مرحبا بالشباب والصبايا ،،،


كيفكم ؟؟


عساكم بخير وبصحه وعافيه ...


بالفعل يا شباب انها افضل روحه للرياض في حياتي كلها (وش عنده ابن بطوطه على الرحلات )


طبعا يا شباب الموضوع صغير بس ابتفلسف عليكم شوي واخليه طويل ;)


طبعاً معروفه المنطقه الشرقيه وجوها الرطب والحار في نفس الوقت ،،،

وبما ان سفرتنا انا وعاشق النمر الى سويسرا باقي عليها اكثر من شهر فحبيت اني اغير جو فكان عندي ثلاث اماكن محتار وش ااخذ منهم يالرياض يا لبنان ;) يالبحرين فسويت قرعه وطحت على الرياض والحمدالله انها جات على الرياض (مطفر لبنان يبيلها فلوس) ،،،


والله واروح محطه القطار واقص التذكره ليوم الاربعاء الماضي وبعد ما خذت التذكره جلست على النت وشفت حبيب قلبي عاشق النمر وحبيبي الثاني شكسبير (الكاسر) واعلمهم اني جاي للرياض وليه ما نتقابل قالوا اوكيه هذي الساعه المباركه اللي نشوفك فيها (عاد انا صار وجهي احمر اول مره واحد يمدحني )

والحمدالله وصلت الرياض بسلامه (اللي يشوفني رايح مشي )

يوم الاربعاء كان الوقت متاخر فصعب اني اشوف الكاسر او عاشق فاتصلت على عاشق فكان الغالي ينتظرني وكان جالس بالبيت بنتظر اني اوصل للرياض بس للاسف القطار تاخر ساعه ونص وما وصلنا الا حول الساعه 12 الليل بعطيته خبر اني صعب اشوفه اليوم وبعد هم الكاسر عطيته خبر فتواعدنا ان نتقابل اليوم اللي بعده اللي هو الخميس ،،،


وفي تمام الساعه الخامسه والنصف يوم الخميس عصراً جاني اتصال من عضو في المنتدى هذا العضو عنده ضروف ابعدته عن المنتدى يعني من زمان ما شفته وهذا العضو هو اكثر عضو له مشاركات في وجوده وهو الغالي (الاســـطــــوره) المهم في الاتتصال عرف اني موجود في الرياض (انا الى الحين مستغرب وش خلى الاسطوره يتصل بهالوقت ولكن صدق المثل القلوووووب دائما عند بعضها ) وتواعدنا في الليل ،،،


جات الساعه 9 الليل واتصل على شكسبير واكدنا الوعد اللي بينا واتصل على عاشق وكان جواله مغلق على ما اظن انه ما نام الا متاخر يفكر في شوفتي ،،،



اتصل علي الغالي الاسطوره وقال وصفلي البيت والحمدالله وصفت له البيت مع اني غشيم بالرياض على كثر جياتي لها بس ما ادل ما ادل الا بيتنا بس



ودي الواحد منكم يتخيل كيف يشوف واحد اول مره يشوفه مع ان اتصالتنا مع بعض متواصله بس بجد صعبه يعني ما تدري اللي بتشوفه صغير ، كبير ، متين ، ضعيف ، اسئله كثيره في بالي ،،،

والحمدالله تشجعت وشلت السيف ورحت ودخلت في وسط المعركه


اتصال من الاسطوره يقول يالله هاجس اطلع انا الحين عند الباب ،،،


بكل صراحه وصدق يا شباب اني انا توقعت ان الاسطوره شاب اخلاق بس يوم شفته وجلست معه يمكن حسبتها بالظبط ساعه و12 دقيقه لقيت فيها الاخلاق كلها وطيبه لو اجلس سنوات ادورها ما لقيتها قمه في الاخلاق والطيبه ،،،

كل اللي تمنيته ان عندي كميرا فديوا واسجل الوقت اللي جلسته مع الاسطوره بالفعل من اروع وافضل الاوقات ،،،


وانا جالس مع الاسطوره جا اتصال من الكاسر وقال انا عند البيت يالله اطلع ،،


تخيلوا شباب اثنين من اهل الرياض يجمع فيهم واحد من الشرقيه

ونفس الشيء الكاسر والاسطوره كانت بينهم اتصالات وتعارف بس ما قد تقابلوا حتى انا والكاسر ماتقابلنا يعني انا والاسطوره شوي عندنا شجاعه اننا نسلم عليه بس هو مسكين بيسلم على ثنين اول مره يشوفهم ،،،،


طبعا الى الحين الكاسر ما يدري من معي قلت له واحد من المنتدى معي قال اوكيه



ونشوف الكاسر ينتظرنا وننزل نسلم عليه ياحلوك يالكاسر وش ذا الاحراج اللي كان عليك يوم نسلم عليك (شفت ناس ينحرجون بس كذا ما شفت )

قلت للكاسر الحين عرفته والا لا (طبعا اقصد الاسطوره) والله الكاسر يوم شاف الطيبه والاخلاق اللي على الاسطوره قال اكيد الاسطوره (والله احسدك يالاسطوره على هالخلاق اللي عليك)
وكانت هناك امور تم النقاش فيها بيني وبين الاسطوره والكاسر فاحب ابشركم بقرب رجعة الاسطوره لنا ورجعة مواضيعه الرهيبه ويا ويلك يا سفر جا اللي يعرف لك

وتمينا مع الكاسر يمكن 20 دقيقه تخللتهاامور كثيره وحلوه ،،،



وكذا انتهت اجمل اللحظات اللي عشتها في الرياض،،،




قــريـبــاااااً جدا افضل اللحظات اللي عشتها في الخبر مع المهندس علي السمراني والفكر والاسطوره،،،


قـــريــبــاااا افضل اللحظات اللي عشتها في مكه وجده مع الغالي ابراهيم النجيدي والغالي حبيب الجميع طلال (الله يرده سالم)



في الختام احب اتأسف للكاسر والاسطوره للكلام اللي قلته عن طبائعهم اللي يتمناها اي شخص في المنتدى ،،،






وسلامتكم ،،،

ياسلام والله ليتني معكم

وهذا من بركة موقع الزعيم اللي خلى الكل اخوان

اخوي الغالي هاجس:

تحياتي لك ...ونقلك لما حدث معك في الرياض..<هذي دلاله ان لديك حس صحفي >
مشالله عليك ..ما خليت شي..
واهنيك على طريقتك الجميله والاجتما عيه...
كما اهني فيك روحك الثريه..ووصف من قا بلتهم....
هنيئا لنا باعضاء الزعيم...وبهذه الاخلاق..وبهذا الحب..وبهذا التواصل..

تحيا تي لك...وانشالله نشوفك في الرياض مرة ثا نيه..
يقولون من شرب من موية الرياض..رجع لها..;) ;) ;) ;) ;)

كيف تجي للرياض ولا تعطينا خبر ...

المفروض انك تتعشى عندي .....

او على الاقل انك تتقهوى

الله يحييك دايم .....

بس هاجس فيه واحد وعدني انه يتصل علي يوم الخميس العصر ولااتصل .......

حاولت اعزمه على البيت قام يتعذر مايدل .......... يالله بسيطه ....... تراي ماادل في الشرقيه بعد الى قصرنا ( ماعدندهم بيت هناك عشان يصير عندهم قصر )......

حبيب القلب مازولا قصدي هاجس اقدم اسفي لك وللشباب اللي ذكرتهم على اني ما تمكنت من مقابلتكم

وابشر بالحق يخوي والشباب اللي معك ايضاً يبشرون بالحق ووالله اني متأثر كثيراً بعدم شوفت وجيهكم الطيبه


هذا السهر وما يسوي سهران الين العصر قلت يولد مادامنا الحين العصر اصبر الين تقابل الشباب ثم نم يولد ويأذن المغرب والى يوم صرت تقول مصفقني ولد النجيدي دايخ و عيوني حمر يولد اصبر الين تقابل الشباب وجاً بعد العشاء يولد تو الموعد باقي عليه ساعتين خذلك غطه الين يتصل هاجس ولا حسيت بالوقت الا والشغالة تقول قم الساعة ثلاث الفجر قم جيب لبتن اخو كبير يبغى شاهي يولد شاهي الفجر واروح اجيب وارجع والقى اخوي نايم ....... والله شكلها كانت تصرفني



المهم تقبلوا اسفي شباب واخوي هاجس صدقني اني في اشد الاسف لاني ماشفتك

سبحان الله كلام غريب !! ,,,

كلامك ياهاجس عكس الكلام اللي سمعته من الاسطوره !! أنت تقول إن الأوقات اللي قضيتها مع الأسطوره والكاسر كانت ممتعه ,,,

لكن الأسطوره يقول ... ماقد مر علي أوقات ممله مثل الساعه اللي قضيتها مع هاجس واللي كانت كنها سنه ,,,

يالله معليش يمكن انك ماكنت عارف قد ايش تأثير الجلسه معك على الشباب اللي حولك ,,,

لكن مصيرك تجي عندنا إن قاله الله وتبي تكره شيء اسمه مقابلة الأعضاء وبالتحديد رامبو الأطخم ويمكن بعد من تبعات هذي المقابله تبي تكره النت كله ... انا ترى ماعندي " يمه أرحميني " مالك عندي إلا " القاز " ,,,

وأنت ياداااج ياعاشق النمر .... شكلك متعود على تكفيخ رامبو لك الليل وتالي النهار ... حتى إنك صرت تتذكره في خارج أوقات الدوام ,,,

أقول ... أشوى اللي ماقابلت الشباب مع رفيقك الداج الثاني .... ولا كان وش يفكهم من هالغثا المزدوج ... هاجس ويالله يالله عدت أموره وجلس الغلبان الأسطوره دايخ يومين من بعدها كيف لو جيت أنت معه يالداااج ... كان جته عقده نفسيه وحالة إكتئاب ميؤس منها ,,,

ثنينكم ماينفعلكم إلا رامبو .... اللي مايعرف يجامل ويضغط على نفسه مثل غيره .... تكثر ولا تقلل أنت وياه ماتشوفون إلا العقال ,,,

قال إيش قال قريبا أفضل اللحظات اللي عشتها مع ابراهيم النجيدي !! ..... إلا والله كوابيس ماراح تنساها طول عمرك ,,,

يالله صلاح العطا ,,,


تحياتي للجميع ,,,

وصلنا هذا الخبر :




تقديم سفره هاجس الى مكه لكي يصفي حسابه مع اللي اسمه ابراهيم النجيدي ومصدرنا تؤكد ان عاشق النمر حاملا شيء يسمى (عجرى)



وسنوافيكم بالاخبار اول باول فور وصولهم ،،،

ياوين هالأيااااام يووم نطلع و..... ويوم أقولك شفت صدقتني ان الأسطوره أخلاق <=== واحـــد بيحتك....

موضوع رائع وجميل والله واكيد بتكوون احلى الأيام اذا كنت مع أعضاء الزعيـــم

أخوي الغالي (هاجس) ,,,

الحقيقه انا اللي كنت اسعد وزدت شرف بشوفتك وشوفه اخوي الغالي (الكاسر) واتمنى اشوف كل اعضاء المنتدى من دون استثناء لما تملكون بداخلي كل الحب والغلا , فموق الزعيم لاتجمعنا فيه تبادل الاراء والافكار فقط , بقدر ماتجمعنا الاخوه والمحبه ,,,

واللحظات اللي قضيتها بصبحتك وصبحه كل اخواني هي بالفعل من احلى اللحظات , واعتز بمعرفتي بعدد من الاعضاء واعتبر نفسي اخ اصغر لكم جميعا وانا الوحيد الكاسب من معرفتكم الغاليه ,,,

وكلماتك في حقي ياغالي هي كالوسام , وهي لاتمثل قمه اخلاقك وتعاملك الراقي, والحقيقه ان مقابلتك جعلتني اتندم كثيرا على عدم مقابلتك في اوقات سابقه , فمن يعرفك ويتلقى بك يشعر انه يعرفك منذ سنوات وليس من ساعات !!!!

وليتك ياغالي سمح لنا وقتك بالجلوس معك اكثر , فالجلسه معك لاتمل ابدا , وهذا سيلاحظه اى عضو يقابلك (ماشاءالله عليك ) ,,

وبما انك كتبت هذا الموضوع فانا لي عتب اذكره من خلال ردي , وهو قصر الزياره التي قمت بها والتي لم تسمح لنا بالقيام بواجبك , او على الاقل محاولتنا بان (نشبع) منك ومن شوفتك ومن احاديثك وروحك المرحه , والتي على ارض الواقع هي اروع بكثير , حتى اخونا (عاشق النمر) لم تعطه الفرصه ليعوضك ويقابلك (وش هالنومه ياعاشق ) ;) ,,

أعيد واقول ياغالي اني مهما كتبت وعبرت ستخونني الحروف وتتخلى عن سطوري في وصف مدى سعادتي بمقابلتك والتعرف عليك بشكل اكبر ,فقد مضى علي الوقت وكانه دقائق , واتمنى المره القادمه التي تزور في الرياض ان تضع في حسبانك مده اطول وتتجاوز الساعات الى الاشهر ,,

عاد ياشباب اللي فيكم خارج الرياض ويحب يزورها , لازم يخلي في باله يجلس على الاقل حوالي الشهر نبي نجلس مع كل الاعضاء اكبر وقت ممكن , ولا يسوى مثل هاجس (يوم واحد ويروح) ;) خاصه (رامبو الاطخم) نبي نستقبله وحنا معنا عصابات (حواري) يمكن يترك (البلطجيه) اللي متعود عليها في مكه لاني ملاحظ زايده عنده (الفتوه ) في الفتره الاخيره ;),,,,

وش القصه يا(رامبو ) ؟

الغالي (زعيم اسيا) ,,

والله الاخلاق هو انت ياغالي , ومعرفتكم ماتباع بكنوز الدنيا , عسى الله يخليك ويخلي كل اعضاء المنتدى ,,,

نصيحه ,,

هاجس وعاشق , نصيحه لاتروحون لمكه , لاتستبعدون يفجر لكم المطار علشان يثبت لكم انه (رامبو) صدق ,,,


وتقبلوا خالص تحياتي لكم ياغالين ,,

من شاف وجهك ما رجى فيه ترحيب.........وجه الفقر والقرداة تناحي

هلا هجوسي تسيف حالك...شنو اخبارك...عساك طويب..

ياخي وراء ما عطيتنا خبر ياخي نعزمك ترانا راعين عزايم وبيتنا في العلياء<==مسوي

وليتك بعد خليتني اشوف الكاسر (الرايق) .. والاسطورة ..

اما بس لوه جاي عاشق النمر كان .........

المهم .. انتبه ترى رامبو ماهو سهل واحذرك حذاري..لأني دق صار لي موقف منه

وحطمني وحطم مشاعري ...تهي تهي تهي تهي

وياليت تخليني المساعد الخاص لك ...;) علشان اشوف الاعضاء واتشرف..

مهووووووب بالمنتدى وكلام بس


وتحياتي،،،،

ابشركم شباب توني راجع انا وهاجس من مكه بالهلوكبتر حقي اللي تخبرونه ايه الهلوكبتر هذا


ابد وصلنا الساعة 2 بالليل لبيت النجيدي دق هاجس الباب وانحشنا ؟؟؟؟؟ خفنا يطلع علينا رامبوا اللي صاجنا بالمنتدى المهم ويطلع علينا ذاك الوليد المعـصــقــل لابس بنطلون اخضر ابو خطين اللي يوزع في المدارس وفنيله تقول فاضيه قلنا له ناد ابراهيم وحنا معصبين قال انا ابراهيم ؟؟؟؟ هو قال انا ابراهيم وانا اللي ارسل له مخمس مزدوج الين تمدد على الارض قال هاجس اصبر يعاشق خلنا نتسلى عليه قلت فكني عليه بس !! قام مسكين مايدري وينه فيه قال من انتم قام هاجس بلمح البصر برفسه رفسة على شاتسلته ( خصره ) المهم ورفسه من هاجس وبقس مني وهو مسكي ما يدري وش الطبخه واسدحه على الارض ويطب عليه هاجس مثل ( سنوكا ) والا يوم بدء يصيح قال من انتم ووش سويت قلت انا عاشق النمر وهذا هاجس !!! هو سمع الكلام والا يوم صار وجهه اخضر احمر اصفر صار تقول فليشر ؟؟؟؟ المهم ونحن جالسين نصفق في ولد النجيدي طلعوا علينا عيال حارتم كـثار ايش الهرجه اشبك انت وهو وانا اللي اناضر في هاجس ويقمز هاجس للهلوكبتر وينزل العجرا ؟؟؟؟؟

عاد اعرفه ابو هاجوس لعبة المفضله العجرا


المهم وهو اللي يجي ويقول نعم وش تبون وابد وعينك ماتشوف الا النور انا اصفق فيهم من هنا وهاجس مخلي العجرا تغرد على ضهورهم ونصفق ونصفق ونصفق ونشوت فيهم يروحي ابو هاجوس عليه حركات بهلوانية بالعجرا جلدهم جلد صحيح انه اخطى وحده من الضربات وجت فيني الين صرت اطرش من قوها المهم ونجلد فيهم الين انحاشو لبيوتهم بقى ولد النجيدي بس ونرفس فيه الين مابقى فيه حيل مسكين المهم مسكناه قلناله وين اللي صاجنا بالمنتدى رامبو ورامبو اثرك ماعندك سالفة قال لا منول احسبكم ماتعرفون مكان بيتنا المهم يوم خلصنا جالدينه تأسف منا ولزم علينا على العشى من حر مايوجس !! رفضنا وجاب عصير شربناه على عجل ورجعنا بحفض الله ورعايته



المهم تعرفوني انا ما امشي الا والكمره معي فصرت انا اصفق شوي وهاجس يصور وهاجس يصفق شوي وانا اصور عشان تصيرون كانكم معنا وتشوفون كل شي الخلاصة هذي الصور بتسلسل الاحداث :

هذي صورتي انا وهاجس نلعب بلوت ونخطط للعمليه




وهذي صورت ابراهيم عقب الجلد المبرح مسكين ماقدر يقوم




هذي صورة عيال حارتهم جاين يفزعون له





وهذي صورة النجيدي بعد ما جلدناه وطلعوا عيال الحارة يفزعون له





وهذي صوره التقطها هاجس لي وانا شاقل ابراهيم برفسه يحبها قلبكم






ومن باب العلم بالشيئ بس اللي صاجنا بالسيارات الامريكيه والموبايل هذي السيارة اللي لقيناها عند باب بـيـتـه :



ولذلك خلاص من اليوم سحبنا منه شارة الكبتنيه وصار هاجس هو رامبو .... مبرووووك


خمسه وعشرين ثانية الــــــــــــــــــــــــك ،،،،،،،

اهلين اخوي هاجس

صدقني لااستطيع وصف مشاعري بعد
ماتشرفت وقابلتك انت واخوي الاسطورة

كانت لحظة واي لحظة

ياخي وجهك وجه خير
بس لي عتب كبير انك ماجلست وطولت في الرياض
ومن يشوفك صدقني يرتاح لك ويحس انه يعرفك منذومبطي

انت واخوي الاسطورة والي كان فعلا حبوب وخلوق مثل
ماتوقعته وعرفته
ونبي تكرر هالجيات اكثر
وشكرا لك حبيبي

هلا والله بهاجس :

اخوي معليش الرد جاي متاخر شوي بس وش اقولك مشاغل يا اخوي الى ان نبهني واحد من الشباب على الموضوع وقال لي شفه .

اخوي والله انا عتبان عليك ليه ما قلت لنا علشان نقوم بواجب الضيافة لك يا اخوي واذا جيت مرة ثانية للرياض علمنا علشان نستقبلك صح ...

والله انا ودي انا اعضاء المنتدى في اي مدينة يجتمعون ولو ساعة في اي مكان .

وبالاخص الاخوان عاشق النمر - الاسطورة - سفر .......... يوووووووووه واجد بس هذولا الي اذكرهم الحين .