الا اغنية طاهر الاحسائي " الله على الجمس " اوةة اقصد اغنية راغب علامة " آسف حببتي "
تكلمت عجوز بليس وقطعت علينا لحظات التوديع وهي تقول ما رديت علي بتعرس والا لا ؟
عطيتها اشكل وقضبت الباب مودعن من ارادتني بعلن لها و مروحن لشقتي حاملن في رأسي افكارن وتساؤلات كثيرة اهمها هو
يا ترا زوجة المستقبل اللي قابلتها في الدور الثاني من قلبي ( ركبها ومرافقها جايات مع لون البدي والا فية فرق في البوية )
تحياتي وعذراً للإطالة تراني انسجمت مع القصة وانا اكتب
يقول سيلا بن صعفق الشاعر السيلاني المعروف
خذ وخل مما تقرأ لبيزاا
الوضع العادي
