بسم الله الرحمن الرحيم

|
|
|
|

كيف الحال يا شباب ..عساكم بخير؟!..
تحية معطره لكم من كل هلاليين جيفونتسيين
ونبارك لكم مستوى الزعيم هالموسم والنتايج اللي توسع الصدر





-الموضوع-


تأسس هلالنا عام 1378هـ وتحديدا في 21\5 من ذاك العام..
يعني بنهاية الموسم ما بعد القادم يحتفل النادي بمرور 50 سنة على تأسيسه

نجي لصلب الموضوع..الهلال الان عنده 41 بطولة
وان شاء الله بعد نهاية هذا الموسم يرتفع العدد ل44 بطولة
والموسم القادم باذن الله حنا اول فريق سعودي يشارك في بطولة آسيا
وبما اننا ابطال كأس فيصل بن فهد -رحمه الله-
فهذا يعني اننا مشاركين في بطولة الاندية الخليجية
هذا غير البطولات المحلية..يعني من وقتنا الحاضر لنهاية الموسم القادم
الهلال بيكون عنده ما يقارب 6 بطولات يشارك فيها..وهي



بطولة الدوري
كاس ولي العهد
كاس فيصل بن فهد
كاس الخليج للاندية
كاس العرب
بطولة آسيا



يعني باذن الله الهلال بتكون عنده الفرصة انه يحقق 50 بطولة بنهاية الموسم القادم
وان صار شي لا قدر الله..بتكون فيه فرصة لزيادة الغلة في الموسم ما بعد القادم
-اللي فيه بيتم الزعيم 50 عام-

فبإذن الله..سيحقق الهلال ما لم يحققه (ولن يحققه)..اي نادي سعودي من قبل وهو



خمسين بطولة في خمسين عام


يعني بمعدل بطولة كل سنة ..
في حين ان بعض (اندية الوطن)..
احتفلوا ب75 عام وهم ما وصلوا نص بطولات زعيمهم





-هلاليات-


# اكبر مكسب لنا هالسنة هو -ابو سلطان- رجل من ذهب كسب محبة واحترام الجميع
الهلاليين وغير الهلاليين حتى في منتدياتهم ما يجي طاريه الا بمدح..
والله هالرجال قول وفعل..وعد ببناء فريق واوفى -فريق يشارك بمباراة ديربي 5 من لاعبينه اولمبي و4 منهم ما تجاوزوا ال19 عام..ويحجرون للفريق المنافس حتى آخر لحظة- <-- بالله هذا مو بناء
ومع انه ما وعد بالبطولات..شوفوا الفريق الان..فاز ببطولتين وباقي له 8 مباريات لو فاز فيها خذنا ال3 بطولات الباقية ..


# لو تطلع انباء التجديد لباكيتا وتفاريس صحيحة..فهذا اجمل خبر سمعته هالموسم..مع اني اتمنى يكمل الحلو ويتم التجديد للبروفيسور مادينا اللي بوجوده صارت لياقة الفريق رائعة..
على فكرة..لاحظت ومن خلال الاخبار ان باكيتا حاط عينه على كم من لاعب من شباب وناشئين الزعيم..الظاهر انه ناوي يصعدهم الموسم الجاي
اما كماتشو..ومع انه مقدم مستويات رائعه لكن ما نقول له الا مشكور وما قصرت...ابو بندر رجع



# من زماااااااااان ما شفنا الهلال بلاعبين اجانب عليهم القيمة -بانسى وجود النكبة ديسيلفا لأنه مثل الصفر على الشمال-
اولهم كماتشو..لاعب برازيلي بكل ما تعنيه الكلمة..مهارة..تمريرات قاتلة..واهم ما يميز لاعبين البرازيل..الكور الثابته..وبسببه هالموسم نلاحظ ان اغلب اهداف الفريق من كور ثابته..الثاني وهو الاهم تفاريس..اللي يشوف حماسه في الملعب يقول ما بقى الا ينطق عربي..عيني عليه بارده..في الدفاع صخره..في الكور الثابته خطير سواء سددها او كملها ويكفي انه ثاني هدافي الفريق بعد بو عبدالله



# نجي لمايسترو السيمفونيات الجميلة اللي قاعد يعزفها الحوت الازرق هالموسم
المدرب باكيتا..الرجل المناسب في الوقت و المكان المناسبين..من اول الموسم وسمو الامير محمد بن فيصل مصرح ان الهلال في مرحلة بناء ودعم كلامه بتعاقده مع الداهية باكيتا اللي كان توه مخلص من منتخب البرازيل بدرجتيه السنية -ناشئين وشباب- وحقق معهم بطولات
اول ما جا عرف ان علة الهلال في الوسط والدفاع وجاب كماتشو وتفاريس..وعلى الرغم من النقد الشديد اللي واجهوه اللاعبين واتهام باكيتا بالسمسرة الا انهم نجحوا واصبحوا من اعمدة الفريق الرئيسية..
الموسم لم ينتهي ومع ذلك حقق انجازات مع الهلال

لم يخسر الفريق الا 4 مباريات من اول الموسم الى يومك هذا واثنتين من الاربع كانت في اول الدوري
اما الباقي فكانت تحصيل حاصل في بطولة العرب

فاز ببطولتين ومنافس شديد على بقية بطولات الموسم

حقق رقم قياسي جديد من حيث عدد مرات الفوز المتتالي في الدوري بفوزه في 11

ويكفي انه حقق كل هذا من فريق كان قبل مجيئه شبه منهار وقد مر باسوأ موسم له


# احب ومن خلال هالموضوع ان اقدم شكري لامير بندر بن محمد لما قدمه للمدرسة الهلالية وبعودته عادت القاعدة الهلالية وعادت الاسماء..
ما شاء الله..عدوا معي (الصويلح - الموري - العنبر - الجمعان الصغير - الجري - المعيوف) هالاسماء هي طليعة الدفعه الاولى من المدرسة بعد عودة بندر بن محمد وفي الطريق عندكم (الكلثم - الحجيل - الفريدي - نواف العابد - النعيمه الصغير - الدوسري - الدعيع الصغير - العبدالسلام - البريهي) هؤلاء بعض من اللاعبين -ناشئين وشباب- القادمون بقوة الموسم القادم واللي بعده..وباستمرار وجود الرئيس الذهبي بندر بن محمد..ما فيه خوف على مستقبل الهلال


# جمهورنا..والله رفعتوا راسنا .. اشوفكم في الملعب واغمض عيوني اتخيل اني هناك ..ان شا الله من مباراة الشباب وطالع انا اول واحد في الملعب..وصدق من قال من بين كل 5 سعوديين 3 هلاليين
من اول كان خويي النصراوي مزعجني يقول النصر اكثر شعبية..وكل ما رديت عليه قال شف الحضور في الملعب ..والاستفتائات ما فيها مصداقية..وبعد مباراة الديربي ..قلت له وش رايك الحين.. من اكثر شعبية ..قام يتحجج ويقول اصلا آخر استفتاء وضح شعبية النصر..قلت وين راحت المصداقية..صدق انكم يا النصراوية من طينة وحدة
مرة ثانية اقول..ما قصرتوا..بيضتوا وجيهنا وعقبال ما نملأ ستاد الملك فهد كله مرة ثانية


# مرة ثانية ارجع لأبو سلطان..ترأست الفريق وهو مريض وقد اعلن وفاته الحاقدين
نقلته من سقطته الى القمة مباشرة
رجعت هيبة الزعيم اللي تخلي الفريق المنافس يسجل الهدف في نفسه ..
امنيتي انك تستمر رئيسا للهلال..مو بس الموسم المقبل..بل اللي بعده واللي بعده واللي بعده..الخ



# في الفترة الماضية كثرت العيارات اللي نطلقها على الاندية المنافسه..من الاتهاد الى النثر مرورا بالفقر والاتشاد..هذا غير تحريف الاسماء مثل محمد وحسين الى مهمد وهسين..
اتمنى من اعضاء منتدانا اللي انا واثق من اخلاقهم انهم يمتنعون عن مثل هالكلمات..ترى والله ما فيه اسهل من اختراع العيارات..لكن هذي مو من اخلاقنا..ممكن يرد البعض ويقول انهم يعايرونا في منتدياتهم..لكن هذا مو عذر..انا اعذرهم لأنه عندهم فقر بطولات..ويشوفون زعيمهم مكوش على كل شي..اكيد بيولعون..وما في يدهم الا الكلام..





-متفرقات-
@ ياسر القحطاني..ان شاء الله الموسم القادم هلالي..وابو سلطان ان وعد اوفى..

@ احمد الصويلح..نجم الهلال القادم..مر بمرحلة يمر فيها اي موهبة صاعده وهي اللي تحدد من يسقط في فخ الغرور ومن يكمل الطريق للنجومية..والحمدلله بمساعدة الادارة الهلاليه عاد احمد اللي نعرفه

@ خالد عزيز..اعتذر من اعماق قلبي على كل انتقاد او كلمة سيئة قلتها عنك..فعلا اثبت ان الكثير من الجمهور مخطئين وان نظرة المدربين كانت صحيحة

@ كلها اسبوع ويعود افضل لاعبين وسط في المملكة -التمياط و الغنام-...ان كان الهلال بدونهم مخوف الاندية..اجل بوجودهم وش بيصير؟!..بصراحة اشفق على من يقابل الهلال وهو مكتمل..الله يحفظكم من شر الاصابات

@ اتمنى من ابو سلطان التجديد للدوخي قبل لا يروح علينا..ترى ابو فهد صعب تعويضه

@ تخيلوا معي هالتشكيلة:

العتيبي <-- حارس
الشريدة - الهليل <-- قلوب دفاع
مضواح - الياس <-- اظهرة
عزيز - البرقان <-- محاور
كماتشو - الموري <-- وسط يمين ويسار
العنبر - ديسلفا <-- هجوم

فريق قوي..اتحدى فريق سعودي يهزمه..
طيب ليه ما نتخيل هالتشكيلة:

الدعيع <-- حارس
المفرج - تفاريس <-- قلوب دفاع
الخثران - الدوخي <-- اظهرة
الغنام - الغامدي <-- محاور
الشلهوب - التمياط <-- وسط يمين ويسار
الصويلح - الجابر <-- هجوم

فريقين متكاملين كل واحد منهم يجيب بطولات..هذا هو الهلال..
مو مثل اللي مطبقين سياسة التجميع..مو عارفين يركبون تشكيلة على بعضها

@ بعيدا عن الهلال..في توقعي الخاص المربع الذهبي بعد فوز الاهلي على القادسية
راح يكون بهالشكل:

الهلال
الشباب
الاتحاد
النصر
ومع السلامـــه

مشكووووووووور اخوي االسطورة 2005
مواضيعك حلوة وهادفه

يعطيك العافيه اخوي وان شاء الله نحتفل بالبطوله الخمسين مع الزعيم والله يخلى لنا ابو سلطان

ألف شكر يالحبيب على طرح هالموضوع وعقبال المئة عام ومئة بطولة